“E Mafaia Mea Uma e le Atua”
1 O le galuega sili lava a le faapotopotoga Kerisiano o le talaʻia lea o le feʻau o le Malo i le lalolagi aoao. (Mata. 24:14) O se galuega aupito telē lenei ua faia. I le toʻatele o tagata o loo vaavaai mai, e foliga atu e manaʻomia ni mea se tele e faatino ai na i lo o mea o loo tatou maua. I isi, o le faataunuuina o lenei tofiga e toetoe lava a lē mafai ona fai ona o le amusia, teena ma sauāina i tatou. (Mata. 24:9; 2 Timo. 3:12) E talitonu tagata o loo i ai uiga masalosalo e faapea, e lē mafai ona faataunuuina lenei galuega. Ae peitaʻi, na fetalai Iesu: “E mafaia mea uma e le Atua.”—Mata. 19:26.
2 Faaaʻoaʻoga Mautinoa e Faataʻitaʻi i Ai: Na amataina e Iesu lana faiva i le avea o se tagata e toʻatasi i le feagai ai ma le lalolagi atoa. I le taumafai e taofia o ia mai le taulau, sa faia e tagata tetee faiga matagā uma lava e faalumaina ai o ia, ma iʻu ina faaoo ia te ia se maliu tigā. Peitaʻi, i le iʻuga, na faalauiloa mai ai ma le mautinoa e Iesu e faapea: “Ua ou manumalo i le lalolagi.” (Ioa. 16:33) E moni lava o se faataunuuga sa matuā ofoofogia lea!
3 Sa faaalia e soo o Iesu lea lava agaga lototele ma le maelega i le faiva faa-Kerisiano. E toʻatele na matuā sasaina faamoʻamoʻa, fueina, lafoina i le falepuipui, ma oo lava ina fasiotia. Peitaʻi, sa latou “olioli ina ua taʻuaogāina i latou ia faaleagaina ona o lona suafa.” (Galu. 5:41) E ui lava sa lē faigofie, ae na latou faataunuuina lava le galuega na foliga mai e lē mafai ona fai, o le talaʻia lea o le tala lelei “e oo lava i le tuluʻiga o le lalolagi.”—Galu. 1:8; Kolo. 1:23.
4 Le Auala e Taulau ai i o Tatou Aso: O lea foʻi ua tatou faia ma le maelega le galuega talaʻi o le Malo i le feagai ai ma tulaga e foliga mai e lē mafai ona iʻu i se manuia. E ui lava i faasāsāga, sauāga, tuuina i le falepuipui ma isi taumafaiga sauā e taofia ai i tatou, ae o loo tatou taulau pea. Ua mafai faapefea lenei mea? “E le o le fitafita, e le o le malosi, a o loʻu Agaga, ua fetalai mai ai Ieova o ʻau.” (Saka. 4:6) E faatasi ma le lagolagosua a Ieova ia i tatou, e leai se mea e mafai ona taofia i tatou!—Roma 8:31.
5 Pe a tatou talaʻi, e leai se māfuaaga e tatou te matamumuli pe fefefe ai, po o le iai foʻi o se lagona o le lē agavaa. (2 Kori. 2:16, 17) E iai māfuaaga sili ona maualuga e agaʻi ai i luma i le faasalalauina atu o le tala lelei o le Malo. E faatasi ai ma le fesoasoani a Ieova, o le a tatou faataunuuina ai le galuega lea e ono foliga mai “e lē mafaia” ona fai!—Luka 18:27.