O le a Faaolaina so o se Ituaiga o Tagata
1. O le ā e faalagolago i ai lo tatou tulaga i luma o le Atua?
1 Ua tatalaina e le agalelei faifua o le Atua le ala mo le faaolataga. O le finagalo o Ieova “ia faaolaina o tagata uma lava, ma ia oo ina iloa lelei le upu moni.” (1 Timo. 2:3, 4) O lo tatou tulaga i luma o le Atua e lē faalagolago i lo tatou ituaiga, lo latou tulaga tau i le vafealoaʻi, tomai, po o foliga vaaia, ae o lo tatou faaalia o le faatuatua i le taulaga togiola a Iesu. (Ioa. 3:16, 36) O le avea ai ma tagata faigaluega faatasi ma le Atua, e ao ona tatou tuuesea so o se lagona manatu faapito, lea e uunaʻia ai i tatou e teena tagata e talia e Ieova.
2, 3. O le ā e fesoasoani iā i tatou e aua ai neʻi faia sa tatou faaiʻuga ona o foliga vaaia o tagata?
2 ʻAlofia le Faia o Faaiʻuga i Isi: E silasila Ieova i le tagata i totonu, lea e lē manaʻo e fai se mea e leaga ai se tasi pe faailoga tagata. (1 Samu. 16:7) E tagaʻi foʻi o ia i le ituaiga tagata e ono iai lea tagata. O lea la, e silasila o ia iā i latou e mananaʻo e faafiafia lona finagalo o ni ē e manaʻomia. (Ha. 2:7) Pe tatou te vaai i isi e pei ona silasila i ai le Atua?
3 Atonu o nisi o tagata tatou te tau i ai i le faiva e faateʻia i tatou i o latou foliga vaaia. E ono matagā o latou lavalava e fai po o le lē onomea foʻi, e lē teua a latou ʻava, po o le fai foʻi o ni mama i o latou isu po o laugutu. Atonu o nisi e leai ni mea e nonofo ai. E ono soona fai i tatou e isi. I lo le faia o se faaiʻuga faapea, o tagata na e foliga mai e lē taitai lava ona avea ma tagata e tapuaʻi iā Ieova, ae e tatau ona iai se vaaiga saʻo ona “sa vālea [foʻi] i tatou anamua, ma faalogogatā, ma faasesēina.” (Tito 3:3) O le iloaina o lenei mea, e tatou te naunau ai e talaʻi i tagata uma, e oo lava iā i latou e foliga mai e lē aogā i ai la tatou talaʻiga ona o o latou foliga vaaia.
4, 5. O le ā e tatou te aʻoaʻoina mai faaaʻoaʻoga a Iesu ma Paulo?
4 Faaaʻoaʻoga i le Uluaʻi Senituri: Sa faaalu e Iesu Keriso le taimi e fesoasoani ai iā i latou ua manatu i ai nisi faapea, e mautinoa lava ua leai se faamoemoe e avea ai ma tagata tapuaʻi o Ieova. (Luka 8:26-39) E ui lava e lē manatu māmā Iesu i mea sesē, ae sa ia silafia e mafai ona aafia tagata i ala sesē o le olaga. (Luka 7:37, 38, 44-48) Sa faaalia e Iesu le finagalo malamalama, ona “mutimuti vale ai lea o lona alofa iā te i latou, auā ua faapei o mamoe i latou e leai so latou leoleo.” (Mare. 6:34) Pe mafai ona tatou faataʻitaʻi atoatoa i lana faaaʻoaʻoga?
5 Sa fetogia le aposetolo o Paulo i maa, sasa, ma faafalepuipuiina. (Galu. 14:19; 16:22, 23) Pe na ita ai ea Paulo ma faapea loa ua maumau lona taimi i na nuu ma na ituaiga o tagata? E leai. Na ia iloa e mafai ona maua tagata loto faamaoni mai i ituaiga uma o tagata, ma sa ia maumauaʻi e saʻilia i latou. Po o la tatou vaaiga ea lenā iā i latou i la tatou oganuu e ese talaaga ma aganuu e ō mai ai?
6. O le ā le aafiaga o o tatou uiga e ono iai iā i latou e fou mai i sauniga a le faapotopotoga?
6 Faafeiloaʻia o Isi i Aso Nei: E toʻatele tagata o le Atua ua fiafia ona sa taliaina i latou i totonu o le faapotopotoga e uso ma tuafāfine o ē na lē faavasegaina i latou i o latou foliga vaaia. Sa taunuu atu i le Maota o le Malo i Siamani se tamāloa e lē teua lana ʻava, e oo i ona tauʻau lona lauulu, ma palapalā foʻi ona ofu. Sa iai sona talaaga leaga. E ui i lea, sa faafeiloaʻia ma le māfana o ia i le sauniga. Sa ia lagona lona faagaeetia lea na toe foʻi ane ai i le vaiaso na sosoo ai. I sina taimi puupuu lava, ae ua ia faamamā lelei ona foliga, tuu le ulaula, ma faaipoipo lelei faaletulafono ma lana uō teine sa iai. E leʻi umi lava, ae auauna loa i laʻua ma le la fanau iā Ieova o se aiga autasi.
7. E faapefea ona tatou faataʻitaʻi i lo tatou Atua e lē faailoga tagata?
7 Ina ia faataʻitaʻi atu i lo tatou Atua e lē faailoga tagata, seʻi o tatou faasafua atu la tatou valaaulia ina ia maua e tagata uma aogā mai le agalelei faifua o le Atua.
[Pusa i le itulau 3]
“E lē faailogaina tagata e le Atua; a e peitaʻi o le mataʻu iā te ia i nuu uma lava, ma fai le amiotonu, ua talia i latou e ia.”—Galu. 10:34, 35.