Le Tusi Paia—O se Tusi na Faia ma le Manatu ia Malamalama i ai

E TALITONU nisi tagata e faapea, o le Tusi Paia o le Afioga manino a le Atua e ao ona faatatauina atoatoa faaletino mea uma o fai mai ai. A o isi, “o le feau a le Tusi Paia e mafai ona tele ni ona faauigaga.” O le faamatalaga lena a le komiti faafaifeau e toʻa 12 ona sui, a le lotu Porotesano e sili ona telē i Kanata. Ua lagona e le faifeau o Clifford Elliott o le Lotu Tuufaatasi e faapea, i nisi, “ua avea le Tusi Paia o se tusi e faigata ona malamalama i ai, e leai ni faalogona, ma e leai sona aogā.”

O manatu faapena, ua lagā ai ni fesili talafeagai e manaomia ai ni tali. O fesili tāua nei, Aisea na tusia ai le Tusi Paia? Po ua faigata naua ma lavelave ua lē mafai ona malamalama i ai? Pe mafai e le tagata lautele ona malamalama i ai? O le ā le fesoasoani e manaomia mo se tasi ina ia mafai ai ona malamalama atoatoa i le uiga o le Tusi Paia? Ma aisea e matuā alagatatau ai ona maua le poto saʻo o le Tusi Paia i nei taimi fesouaina?

Aisea na Tusia ai le Tusi Paia?

Ua avea pea le suesueina o le Afioga a le Atua o se mea sili ona tāua mo i latou o le a maua le faamaoniga ma le finagalo malie o le Atua Silisili ona Maualuga, o Ieova. Na faatonuina tupu, faitaulaga, mātua, tane, fafine, ma tamaiti—mauoa ma ē matitiva—ina ia sema se taimi mai galuega o le olaga i aso uma, e iloilo ai ma le filigā, faatasi ma le tatalo, le Afioga tusia a le Atua.—Teuteronome 6:6, 7; 17:18-20; 31:9-12; Neemia 8:8; Salamo 1:1, 2; 119:7-11, 72, 98-100, 104, 142; Faataoto 3:13-18.

Mo se faaaoaoga, na faatonuina Iosua e faapea: “Ia mautinoa ua faitauina le tusi o le Tulafono i la outou tapuaiga. Ia suesue i ai i le ao ma le po, ma ia mautinoa ua outou usiusitai i mea uma ua tusia ai. Ona outou uluola ai lea ma manuia ai.” (Iosua 1:8, Today’s English Version) O sea suesuega ma le faaeteete ma le faatinoina o le Tulafono a le Atua, o le a iu i le manuia ma le fiafia. Sa fuafua e Ieova e faapea e ao i “tagata uma lava” ona lē gata ina malamalama i lana Afioga, le Tusi Paia, ae ia usiusitai foi i ai, ma le faamoemoe e maua le meaalofa o le ola.—1 Timoteo 2:3, 4; Ioane 17:3.

Pe Lavelave Naua ua Lē Mafai ona Malamalama i Ai?

A o leʻi afio aʻe Iesu i le lagi, sa ia faamanino mai lona manao e faaauau pea ona faia i le lalolagi aoao se polokalama sili faatatau i le aʻoaʻoina o le Tusi Paia. (Galuega 1:8) Sa ia silafia e faapea, o le Tusi Paia, na faia ina ia malamalama i ai tagata. Ina ua uma ona faamatalaina e faapea ua tuuina mai e Ieova i a te ia le pule uma lava i le lagi ma le lalolagi, ona ia tuuina atu loa lea o le faatonuga tuusaʻo e faapea: “O lenei, ia outou o atu e fai nuu uma lava ma soo [po o ē ua aʻoaʻoina], ma papatiso atu ia te i latou i le suafa o le Tamā, ma le Atalii, ma le Agaga paia; ia outou aʻoaʻo atu ia te i latou ia tausi i mea uma ua ou fai atu ai ia te outou.”—Mataio 28:19, 20.

A o leʻi papatisoina, e tatau ona aʻoaʻoina soo fou e uiga i a Ieova, lona Alo, ma le gaoioiga a le agaga paia. E faaopoopo i lena, e tatau ona aʻoaʻoina foi i latou i le tulafono o le faiga o mea faa-Kerisiano. (1 Korinito 9:21; Kalatia 6:2) Ina ia faataunuuina lenei fuafuaga, e ao i ē ua tatau ai, ona muai talitonu o le Tusi Paia e mai i a Ieova, o lona lua, na faia ma le manatu ina ia malamalama i ai.—Mataio 10:11-13.

O le ā e manaomia ona e faia ina ia malamalama ai i le Tusi Paia? Na faia e le Alo o le Atua se taumafaiga faapitoa e faamatala ai le Tusi Paia. Sa ia silafia faapea o le Tusi Paia, e moni ma o loo maua ai le finagalo faaalia o Ieova. (Ioane 17:17) E tusa ai ma lana galuega tofia, na fetalai ai Iesu Keriso e faapea: “O le mea lenei na fanau mai ai aʻu, o le mea foi lenei na ou sau ai i le lalolagi, ina ia ou molimau i le upu moni. O i latou uma lava o i le upu moni, e faalogo mai i latou i loʻu leo.” (Ioane 18:37; Luka 4:43) Sa leʻi nofoaʻi Iesu mai le aʻoaʻoina o i latou o ē na naunau o latou loto ma mafaufau e talia ana aʻoaʻoga. I le Luka 24:45, ua taʻu mai ai i a i tatou e faapea: “Ona tatalaina lea e ia [Keriso Iesu] o latou loto, ina ia latou lagona ai Tusi.”

I le taimi o le faiva a Iesu, sa ia sii soo mai le Afioga tusia, ua faamatala ma faasino atu i tusi “le tulafono a Mose ma le au perofeta ma salāmo.” (Luka 24:27, 44) O i latou na faalogo i ana faamalamalamaga o le Tusi Paia, sa matuā faagaeetia ai ona o le manino o ana faamalamalamaga, faapea ma lona tomai e aʻoaʻo atu. (Mataio 7:28, 29; Mareko 1:22; Luka 4:32; 24:32) I a Iesu, o le Tusi Paia, sa o se tusi mo tagata uma ia malamalama i ai.

Le Tusi Paia ma Soo o Iesu

O le aposetolo o Pauro, o sē na faaaʻoaʻo i a Iesu Keriso, sa ia iloa le manaomia ona aʻoaʻo isi i mea o loo i le Tusi Paia. Sa ia iloa foi le tatau ona malamalama i mea o i le Tusi Paia. O le mafuaaga lena na ia aʻoaʻo atu ai i le lautele, ma e lē taumatea sa ia faamalamalama atu foi le Tusi Paia i aiga o i latou o ē na fia malamalama i ai. Na faailoa atu e Pauro lona tulaga i lona faapea atu: “Ua outou iloa ou te leʻi natia so o se mea sa mafai ona fesoasoani ia te outou a o ou talaʻi atu ma aʻoaʻo i tagata lautele ma ō outou aiga.” (Galuega 20:20, TEV) A o talanoa atu o ia, sa ia faamalamalamaina atu mai le Tusi Paia, i le faamatala ma faamaonia ona manatu i lona faasino atu i mau. (Galuega 17:2, 3) Sa naunau o ia e fesoasoani atu i isi ina ia malamalama i le uiga o Tusi Paia.

Po o e moomoo e fia malamalama i mea na aʻoaʻo e Iesu ma ona soo? (1 Peteru 2:2) Sa iai se faanaunauga faapena i tagata Perea anamua, ma sa naunau i latou e talitonu i mea na aʻoaʻo atu e le aposetolo o Pauro i a i latou e uiga i le Keriso. O lea, na faalototeleina ai i latou e suesue i aso taitasi le Tusi Paia, ma i lea ua faamautinoa ai i a i latou e faapea, o le tala lelei sa latou faalogo i ai, o le upu moni lava lea. Ona sa latou talia le upu ma le fiafia tele, “o le mea lea ua talitonu ai i latou e toatele.”—Galuega 17:11, 12.

Ina ia malamalama i le Tusi Paia, e tatau i se tasi ona saʻo lona loto, ia iai se faanaunauga faamaoni e aʻoaʻo, ma ia ‘iloa ona lava manaoga faaleagaga.’ (Mataio 5:3) Ina ua fesiligia Iesu: “Se a le mea ua e fetalai atu ai ia te i latou i faataoto?” ona tali atu lea o ia: “Ua foaiina atu ia te outou ia outou iloa mea lilo a le malo o le lagi, a ua le foaiina atu ia te i latou.” Na valoia e faapea o le a ‘tautala atu o ia i faataoto ma faailoa atu mea lilo sa natia.’ (Mataio 13:10, 11, 35) O lea, sa fetalai atu ai Iesu e ala i faataoto ina ia vavaeese ai le au faafiapopoto ma le suesuevale mai i a i latou sa fia iloa moni. Na faaalia e soo o Iesu lo latou naunau faamaoni i se tasi o taimi ina ua latou ō faatasi ma ia i se fale ma faapea atu: “Ia e faamatala mai ia te i matou le faataoto i le titania i le fanua.”—Mataio 13:36.

Ua manino mai la lo tatou manaomia o se fesoasoani pe afai tatou te fia malamalama i le Tusi Paia. Na faapea mai le faifeau o Hal Llewellyn, o le failautusi o le Lotu Tuufaatasi faafaifeau ma le faatuatuaga faalelotu: “E matuā tāua tele le faamanino mai i a i tatou le uiga o le mea o fai mai ai le Tusi Paia, le auala e faitau ai ma faamatala ai.” Ae tusa lava pe lē iloa e tagata uma lena mea, o le mea moni, e lē mafai ona tatou malamalama i le Tusi Paia na o i tatou lava. Tatou te manaomia se fesoasoani.

O le ā le Fesoasoani e Mafai ona Maua?

O loo iai i le Tusi Paia nisi o faaupuga faamatalagatā, fesili lavelave, ma faamatalaga uigaese e manaomia ona faamalamalamaina. Atonu sa fuafuaina ina ia natia lo latou uiga, i le faaaogaina o ni faatusatusaga uigā sa lē manatu e ao ona malamalama i ai i le taimi na tusia ai. Ae sa aafia ai fuafuaga a Ieova. Mo se faaaoaoga, ua faapea mai le Faaaliga 13:18 e uiga ‘i le numera o le manufeai’ e “ono selau ma le onogafulu ma le ono.” E ui ina faapea mai le fuaiupu “o le mea lenei ua i ai le poto,” e lē o faamatalaina mai ai le uiga moni o lena fuainumera. Ae peitai, ua faatagaina e Ieova e ala i lana faalapotopotoga, ana auauna faamaoni ia malamalama i lona uiga i aso nei. (Tagaʻi i le pusa, “Auala e Malamalama ai i le Tusi Paia.”) E mafai foi ona e maua lenei malamalamaga ona o le fesoasoani mai i a i latou ua maua le poto masani i le “vaevaetonuina le upu moni.”—2 Timoteo 2:2, 15, 23-25; 4:2-5; Faataoto 2:1-5.

Sa faaaogā e Iesu i nisi taimi faataoto e faaalia ai le tali mai po o le lē tali mai i le feau o le Malo. Sa ia faaalia e faapea, o le a lē agaigai i luma nisi ona ua faalotovaivaia i latou i teteega mai uo ma tauaiga. O le a faatagaina e isi “puapuaga po o sauaga” latou te lē talisapaia ai le feau o le Malo. A o isi, o le a avea mea e tutupu i aso uma o le olaga, “o le loto popole i mea a lenei lalolagi, ma le pepelo o le oa,” e faamuta ai se alofa atonu sa i a i latou mo le tala lelei. I le isi itu, e iai i latou o ē ua talia ma le fiafia ma ua naunau e faalogo i le upu tāua ma lagona ai le uiga. O loo “mapuitiga ma feoi ona o mea inosia uma ua faia” e Kerisinetoma, ma le manatu ua faia i le suafa o Iesu Keriso. O tagata faapena o loo naunau ina ia aʻoaʻoina i ala o Ieova, ma malamalama ai i mea o latou faitauina i le Tusi Paia.—Mataio 13:3-9, 18-23; Esekielu 9:4; Isaia 2:2-4.

Mo i latou o ē mananao e maua le malamalama i fuafuaga a Ieova i taumafaiga taitoatasi, o le a silasila i ai Ieova ua maua le fesoasoani manaomia. O se faataitaiga, ua lipotia mai i le Tusi Paia e faapea, o le agaga o Ieova na taitaiina le faievagelia o Filipo e fesoasoani i le tamaloa Aitiope lena sa faitau le tusi o le Tusi Paia o Isaia a o malaga atu mai Ierusalema. A o alu atu i lona aiga i lana kariota, sa ia faitauina le tusi. Ona o le usiusitai i le taitaiga a le agaga paia o Ieova, na tamoe atu ai Filipo i le kariota ma fesili atu: ‘Po o e malamalama ea i mea o e faitauina?’ Sa loto maulalo le tamaloa ma sa lava lona faamaoni e ioe ai, sa ia manaomia se fesoasoani. Na aʻoaʻo ma le fiafia e Filipo lenei tamaloa galala faaleagaga ma aʻoaʻogofie. O le aʻoaʻoga na fesoasoani i a te ia e malamalama ai i le Tusi Paia. Sa ia iloa le mea e ao nei ona ia faia ina ia olioli ai i se faiā lelei ma Ieova ina ia maua ai le ola e faavavau. Sa avea o ia o se auauna fiafia papatisoina a Ieova, o lē na mulimuli atu i se olaga na faafiafiaina ai le Atua.—Galuega 8:26-39.

Atonu o iai sau Tusi Paia i lou fale, ma e lē taumatea sa e faitau soo foi i ai i le tele o taimi. Ma atonu ua oo foi i a te oe le faafitauli lea na oo i le tagata Aitiope loto maulalo ma faamaoni. Sa lē malamalama i mea na ia faitauina. Sa ia manaomia se fesoasoani, ma sa leʻi faatalatu e talia le fesoasoani na fiafia Ieova e tuuina mai. I le pei o Filipo, ua fiafia ai Molimau a Ieova e fesoasoani atu i a te oe ina ia malamalama i mea e uiga i le Atua na o loo tusia i lana Afioga, le Tusi Paia. Ua latou iloa na saunia e Ieova le Tusi Paia ma le manatu e tatau ona malamalama i ai.—1 Korinito 2:10; Efeso 3:18; 2 Peteru 3:16.

Aisea e Tāua ai le Tusi Paia?

O loo tatou ola i taimi aupito sili ona faanatinati o le talafaasolopito o le tagata. Ua faasino atu i ai e le Tusi Paia e faapea, “o le vaitaimi faaiuiu o lenei faiga o mea.” (Mataio 24:3, NW) O le tele o mea tutupu e faataunuu ai valoaga o le Tusi Paia talu mai le 1914, ua faaalia ai e faapea, ua toeitiiti nei ona ‘tuimomomoina lea ma faaumatia isi malo uma lava’ e le Malo o le Atua.—Tanielu 2:44.

Faitau a oe i ai po o le ā o valoia e le Tusi Paia i le Mataio mataupu e 24, Mareko mataupu e 13, ma le Luka mataupu e 21. O le a e iloa ai o mea tutupu na faamatalaina, o ni mea o le a faasopolia ai le lalolagi aoao. Ua latou faaaofia ai taua a le lalolagi—e tulaga ese mai i isi taua uma. Talu mai le Taua Muamua a le Lalolagi, na tatou molimauina ai oge, mafuie, ma le faatuputeleina o le amio leaga e pei ona valoia. Ma e foliga mai ua tutū nei atunuu i le siui po o le faatausiusiuga, ua toeitiiti lava alalaga mai i se faamautinoaga e aumaia ai se faailoga lē masese e iloa ai ua matuā latalata mai le faaumatiaga o le lalolagi. E tusa ai o lenei mea, na tusia ai e le aposetolo o Pauro e faapea: “O le aso o le Alii e pei o le gaoi i le po, e faapea ona oo mai ai; auā pe a latou fai ane: ‘Ua filemu ma saogalemu!’ ona oo faafuaseʻi lea o le faaumatiaga ia i latou; . . . ma latou te lē mafai ona sosola ese ai.” (1 Tesalonia 5:2, 3, NW) O ai i latou e lē mafai ona sosola ese ai? Ua faamatala mai e Pauro: O “ē ua lē iloa le Atua, ma ua le anaana i le tala lelei a lo tatou Alii o Iesu.” (2 Tesalonia 1:7-9) O le vaega o le faailoga tuufaatasi sa tatau ona faataunuuina e i latou o ē usiusitai i le poloaiga na tuuina mai i le Mataio 24:14 ina ia talaʻia le “tala lelei o le malo i le atu laulau uma.”

E faitau miliona Molimau a Ieova o loo usiusitai i lenei poloaiga, i atunuu e 231 faatasi ma motu o le sami. Latou te asiasi atu i fale o tagata, ma valaaulia totino ai i latou ina ia aʻoaʻo e uiga i le pulega a le Malo o Ieova le Atua. Latou te faasino atu ma le agalelei le auala o gaoioiga e tatau i tagata taitoatasi ona faia ina ia iai faatasi ma i latou o le a faasaoina mai lenei faiga o mea, ma ola ai i se lalolagi parataiso o le a lē toe iai se faanoanoa, se auē, leai se tiga po o le oti.—Faaaliga 21:3, 4.

Ua matuā utiuti lava le taimi mo lenei lalolagi leaga, ma o se mea talafeagai mo i latou uma o ē mananao ina ia faasaoina mai le iuga o lenei lalolagi le iloa po o ā mea o loo aafia i le ‘usiusitai i le tala lelei’ ma i lea, ua sao ai mai le faaumatiaga. O le isi taimi e toe asiasi atu ai Molimau a Ieova i lou fale, aisea e lē talia ai le valaaulia ina ia faia se suesuega faale-Tusi Paia i vaiaso taitasi? Ae, e sili atu foi ona lelei, aisea e te lē talosaga atu ai i a i latou ina ia suesue le Tusi Paia ma oe ona e te fia malamalama i ai?

[Pusa i le itulau 8]

AUALA E MALAMALAMA AI I LE TUSI PAIA

NA FAAMAUTINOA mai e Iesu i a i tatou e faapea, pe a mavae lona maliu ma le toetu, o le a ia faatuina se “auauna faamaoni ma le mafaufau” o le a auauna e avea o lana auala o fesootaiga. (Mataio 24:45-47) Na faailoa mai e le aposetolo o Pauro lenei auala i Kerisiano i Efeso ina ua ia tusi mai e faapea, “o le a faailoa mai e ala i le faapotopotoga, uiga eseese o le atamai o le Atua, e tusa ma le fuafuaga e faavavau na ia faavaeina e ala i a Keriso Iesu lo tatou Alii.” (Efeso 3:10, 11, NW) O le faapotopotoga o Kerisiano faauuina na faavaeina i le Penetekoso i le 33 T.A., lea na tuuina atu i ai le tausiga o “mea ua faailoa mai.” (Teuteronome 29:29) I le avea o se vaega, ua auauna ai Kerisiano faauuina e avea o le auauna faamaoni ma le mafaufau. (Luka 12:42-44) O lo latou tofiga mai le Atua, o le saunia lea o le malamalama faaleagaga i “mea ua faailoa mai.”

E pei lava ona faasino atu e valoaga o le Tusi Paia i le Mesia, ua faapea foi ona ia tataʻia i tatou i le tino maopoopo o Molimau Kerisiano faauuina lea ua avea nei o le auauna faamaoni ma le mafaufau.a Ua fesoasoani lea i a i tatou e malamalama ai i le Afioga a le Atua. O i latou uma e mananao ina ia malamalama i le Tusi Paia, e ao ona talisapaia e faapea, e na o le auala lava a Ieova o fesootaiga, le auauna faautauta ma le mafaufau, e mafai ona faailoa mai ai “le atamai uiga eseese o le Atua.”—Ioane 6:68.

[Faaopoopoga i lalo]