Ia Tausia le Nofoaga Tatou te Tapuaʻi ai i se Tulaga Lelei
1. O le ā le fuafuaga o le Maota o le Malo?
1 E silia i le 94,000 faapotopotoga a Molimau a Ieova i le lalolagi atoa. O le tele o faapotopotoga e potopoto mo suʻesuʻega faale-Tusi Paia ma aufaatasiga faa-Kerisiano i se Maota o le Malo, lea foʻi e fai ma nofoaga i lea vaipanoa mo le tapuaʻiga mamā.
2. Aiseā e tāua ai le tausia mamā ma ia lelei i le vaai le Maota o le Malo?
2 Faasologa Masani mo le Galuega Faamamā: O le tausia o le Maota o le Malo o se vaega tāua o la tatou auaunaga paia. O le tusi La Tatou Faiva, o loo taʻua ai i le itulau 61-62: “E tatau i uso ona manatu i ai o se faaeaga le lagolagoina tau tupe o le Maota o le Malo, aemaise foʻi i le tauofo atu ina ia tausia pea le mamā, ia matagofie i le vaai ma faaleleia. E tatau ona faaatagia talafeagai atu le faalapotopotoga a Ieova i totonu ma fafo o le Maota o le Malo.” Ona o le faaaogā soo o le Maota o le Malo i vaiaso taʻitasi, e iai la le manaʻoga faifai pea mo le faamamāina ma tausia lelei. O le tulaga masani, e tauofo mai lava tagata o le faapotopotoga po o faapotopotoga o loo faaaogāina le Maota o le Malo mo le tausiaina o nei manaʻoga. E pei lava o taimi o le Tusi Paia, ua faapena foʻi i auauna a Ieova i aso nei ona maelega e ʻgalulue e toe faasoo le fale’ po o le toe faaleleia ma le toe lipea o lo tatou nofoaga mo le tapuaʻiga.—2 No. 34:10.
3. E faapefea ona faatulaga le faamamāina o le Maota o le Malo, ma o ai e ono auai i lea galuega?
3 E tatau ona faapipii i le laupapa o faasilasilaga, se faasologa mo le faamamāina o le Maota i vaiaso taʻitasi. E tatau ona auauaʻi vaega uma o suʻesuʻega tautusi i le faamamāina o le maota i vaiaso taʻitasi, e ala i le mulimuli i se lisi o mea e ao ona fai. O i latou uma e mafai ona faia faapea, e manaʻomia ona fai se sao i nei galuega i vaiaso taʻitasi e tausia ai le Maota o le Malo ia mamā ma ia matagofie i le vaai. E mafai ona faaaofia ai ma tamaiti i lea galuega pe a vaavaai lelei e o latou mātua, ma aʻoaʻoina i latou e faaalia le talisapaia mo lenei faaeaga. Pe afai e sili atu i le tasi le faapotopotoga e faaaogāina le Maota o le Malo, e tatau ona iai se fesootaʻiga lelei ina ia lē paʻū atu lenei vala tāua o la tatou tapuaʻiga i ni nai tagata toʻaitiiti.
4. O le ā e tatau ona fai ina ia iloa ai e le faapotopotoga mea e ao ona fai pe a faamamā le Maota o le Malo?
4 E tatau ona faapipii se lisi o mea e ao ona fai, pe atonu i le mea o loo teu ai le sapalai o mea e faamamā ai le maota. E tatau ona faamatalaina i lea lisi galuega e fai faalevaiaso, e aofia ai le faaaogāina o masini e mimiti ai le pefu, fufuluina o faamalama, solo luga o laulau, sasaa lapisi, fufulu le fola, ma faata. O nisi o galuega atonu e lē manaʻomia ona faia soo, e pei o le faaiila po o le polesi o mea e fai i laupapa o loo i le Maota o le Malo, le faamamāina lelei o nofoa, ie faamalama, ma molī. O vailaau uma e faaaogā i ia galuega e tatau ona aua neʻi au i ai tamaiti ma ia tusia manino igoa o ia vailaau. E tatau ona faamalamalama puupuu le auala e ao ona faaaogā ai vailaau taʻitasi.
5. O le ā le tāua o le saogalemu, ma o ā mea e tatau ona siakiina mai lea taimi i lea taimi? (Tagaʻi i le pusa i le itulau e 4.)
5 E matuā tāua tele le saogalemu o le Maota o le Malo. (Teu. 22:8) E tusa ai ma lenei tulaga, tagaʻi i le pusa i le itulau e 4 o loo iai le lisi o nisi o mea e manaʻomia ona siakiina mai lea taimi i lea taimi ina ia puipuia ai faalavelave tutupu.
6. E faapefea ona faamaopoopoina le galuega o le tausia o le Maota o le Malo?
6 Tausia o le Maota o le Malo: Ua i le ʻautoeaina le tiute tauave e vaavaaia ai le tausiga o le Maota o le Malo. E masani lava ona tofia se toeaina po o se auauna o le faiva e faamaopoopoina lea galuega. E na te faatulagaina faasologa o mea e fai i lea aso ma lea aso i le Maota o le Malo, ma faamautinoa ua tausia mamā ma ia faaleleia mea e leaga ma ia lava le sapalai o mea e faaaogā. E tāua ona faamautinoa e leai ni tulaga e lamatia ai i le maota po o lona siʻomaga foʻi i fafo. Afai e lua pe sili atu foʻi faapotopotoga e faaaogāina le maota lea e tasi, ona tofia lea e le ʻautoeaina o ia faapotopotoga se komiti faafoe e faatulagaina fuafuaga mo le tausia o le maota ma le fanua. O lenei komiti e galulue i lalo o le taʻitaʻiga a le ʻautoeaina o ia faapotopotoga.
7. (a) O le ā ua faia i tausaga taʻitasi ina ia faamautinoa ai o loo tausia lelei le Maota o le Malo? (e) O ā mea e manaʻomia ona uaʻi atu i ai mai lea taimi i lea taimi? (Tagaʻi i le pusa i le itulau e 5.)
7 E faia i tausaga taʻitasi se iloiloga māeʻaeʻa o le Maota o le Malo. A uma lenā ona faia lea e toeaina fuafuaga e tausia lelei ai so o se mea o loo manaʻomia ona faaleleia. Atonu e valaaulia le ʻautalaʻi e fesoasoani i mea e manaʻomia ona lipea ma toe faaleleia. E tatau ona mataala tagata uma e faaleleia ni nai mea laiti ua faalētonu ma ia vave ona gaoioi agaʻi i mea o loo manaʻomia ona faaleleia.
8. O fea tonu le taimi e faafesootaʻi ai e toeaina ia le Komiti o Faugāfale?
8 Afai e manaʻomia e toeaina ni fautuaga po o se fesoasoani i le vaaia ma le tausia o le Maota o le Malo, e mafai ona latou faafesootaʻia le Ofisa i Samoa. E ono aofia ai le tausia o le kapeta, le siakiina o le ea mālūlū, ma le faaleleia o faafitauli e māfua mai i le susū o le ea i le maota po o se paipa o loo mama.
9. O le ā le faatulagaga e ao ona mulimulitaʻia pe afai e iai se manaʻoga e faaaogāina se konekarate?
9 Faaaogāina Tatau o Tupe a le Faapotopotoga: O le tele lava o galuega i le Maota o le Malo ma le fanua, e faia e i latou e tauofo. O ā latou taumafaiga lē manatu faapito o ni faailoaga lelei lea o le alofa, ma e fesoasoani tele i le faaitiitia o tupe faaalu. Pe afai e talafeagai ona faaaogā se konekarate e faia nisi o galuega e pei o le fanaina o le maota ona o iniseti, po o le faaaogāina o ni masini tetele i ni galuega e fia fai, ona vaai lea o toeaina i le tau o loo ofoina mai e konekarate eseese ina ia lē tele se tupe e alu. E latou te faia lenei mea e ala i le saunia muamua o ni faamatalaga tusitusia lelei o le galuega o le a faia, ma so o se mea e manaʻomia mo le galuega. E avatu i tagata po o konekarate eseese o ē fia faia le galuega se kopi o lenei lisi ina ia malamalama uma i latou i mea e manaʻomia mo le galuega. Pe a mauaina tauofoga tusitusia mai konekarate e ono faia le galuega, ona filifili lea e toeaina o se ofo e sili ona lelei. O lenei faiga e tatau ona mulimulitaʻia e tusa lava po o se uso lea e ofo mai e faia le galuega, pe aumaia ni mea e faaaogā i le faia o le galuega i se tau ua uma ona faatulaga mai.
10. O le ā e fai ina ia faamautinoa ai le faaaogāina tatau o tupe a le faapotopotoga?
10 E uia foʻi e toeaina laasaga talafeagai ina ia saʻoloto ai mai le totogia o lafoga mo fanua ma fale pe afai o le tulaga lenā e iai i le atunuu. Afai e sili atu i le tasi le faapotopotoga e faaaogāina le Maota o le Malo, ona faatulaga lea e le komiti faafoe o se isi teuga tupe, ma ia mauaina e ʻautoeaina o ia faapotopotoga se lipoti tusitusia i masina taʻitasi o ia teuga tupe. O le faia faapena e faailoa ai pea i toeaina le auala o loo faaaogāina i ai tupe. E paʻū atu i toeaina le tiute tauave o le faaaogāina lelei o tupe a le faapotopotoga.
11. O le ā e tatau ona fai pe a manaʻomia galuega tetele o le toe faaleleia ma le toe faafou?
11 Galuega Tetele o le Toe Faaleleia ma le Toe Faafou: Pe afai e manatu le komiti faafoe o loo iai se galuega telē e manaʻomia ona fai mo le sologa lelei o le faaaogāina o le Maota o le Malo, e latou te taʻu atu i ʻautoeaina o ia faapotopotoga lea mataupu mo faatonuga i mea e fai. Afai e manatu faapea e talafeagai ona faia ni galuega tetele o le toe faaleleia po o le toe faafou, pe e manaʻomia foʻi se fesoasoani mai isi e ese mai le faapotopotoga po o faapotopotoga ia e faaaogāina lea Maota o le Malo, ona faafesootaʻi lea e toeaina i le Ofisa i Samoa. E aumai e nei uso agavaa fautuaga aogā ma vaaia le faafoeina o le galuega. Afai e telē se tupe e manaʻomia, e talafeagai ona faia se fuafaatatau saʻo o se tupe e alu ai ma ia saunia se iʻugāfono mo le faamaoniga a le faapotopotoga.—Tagaʻi i le Pusa Fesili i La Tatou Faiva o le Malo o Fepuari 1994.
12. E faapefea ona tatou faailoa lo tatou loto talisapaia mo le faaeaga o le auai i sauniga i le Maota o le Malo?
12 Maʻeu lo tatou matuā talisapaia o lo tatou faaeaga tutasi e feiloaʻi faatasi i le Maota o le Malo! E tatou te lē mananaʻo e lafoaʻia a tatou sauniga po o le manatu māmā foʻi i ai. E mafai e tagata uma ona fesoasoani i le sologa lelei o lea fuafuaga mo le faalaeiauina o i tatou e ala i le auai atoatoa i le tausia o lo tatou Maota o le Malo. E faamamaluina ai le tapuaʻiga mamā ma aumaia ai le viiga i le suafa o Ieova. O lea seʻi o tatou taumafai e tausia lo tatou nofoaga mo le tapuaʻiga i se tulaga lelei.
[Pusa i le itulau 4]
Lisi o Mea e Siaki mo le Saogalemu
◻ O fagu fui mū e tatau ona tuu i se mea e faigofie ai ona maua, ma ia siaki i tausaga taʻitasi.
◻ E tatau ona faailoga lelei auala e ulufafo ai ma faasitepu, ia iai molī e faamalamalama ai, ma faigofie ona ui atu ai, ma e tatau ona mau lelei le siʻo lea e pipii atu i ai lima.
◻ O potu e teu ai mea e faaaogā, o fale ese ma potu e tautau ai peleue ma ofu talaloa, e tatau ona mamā, lelei ona faatulaga, ma ia leai ni mea e faigofie ona mū o iai, ma ni mea totino a se tagata, po o ni lapisi.
◻ O le taualuga ma talivai e tatau ona siaki ma faamamā e lē aunoa.
◻ O ala savali ma mea e paka ai taavale e tatau ona malamalama lelei ma ia leai ni mea e faapogaia ai le see po o le paʻū o se tasi.
◻ O faiga tau eletise ma le faiga e faasau ai le savili i totonu, e tatau ona siaki ma tausia lelei.
◻ E tatau ona vave fai so o se tutulu po o se paipa o mama ina ia puipuia ai faafitauli ogaoga e māfua mai i le susū.
◻ E tatau ona loka le maota pe a leai se tasi o iai.
[Pusa i le itulau 5]
Tausia o le Maota ma le Fanua
◻ Fafo: Po o lelei le taualuga, puipui o le fale, vali, faamalama, ma le faailoilo o loo tusia ai le Maota o le Malo o Molimau a Ieova?
◻ Fanua: Po o tausia lelei le fanua? O lelei le auala savali, le pā, ma le mea e paka ai taavale?
◻ Totonu: Po o lelei le kapeta, ie faamalama, nofoa, molī, vali o le puipui, kapoti e tuu ai lomiga, ma potu e tautau ai peleue ma ofu talaloa?
◻ Mea Faigaluega: Po o i se tulaga lelei molī, mea faaleotele leo, ea māfanafana, mea e faasau ai le savili i totonu, ma le ea mālūlū?
◻ Faleese: Po o mamā ma iai i se tulaga o loo lelei i le faaaogā?
◻ Pepa Faaletulafono a le Faapotopotoga: Po o saʻo ma ua faia ni suiga manaʻomia o pepa faaletulafono e faatatau i fanua ma Maota o le Malo? Po ua avatu i le ofisa o le malo i tausaga taʻitasi pepa ina ia saʻoloto ai mai le totogia o lafoga pe afai e manaʻomia?