Polokalame Fou o le Fonotaga Matagaluega
1 Na folafolaina mai e lo tatou Alii e faapea, o le a oo puapuaga i ona soo. (Mata. 24:9) O le ā la tatou vaaiga i tofotofoga? E tatou te mafaia faapefea ona onosaia puapuaga? O le polokalame o le fonotaga matagaluega o le tausaga faaleauaunaga e 2004 o le a taliina ai nei fesili. O le matua ‘Ia Olioli i le Faamoemoe. Ia Onosai i le Puapuaga.’—Roma 12:12.
2 Lauga Faasolo e Lua: O le lauga faasolo muamua, e faamatuaina “Ia Fua Mai ni Fua ma le Onosai,” o le a talanoaina ai auala e tatou te fuaina mai ai fua. O le a faatalanoaina ni nai tagata talaʻi e uiga i la latou galuega talaʻi ma le aʻoaʻo atu e tusa ai ma lo latou iloaina ua puupuu le taimi. O le a manaʻomia ona uaʻi faapitoa atu mātua i le vaega “Pe a Aʻoaʻia e Ieova,” lea o le a talanoaina ai le auala e fefulifulisaʻi ai mātua ma a latou fanau. O le failauga mulimuli o lauga faasolo, o le a faamatilatila maia le mea e ao ona fai e puipuia ai i tatou i le matuā aafia i mea a le lalolagi ma tatou lē fua mai ai.—Mare. 4:19.
3 O le matua o le lauga faasolo lona lua e faapea, “Ia Tausinio i le Taufetuliga ma le Onosai.” O le a faamanino mai ai le auala e pei ai lo tatou olaga o se tuuga. Aiseā e manaʻomia ai ona tatou taufetuli e tusa ai ma tulafono? E mafai faapefea ona tatou taulau manuia i le tuuesea o mea mamafa ma lē faavaivai ai i le taufetuliga i le ola? O fautuaga talafeagai lelei mai le Tusi Paia, o le a fesoasoani iā i tatou uma e faaauau ai ona taufetuli ma le onosai.
4 O le Onosai e Aumai ai le Faamaoniga a le Atua: O lauga e tauaaoina e ovasia femalagaaʻi o le a faamalosia ai le faatuatua o i latou e faalogo ma faatatauina na fautuaga. O se tasi o lauga a le ovasia itumalo e faamatuaina faapea, “O le Onosai e iʻu i se Tulaga Faamaoniaina.” O le a taliina i le lauga i le lautele fesili nei: O le suafa o ai e tatau ona faamoemoe i ai atunuu, ma o le ā e aofia ai i le faia o lenā mea? O le lauga faaiʻu, “O le Onosai e Maua ai lo Outou Ola,” o le a talanoaina ai le auala na mafai ai ona onosaia e Iesu faiga lē tonu e aunoa ma ni lagona toʻatamaʻi.
5 Ia manatua e aumai lau tusi, Aʻoga o le Faiva ma lau Olomatamata lea o le a talanoaina i lenā vaiaso. Ia fai ni faamaumauga e fesoasoani iā te oe e uaʻi atu ai, ma toe tapa atu foʻi i ai i le lumanaʻi. O le toe autaluina o le polokalame o le a faia mulimuli ane i le faapotopotoga.
6 Ua saunia e Ieova lava ia, lenei faigaʻai o taumafa faaleagaga. Ō maia! Inā taumamafa! O le a tatou alalaga ma le olioli pe afai, e tatou te auai ma maua aogā mai le polokalame atoa.—Isa. 65:14.