Talavou o Loo Susulu Atu Faapei o Mea e Faamalamalama Aʻi
1. O faapefea ona faaalia i le Tusi Paia faapea o le a matuā iloga lava le ese o Kerisiano, ma ua faapefea ona faatatauina na upu i talavou Kerisiano i aso nei?
1 Na taʻu atu e Iesu i ona soo: “O outou, o le malamalama o le lalolagi.” (Mata. 5:14, 16) E faapei o le aai e tū i luga o le mauga e feʻilafi pe a sulugia i ave o le lā, ua faapena ona iloga le ese mai o soo o Iesu i aso nei. E toʻatele talavou i aso nei o loo ‘susulu atu faapei o mea e faamalamalama aʻi le lalolagi’ e ala i la latou amiotonu ma le maelega e molimau atu.—Fili. 2:15; Mala. 3:18.
2. O ā nisi o auala e mafai ona e molimau atu ai i faiaʻoga ma i latou i lau vasega?
2 I le Aʻoga: E faapefea ona e molimau atu i le aʻoga? E faaaogā e nisi o talavou avanoa i talanoaga i le vasega i mataupu e pei o fualaau faasāina, evolusione, ma le faasaienisi—ma le tele lava o isi mataupu faapena e molimau atu ai. Na tofia se vasega e tusia ni tala e faatatau i tagata faatupu faalavelave, ona faaaogā lea e se tasi tuafafine le avanoa e molimau ai e faatatau i le Malo o le Atua e na o le pau lea o le faamoemoe moni mo tagata. Na faagaeetia ai le faiaʻoga i le ʻānoa ma le uigā o manatu o le tala na tusia, ma na maua ai le avanoa mo le avatu atili o se isi molimau.
3. E faapefea ona faasusulu atu lou malamalama i le aʻoga e ala i lau amio?
3 O se isi auala e susulu atu ai faapei o mea e faamalamalama aʻi, e ala lea i lau amio, laʻei, ma teuga. (1 Kori. 4:9; 1 Timo. 2:9) Pe a iloa e tamaiti ma faiaʻoga e ese lau amio, atonu e taaʻina ai i latou i le upu moni ona o lau amio ma avatu ai iā te oe se avanoa e tufa atu ai upu moni o le Tusi Paia. (1 Pete. 2:12; 3:1, 2) O le faaalia o uiga faale-Atua atonu e lē faigofie, ae o le a faamanuia oe e Ieova. (1 Pete. 3:16, 17; 4:14) Ina ia faagaee lagona i le tala lelei, e te ono faitau lomiga faale-Tusi Paia i le taimi o mālōlōga po o le tuu foʻi i se mea e mafai e isi ona vaai atu i ai.
4. O ā nisi o aogā o le molimau atu i aʻoga?
4 O le pupula atu o lou malamalama i le aʻoga e faamalosia ai lou faatuatua ma fesoasoani ai iā te oe e ati aʻe lou lava mitamitaga i le auauna atu iā Ieova. (Iere. 9:24) E mafai foʻi ona avea o se puipuiga. Na faapea mai se tuafafine, “O se tasi o mea e aogā ai le talanoa atu e faatatau i o tatou talitonuga ona e lē faamalosia ai aʻu e tamaiti aʻoga e fai mea e lē ōgatasi ma mea o loo fai mai ai le Tusi Paia.”
5. (a) Ua faapefea ona faalautele atu e nisi o talavou la latou faiva? (e) O ā ni ou sini faaleagaga?
5 Faalautele Atu le Auaunaga: O le isi auala o loo susulu atu ai talavou e faapei o mea e faamalamalama aʻi, o le faalautele atu lea o la latou faiva. Ina ua uma le aʻoga maualuga a se tasi o uso, ona siitia atu lea o ia e auauna i le mea o loo iai le manaʻoga mo ē e folafola atu le Malo. E iai o ia i se tamaʻi faapotopotoga lea e tasi le toeaina e iai. Na ia tusi atu i sana uō e faapea: “E ese loʻu fiafia i laʻu auaunaga i inei, e matuā faafouina moni ai lava ona o le faiva! Matou te talanoa pe tusa ma le 20 minute i fale taʻitasi ona o le mananaʻo o tagata e faalogo mai i mea o loo e talanoa atu ai.” Na ia toe faaopoopo atu: “Ou te moomoo maʻimau pe ana faia foʻi e isi talavou le mea lava lea e tasi ma maua le faalogona o loo iā te aʻu. E leai se mea e sili atu i lo le faaaogā o mea uma o loo iā i tatou e auauna atu ai iā Ieova.”
6. O ā ni mea o loo e mitamita ai i talavou i lau faapotopotoga?
6 E ese lo matou mitamita iā te outou talavou o loo susulu atu e faapei o mea e faamalamalama aʻi le lalolagi! (1 Tesa. 2:20) A o e auauna atu iā Ieova ma lou loto atoa, ma lou agaga atoa, ma lou manatu atoa, ma lou malosi atoa, o le a e selesele “taʻisautuaselau i lenei olaga . . . [ma le ] ola atalī e maua ai le ola faavavau.”—Mare. 10:29, 30; 12:30.