Se Tusi Mai Le Vaega Pule

Maʻeu so tatou manuia! Ona o i tatou o Molimau a Ieova, ua tatou maua ai le faaeaga e lē gata i le iloaina o Ieova, le Atua soifua moni e toʻatasi, o Lē na Foafoaina le aoao o mea, ae o loo tatou tauaveina foʻi lona suafa ma auauna atu ia te ia. E leai se isi faamanuiaga e sili atu na i lo o lena!—Isa. 43:12; Epe. 8:11.

Ua ia i tatou le faamoemoe mo le faaolataga ma le tofiga ia talaʻi atu le tala lelei o le Malo ina ia mafai foʻi e isi ona latou tapuaʻi i a Ieova ma olioli i le faamoemoe ua ia i tatou. (Mata. 24:14; Roma 10:13, 14; 1 Tesa. 5:8) Ua tatou olioli foʻi e avea o se ʻauuso faava-o-atunuu o tagata tapuaʻi o ē fealofani ma tinoū e felagolagomaʻi. Maʻeu se faamalieina ai i nei mea uma!

Ua valaauliaina ma le talafeagai i tatou e le Tusi Paia e faapea: “Ia outou auauna atu ia Ieova ma le fiafia. . . . Ia outou ulu atu i ona faitotoa ma le viiga, ma ona lotoā ma le pese; ia outou vivii atu ia te ia, ia outou faamanu atu i lona suafa. Auā e lelei Ieova; e faavavau lava lona alofa; e oo atu lava lona faamaoni i lea tupulaga ma lea tupulaga.” (Sala. 100:2-5) O le auauna atu ma le fiafia i a Ieova e fesootaʻi tonu lava ma le iai o se faiā totino ma malosi ma ia. Ua ia faaavanoa maia lena faiā, ma ua ia i tatou le faaeaga e ati aʻe ai. Pe a ia i tatou sea faiā, ona tatou iloa lea, e nofosauni Ieova i taimi uma e fesoasoani ma faamalosiau mai ia i tatou i taimi o mafatiaga. Ua tatou mautinoa lelei o le a ia foaʻi maia le malosi ma taʻiala faaleagaga e manaʻomia ina ia faafetaiaʻia ai luʻi a o ola ai i aso mulimuli o lenei faiga o mea. E tusa lava po o ā omiga o loo tatou fesagaʻia, ae tatou te fiafia pea i la tatou faiva, ma tatou sii aʻe le faafetai i a Ieova i aso taʻitasi, auā e pei ona faamanatu mai e lana Afioga ia i tatou, ‘o loo manatu mai o ia ia te i tatou.’—1 Pete. 5:7.

Sa matuā faamanuiaina i tatou e Ieova a o faagasolo le tausaga na seʻi mavae atu nei. I le Tauaofiaga Itumalo “O Ē Faia le Afioga a le Atua,” sa faafiafiaina ai i tatou e auai faatasi ma le faitau afe o isi o ē ua iai i lea lava faatuatuaga tautele, i lo tatou vivii ma talisua faatasi i le laoʻai faaleagaga a Ieova. I a tatou Suʻesuʻega Tautusi a le Faapotopotoga faa-Peretania, ua tatou olioli ai i se vala e faamalosia ai le faatuatua, o le suʻesuʻeina faatasi lea o le tusi Pay Attention to Daniel’s Prophecy! E lē gata i lea, maʻeu se faafiafiaina o i tatou ina ua tatou maua le Tusi I o le lomiga fou, Isaiah’s Prophecy—Light for All Mankind! ‘Ua taumasuasua la tatou ipu.’—Sala. 23:5.

Maʻeu se olioli i le iloa, e faitau miliona i tatou, o uso ma tuafāfine faaleagaga, o loo autasi e auauna atu i a Ieova! Maʻeu se faalaeiau i le faitau atu i ni tumutumuga fou na ausia i le faiva i le fanua! E tatou te fiafia i le faitau miliona o ē na auai i le Faamanatuga o le maliu o lo tatou Alii—ma na latou faia e ui lava i tulaga ua iai le lalolagi. A o tatou mātauina le fanua o le lalolagi aoao, ua manino mai ai ‘le tele o le seleselega.’ (Luka 10:2) I le tausaga talu ai, sa iai se faatatauga e faapea, i vaiaso taʻitasi, e 5,555 tagata suʻesuʻe o le Tusi Paia sa agavaa mo le faailogaina o lo latou tuuina atu, e ala i le papatisoga i le vai. E ui ina tetele le seleselega i nisi nofoaga o le lalolagi na i lo o isi, ae tatou te fiafia uma lava i mea o loo faia e Ieova. Ua tatou vaaia faamaoniga mautinoa o lana faamanuia mai i taumafaiga autasi a ana auauna.

O se isi pogai mo le faateleina o le fiafia, o le fausiaina lea o Maota o le Malo fou! E matuā faafiafiaina i tatou i le vaavaai atu i le lagolagoina ma le lotoatoa o lenei galuega, e o tatou uso ma tuafāfine i atunuu tauatiaʻe. E faitau selau Maota o le Malo ua uma ona fausia mai le fesoasoani a Vaega mo le Fausiaina o Maota o le Malo, lea sa latou maua ni toleniga manaʻomia. E feofeoaʻi solo lava nei uso i faapotopotoga eseese i totonu o lo latou lava atunuu, ina ia taʻimua i galuega mo le fausiaina o Maota o le Malo. Talu ai e faitau afe isi Maota o le Malo o loo manaʻomia foʻi ona fausia, ua avatu ai se faatalosaga mo le maua atili mai o nisi ʻaufaigaluega tauofo i atunuu tauatiaʻe, ina ia fesoasoani i lenei galuega manaʻomia tele. Pe afai o loo e alaala i se atunuu faapena, pe mafai ona e avanoa mai? Maʻeu se talisapaia e o tatou uso ma tuafāfine pele o le iai o so latou lava Maota o le Malo e faatasitasi ai mo le tapuaʻiga! Ma e maʻeu foʻi so latou faafetaia o le ʻauuso i le lalolagi aoao, ona o fesoasoani tau seleni ua mafai ai ona tino mai lenei fuafuaga!

Ua faafiafiaina i tatou i tala o faaiʻuga faaletulafono ua tatou manumalo ai. Peitaʻi, i le tele o nofoaga, o loo iai foʻi tagata aloaʻia o ē mananaʻo e taofia le tapuaʻiga i a Ieova. A o tatou faafetaiaʻia nei tulaga, ua tatou mautinoa lelei, pe a faaoo mai e Ieova lana fesoasoani, e lē āfaina ia te ia po o le ā le toʻatele o ē tetee mai, pe o le ā foʻi le tulaga lē malupuipuia e foliga o loo iai ana auauna. (2 No. 14:11) E matou te faamālō atu ma le māfana ia te outou uma uso ma tuafāfine, o ē o loo tutū mausalī pea mo le tapuaʻiga moni.

Ia faaauau ona faamalosia lo outou faatuatua ma ia matuā faalagolago atu i a Ieova mo lana taʻitaʻiga a o outou faataunuuina ma le olioli o outou tiute tauave faa-Kerisiano. (Faata. 3:5, 6) E leai se pogai e ao ai fua ona lotovaivai, e tusa lava po o ā mea atonu ua faatagaina le fili e faia. Ia manatua le faalaeiauga na tuuina atu e Elisaia i lana auauna lea sa atuatuvale: “Aua e te fefe, auā e toatele ua ia te i tatou i e ua ia te i latou.” (2 Tu. 6:15-17) I aso nei, o loo nofosauni le ʻau faalelagi a Ieova e puipuia manaʻoga o le tapuaʻiga moni e pei lava ona sa latou faia i aso o Elisaia. Ua tatou faatalia le lumanaʻi ma le mautinoa. O loo faatautaia e Ieova le tulaga o mea. E lē mafai e atunuu ona manumalo mai ia te ia. Ua ia faanofotupuina lona Alo ma foaʻi atu i ai le aiā atoatoa e pule ai. “Amuia i latou uma o e faatuatua ia te ia.”—Sala. 2:1-6, 12.

Tau ina ia outou manatua, e lē mafai ona matou faagaloina outou uma lava, uso ma tuafāfine pele i o matou mafaufauga māfana. Matou te tatalo faatauanau, ina ia taʻitoʻatasi outou uma ma “tumau ua atoatoa ona lelei, ma ua mautinoa le finagalo uma lava o le Atua.”—Kolo. 4:12, LT.

O o outou uso,

Vaega Pule a Molimau a Ieova