Musika e Faafouina Ai
1 O pese ma musika, o ni vaega tāua ia o le tapuaʻiga moni. I Isaraelu anamua, na pepese ai Asafo ma ona uso e faapea: “Vivii atu ia outou iā Ieova, . . . Ia pepese outou iā te ia, ia outou fai pesega iā te ia; talatala atu ia outou i ona vavega uma.” (1 No. 16:8, 9) I aso nei, e sii aʻe ai o tatou leo i pesega iā Ieova i a tatou sauniga faalevaiaso i le faapotopotoga. (Efe. 5:19) Maʻeu se avanoa lelei lenei e vivii atu ai i lona suafa!—Sala. 69:30.
2 O le faalogologo atu i Pese o le Malo, o pese ia mo sauniga o loo taina e faaili, e mafai ona faatumulia ai o tatou mafaufau i manatunatuga faaleagaga. Ua faapea mai se tasi tuafafine: “A o tāina musika, e amata ai ona manatua e loʻu mafaufau ia upu. Maʻeu se auala lelei e mafai ai ona ou mafaufau pea iā Ieova, a o ou fiafia e faalogologo i musika!”—Fili. 4:8.
3 Avanoa e Olioli ai i Nei Musika: O le tāina o Pese o le Malo i le fale, e faatupuina ai se siʻomaga māfana faaleagaga e fesoasoani e maua ai le filemu i le aiga. Na tusi mai se tasi aiga e faapea: “E matou te tāina pea lava pea lenei [musika] i lo matou aiga ma le taavale, ma e lē taitai lava ona matou fiu e faalogo i lea musika e faagaee loto. O Pese o le Malo, e masani ona faatupu ai se faalogona manaia ma le toʻafilemu a o sauniuni mo sauniga faa-Kerisiano pe faimalaga atu foʻi i se tauaofiaga.” Na faapea mai se tasi tuafafine: “O le faalogologo i nei pese a o faia aʻu galuega i le fale, o se mea e matuā faafiafiaina ai aʻu—e faapena foʻi a o gaugau le tagamea! Ua ou fuafua e tāina lenei pese pe a oo ina mafatia loʻu loto. O na musika, e mafai ona faagaeetia ai! . . . O pese uma lava e faatupu ai le fiafia.” Pe e iai ni taimi na aogā ai iā te oe musika faapena?
4 O le tele o musika i aso nei, ua atagia mai ai le agaga o le lalolagi. E mafai ona fesoasoani mātua i a latou fanau ina ia atiaʻe se faanaunauga mo musika mamā e ala i le faaaogāina lelei o lipine ua puʻeina ai Pese o le Malo. E aogā foʻi nei pese matagofie faaleagaga mo le toʻatele o tagata fiafia ma tagata suʻesuʻe o le Tusi Paia talu ai e faagaeetia ai le loto ma faamamaluina ai Ieova.—Sala. 47:1, 2, 6, 7.