Mea ua Faataunuuina e la Tatou Faiva
1. Ua faapefea ona tagaʻi Ieova i la tatou faiva, ma o le ā le tali mai a tagata?
1 E faamatalaina e le Afioga a le Atua ia Kerisiano e faapea, o loo savavali ma le manumalo i le auaunaga iā Ieova, e pei o loo i se savali o se solo o le manumalo. (2 Kori. 2:14-16) A o tatou faalauiloa atu le poto o le Atua, ua pei ai la tatou auaunaga o se mea manogi iā Ieova. Ua tosina mai nisi i le nanamu o le tala lelei; ae o isi ua latou teena. O le lē tali lelei mai o le toʻatele e lē faapea ai ua tatou lē taulau manuia i la tatou galuega. Seʻi mafaufau i mea ua faataunuuina e la tatou faiva.
2. O le ā o loo mafai ona faaalia ona o le faia o la tatou faiva?
2 Ia Faamamaluina Ieova: Ua finau mai Satani faapea, e auauna tagata iā Ieova ona o ni māfuaaga manatu faapito. (Iopu 1:9-11) Ua maua i le faiva faa-Kerisiano se avanoa e faaalia ai lo tatou tuutoina moni i le Atua. E toʻatele le ʻautalaʻi o loo latou usitaia pea le poloaʻiga ia talaʻi ma le faia o soo e ui i tulaga faigatā o le tagata lava latou, po o le lē ano mai foʻi o tagata. O lenā onosai ma le faamaoni e faafiafiaina ai le finagalo o Ieova!—Faata. 27:11.
3. Aiseā e tāua ai mo i tatou ona faaauau ona faalauiloa atu le suafa o le Atua ma lona finagalo?
3 E lē gata i lea, o loo faia e la tatou faiva se matafaioi i le faataunuuina o le finagalo o le Atua. Na fetalai Ieova e faatatau i le faaumatiaga o loo fotuaʻi mai o le lalolagi a Satani: “E iloa foʻi e nuu ese o aʻu lava o Ieova.” (Eseki. 39:7) Ina ia iloa e nuu uma Ieova, e matuā talafeagai ona faaauau le folafola atu e auauna a le Atua o lona suafa ma lona finagalo “i atunuu uma, ma ituaiga, ma gagana eseese, ma nuu.”—Faaa. 14:6, 7.
4. Ua faapefea ona avea le galuega talaʻi ma faavae o le faamasinoga?
4 Faavae o le Faamasinoga: O le talaʻia o le tala lelei o loo avea foʻi ma faavae o le faamasinoga. Na taʻua e le aposetolo o Paulo, o le a aumai e Iesu Keriso le taui ma sui i “ē ua lē iloa le Atua, ma ua lē anaana i le tala lelei a lo tatou Alii o Iesu.” (2 Tesa. 1:8, 9) O le a faamasinoina tagata e fua i la latou tali mai i le tala lelei. Maʻeu se tiute tauave matuā tāua tele o loo i auauna a le Atua! Ina ia ʻalofia la le nofosala i le toto, e lē tatau ona tatou faatalatū i le faalauiloa atu o le feʻau faasaoola o le Malo.—Galu. 20:26, 27.
5. Ua faapefea ona faaalia le alofa mutimutivale o le Atua e ala i la tatou faiva?
5 O a tatou taumafaiga faifai pea e fesoasoani atu i o tatou tuaoi ina ia maua le finagalo malie o le Atua, o se faaaliga lea o le alofa mutimutivale o Ieova. (1 Timo. 2:3, 4) I le iloaina faapea e fesuisuiaʻi le tulaga o olaga o tagata, e tatou te ō atu ai pea lava pea ma faalaeiau i latou e saʻili iā Ieova a o maua le taimi e fai ai. O le faia faapea, e tatou te faaatagia atu ai le “mutimutivale [o] le alofa o lo tatou Atua,” lea e “lē finagalo ia fano se tasi, a ia oo uma lava i le salamō.”—Luka 1:78; 2 Pete. 3:9.
6. E faapefea ona aogā iā i tatou le pisi i le auaunaga iā Ieova?
6 Aogā mo i Tatou: O lo tatou pisi i le auaunaga iā Ieova e avea o se puipuiga mo i tatou. E fesoasoani iā i tatou e “faatalitali ma naunau atu ia aulia mai le aso o le Atua” ma ʻalofia ai le faaleagaina i lenei faiga leaga o mea o loo iai. (2 Pete. 3:11-14; Tito 2:11, 12) O lea la, seʻi faaauau ona tatou ‘tumau ma le lē faagaeetia, ia alualu lo tatou faamalosi i le galuega a le Alii,’ i le iloa faapea o a tatou taumafaiga o loo fai i le faiva faa-Kerisiano e lē o se mea e faalēaogā.—1 Kori. 15:58.