“Ia Tatou Vivii Faatasi i Lona Suafa”

1. O le ā le avanoa o loo loma nei e tatou te vivii faatasi ai i le suafa o le Atua, ma o le ā e tatou te faia nei e sauniuni ai?

¹ Na pese le faisalamo: “Ia outou faaneenee atu iā Ieova faatasi ma aʻu; ma ia tatou vivii faatasi i lona suafa.” (Sala. 34:3) O la tatou Tauaofiaga Itumalo o loo loma nei “Savavali ma le Atua” o le a aumai ai iā i tatou se avanoa e vivii ai i le suafa o Ieova faatasi ai ma o tatou uso ma tuafāfine mai le tele o faapotopotoga. Po ua fai ni fuafuaga mo sou āpi, auala mo femalagaaʻiga, ma aso e mālōlō ai mai galuega? O se mea lelei ona faia nei sauniuniga a o lava le taimi.—Faata. 21:5.

2. Aiseā e aogā ai le fuafua e vave taunuu i le nofoaga o loo faia ai le tauaofiaga?

² Taunuu i le Nofoaga e Faia ai le Tauaofiaga: E tele mea e fai pe a auai i se tauaofiaga. O le vave ona ō atu i le tauaofiaga, o le a fesoasoani iā i tatou ina ia lava le taimi e taulimaina ai ni mea e tutupu, ma mafai ai ona tatou nonofo lelei i o tatou nofoaga a o leʻi amata le tauaofiaga, ina ia auai faatasi i le usuina ma le lotoatoa o le pese amata ma le tatalo. (Sala. 69:30) I nai minute a o leʻi amataina le polokalame o le tauaofiaga, o le a alaala le taʻitaʻifono o le polokalame i le pulelaa a o amata tāina musika o le Malo. E tatau ona tatou nonofo uma i o tatou nofoaga ina ia amata ai le polokalame o le tauaofiaga i se tulaga mamalu.—1 Kori. 14:33, 40.

3. E faapefea ona tatou faaalia le manatunatu alofa i isi a o suʻe ni nofoa?

³ O loo timaʻi mai le Afioga a le Atua ‘Ia faia uma a tatou mea i le alofa.’ (1 Kori. 16:14) Pe a tatalaina faitotoʻa i le 8:00 i le taeao, o le manatunatu alofa i isi o le a taofia ai i tatou mai le taufetuli atu, nanati, ma tautulei, ina ia taumafai e oo atu i nofoa o loo tatou mananaʻo i ai a o leʻi oo atu i ai isi. E mafai ona taofia ni nofoa mo na o i latou lava o loo outou faimalaga faatasi i se taavale po o loo outou nonofo faatasi foʻi i le fale.—1 Kori. 13:5; Fili. 2:4.

4. O ā faatulagaga mo le mālōlōga i le aoauli, ma e aogā faapefea?

⁴ Faamolemole aumai se taumafataga mo le aoauli na i lo le alu ese atu e taumafa i se isi mea i le taimi o le mālōlōga i le aoauli. O le faia faapea o le a mafai ai e tagata uma ona olioli i talatalanoaga e atiaʻe ai, ma ia iai i le taimi amata i le aoauli. E mafai ona faaaogā se tamaʻi cooler lea e mafai ona tuu i lalo o se nofoa. O cooler tetele, o mea mataʻetaʻe, ma le ʻava malosi e lē faatagaina i le nofoaga o le tauaofiaga.

5. E faapefea ona sauniunia o tatou loto mo aʻoaʻoga o le a tatou mauaina?

⁵ Ua Saunia mo i Tatou se Faigaʻai Faaleagaga: O le tupu o Iosefatu o se tasi na “saunia [lona] loto e saʻiliʻili i le Atua.” (2 No. 19:3) E faapefea ona saunia o tatou loto a o leʻi oo i le tauaofiaga? E mafai ona tatou faia faapea a o leʻi tuua o tatou fale e ala i le mafaufau loloto i le matua o le tauaofiaga ma talanoaina faatasi ma lo tatou aiga lenā matua. O le sauniunia o o tatou loto e aofia ai le talosaga atu iā Ieova e fesoasoani iā i tatou ia iloa le uiga o aʻoaʻoga o le a tatou maua ma faatatauina.—Sala. 25:4, 5.

6. O le ā lo tatou faanaunauga, ma aiseā?

⁶ E tatou te faanaunau uma lava e aʻoaʻoina atili mea mai le Afioga a le Atua, i le iloa faapea e ala i na aʻoaʻoga, e mafai ona tatou tutupu aʻe ai i le faaolataga. (1 Pete. 2:2) O lea la, seʻi o tatou auai i le Tauaofiaga Itumalo “Savavali ma le Atua” ma ‘⁠vivii faatasi i le suafa o Ieova.’—Sala. 34:3.

[Pusa i le itulau 3]

Auala e Vivii ai i le Suafa o le Atua

◼ Sauniuni mamao

◼ Faaalia le alofa i isi

◼ Saunia o lou loto