O le Alofa ua Uunaʻia ai i Tatou e Talaʻi
1 I le avea o ni Molimau a Ieova, ua sili atu ai ona lauiloa i tatou o ni tagata talaʻi maelega o le feʻau o le Malo. (Mata. 24:14) E sili atu i le ono miliona o loo maelega i le lalolagi aoao; ua faaopoopo mai foʻi ni tagata fou pe a latou aufaatasi ma i tatou i le talaʻiga. Ua faia ai se faamaumauga o le aofaʻiga tele o tagata talaʻi ina ua latou faia se sao i lenei galuega.
2 O le ā ua uunaʻia ai i tatou e tauofo mo lenei tofiga ua fai ma luʻitau? E lē o faamalosia i tatou, pe faatosina i ni mea faitino e maua, pe fai mai foʻi ni faaaloaloga faapitoa. I le taimi muamua, o le toʻatele o i tatou sa fefefe ona sa tatou lagona le lē agavaa ma sa masani ona lē fiafia mai tagata ia i tatou. (Mata. 24:9) O le toʻatele o tagata ia e vaavaai mai, e latou te lē o malamalama i le mea lea e uunaʻia ai i tatou. Atonu e iai se māfuaaga malosi ua tatou finafinau ai.
3 Le Malosi o le Alofa: Na faailoa mai e Iesu le poloaʻiga aupito sili o poloaʻiga uma i lona faapea mai e tatau ‘ona tatou alolofa atu ia Ieova ma o tatou loto atoa, agaga atoa, manatu atoa, ma le malosi atoa.’ (Mare. 12:30) O lo tatou alofa mo Ieova o loo faavae i faalogona loloto o le talisapaia po o ai ma o le ā foʻi o ia—o le Pule Silisili Ese, o Lē na Foafoaina Mea uma, o lē ua ‘tatau ona tuuina atu i ai le viiga ma le faaneeneega ma le mana.’ (Faaa. 4:11) E lē mafaatusaina ona uiga ofoofogia.—Eso. 34:6, 7.
4 O le iloaina, faapea ma le alolofa ia Ieova, ua uunaʻia ai i tatou e faasusulu atu lo tatou malamalama i luma o tagata. (Mata. 5:16) E susulu atu lo tatou malamalama pe a tatou vivii atu ia te ia i luma o le lautele, talanoa e uiga i ana galuega ofoofogia, ma faasalalau atu le feʻau e uiga i lona Malo. E pei o le agelu i le taulotoaʻiga o le lagi, ua ia i tatou “le tala lelei e faavavau e folafola atu i . . . atunuu uma ma ituaiga ma gagana eseese ma nuu.” (Faaa. 14:6) O lo tatou alofa, o le malosi lea o loo uunaʻia ai le galuega talaʻi i le lalolagi aoao.
5 E manatu le lalolagi i la tatou talaʻiga e faapea o se mea “valea” e tatau ona aua le amanaʻiaina. (1 Kori. 1:18) Ua faia taumafaiga i le lalolagi aoao ina ia taofia ai la tatou galuega. O lo tatou alofa faamaoni ua faamalosia ai i tatou e folafola atu e pei ona sa faia e le ʻauaposetolo e faapea: ‘E matou te lē mafaia ona le tautala i mea ua matou vaai ma faalogo i ai. . . . E sili ona tatou anaana i le Atua i lo o le anaana i tagata.” (Galu. 4:20; 5:29) O loo faaauau pea ona faateleina le galuega talaʻi i tuluʻiga uma o le lalolagi e ui lava i teteega.
6 O lo tatou alofa mo Ieova ua pei o se afi mumū ua faamalosia ai i tatou ina ia folafola atu i nuu mamao ana galuega lelei. (Iere. 20:9; 1 Pete. 2:9) O le a faaauau pea ona tatou “faailoa atu i nuu o ana galuega . . . auā ua faia e ia mea silisili ese”!—Isa. 12:4, 5.