Mataupu 38

O le ā ua Tuu Mai i le Lumanaʻi mo Aʻu?

“OU TE fefe i le lumanaʻi, le lumanaʻi i se lalolagi ua masani i faamataʻuga faaniukilia.” O le faamatalaga lena a se talavou Siamani i sana tautalaga na fai atu i se tagata e sili ona maualuga sona tulaga i faiga faapolotiki a lona atunuu.

Atonu o le taufaafefe mai o le faaumatiaina i se afi faaniukilia ua faapena foʻi ona tau faalētonu ai lau vaaiga i le lumanaʻi. Ua fesili mai se isi talavou: “Aiseā ou te popole ai fua i le mauaina o ni togi lelei? O lea o le a pasae aʻe le lalolagi.” O le mea moni, i se suʻesuʻega na faia i tamaiti aʻoga, na taʻua e tamaiti laiti e faapea, o le mea e sili ona latou fefefe i ai o le taua faaniukilia. Na tulaga lua teineiti i le faatulagaga, lea o le mea e sili ona latou fefefe i ai o le “feoti o oʻu mātua.”

Ae peitaʻi, o le mala faaniukilia, ua lē na o le pau lena o se mea o loo faamataʻu mai i le lumanaʻi. O le taufaafefe mai o le “toʻatele naʻuā o le faitau aofaʻi o tagata, le faaleagaina o alamanuia, le faaoonaina o le siʻosiʻomaga,” ma isi mala o loo faaloloʻi mai na māfua ai se manatu o le fomaʻi taʻutaʻua i togafitiga o maʻi o le mafaufau, o B. F. Skinner e faapea: “Ua foliga mai ua faamataʻuina nei le tagata.” Mulimuli ane sa ia taʻutino mai: “Ua ou matuā lē mautonu lava. O le mea moni lava, o le a lē mafai ona tatou foʻiaina o tatou faafitauli.”

Talu ai o lea ua oo lava i le ʻauatamamai o loo mataʻitūina mea ua faalētonu la latou vaaiga i le lumanaʻi, e lētioa lava la toʻatele talavou latou te faaali maia uiga nei: “Ina tatou aai ma inu, auā o a taeao tatou te oti ai.” (1 Korinito 15:32) O le mea moni, afai o loo faalagolago atu lou lumanaʻi i tomai o le ʻaufaipolotiki ma saienitisi, e matuā faalētonu lava la. Auā ua faapea mai le Ieremia 10:23: “E le o i le tagata lona ala, e le o i le tagata e savali ona faatonuina le mea e ui ai o ia.”

E lē faapea ua lē iai i le tagata se tomai e pulea ai o ia lava. Seʻi mātau, e lē ‘o se matafaioi’ a le tagata lona faia faapea—e leai sana aiā na te puleaina ai le lumanaʻi o le lalolagi. O le pogai lena ua matuā lē taulau ai ana taumafaiga. Ona o lena māfuaaga, sa tatalo ai Ieremia mo se faalaa mai a le Atua: “Ieova e, ia e aoai mai ia te au, tau lava ina faia ma le faatatau.” (Ieremia 10:24) O le uiga o lenei mea, o lo tatou lumanaʻi o le a filifilia e Lē na Foafoaina i tatou. Ae o le a faapeī lena lumanaʻi?

Le Fuafuaga a le Atua mo le Lalolagi—Ma Lou Lumanaʻi

Ina ua faatoʻā mavae le foafoaina o le tagata, na fetalai atu ai le Atua i le uluaʻi ulugalii: “Ia fanafanau ia, ma ia uluola, ma ia tumu ai le lalolagi, ia faatoilalo i ai, ma ia pule i iʻa i le sami, ma manu felelei, atoa ma mea ola uma e fetolofi i le eleele.” (Kenese 1:28) O lea sa tuuina atu ai i le tagata le faamoemoe o le ola i se parataiso i le lalolagi aoao.

Peitaʻi ane, sa fouvale le uluaʻi ulugalii i le pulega a le Atua. E pei ona faaupu mulimuli ane e Solomona, “Na faia e le Atua le tagata e amiotonu, a o i latou ua sailiili i latou i togafiti e tele.” (Failauga 7:29) Ua faamaonia le malaia o mea o loo fuafua e tagata, ua na ona oo mai ai o puapuaga i le tupulaga o loo iai nei, ma ua matuā lē mautinoa ai ni faamoemoega mo le lumanaʻi.

Po o le uiga ea o lenei mea ua lafoaʻia e le Atua le lalolagi ia avea o se kelope ua faapolusioneina ma faaoonaina i mea faaniukilia—ma atonu ua lē o toe iai se ola? E lē mafai ona faia faapea! O ia o “le tufuga o le na faia le lalolagi; o ia na faatumauina; na ia le faia fua, na ia faia ina ia āina.” E mautinoa la le tatau ona faataunuuina o lana fuafuaga mo le lalolagi e pei ona ia fetalai i ai!—Isaia 45:18; 55:10, 11.

Ae o afea—ma e faapefea? Faitau lava oe i le Luka mataupu e 21. O iinā na valoia ai e Iesu faafitauli tonu lava ia ua pagatia ai tagata i le gasologa o lenei senituri: o taua i le va o malo, mafuiʻe, faamaʻi, lē lava meataumafa, le taatele o soligātulafono. Ua toe o se aga ona faataunuuina lea o fetalaiga a Iesu: “A afua ona faia o ia mea, ia tepa ae outou, ma ia ea i luga o outou ulu; auā e latalata ina faaolaina outou. . . . Pe a iloa e outou ia mea ua faia, ia outou iloa ua latalata le malo o le Atua.”—Luka 21:10, 11, 28, 31.

O lena Malo o le ki lea i lou lumanaʻi. Pe a taʻua faafaigofie, o se faigā malo, o le auala a le Atua mo le puleaina o le lalolagi. O lena pulega a le Malo o le a ia tafiesea faamalosi le pulea e tagata o le lalolagi. (Tanielu 2:44) ‘O i latou o loo faafanoina le lalolagi’ o le a latou fesagaʻi foʻi ma le faafanoga a le Atua, ina ia faasaoina ai le lalolagi—ma tagata—mai mala uma ona o mea leaga o loo faia e tagata.—Faaaliga 11:18; Failauga 1:4.

Talu ai le malupuipuia i le puleaina e le Malo o le Atua, o le a iʻu ina faaparataisoina ai le lalolagi atoa. (Luka 23:43) Ona toe maua ai lea o le tulaga lelei atoatoa i faiā a meafaiola uma ma o latou siʻosiʻomaga. Ioe, o le a iai le filemu i le va o tagata ma manu. (Isaia 11:6-9) O le a mou atu taua ma auupega o taua. (Salamo 46:8, 9) O solitulafono, le fia taumafa, le lē lava o fale, o maʻi—e oo lava i le oti—o le a soloiesea uma. O tagata e ʻaināina le lalolagi o le a “faafiafia foi i latou ia te i latou ona o le manuia e tele.”—Salamo 37:10, 11; 72:16; Isaia 65:21, 22; Faaaliga 21:3, 4.

‘Le Tofotofoina’ o Folafolaga a le Atua

Ola e faavavau i se parataiso—e mafai ona avea lena ma ou lumanaʻi! Peitaʻi, a o manaia lena manatu i le faalogologo atu i ai, ae atonu o loo faafaigatā ona e faamatuu ese atu le talitonuga faapea e ō atu tagata lelei uma i le lagi, pe atonu o loo iai ni ou masalosaloga i le Tusi Paia. E oo lava i nisi talavou o Molimau a Ieova e iai ni taimi latou te matuā lē mautonu ai lava i lo latou faatuatua. Mo se faaaʻoaʻoga, sa tausia aʻe Masina e ni mātua Molimau. O lona ioeina o le moni o le Tusi Paia e pei lava o lona ioeina o le ao e sosoo ma le po. Ae i se tasi aso, na ia faatoʻā malamalama lelei ai—sa ia lē iloa le māfuaaga na ia talitonu ai i le Tusi Paia. Fai mai a ia: “Ou te masalo sa ou talitonu i ai i lena taimi auā sa talitonu i ai loʻu tinā ma loʻu tamā.”

Ua faapea mai le Tusi Paia: “A leai foi se faatuatua e le mafai ona fiafia mai [le Atua].” (Eperu 11:6) Peitaʻi, o le faatuatua e lē o se mea e te mauaina talu ai o loo maua e lou tinā ma lou tamā. Afai e te fia faamautinoaina lou lumanaʻi, e tatau la ona e atiina aʻe le faatuatua e faavae i faamaoniga maumaututū—o le “faalagolago lea i mea ua faamoemoe i ai.” (Eperu 11:1) E pei ona faaupu mai e le Tusi Paia, e tatau ona e “mautinoa i mea uma lava,” (NW) po o le pei ona faaupuina i le Tusi Paia faa-Samoa, “ia tofotofo i mea uma lava” ina ia faamautinoa pe moni.—1 Tesalonia 5:21.

Ia Faamaonia e Oe Lava e Moni le Tusi Paia

Atonu e te manaʻomia ona tofotofoina muamua pe faagaeeina moni le Tusi Paia e “le Agaga o le Atua.” (2 Timoteo 3:16) E mafai faapefea ona e faia lena mea? Ia, e na o le Atua e Ona le Malosi Uma Lava na te mafaia ma le mautinoa ona ‘fetalaia mai le amataga o mea e mulimuli.’ (Isaia 43:9; 46:10) Ma e tele taimi o loo ia faia ai faapena i le Tusi Paia. Ia faitau i valoaga o loo faamauina i le Luka 19:41-44 ma le 21:20, 21 e faatatau i le paʻū o Ierusalema. Po o valoaga o loo i le Isaia 44:27, 28 ma le 45:1-4 e faatatau i le paʻū o Papelonia. Ua faamaonia e talafaasolopito o le lalolagi le lē masesē o le valoiaina e le Tusi Paia o nei mea tutupu! Na faapea mai Saine e 14 ona tausaga: “Ina ua uma ona ou iloiloina nisi o ona valoaga, sa ou matuā ofo i le mafai e le Tusi Paia ona valoia mai nei valoaga uma.”

O le saʻo aʻiaʻi o talafaasolopito, le faamaoni, le faamatala saʻo, ma le leai o se feteenaʻi o le Tusi Paia, o nisi na o māfuaaga e faatuatua atu ai i le Tusi Paia.a Ae faapefea ona e iloa e saʻo le auala lea e talitonu ai Molimau a Ieova i le Tusi Paia? Sa leʻi talia e tagata o le nuu o Perea anamua le faamalamalamaga a le aposetolo o Paulo i le Tusi Paia e aunoa ma ni fesili. Na latou “saili i Tusi i lea aso ma lea aso, pe moni ia mea.”—Galuega 17:11.

E faapena foʻi ona matou faalaeiauina oe ina ia e suʻesuʻeina maeʻaeʻā aʻoaʻoga a le Tusi Paia. O le tusi o Le Poto e Taʻitaʻia ai i le Ola e Faavavau (ua lomia e le Watchtower Bible and Tract Society of New York, Inc.) o loo talanoaina ai nei aʻoaʻoga i se auala manino. Pe afai o ou mātua o ni Molimau a Ieova, e mautinoa o le a mafai ona la fesoasoani ia te oe i ni au fesili o iai. Fai mai le manatu o se tamaʻitaʻi talavou e igoa ia Iaeli: “Ia e tautala saʻo i ou mātua pe a iai ni ou faafitauli i lenei itu. Fai ni au fesili pe a iai se mea o loo faigatā ona e talitonu i ai.” (Faataoto 15:22) I se taimi, o le a mautinoa lou talisapaia ai faapea, ua faamanuia moni lava e Ieova ana Molimau i lona foaʻi mai ia i latou o se malamalamaga ofoofogia o upu moni o le Tusi Paia!

Ua faapea mai se talavou e igoa ia Perenise: “O nisi taimi e mafatia ai loʻu mafaufau i le tulaga ua iai le lalolagi. Ou te suʻeina mau e pei o le Faaaliga 21:4, ma aumaia ai ia te aʻu se mea ou te faamoemoe i ai.” Ioe, o le iai o se faatuatua mausalī i folafolaga a le Atua e mautinoa le aafia ai o lau vaaiga i le lumanaʻi. E te tagaʻi atu ai i le lumanaʻi ma se faatalitaliga fiafia, ae lē puaoa. E oo ina avea lou ola o loo iai nei, e lē o se tauiviga e aunoa ma se iʻuga, ae o le auala lea e te ‘teumaluina ai mo oe lava le faavae lelei mo le lumanaʻi, ina ia e taofi mau atu i le ola moni.’—1 Timoteo 6:19.

Ae pe iai nisi mea e sili atu mo le mauaina o lena “ola moni” na i lo le tau ina aʻoaʻoina ma talitonu i aʻoaʻoga a le Tusi Paia?

[Faaopoopoga i lalo]

Fesili mo Talanoaga

◻ O ā mea ua fefefe i ai le toʻatele o talavou e faatatau i lo latou lumanaʻi?

◻ O le ā le uluaʻi fuafuaga a le Atua mo le lalolagi? Aiseā e mafai ai ona tatou mautinoa e lē o suia le fuafuaga a le Atua?

◻ O le ā le matafaioi ua faia e le Malo i le faataunuuina o le fuafuaga a le Atua mo le lalolagi?

◻ Aiseā e talafeagai ai ona e tofotofoina le moni o aʻoaʻoga a le Tusi Paia, ma e mafai faapefea ona e faia lena mea?

◻ E mafai faapefea ona e faamaonia ia te oe lava o le Tusi Paia na faagaeeina e le Atua?

[Faamatalaga faaopoopo i le itulau 306]

“Ua ou matuā lē mautinoa lava. O le mea moni lava, o le a lē mafai ona tatou foʻiaina o tatou faafitauli.”—Le fomaʻi o le mafaufau B. F. Skinner

[Ata i le itulau 307]

O le a lē faatagaina e Lē na Foafoaina le lalolagi le fanau a tagata ina ia faafanoina lo tatou paneta

[Ata i le itulau 309]

Po ua e faatalitonuina ea oe lava i le moni o le Tusi Paia?