Māfana ma Faalogona

O LAGONA loloto o se vaega autū o le soifuaga faaletagata. Pe a faaalia mai e se tagata ona lagona loloto, ua ia faaalia mai ai mea o i lona loto, o ona faalogona totino, pe faapeʻī ona lagona e faatatau i tulaga atoa ma tagata. Ona o mea lē lelei na oo i ai o latou soifuaga—i nisi foʻi taimi ona o aafiaga i aganuu—ua taofiofia ai e le toʻatele o latou lagona loloto. Peitaʻi ua faalaeiauina i tatou e Ieova ina ia ati aʻe uiga lelei tau amio a le tagata lava ia, ma ia talafeagai ona faaalia le tulaga tonu o iai.—Roma 12:10; 1 Tesa. 2:7, 8.

Pe a tatou talanoa, e ono faaalia ma le saʻo e upu o loo tatou faaaogāina na lagona loloto. Peitaʻi afai e lē o ōgatusa a tatou upu o faaalia ma o tatou faalogona, e ono masalomia la e i latou o loo faalogologo mai lo tatou faamaoni. I le isi itu, afai e faaalia atu upu i ni faalogona saʻo, e mafai ona faamatagofieina ma logolelei ai la tatou talanoa, ma ono pāʻia ai loto o i latou o loo faalogologo mai.

Faaalia o le Māfana. E masani lava ona vaavaalua faalogona māfana ma manatu e faatatau i tagata. O lea la, pe a tatou talanoa e faatatau i uiga faapelepele o Ieova ma pe a tatou faaalia lo tatou talisapaia o le lelei o Ieova, e ao ona māfana o tatou leo. (Isa. 63:7-9) Pe a tatou talanoa atu i uso a tagata, e ao i le auala tatou te tautatala ai ona faaoo atu ai se uiga māfana.

Sa faalatalata atu se lepela iā Iesu ma ʻaiʻoi atu ina ia faamālōlōina o ia. Seʻi manatu i le ituaiga leo na iai le leo o Iesu ina ua ia fetalai atu: “Ou te loto i ai, ina mamā ia oe.” (Mare. 1:40, 41) Seʻi faaata foʻi i le mafaufau le vaaiga a o faalatalata lemū atu iā Iesu se fafine ua 12 tausaga o aafia i le puna toto. Na ui ane o ia i tua ma paʻi atu i le tuupao o le ofu telē o Iesu. Ina ua iloa e le fafine ua iloa mai e tagata lana mea na fai, ona savali mai lea o ia i luma ua atuatuvale, ua faapaʻū i luma o aao o Iesu, ma faailoa atu i luma o tagata uma le māfuaaga na ia paʻi atu ai i lona ofu ma le auala ua faamamāina ai o ia. Manatunatu i le auala na fetalai atu ai Iesu iā te ia: “Loʻu afafine e, o lou faatuatua ua e malolo ai; ina alu ia oe ma le manuia.” (Luka 8:42e-48) O le māfana sa faaalia e Iesu i na tulaga ua pāʻia ai o tatou loto e oo mai lava i aso nei.

Pe a iā i tatou faalogona alofa mo tagata e pei ona sa iā Iesu, ma pe a tatou mananaʻo moni lava e fesoasoani iā i latou, e mafai ona faaalia i le auala tatou te tautatala atu ai iā i latou. O se faaupuga māfana faapena, e faamaoni, e lē soona faamamafaina. O lo tatou māfana e mafai ona iai se eseesega telē i le auala e tali mai ai tagata. O le tele o mea tatou te fai atu ai i le faiva i le fanua e faalagolago i le māfana o la tatou talanoa, aemaise lava pe a tatou feutagaʻi, faalaeiau, timaʻi, ma tigā alofa.

Afai o iai ni ou faalogona māfana i isi, ia faailoa atu i ou foliga. Pe a e faaalia le māfana, e tosina mai lau ʻaufaalogologo iā te oe e pei ona tosina atu i se afi i se pō mālūlū. Afai e lē manino atu se māfana i ou foliga, e ono lē faatalitonuina lau aofia e faapea e te manatu mamafa moni lava iā i latou. E lē mafai ona e faapipiiina le māfana e pei o se mata pulepule—e ao ona moni aʻiaʻi.

E ao foʻi ona manino atu le māfana i lou leo. Afai e paū ma oolo lou leo, e ono faigatā ai ona faaalia le māfana i lau tautala. Peitaʻi o le lava o le taimi ma taumafaiga filigā, e te mafaia ai ona fai. O se tasi o mea e ono fesoasoani, o le manatua lea e faapea, o leo e lē matala lelei ma faatopelau e faapogaia ai le lē māfana o le talanoa atu. Faamasani e tau faaumi teisi ona faaleo mai leo vaivai o upu. O le faiga lenā e fesoasoani ai iā te oe ina ia māfana lau tautala.

Peitaʻi, e sili atu foʻi ona tāua le mea e taulaʻi i ai lou fiafia. Afai e taulaʻi moni ou manatu iā i latou o loo e talanoa atu i ai, ma o loo iai sou faanaunauga malosi e faaoo atu se mea e mafai ona aogā iā i latou, o le a atagia atu lenā faalogona i le auala e te tautala ai.

O se taulimaga e ola e mafai ona faagaeetia ai, ae e manaʻomia foʻi faalogona alofa. E lē lava i taimi uma le na ona faatauanau i le mafaufau; e ao foʻi ona tatou uunaʻia le loto.

Faaalia o Isi Faalogona. O lagona loloto e pei o le atuatuvale, le fefe, ma le lotomafatia e ono faaalia mai e se tagata o loo tigā. O le olioli o se lagona loloto e ao ona matilatila i o tatou olaga ma e saʻoloto lo tatou faaalia pe a tatou talanoa i isi. I le isi itu, o nisi lagona loloto e manaʻomia ona faaitiitia. E lē talafeagai ma uiga faa-Kerisiano. (Efe. 4:31, 32; Fili. 4:4) Po o le ā lava le ituaiga lagona loloto, e mafai ona faaoo atu e ala i upu tatou te filifilia, le ituaiga o leo tatou te faaaogāina, le malosi o lo tatou tautala, o o tatou foliga vaaia, atoa ma tāga.

O loo taʻua mai e le Tusi Paia ituaiga eseese o lagona loloto faaletagata. O nisi taimi e na ona taʻu mai lava o lagona loloto. O nisi taimi e faamatala mai mea na tutupu pe sii mai ni faamatalaga lea e faailoa mai ai lagona loloto. Pe a e faitauina leotele na faamatalaga, e tele ni ona āuga e ono oo i ai, e lē gata iā te oe ae o i latou foʻi o loo faalogologo, pe afai e atagia atu i lou leo na lagona loloto. Ina ia faia lea mea, e ao ona e tuu oe i le tulaga o i latou o loo e faitau atu i ai. Peitaʻi, ia faaeteete, o le lauga e lē o se faaaliga o se tifaga, ia aua la le ova faamamafaina. Fai i se auala e puʻe mautū lelei ai faamatalaga i mafaufau o i latou o loo faalogologo mai.

Talafeagai i Faamatalaga. E pei lava o le aasa, e faapena foʻi i le māfana e te tuuina i au faamatalaga atoa ma isi lagona loloto e te faaalia, e faalagolago tele lava i mea e te fai atu ai.

Suʻe i le Mataio 11:28-30, ma mātau le mea o fai mai ai. Ona faitau lea o le taʻusalaina e Iesu o le ʻautusiupu ma Faresaio, e pei ona faamauina i le Mataio mataupu e 23. E lē mafai ona tatou manatu faapea sa ia faaooina atu nei upu ogoogo o le taʻusalaina i se auala vaivai ma le faapalupē.

O le ā le ituaiga o faalogona e te talitonu e manaʻomia i se mea na tupu e pei o lea e taʻua i le Kenese mataupu e 44, e faatatau i le ʻaiʻoi a Iuta mo lona uso o Peniamina? Mātau lagona loloto o loo faamatalaina i le fuaiupu e 13, le faailoaina mai i le fuaiupu e 16 o le mea na manatu Iuta e faapea o le pogai lea o le puapuaga, ma le auala sa gaoioi ai Iosefa lava ia, e pei ona taʻua i le Kenese 45:1.

O lea la, pe tatou te faitau pe tautatala, ina ia lelei ona faia e ao ona tatou manatunatu e lē gata o upu ma manatu ae faapena foʻi i le faalogona lea e ao ona faaoo faatasi atu ai.