Mataupu 32

E Mafai Faapefea Ona Taulau Manuia Laʻu Faigauō?

“O LE tele o faaipoipoga e lē taulau ona o le lē taulau o faigauō. O lenei faamatalaga ua taʻua soo e faamamafa ai le tāua o lenei manatu.” O le faamatalaga lea a Paul H. Landis, o se tagata suʻesuʻe i le mataupu e faatatau i le olaga faaleaiga. E mafai foʻi ona faamaonia e Luisa le saʻo o lenei faamatalaga. Ua ia faamatala mai e faapea: “O le mea na ou matuā sesē ai, o loʻu māfana tele atu lea ia Aneterea ae ou te leʻi muaʻi suʻesuʻeina po o le ā le ituaiga o tagata e iai o ia. Sa tele lava ina ma eva na o i maʻua i le vaitaimi o le ma faigauō. Ou te leʻi iloaina lava pe na ono faapefea ni ona uiga e faaalia e ese mai i nei tulaga ‘fetaui lelei’ lea e na o maʻua ai.” Na solovī le la faaipoipoga ina ua tatalaina. O le ā le ki i le ʻalofiaina o se tulaga faigatā faapena? O le iai lea o le faigauō e taulau manuia!

A o Leʻi Faia se Tuugatala

“O le tamaloa [po o le fafine] atamai, e vaavaai ma manatunatu lelei i le mea e alu i ai o ia.” (Faataoto 14:15, The Amplified Bible) O le tuputupu aʻe o le alofa fetosinaaʻi i se tasi e te matuā lē iloa lava, e oo ai i mala—e tusa lava pe foliga mai e lelei lena tagata. E mafai ona iʻu ai i lou faaipoipo atu i se tagata e matuā ese mamao lava ona faalogona ma sini mai ou faalogona ma ou sini! O le mea lea, o se tulaga atamai le muaʻi mātauina o lena tagata i le taimi a o faatasi ma nisi tagata, atonu a o tou olioli faatasi i nisi o faafiafiaga.

Na faamatala mai e Tavita o lē ua sefulu nei tausaga talu ona faaipoipo ma le fiafia e faapea: “Sa ou iloa, afai ou te māfana tele atu i le taimi muamua, o le a punitia e oʻu faalogona i aʻu faaiʻuga lelei. O lea sa ou vaavaai mamao atu ai ia Rosa e aunoa ma lona iloaina ou te manaʻo ia te ia. Sa mafai ai ona ou iloa atu le auala sa feagai ai o ia ma isi tagata, pe sa faatafai solo o ia i isi tama. I ni talanoaga faasamasamanoa, sa ou iloa ai lona tulaga ma ona sini.” E fesoasoani foʻi le saʻili ina ia iloa po o le ā le ituaiga o talaaga e iai lena tama po o le teine e ala i le talanoa atu i se tasi na te iloaina lelei lena tagata.—Faatusatusa i le Faataoto 31:31.

Le Tuugatala Muamua Lava

I le filifilia o se tasi atonu o le a avea o se paaga faaipoipo e talafeagai lelei mo oe, e mafai ona e faalatalata atu i lea tagata ma faailoa atu i ai lou manaʻo e te fia faamasani lelei ia te ia.a I le manatu o le a tuuina mai se tali mautinoa, o la oulua tuugatala muamua lava la, e lē o se mataupu e manaʻomia ona soona faamamafa. Atonu po o se tuugatala e fai taumafataga faatasi i le aoauli ia po o le tafafao foʻi faatasi ma nisi tagata, o le a mafai ai ona lua masani lelei ma faia ai se faaiʻuga pe te manaʻo e faaauau pea le lua faigauō. O le lē soona sasalu, o le a fesoasoani e tuumāmā ai ni lagona lē toʻa e te lua ono lagonaina i le taimi muamua. Ma o le ʻalofia o le faia o ni taʻutinoga i le amataga, e mafai ai ona e faaitiitia ni faalogona tigā pe afai e teena—po o le masiasi foʻi—pe afai ua musu se tasi o oulua.

E tusa lava po o le ā le ituaiga o fuafuaga na faataatia, ae ia taunuu i le taimi tonu na fuafuaina, ia laʻei mamā ma ia talafeagai. Ia faaalia le tomai i le avea o sē e talanoa lelei. Ia avea ma sē e faalogologo lelei. (Iakopo 1:19) E ui e leai ni tulafono maumaututū e tusa ai ma na mataupu, ae o le a manaʻo se tama talavou e tausisia le vaaiga e aloaʻia e le lautele i ituaiga o faatasiga faapenei. Atonu e aofia ai i lenei mea le tatalaina o le faitotoʻa mo le tamaʻitaʻi po o le taʻitaʻiina atu o ia i lona nofoa. E tatau i se tamaʻitaʻi talavou o lē na te lē o faatalitalia le faia o ia e pei o se purinisese, ona ia faaali atu se uiga talafeagai e lagolago atu ai i taumafaiga a lē o loo la tuutala. O lo la feāvataʻi, e mafai ai e se tama ma se teine o loo uō ona faataatia se faataʻitaʻiga lelei mo le lumanaʻi. Ua poloaʻiina le tane ina ia ‘āva i lana avā auā o le ipu o ia ua sili ona vaivai.’ Ma o le avā foʻi “ia ava o ia i lana tane.”—1 Peteru 3:7; Efeso 5:33.

Pe talafeagai ona uulima, feasogi ma fusifusi, ma afai ua tatau ai, o fea le taimi? O le faaalia o faalogona alofa, pe afai e faia e faaalia ai le alofa moni ae lē o ni faalogona manatu faapito ona o le mu i tuʻinanauga faaleituaiga, e mafai ona avea o ni uiga mamā ma talafeagai. Ua faaalia i le tusi o le Tusi Paia o le Pese a Solomona nisi o faaupuga fetaui o le alofa moni lea na faia i le va o le teine Sulami ma le tama leoleomamoe na ia alofa i ai ma ua lē pine ae faaipoipo atu i ai. (Pese a Solomona 1:2; 2:6; 8:5) Ae tusa ai ma lena toʻalua amio mamā, o le a matuā faaeteete ai se tama ma se teine ina ia aua neʻi avea le fefaaaliaʻi o na faalogona alofa ma tulaga lē mamā, pe iʻu ai i le faia o feusuaʻiga lē mamā.b (Kalatia 5:19, 21) O le mea moni, o na faaupuga e faailoa atu ai le alofa, e tatau ona faia i le na o le taimi lava ua oo atu ai le faigauō i le tulaga ua uma ona faia se feagaiga i lo la va ma e foliga mai ua lata ona faaipoipo. O le faaalia o le pulea totino, e mafai ai ona e ʻalofia le taaʻina ese mai le faamoemoega autū o se faigauō taulau manuia, e pei ona faaupuina ai . . .

Ina ia Iloa Lelei ai “le Tagata Lilo o le Loto”

Na lipotia mai se faamatalaga a se ʻau suʻesuʻe i le lomiga o le mekasini o le Journal of Marriage and the Family, o Me 1980, e faapea: “O faaipoipoga e foliga mai e sili atu ona tumau ma taulau manuia pe afai e ulu atu i ai tagata ma le matuā iloa lelei e le tasi o faalogona loloto o le isi.” Ioe, o se mea tāua le iloa lelei “o le tagata lilo o le loto” o lau paaga.—1 Peteru 3:4.

Peitaʻi, ‘o le utufia mai’ o faanaunauga o le loto o le isi tagata, e manaʻomia ai ni taumafaiga ma le faautauta. (Faataoto 20:5) O lea, ia fuafua ni gaoioiga e sili atu ona foliga mai e fesoasoani ia te oe e iloa lelei ai le tagata lilo o lau paaga. Atonu ua lava le ō atu i se tifaga po o se koneseti i le amataga, ae o le auai i gaoioiga e sili atu ona la maua ai se avanoa lelei e talanoa ai (e pei o le ō e faasee i le aisa, faataavale polo, ma le asiasi atu i lotoā e tuu ai manu [zoo], falemataaga, ma fale e faia ai tusigā ata) e sili atu ona aogā e faamasani lelei ai le tasi i le isi.

Ina ia iloa faalogona o lau paaga, taumafai e faaaogā fesili faatupu manatu, e pei o lenei, ‘O ā au mea e fai i ou taimi avanoa?’ ‘Afai e lava tupe, o le ā e te manaʻo e fai?’ ʻO le ā le vala o la tatou tapuaʻiga i le Atua e sili atu ona e fiafia i ai? Aiseā?’ O nei fesili o le a e maua ai ni tali loloto e fesoasoani ia te oe e te iloa ai mea o loo faatāuaina e lau paaga.

A o agaʻi ina matuā māfana le faiā ma ua tonu i o oulua manatu o le a faaipoipo, e manaʻomia loa la ona faia se talanoaga uigā i mataupu e sili ona tāua e pei o mea e te lua faatāuaina; o fea e te lua nonofo ai, ma o le a faapefea ona lua ola; mataupu faatatau i tupe, e aofia ai ma le po o le a lua taufai faigaluega uma; le fanau; aiga fuafuaina; manatu o le tagata lava ia e uiga i lana vaega fai i le faaipoipoga; ma mafaufau uma i o sini tau lalata mai ma sini i le lumanaʻi ma le auala lua te fuafuaina e faataunuuina ai nei sini. E toʻatele Molimau talavou a Ieova ua avea ma faievagelia faataimi atoa ina ua iʻu mai aʻoga ma ua faanaunau lava e faaauau pea ona auauna i lenei auala ina ua uma ona faaipoipo. O le taimi lenei mo oulua uma e faamautinoa ai ua tutusa o oulua sini faaleagaga. O le taimi foʻi lea e faailoa atu ai mea e uiga ia te oe i aso ua mavae, e ono aafia ai le faaipoipoga. O nei mea e ono aofia ai ni aitalafu tetele po o ni avega tauave. E tatau foʻi ona talanoaina i se auala tuusaʻo mataupu e faatatau i le soifua mālōlōina, e pei o se maʻi tugā, ma taunuuga e iʻu i ai.

I talanoaga faapena, ia mulimuli i le faaaʻoaʻoga a Eliu, o lē na faapea mai: “Ou te tautala saʻo atu mai loʻu loto, ma talanoa ma le faamaoni.” (Iopu 33:3, The Holy Bible in the Language of Today, a William Beck) I le faamatalaina o le auala na saunia ai o ia e lana faigauō mo se faaipoipoga fiafia tele, na faapea mai Eseta: “E lē taitai lava ona ou taumafai e ʻfaafoliga atu’ pe faapea atu ua ou malie i le mea o fai mai ai Tielu pe afai e ese le mea lea ou te lagona. Ou te lē faia lava faapena. Ou te taumafai pea ou te faamaoni.”

Aua neʻi e ʻalo pe manatu māmā i le talanoaina o mataupu maʻaleʻale ona o le popole ina neʻi lē fiafia lau paaga. O le measesē lena na faia e Peti i le taimi o le la faigauō ma Ioane. Na faapea atu Peti, e fiafia o ia i le sefeina o tupe mo le lumanaʻi, ae lē o le faamaʻimauina o tupe. Na faapea mai Ioane e ioe foʻi o ia i ai. E leʻi toe fai atu atili e Peti ni fesili ma le manatu ua la femalamalamaaʻi e tusa ai ma mataupu tautupe. Ae foliga mai o le manatu o Ioane e uiga i le sefeina o tupe mo le lumanaʻi, e mo le faatauina o se taavale tutuu taugatā! Ina ua uma ona faaipoipo, sa oo ina matuā faaalia mai lo la lē malilie faatasi i le auala e faaaogā ai tupe.

E mafai ona ʻalofia se lē femalamalamaaʻi faapena. Na faapea mai Luisa lea na muaʻi taʻua e tusa ai ma lana faigauō: “Sa tatau lava ona ou fesili atu i nisi fesili se tele, e pei o nei, ‘Ae faapefea pe a ou maʻitō ae te leʻi manaʻo e fai se pepe, o le ā lau mea o le a fai?’ Pe, ‘Afai e iai sa ta aitalafu ma ua ou manaʻo ou te nofo i le fale e tausi le ta tama, o le a faapefea ona e taulimaina na mataupu?’ Semanū ou te mātauina lelei ai ona uiga faaalia.” O talanoaga faapena e mafai ona aliali mai ai mea o i le loto, o mea ia e sili ona lelei pe iloa muamua a o leʻi faaipoipo.

Vaai i Ana Gaoioiga!

Na faapea mai Eseta: “E mafai ona faaalia atu uiga lelei o se tagata pe a na o oulua. Ae a faatasi ma isi, e masani lava ona oo i se tulaga e leʻi faatalitalia. E ono fai atu e se tasi o au uō i lau paaga se tala atonu e lē fiafia ai o ia. O le a e iloa ai nei la po o ā ona uiga faaali i le taimi o omiga. Po o le a ia inainā atu i lena tagata ma sosoʻa atu i ai ni faamatalaga?” Ua ia faaiʻu mai e faapea: “O le iai faatasi ma a ma uō ma aiga i le taimi o la ma faigauō, na matuā telē lava se fesoasoani.”

E lē gata i faafiafiaga, ae ia faaaluina foʻi se taimi e galulue faatasi ai. Auai i galuega faa-Kerisiano, e aofia ai le suʻesuʻeina o le Afioga a le Atua ma le faiva faa-Kerisiano. E lē gata i lea, o le faia foʻi o nisi o galuega ia o le a avea ma olaga masani i aso faisoo pe a uma ona faaipoipo—o le faia o faatauga mo meaʻai, sauniunia o se taumafataga, fufuluina o ipu, ma le faamamāina o le fale. O le faifaimea faatasi i tulaga moni o le olaga—atonu i se taimi o sili atu ona iai ni faigatā i lau uō—e mafai ai ona e iloa atu ai ni uiga lilo e lē o faaalia mai.

Sa iloa lelei lava e le tama leoleomamoe i le Pese a Solomona gaoioiga a le teine na ia alofa i ai pe a lē fiafia po o le taimi foʻi e galue mamafa ai o ia i le mūtinitini o le lā—e āfu ma vaivai. (Pese a Solomona 1:5, 6; 2:15) Ina ua uma ona ia iloaina le auala na teena ai ma le alofa faamaoni e lana uō teine mailei a le tupu mauʻoa o Solomona, ona ia faamatala mai lea ma le ofo e faapea: “Laʻu uo e, ua sao lou lalelei, e leai lava se pona ia te oe.” (Pese a Solomona 4:7) E mautinoa lava e lē o le uiga o lana tala e faapea, e lelei atoatoa lana uō, ae ona sa lē ponā pe taʻuvalea o ia i ni amioga lē mamā. O lona lalelei faaletino sa ō faatasi ma lona malosi tauamio, ma sa ufiufi ai so o se vaivaiga atonu na ia te ia.—Faatusatusa i le Iopu 31:7.

I le faia o se faatatauga faapena, e alu ai se taimi umi. O lea ia ʻalofia le faavavevave ona faia se faigauō. (Faataoto 21:5) E masani lava ona faia e se tama ma se teine mea uma e faatosina mai ai le alofa o le tasi i le isi. Ae o le faatagaina o se taimi umi, o le a faaalia mai ai uiga ma faanaunauga lē lelei. O se tama ma se teine e lē gata ina faagesegese ae faaaogā lelei le taimi a o faia le faigauō, o le a la iloaina le faigofie ona faia o ni fetuutuunaʻiga pe a uma le faaipoipoga. Ma le matuā iloa lelei, e mafai ona la ulu atu i le faaipoipoga ma le mautinoa e mafai ona la foʻia ni feeseeseaʻiga o le a tulaʻi mai. O le taulau manuia i le faigauō, ua sauniunia ai i laʻua mo se faaipoipoga taulau manuia ma fiafia.

[Faaopoopoga i lalo]

Fesili mo Talanoaga

◻ O le ā le sini autū o le faigauō, ma o le ā lona tāua mo se faaipoipoga fiafia?

◻ O le ā o le a fesoasoani ia te oe ina ia mafai ai ona iloa le ‘tagata lilo’ o le isi?

◻ O ā ituaiga o talanoaga e saosaolaumea i se faigauō taulau manuia?

◻ Aiseā e aogā ai le faaaluina faatasi o le taimi i ni tulaga eseese?

◻ O ā nisi o mea e iloa ai le lē lelei o se faigauō?

◻ O le ā le taimi e mafai ai ona faauma se faigauō?

[Faamatalaga faaopoopo i le itulau 255]

“O faaipoipoga e foliga mai e sili atu ona tumau ma taulau manuia pe afai e ulu atu i ai ni tagata ma le matuā iloa lelei e le tasi o faalogona loloto o le isi.”—Journal of Marriage and the Family

[Pusa/Ata i le itulau 256, 257]

Po ua Tatau ea Ona Faauma?

Pe a oo atu se faigauō i le faia o se faaiʻuga, e masani lava ona tulaʻi mai ai ni masalosaloga. Ae faapefea pe afai o na masalosaloga e māfua mai i ni faalētonu matuiā o le tagata o loo e faiuō atu i ai po o ni faalētonu foʻi i le faigauō lava ia?

Mo se faataʻitaʻiga, o le mea moni e oo lava i tagata e alofa le tasi i le isi, e mafai ona eseese o la taofi i nisi o taimi. (Faatusatusa i le Kenese 30:2; Galuega 15:39.) Ae afai lua te feeseeseaʻi toetoe lava i mea uma, pe afai o talanoaga uma e iʻu atu lava i le feʻei, po o le lua mafutaga ua fai ma masani le faauma ma toe faalelei, ia faaeteete! Na fesiligia ni fomaʻi e 400 ma sa faaalia ai faapea o le tauupu soo, o se faamaoniga sili lea o le “lei lava le matua tau faalogona mo le faaipoipoga,” atonu ua faaalia ai le “feteenaʻiga e lē mafai ona faaleleia i le va o tagata e toʻalua.”

O se tasi o māfuaaga mo popolega, atonu ua e iloaina ni uiga faalētonu e faapopoleina ai, i se tasi o e faamoemoe i ai e fai ma au paaga. O le vaaia o le sauā pe a oso faafuaseʻi le ita po o le tau aliali mai o lona manatu faapito, e lē uiga faatagata matua, itaitagofie, po o le lotomaaa atonu o le a e tau mānatu ai po o le a e manaʻo e te lua nonofo i lou olaga atoa ma lea ituaiga o tagata. Peitaʻi o le toʻatele e lē amanaʻia po o le taumafai e faia ni faamolemolega mo ia sesē ma foliga mai o loo faia taumafaiga uma ina ia sologa lelei ai pea le mafutaga e ui i le tele o faigatā. Aiseā ua faapea ai?

Talu ai o faigauō o se mea e matuā vaai mamafa i ai Kerisiano moni—o le tulaga moni lena e tatau ona iai—ua lagona ai e nisi le faamalosia o i latou ina ia faaipoipo atu i le tagata ua faauō atu i ai. Atonu e latou te faʻatu e taʻu atu i lenei tagata ua tatau ona faamuta ma e ono tigā ai lea tagata. O isi atonu ua latou popole o le a latou lē toe maua se tasi e faaipoipo atu i ai. Peitaʻi, e lē o ni māfuaaga lelei ia e faaauau ai pea se faigauō o loo tumu i faafitauli.

O le māfuaaga o le faigauō o le iloiloina lea pe faamata e ono oo atu ina faaipoipo. Ma afai e amataina e se Kerisiano se faigauō ma le malamalama lelei, o le a lē taofia ai la o ia e faauma le faigauō pe a faamaonia e tumu i faalētonu. E lē gata i lea, faamata e lē sesē ma manatu faapito le faaauau pea o se faigauō ua faasolo ina leaga ona tulaga ona o se talitonuga e faapea, ‘atonu o le a ou lē toe mauaina lava se isi?’ (Faatusatusa i le Filipi 2:4.) O lea la e tāua lo oulua fesagaʻia—ae lē o le ʻalofia—o o oulua faafitauli. Amata e ala i le vaai totoʻa i le tagata o loo e faiuō atu i ai.

Mo se faataʻitaʻiga, po o iai ea se faamaoniga o lea tamaʻitaʻi o le a gauaʻi, o se avā amio lelei? (Faataoto 31:10-31) Po o iai ni faamaoniga o lenei alii o le a faaalia le alofa lē manatu faapito ma o sē e mafai ona tausia se aiga? (Efeso 5:28, 29; 1 Timoteo 5:8) Atonu e faapea mai se tasi o ia o se auauna maelega a Ieova le Atua, ae po o iai ea ni galuega e lagolagoina ai lea taʻutinoga o le faatuatua?—Iakopo 2:17, 18.

O le mea moni, afai ua e faaaluina le tele o taimi ma faalogona i le atiina aʻe o se faigauō, aua le vavevave i le faaumaina ona ua e iloa o le tama po o le teine e lē lelei atoatoa. (Iakopo 3:2) Atonu o faalētonu o lena tagata e mafai lava ona e taulimaina.

Ae ā pe afai e leai? Ia talanoa i ai. Po o iai ni lua eseesega tetele i sini po o manatu? Pe na o ni nai lē femalamalamaaʻi? Po o le tulaga ea, e tatau ia te oulua uma ona aʻoaʻoina pe mafai faapefea ona ‘taofiofi lou loto’ ma foʻia mea i se auala filemu? (Faataoto 25:28) Pe afai e aliaʻe ni uiga faaʻonoʻono e te lē fiafia ai, po ua ia lotomaulalo ea e taliaina ona sesē ma faailoa mai se faanaunauga ia faaleleia ona uiga? Po o manaʻomia ona faagesegese lou ita, ma ia lē maʻaleʻale? (Failauga 7:9) ‘O le faapalepale le tasi i le tasi i le alofa’ o le faavae autū lena o se faaipoipoga lelei.—Efeso 4:2.

Na i lo le faauma o le lua faiā, o le talanoaina o faafitauli e iloa ai pe iai se faamoemoe e faaleleia ai le lua faiā auā le agaʻi atu i le lumanaʻi! Peitaʻi afai o le talanoaga e iʻu foʻi i se isi fefaaʻūʻūaʻi, aua la neʻi lē amanaʻiaina faailoga o puapuaga o faaloloʻi mai. (Faataoto 22:3) E foliga mai o le a lē oo ina faaleleia tulaga o mea pe a uma ona faaipoipo. O le faamutaina o le faigauō atonu o se mea sili lea ona lelei mo oulua uma.

[Ata i le itulau 253]

O le mātauina e le tasi o le isi i ni faatasitasiga ma ni tagata, e mafai ai ona oulua masani lelei e aunoa ma le aafia ai o le alofa fetosinaaʻi

[Ata i le itulau 254]

O le faatinoina o tū a le atunuu e uiga i faiga aloaʻia ma amioga lelei, ua faataatia ai se faaaʻoaʻoga o le fefaaaloaloaʻi lea e mafai ona faaauau pea i le faaipoipoga

[Ata i le itulau 259]

Pe a manino lelei ua lē sologa lelei le faigauō o le gaoioiga agalelei e tatau ona faia o le faafesagaʻi lelei lea ma faia se talanoaga e faamalamalama ai le pogai ua tatau ai ona faauma le faigauō