Ofoina o Lomiga i Oganuu e Eseese Gagana e Tautatala Ai
1. Aiseā ua tulaʻi mai ai se manaʻoga i le tele o faapotopotoga mo ni lomiga i se gagana ese?
1 O le tele o nofoaga, ua tele ina nofoia e tagata mai isi atunuu. O le toʻatele o nei tagata e vave tele ona latou aʻoaʻoina ma maua se malamalamaga loloto o le upu moni pe a aʻoaʻoina i la latou lava gagana. O ā ni fuafuaga ua fai mo le mauaina e tagata loto fiafia o lomiga faale-Tusi Paia i le gagana e sili atu ona latou malamalama ai?
2. O le ā le gaoioiga e manaʻomia ona fai pe a sili atu i le lua faapotopotoga e eseese gagana e tautatala ai o loo galulue i le oganuu e tasi?
2 Le Taimi e Ofoina ai Lomiga: Pe a galulue ni faapotopotoga se lua pe sili atu foʻi e eseese gagana e tautatala ai i se oganuu e tasi, ona galulue lea o toeaina o ia faapotopotoga ma ovasia o le auaunaga e faatulaga se faiga e talafeagai lelei mo ia faapotopotoga, ina ia mafai ai ona maua e tagata o ia gagana se molimau māʻeaʻea. Pe a talaʻi mai lea fale i lea fale, e lē o se faiga masani le ofoina e tagata talaʻi o lomiga i le gagana a isi faapotopotoga. Ae peitaʻi, pe a molimau atu lē fuafuaina se tagata talaʻi, pe i nofoaga faitele foʻi, e mafai ona latou ofoina atu lomiga i gagana e tautatala ai tagata o lea vaipanoa.—Tagaʻi i le Pusa Fesili o Oketopa 1990 i La Tatou Faiva o le Malo.
3. O fea le taimi e mafai ai e se faapotopotoga ona teuina ni lomiga o isi gagana?
3 Le Taimi e Tatau ai Ona Teu ni Lomiga o Isi Gagana: O le ā e mafai ona fai pe a toʻatele ni tagata o se isi gagana o loo iai i se vaipanoa, ae e leai se faapotopotoga e tautala i lea gagana? A tulaʻi mai tulaga faapena, e mafai ona teuina i faapotopotoga ni nai lomiga talafeagai o loo mafai ona maua i lenā gagana, e pei o sāvali, polosiua o le Manaomia ma le Uō a le Atua ma le tusi o le Poto. E mafai ona ofoina e le ʻautalaʻi nei lomiga pe a latou feiloaʻi ma tagata e mafai ona faitau i ia gagana.
4. E faapefea ona maua lomiga i se gagana e lē o maua i le faapotopotoga?
4 Le Auala e Ota ai Lomiga: Afai e lē o teua e le faapotopotoga lomiga o loo i le gagana e mafai ona faitau i ai se tagata loto fiafia, e faapefea ona mauaina ni lomiga i lenā gagana? E ao i le tagata talaʻi ona siaki i le auauna o tusi ina ia iloa ai po o ā lomiga o loo maua i lenā gagana, ina ia mafai ai ona ota lomiga o loo manaʻomia i le isi taimi e fai ai le ota a le faapotopotoga.
5. O le ā e mafai ona fai pe a manaʻomia ni lomiga a o leʻi oo i le taimi e maua ai lomiga ia na otaina?
5 Afai e vave ona manaʻomia, e mafai ona talanoa atu le tagata talaʻi i se tasi o le Komiti o le Auaunaga a le Faapotopotoga pe mafai ona ota tusi ia a o leʻi oo i le taimi e toe fai ai le isi ota a le faapotopotoga. Afai e taliaina le talosaga, ona fai lea o se ota faavavevave e le tagata e vaaia lomiga po o se tasi na te tofiaina, ma auina atu i le meli po o le telefoni foʻi i le ofisa o le lālā. O le a auina atu lomiga i le tuatusi masani a le faapotopotoga po o se tuatusi lē tumau pe afai e manaʻomia. Afai e talosaga ia maua atu i le aso e sosoo ai po o isi aso e lua, o le a totogi la e le faapotopotoga le tau o le tiliva.
6. O le ā lo tatou sini i le faaaogāina o lomiga faa-Kerisiano?
6 Seʻi tatou faaaogā lelei lomiga faa-Kerisiano e fesoasoani ai i “tagata uma lava,” po o le ā lava la latou gagana, ina ia ‘oo ina iloa lelei le upu moni ma faaolaina ai.’—1 Timo. 2:3, 4.