Po o E Moomoo e Faalautele Lau Auaunaga?

SA FAAPEA mai Laura: “Sa ou matuā lē fiafia ia Ieova. Sa ou tatalo ma tatalo ia fesoasoani mai na te faaleleia lo ma tulaga tautupe ina ia mafai ai ona faaauau pea laʻu paeonia—ae na lē taulau. Na iu ai lava ina tatau ona motusia laʻu auaunaga faapaeonia. Ou te tautino atu foi na ou fuā ia i latou ia na mafai ona faaauau pea la latou auaunaga faapaeonia.”

Manatu foi i le tulaga o Mikaele, o se tasi o auauna o le faiva i se faapotopotoga a Molimau a Ieova. Na ia taumafai e aapa atu mo le tofiga o le ovasia. (1 Timoteo 3:1) Ina ua lē faataunuuina ona moomooga mo ni nai tausaga, na matuā tiga o ia ma lē toe manao ai e aapa atu i lenei faaeaga. Sa ia faapea mai, “ua ou lē lavā tatali le oo mai o ia tulaga e tiga ai.”

Pe na oo ia te oe se mea faapena? Pe na tatau ona e faamatuu atu se faaeaga faatiokarate lea na e faapelepele i ai? Mo se faataitaiga, pe na tatau ona faamuta lau auaunaga o se paeonia, o se tagata talaʻi faataimi atoa o le Malo? Po o e moomoo i ni tiute tauave patino faalefaapotopotoga ia ua tuuina atu i isi? Atonu foi o loo e matuā naunau e auauna i Peteli po o le avea ma se misionare, ae e lē o faatagaina e ou tulaga.

Ua faailoa mai e le tusi o Faataoto e faapea “o le faamoemoe ua tuai ona taunuu e faanoanoa ai le loto.” (Faataoto 13:12) E matuā moni lenei mea pe afai ua maua e isi ia lava faaeaga o loo e faamoemoe i ai. Po o aumaia e le Afioga a le Atua le malamalamaga, faamafanafanaga, ma le faamoemoe mo so o se tagata o loo iai na faalogona lē fiafia? Ioe, o loo iai. O le mea moni, ua faamatala mai e le mataupu e 84 o le Salamo faalogona o se auauna a Ieova o sē na lei faataunuuina ona faanaunauga e faatatau i le auaunaga a Ieova.

O se Uiga Talisapaia o se sa Levī

O ē na tusia le Salamo 84 o atalii o Koru, o sa Levī na auauna i le malumalu o Ieova ma na latou matuā faasilisilia a latou faaeaga faapitoa. Na faapea mai se tasi o i latou: “Ieova o ʻau e, e matuā manaomia ou afioaga. O loo naunau loʻu agaga, ma ua lailoa i le fia alu atu i lotoā o Ieova; o loo alaga fiafia loʻu loto ma loʻu tino i le Atua soifua.”—Salamo 84:1, 2.

Na matuā moomoo lenei sa Levī e auauna i le malumalu o Ieova lea e oo i vaaiga masani i le ala i Ierusalema na matagofie ia te ia. Na ia faapea mai: “Ua ui ane i latou i le vanu o Peka, ua faia lea e i latou ma vaipuna.” (Salamo 84:6) Ioe, o se laufanua lea e masani ona matūtū ua pei o se vaipanoa o tele ai le timu.

Ona o le faisalamo e lē o se ositaulaga sa Levī, e na o le tasi le vaiaso mai le taʻi ono masina e mafai ona auauna ai i le malumalu. (1 Nofoaiga a Tupu 24:1-19; 2 Nofoaiga a Tupu 23:8; Luka 1:5, 8, 9) O le tele o lona taimi na nofo ai i lona aiga i se tasi o aai o sa Levī. O lea la na ia pese ai e faapea: “E moni, o le manu lele ua maua se fale, o le peʻapeʻa foi ua maua sona ofaga e tuu ai lana toloai, o au lava fata faitaulaga, Ieova o ʻau e, o loʻu Tupu ma loʻu Atua.” (Salamo 84:3) Maeu se fiafia o le sa Levī pe ana pei o manufelelei ia na sili atu ona mautu mea na nonofo ai i le malumalu!

Atonu na faigofie ona lolo atu le sa Levī i faalogona lē fiafia ona o le lē mafai ona auauna faifai pea i le malumalu. Ae peitai, na ia fiafia e auauna i le tele na te mafaia, ma na malamalama faapea e matuā aogā taumafaiga o le tuutoina atu ma le loto atoa ia Ieova. O le ā na fesoasoani i lenei sa Levī faamaoni ina ia loto malie i faaeaga o lana auaunaga?

Ia Loto Malie i Mea ua Iai

Ua faapea mai le sa Levī: “E sili le aso e tasi i ou lotoā i lo le afe. E sili loʻu manao ia aʻu tu i le faitotoa o le fale o loʻu Atua, i le manao e mau i fale ie o e amio leaga.” (Salamo 84:10) Na ia talisapaia faapea o le faaaluina o se aso se tasi i le fale o Ieova o se faaeaga lē mafaatusalia. Ma e sili atu nai lo le tasi le aso na auauna ai le sa Levī i le malumalu. O lona loto malie i ona faaeaga na uunaia ai o ia e pese ma le fiafia.

Ae faapefea i tatou? Po o tatou matauliaina o tatou faamanuiaga, pe e tele ina tatou faagaloina faaeaga ia ua ia i tatou i le auaunaga a Ieova? Ona o lo latou tuutoina atu ia te ia, ua avatu ai e Ieova i ona tagata ni faaeaga ma tiute eseese. Ua aofia i nei tiute tauave e sili atu ona mamafa o le vaavaaiga, leoleoina, aʻoaʻo atu, ma vala eseese o le auaunaga faataimi atoa. Ae o loo aofia ai foi isi mea tāua e fesootai atu i le tapuaiga a Ieova.

Mo se faataitaiga, seʻi manatu i le faiva faa-Kerisiano. Ua faatusatusa e le aposetolo o Paulo lo tatou faaeaga o le talaʻia o le tala lelei e pei o lo tatou mauaina o “oa i ipu omea.” (2 Korinito 4:7) Pe e te vaai atu i na auaunaga o se oa tele e lē mafaatusalia? Na faapena le silafaga a Iesu Keriso, o lē na taʻimua i le galuega talaʻi o le Malo, ma ua faataatia ai le faaaoaoga. (Mataio 4:17) Na faapea mai Paulo: “Matou te le faavaivai ai, o i matou ua i ai lenei faiva.”—2 Korinito 4:1.

O sauniga Kerisiano o sauniuniga e paia foi, lea e lē tatau ona manatu māmā i ai. I a tatou sauniga, e tatou te maua ai faatonuga tāua ma olioli ai i auaufaatasiga ia e tatou te manaomia. I a tatou sauniga e mafai ai foi ona faaali atu i le lautele lo tatou faatuatua ma lo tatou faamoemoe e ala lea i le faia e lē aunoa o se sao ma auai i isi vala o le sauniga. (Eperu 10:23-25) O le mea moni, o a tatou sauniga o se sauniuniga e ao ona matuā faatauaina!

O Mikaele, o lē na muai taʻua, na ia matuā faatauaina nei faamanuiaga ma matuā talisapaiaina. Ae o ona faalogona tiga i le lē mafai ona avea ma se toeaina na faaitiitia ai lona talisapaia o na faamanuiaga mo se taimi lē tumau. Ae e ala i le toe mafaufau i nei mea, na mafai ai ona toe faapaleni lana vaaiga ma faatalitali ai ma le onosai ia Ieova.

Nai lo le lē malie i le lē mauaina o se faaeaga patino, e lelei lo tatou toe iloiloina o auala o loo faamanuia ai e Ieova i tatou, e pei ona sa faia e le faisalamo.a Afai e lē tele ni faamanuiaga o loo tatou iloaina, e manaomia la lo tatou toe iloilo i ai, i le talosaga atu ia Ieova ina ia faapupula o tatou mata ina ia iloa o tatou faaeaga ma auala ua ia faamanuiaina ai i tatou ma faaaogaina ai i tatou mo lona viiga.—Faataoto 10:22.

E tāua foi le iloa faapea o faaeaga faapitoa e pei o tofiga tau ovasia e moomia ai ni agavaa patino. (1 Timoteo 3:1-7; Tito 1:5-9) O lea e tatau ona tatou iloiloina i tatou lava, ina ia vailiili so o se vala lava e manaomia ona faaleleia, ona faia lea o ni taumafaiga filigā e faaleleia ai.—1 Timoteo 4:12-15.

Aua Neʻi Faavaivai

Afai tatou te lē mauaina se faaeaga patino i le auaunaga, e lē tatau la ona faia sa tatou faaiuga faapea e sili atu le alofa o Ieova mo ē o loo mauaina ia faaeaga po o le faapea foi o loo ia taofia se mea lelei mai ia i tatou. E mautinoa la, e lē tatau ona tatou manatu ma le mataua faapea na maua faaeaga a i latou ia ona o le faaʻauʻau faaletagata ae lē o le tofiaina faatiokarate. O le mafaufau pea ma le lē fiafia i manatu faapena e ono taʻitaʻi atu ai i le loto leaga, fevaevaeaiga, ma e oo lava ina tatou matuā faavaivai ai.—1 Korinito 3:3; Iakopo 3:14-16.

E lei faavaivai Laura, o lē na taʻua muamua. Na iu ina faaleleia ona faalogona ita ma le fuā lē tatau. Na tatalo atu pea Laura i le Atua mo le fesoasoani ina ia foia ona faalogona lē lelei i lona lē mafai ona paeonia. Na ia sailia foi le fesoasoani mai tane agavaa o le faapotopotoga ma na toe maua ai le faamautinoaga o le alofa o le Atua. Na ia faapea mai: “Na aumaia e Ieova ia te au le filemu o le mafaufau. E ui lava ua ma lē mafai ona ma paeonia ma loʻu toalua i le taimi nei, ae e ma te manatua ma le fiafia taimi na ma faia ai lenei galuega, ma maua faalaeiauga mai mea na tutupu i lena taimi. E ma te fesoasoani foi i le ma tama tama lea ua matua i lana paeonia.” I le maua o le loto malie, ua mafai ai nei e Laura ona “olioli faatasi ma e ua olioli” i la latou auaunaga faapaeonia.—Roma 12:15.

Ia Faatutu ni Sini e Mafai Ona Ausia

O lo tatou loto malilie i faaeaga o le auaunaga lea o loo maua i le taimi nei e lē faapea o le a taofia ai lo tatou faatutu o nisi sini faatiokarate. I le talanoaina o le toetu faalelagi, na taʻua e Paulo le “momoe punou aʻi [“aapa atu,” NW] foi i mea o lumanai.” Na ia faapea mai foi: “A ia tatou amio e tusa ma le tulaga ua tatou aulia.” (Filipi 3:13-16) E fesoasoani sini faatiokarate ia i tatou ina ia aapa atu. Ae peitai, o le lui, o le faatutu lea o sini moni.

O sini e moni e fetaui ma e mafai ona ausia. (Filipi 4:5) E lē faapea ai la o se sini e moomia ai ni taumafaiga maelega mo ni nai tausaga ona faatoʻā ausia lea ua faapea ai ua lē moni. O se sini faapea ua faatū mo le lumanai e mafai ona mulimuli ane ausia e ala i le faatutu o ni sini mo le taimi nei, po o ni laasaga. E avea nei mea ma laasaga tāua mo le agaigai i luma faaleagaga. O le faataunuuina ma le manuia o laasaga taitasi e mafai ona aumaia ai le faamalieina totino nai lo faanoanoaga.

Se Vaaiga Paleni

Ae peitai, e tāua le amanaia faapea e lē mafai ona mauaina isi faaeaga ona o o tatou tulaga ma tapulaa. O le faatutuina o ia mea e avea ma sini e na ona taʻitaʻiina ai i faanoanoaga ma le lē mautonu. O na sini e ao ona tolopoina mo le taimi nei. O le a lē faigata le faia o lenei mea pe afai tatou te tatalo mo le loto malie mai le Atua ma avea le faia o le finagalo o Ieova ma mea e sili ona tatou manatu mamafa i ai. Afai tatou te aapa atu i faaeaga, ia mo o le viiga o Ieova—ae lē o le faatāuaina o a tatou taumafaiga totino. (Salamo 16:5, 6; Mataio 6:33) Ua talafeagai ai la le faapea mai o le Tusi Paia ia i tatou: “Ia e tuuina atu ia Ieova o au galuega; ona faamauina ai lea o ou manatunatuga.”—Faataoto 16:3.

I le manatunatu i le Salamo 84, ua tatou iloa ai le faaalia e le faisalamo o nei uiga e faatatau i faaeaga o le auaunaga, ma na matuā faamanuia e Ieova. Ae sili atu i lea, o loo faaauau pea ona aogā lenei salamo i tagata o Ieova i aso nei.

O le faalagolago ia Ieova i le tatalo e mafai ona faapaleni ai lou moomoo i faaeaga faaopoopo ma lou loto malie i faaeaga ia o e olioli ai i le taimi nei. Aua lava neʻi e faatagaina ou faanaunauga ina ia faia mea e sili atu, e aveesea ai lou talisapaia o mea o loo e mauaina i le taimi nei ma le olioli i le auauna atu ia Ieova e faavavau. Ia faatuatua ia Ieova, auā e iʻu ai i le fiafia, e pei ona faaalia i upu a le sa Levī: “Ieova o ʻau e, amuia [“fiafia,” NW] le tagata ua faatuatua ia te oe.”—Salamo 84:12.

[Faaopoopoga i lalo]

[Pusa i le itulau 11]

Sini e Mafai Ona Tatou Faatutuina

Faitauina o le Tusi Paia i aso taitasi.—Iosua 1:8, Mataio 4:4

Faaleleia o lo tatou tomai faalemafaufau e ala i le aʻoaʻoina i le Tusi Paia.—Eperu 5:14

Ati ae se faiā vavalalata ma le Atua.—Salamo 73:28

Ati ae fua taitasi o le agaga.—Kalatia 5:22, 23

Faaleleia le uigā o a tatou tatalo.—Filipi 4:6, 7

Faaleleia atili le tomai i le talaʻiga ma le aʻoaʻo atu.—1 Timoteo 4:15, 16

Faitau ma manatunatu loloto i lomiga taitasi o Le Olomatamata ma le Ala Mai!—Salamo 49:3

[Ata i le itulau 9]

I le faatutuina o ni sini totino, ia faamuamua le faia o le finagalo o le Atua