“Ia Uaʻi Atu i le Auala o Loo E Faalogologo Atu Ai”

O LE faalogo atu o se vaega tāua i le aʻoaʻoina o mea. E mafai foʻi ona aafia ai le faamoemoe mo le faasaoina o se tasi. A o sauniuni Ieova e laveaʻiina ona tagata mai le pologa i Aikupito, sa ia avatu faatonuga iā Mose, o lē na taʻuina atu i toeaina o Isaraelu le mea e ao ona latou fai ina ia faasaoina ai a latou ulumatua mai le faasalaga a le agelu. (Eso. 12:21-23) Ona faaoo atu lea e toeaina nei faamatalaga i aiga taʻitasi. Sa faia lenei mea e ala i le taʻu gutu atu. Sa tatau i tagata ona faalogologo ma le faaeteete. Na faapefea ona latou tali mai? Ua lipotia mai e le Tusi Paia e faapea: “Ona fai lea e le fanauga uma lava a Isaraelu faapei ona poloai mai ai Ieova ia Mose ma Arona, ua faapea ona latou faia.” (Eso. 12:28, 50, 51) O le iʻuga, na oo iā Isaraelu se laveaʻiina e maofa ai.

I aso nei, o loo sauniunia i tatou e Ieova mo se laveaʻiina e aupito sili ona tele e leʻi tupu muamua. Ma le mautinoa lava e ao ona tatou matuā uaʻi atu i faatonuga o loo ia saunia mai. E maua na faatonuga i sauniga a le faapotopotoga. Pe o e maua atoatoa ea aogā mai i na faatasitasiga? O le tele lava e faalagolago i le auala e te faalogologo atu ai.

Pe e te uaʻi atu ea i manatu tāua o faatonuga o loo maua mai i na sauniga? Pe o sau masani ea i vaiaso taʻitasi, le saʻilia o auala e faatatauina ai i lou lava soifuaga, faatonuga o loo saunia mai po o le fetufaaʻi ai foʻi ma isi?

Ia Saunia Lou Loto

Ina ia maua atoatoa aogā mai faatonuga i sauniga Kerisiano, e manaʻomia ona sauniunia o tatou loto. O le tāua o le faia faapea o loo faamatilatila mai i le mea na tupu i le taimi o le nofoaiga a le tupu Iuta o Iosefatu. Sa maumauaʻi ma le lototele Iosefatu mo le tapuaʻiga moni. Sa ia “aveeseina . . . o mea maualuluga ma tupua o Asaira i Iuta” ma faatonu alii, o sā Levī, ma ositaulaga e aʻoaʻo atu le Tulafono a Ieova i tagata i aai uma o Iuta. Peitaʻi, “ua le aveeseina o mea maualuluga.” (2 No. 17:6-9; 20:33) O tapuaʻiga i atua sesē atoa ma le ituaiga tapuaʻiga mo Ieova lea e leʻi faatagaina, sa faia i mea maualuluga, sa matuā malolosi lava ma lē mafai ai ona tafiesea.

Aiseā na lē taulau ai ona iai ni aafiaga tumau o faatonuga sa faatulaga e Iosefatu? Ua faaauau mai le faamaumauga: “O ona po ia ua le saunia ai e le nuu o latou loto i le Atua o latou tamā.” Sa latou lagona ae sa lē taulau ona gaoioi e tusa ai. Atonu pe sa latou manatu faapea e lē faigofie le malaga atu i le malumalu i Ierusalema mo le ofoina o taulaga. Po o le ā lava le tulaga, ae sa leʻi uunaʻia o latou loto e le faatuatua.

Ina ia ʻalofia le tafetafea i tua i le lalolagi a Satani, e ao ona saunia o tatou loto e talia faatonuga ua saunia mai e Ieova i aso nei. E faapefea? O se tasi o auala tāua e ala i le tatalo. E ao ona tatou tatalo ina ia tatou talia faatonuga tauatua i le agaga faafetai. (Sala. 27:4; 95:2) O le a fesoasoani lenei iā i tatou e talisapaia ai taumafaiga a o tatou uso o ē, e ui lava e lē lelei atoatoa, ae o loo faaavanoa atu i latou ina ia faaaogā e Ieova i le aʻoaʻoina o ona tagata. O le a uunaʻia ai i tatou e faafetaia Ieova e lē gata mo mea fou o loo tatou aʻoaʻoina ae faapena foʻi le avanoa e faaloloto ai lo tatou talisapaia o mea ia ua uma ona tatou aʻoaʻoina. Ona ua iai le faanaunauga e faia atoatoa le finagalo o le Atua, e tatou te tatalo ai faapenei: “Ieova e, ia e faasino mai ia te au lou ala, . . . ia e faia ina ia tasi loʻu loto e mataʻu i lou suafa.”—Sala. 86:11.

Ia E Matuā Taulaʻi i Lau Uaʻi Atu

E tele lava mea e faalavelave mai i le uaʻi atu o la tatou faalogologo. E ono faatumulia o tatou mafaufau i popolega. O le pisa ma le paʻō o gaoioiga a le aofia po o fafo o le mea o fai ai le sauniga e ono faalavelave mai iā i tatou. E ono faafaigatā le uaʻi atu ona o ni faalētonu i le tino. O i latou e iai fanau laiti e masani lava ona lē atoatoa lo latou uaʻi atu. O le ā e mafai ona fesoasoani iā i tatou ina ia taulaʻi atu la tatou uaʻi i le polokalame?

E telē le taaʻiga a mata i le mea e taulaʻi i ai la tatou uaʻi atu. Faaaogā ou fofoga [mata] e fesoasoani iā te oe e uaʻi atu, e ala i le taulaʻi o le vaai i le failauga. Pe a ia taʻua se mau—e tusa lava po ua e masani ai—suʻe pea i ai, ma mulimuli ai a o ia faitauina. Tetee atu i le faaosoosoga o le liliu o lau vaai i so o se mea lava e paʻō pe minoi mai. Afai o loo lofia e ou mata lou mafaufau i faamatalaga e faalavelave mai, o le a e misia la le tele o mea o loo faamatala mai i le pulelaa.

Afai e iai so o se “manatu lava e faalavelave mai” e faafaigatā ai mo oe ona taulaʻi atu i le polokalame, tatalo atu iā Ieova mo le toʻafilemu lea e manaʻomia e le mafaufau ma le loto ina ia uaʻi atu ai. (Sala. 94:19; Fili. 4:6, 7) Ia faia faapea e lē aunoa pe afai e manaʻomia. (Mata. 7:7, 8) O sauniga a le faapotopotoga o se sauniuniga mai iā Ieova. E mafai ona e talitonu ma le mautinoa o lona finagalo ia e maua mai ai ni aogā.—1 Ioa. 5:14, 15.

Ia Faalogologo Atu i Lauga

E mautinoa lava, e mafai ona e manatuaina ni manatu e te fiafia i ai sa e faalogo ai i lauga. Peitaʻi, o le faalogologo atu i se lauga, e tele mea e aofia ai na i lo le na o le aoao mai o manatu matilatila. E faatusaina se lauga i se malaga. E ui lava e tele mea mananaia e tau i ai le vaai a o alu le malaga, ae o le mea tāua lava o le mea e taunuu i ai le malaga, le autū. E ono taumafai le failauga e tataʻi le aofia i se ituaiga o faaiʻuga po o le uunaʻia o i latou e fai ni gaoioiga.

Manatu i le tautalaga na fai atu e Iosua i le nuu o Isaraelu, o loo faamauina i le Iosua 24:1-15. O lona sini ia uunaʻia tagata ina ia tutū mausalī mo le tapuaʻiga moni e ala i lo latou matuā vavae ese lava mai i le ifo i tupua a nuu sa siʻomia ai i latou. Aiseā sa tāua tele ai lenā mea? Auā o le tupu tele o tapuaʻiga sesē sa faapogaia ai se lamatiaga mataʻutia i le tulaga lelei o le nuu i le silafaga a Ieova. Sa tali mai le nuu i le olega a Iosua e ala i le faapea mai: “Ia mamao lava ia te i matou ona matou tuua o Ieova, ina ia auauna i atua ese; . . . Matou te auauna ia Ieova.” Ma sa latou faia faapena!—Iosua 24:16, 18, 31.

A o e faafofoga atu i se lauga, taumafai e malamalama i lona autū. Manatunatu i auala e saosaolaumea ai manatu o loo taʻua e le failauga i le ausiaina o lenā autū. Fesili ifo iā te oe po o le ā le mea o taʻu atu e faamatalaga iā te oe e fai.

Ia Faalogologo i le Taimi o Talanoaga

O le Suʻesuʻega o Le Olomatamata, le Suʻesuʻega Tautusi a le Faapotopotoga, ma vaega o le Sauniga o le Auaunaga e tauaaoina i fesili ma tali, e talanoaina ai ni mataupu faale-Tusi Paia ua lomia.

O le faalogologo la i le taimi o talanoaga o lona uiga, i nisi tulaga, e pei o le auai i se talanoaga. Ina ia maua atoatoa aogā, ia faalogologo ma le faaeteete. Mātau le mea o agaʻi i ai le talanoaga. Mātau le auala o loo faamamafa ai e le faisuʻesuʻega le matua ma manatu autū. Tali atu i ana fesili i lou mafaufau. Faalogologo a o faamatala ma faatatauina e isi le mataupu. O le tagaʻi i faamatalaga i le auala e pei ona vaai i ai isi, e ono avatu ai iā te oe se vaaiga fou i se mataupu e masani ai. Saosaolaumea i le felafolafoaʻiga e ala i le faamatala atu foʻi o ni o oe lagona o le faatuatua.—Roma 1:12.

O le muaʻi suʻesuʻeina o le mataupu mo le suʻesuʻega o le a fesoasoani iā te oe e te auai ai i le talanoaga ma mātauina tali o loo fai e isi. Afai e faafaigatā i ou tulaga ona e suʻesuʻe māeʻaeʻa ai i le mataupu, taumafai pea mo ni nai minute ia malamalama i le agaga atoa o le mataupu a o leʻi oo i le sauniga. O le faia faapea o le a mafai ai ona e aʻoaʻoina ni lesona aogā se tele mai i le talanoaga.

Ia Faalogologo i le Taimi o Fonotaga ma Tauaofiaga

E mautinoa lava e sili atu ona tele mea e faalavelave mai i taimi o fonotaga ma tauaofiaga, na i lo taimi o sauniga. O tulaga faapea e mafai ona avea ai le faalogologo o se matuā luʻitau. O le ā e mafai ona fesoasoani mai iā i tatou?

O le mea tāua lava ia lava le mālōlōga i le pō. A o leʻi amataina le polokalame i aso taʻitasi, ia matuā faamausalī lelei le matua i lou mafaufau. Tagaʻi i matua o lauga taʻitasi, ma taumafai ia iā te oe se lagona naunautaʻi e faatalitalia ai mea o le a talanoaina mai. Ia faaaogā lau Tusi Paia. Ua iloa e le toʻatele o tagata, o le fai o ni faamaumauga pupuu o manatu autū e fesoasoani lenā iā i latou e taulaʻi atu ai o latou mafaufau i le polokalame. Tusi i lalo faatonuga ua e fuafua e faatatauina i lou lava soifuaga ma lau faiva. Talatalanoa i ni nai manatu a o faimalaga atu ma toe foʻi mai i le mea o fai ai le fono i aso taʻitasi. O le faia faapea e fesoasoani iā te oe e taofimau ai le mataupu.

Ia Toleni le Fanau e Faalogo

E mafai e mātua Kerisiano ona fesoasoani i a latou fanau—e oo lava i tamameamea—ina ia ‘faapoto e iʻu ai i le faaolataga’ e ala i le aumai o i latou i sauniga a le faapotopotoga, o fonotaga ma tauaofiaga. (2 Timo. 3:15, LF) Talu ai ona o tamaiti e eseese o latou mafaufau ma le uumi o taimi e mafai ona latou uaʻi atu ai, e manaʻomia lava la le faautauta ina ia fesoasoani iā i latou e faamasani i le matuā faalogologo lelei. E ono aogā iā te oe fautuaga o loo mulimuli mai.

I le aiga, faatulaga ni taimi mo lau fanau laiti e nonofo filemu ai ma faitau po o le matamata i ata i a tatou lomiga faa-Kerisiano. I sauniga, ʻalofia le faaaogā o meataalo e faanofo filemu ai tamaiti laiti. E pei lava ona sa iai i Isaraelu anamua, e faapena foʻi i aso nei ona auai le fanau “ina ia latou faalogologo ai, ma ia aʻoaʻoina i latou.” (Teu. 31:12) O nisi taimi pe a talafeagai ai, o nisi mātua e oo lava i a latou fanau laiti ua latou avatu i ai ni a latou lava kopi o lomiga o loo talanoaina. A o faasolo ina matutua aʻe tamaiti, fesoasoani i ai e sauniuni ina ia fai sa latou vaega i mataupu na e manaʻomia ai ni sao o le aofia.

O loo faaalia e le Tusi Paia se fesootaʻiga vavalalata i le va o le faalogo atu iā Ieova ma le usitai iā te ia. E mafai ona mātauina lenei mea i upu a Mose i le nuu o Isaraelu: “Ua ou tuuina atu i ou luma o le ola ma le oti, o le manuia ma le malaia; o lenei, ia e filifili i le ola, . . . ina ia e alofa atu ia Ieova lou Atua, ma e faalogo i lona siʻufofoga, ma ia e pipii atu ia te ia.” (Teu. 30:19, 20) I aso nei, e manaʻomia le faalogo i faatonuga ua saunia mai e Ieova ma faatatauina ma le usiusitai i o tatou olaga, ina ia mauaina ai le faamaoniga a le Atua ma le faamanuiaga o le ola e faavavau. Maʻeu la le tāua, o lo tatou utagiaina o le timaʻi mai a Iesu: “Ia uaʻi atu i le auala o loo e faalogologo atu ai”!—Luka 8:18, NW.