Fesootaʻiga e Ala i le Vaai

O O TATOU mata e fesootaʻi ai uiga ma lagona loloto. E ono faailoa atu ai le ofo po o le fefe. E ono faailoa atu ai lagona māfana po o le alofa. I nisi taimi, e ono faaaliali atu ai se lē mautonu po o le avatu ai foʻi o faamaoniga o le faavauvau. Na taʻua e se tamāloa ua afu lona soifua e faatatau i tagata o lona atunuu o ē sa matuā mafatia lava e faapea: “E matou te talanoa i o matou mata.”

E ono fai e isi ni faaiʻuga e faatatau iā i tatou atoa ma mea o tatou fai atu ai, e faavae i le mea e taulaʻi i ai o tatou mata. I le tele o aganuu, e mātele ina talitonuina e tagata se tasi e faaleuō lava lana pupula iā i latou i taimi uma. Ae i le isi itu, latou te ono masalomia le moni po o le agavaa o se tagata o lē e autilo i ona vae po o nisi mea na i lo le tilotilo saʻo atu i le tagata o loo ia talanoa atu i ai. O nisi aganuu o le matuā faataupupula atu i le isi e manatu i ai o se lē mafaufau, e fia malosi, pe tauluʻiluʻi. O le tulaga lenā aemaise lava pe a talanoa ma nisi o le isi itupā ia po o se alii tāua po o se isi tagata faaaloalogia. Ma i nisi vaipanoa, afai e pupula saʻo atu se tagata talavou i se tagata matua o loo tautala atu i ai, e manatu i ai o se lē faaaloalo.

Peitaʻi, i vaipanoa e lē āfaina ai, o le taulaʻi saʻo atu o le vaai i se tagata a o fai atu se faamatalaga tāua e mafai ona faaopoopo atu ai le faamamafaga i mea o e fai atu ai. E ono manatu i ai o se faailoga o le talitonuina mautinoa e le failauga o ona manatu. Mātau le auala na tali atu ai Iesu ina ua faailoa ane e ona soo le matuā ofo ma faapea ane: “O ai se tasi e mafai ona faaolaina?” Ua lipotia mai e le Tusi Paia e faapea: “Ona silasila atu ai lea o Iesu [“i o latou mata,” NW] ua faapea atu ia te i latou, ‘E le mafaia e tagata lenei mea, a e mafaia mea uma e le Atua.’” (Mata. 19:25, 26) O loo faaalia mai foʻi e le Tusi Paia e faapea sa matuā mātauina lelei e le aposetolo o Paulo le tali mai a i latou sa i lana aofia. I se tasi taimi sa auai ai se tamāloa na pipili talu ina fanau mai a o talanoa atu Paulo. Ua faapea mai le Galuega 14:9, 10: “Ua faalogo mai lenei tagata ia Paulo o loo tautala; ua pulatoa atu o ia ia te ia, ua iloa foi ua ia te ia le faatuatua e malolo ai, ua fai atu ma le leo tele, ‘Ina tu saʻo ia ou vae i luga.’”

Fautuaga mo le Faiva i le Fanua. Pe a e auai i le faiva i le fanua, ia faaleuō ma māfana a o e faalatalata atu i tagata. Pe a talafeagai ai, faaaogā fesili faatupu manatu e amata ai se talanoaga i se mea atonu lua te taufai fiafia uma i ai. A o e faia lenei mea, taumafai malosi e ati aʻe se fesootaʻiga e ala i mata—po o le vaai atu i foliga o le tagata i se auala faaaloalo ma agalelei. O se ʻataʻata māfana mai i foliga o se tasi o lē o loo momoli mai e lana vaai le fiafia o loo i totonu iā te ia, e matuā logo lelei lava. O foliga atu faapena e ono taʻu atu ai i le tagata le tele o mea e faatatau i le ituaiga tagata e iai oe ma fesoasoani i le tagata ina ia matuā toʻafilemu a o e talanoa atu.

O le mātauina foʻi o foliga o le pupula mai a le tagata pe a talafeagai ai, e te ono iloa ai le auala e ao ona faafoe ai se tulaga e tulaʻi mai. Afai o toʻatamaʻi le tagata ia pe e matuā lē fiafia lava foʻi, e te ono mafai ona iloa atu. Afai e lē malamalama mai le tagata iā te oe, e te ono mātauina lava. Afai ua amata ona lē onosai le tagata, e masani lava ona faigofie ona e iloaina. Afai foʻi e matuā fiafia lava le tagata, e mafai foʻi ona mātauina lenā mea. O foliga vaaia o ona mata e ono logoina mai ai oe i le manaʻoga ia fetuutuunaʻi le saosaoa o lau tautala, ia fai ni taumafaiga faaopoopo e faaaofia ai le tagata i le talanoaga, ia faamuta le talanoaga ia po o le, agaʻi loa e faataʻitaʻi le auala e fai ai le suʻesuʻega faale-Tusi Paia.

E tusa lava po o e auai i le molimau atu i le lautele po o fai se suʻesuʻega faale-Tusi Paia i se aiga, taumafai malosi e faatumauina se fesootaʻiga faaaloalogia a o e fevaaiaʻi ma le tagata o loo e talanoa i ai. Peitaʻi ane, aua le pulatoʻa i ai, auā e mafai ona faapogaia ai le mā. (2 Tu. 8:11) Ae ia fai i se tulaga e pei lava ona masani ai, i se uiga faaleuō, e fai ma vaai i le isi tagata i ona foliga. I le tele o atunuu, o le faiga lenei e faaali atu ai le fiafia moni. E moni, pe a e faitau mai i le Tusi Paia po o se isi lomiga, o le a taulaʻi atu lau vaai i le mea o loo faitauina. Peitaʻi ina ia faamamafa se manatu, e te ono manaʻo e pupula saʻo i le tagata, e ui atonu e puupuu se taimi e fai ai. Afai e te ea i luga i taimi e mālōlō ai, o le a mafai ai foʻi ona e mātauina lana tali mai i mea o loo e faitauina atu.

Afai o le matamuli e faafaigatā ai mo oe i le taimi muamua ona e fesootaʻi e ala i lau vaai, aua e te faavaivai. Afai e te faataʻitaʻia, o le a oo ina avea ma mea e masani ai le fesootaʻi talafeagai e ala i le vaai, ma e ono fesoasoani i lou uigā i fesootaʻiga ma isi.

Pe a Fai se Lauga. O loo taʻu mai iā i tatou e le Tusi Paia e faapea a o leʻi amataina e Iesu lana Lauga i luga o le Mauga, sa “silasila atu o ia i ona soo.” (Luka 6:20) Ia faataʻitaʻi i lana faaaʻoaʻoga. Afai o lea o le a e tautala atu i luma o se vaega, faasaga i ai ma faatali mo ni nai sekone a o leʻi amata ona e tautala. I le tele o nofoaga e aofia ai i lenei mea le fesootaʻi atu i nisi i le aofia e ala i le vaai atu i ai. E ono fesoasoani lou faatalitali teisi e faateʻa ai lou lē toʻa i le amataga. E fesoasoani foʻi i le aofia e nofosauni mai ai i le po o le ā lava se uiga po o ni faalogona o loo faaali atu e ou foliga. E lē gata i lea, o lou faia o lenei mea o le a mafai ai e le aofia ona nofoi lelei ma le filemu ma sauni e uaʻi lelei mai iā te oe.

A o faagasolo lau lauga, ia vaai atu i le aofia. Aua le tau ina vaai atu i ai i le aofia atoa. Taumafai malosi e vaai atu i tagata taʻitoʻatasi o loo iai. E toetoe lava i aganuu uma, e faatalitalia ai lava le failauga e fai ma autilo atu i le aofia.

O le tagatagaʻi atu i lau aofia e tele atu mea e aofia ai na i lo le tau ina fai ma tepa atu i le isi itu o le aofia agaʻi i le isi itu. Taumafai e fesootaʻi atu i se tulaga faaaloalo i se tasi o le aofia, ma afai e talafeagai ai, fai atu se fuaiupu atoa i le tagata lenā. A uma lenā vaai atu i se isi ma fai atu i ai se fuaiupu se tasi pe lua. Aua le umi o e autilo i se tasi ina neʻi oo ai o ia i se tulaga lē mautonu, ma aua le taulaʻi atu tau lava o ni nai tagata i le aofia atoa. Faaauau pea ona faasolosolo lau vaai i le aofia atoa i le auala lea, ae a e talanoa atu loa i se tagata, ia tautala atu i lenā tagata ma mātau lana tali mai a o e leʻi vaai atu i se isi.

O au faamaumauga e ao ona i luga o le pulelaa, uu i ou lima, pe i totonu o lau Tusi Paia ina ia mafai ona e tepa tasi atu i ai e aunoa ma le liliu atoa atu i ai o lau vaai. Afai e ao ona liliu lou ulu atoa e autilo ai i au faamaumauga, o le a āfaina la le fesootaʻiga ma le aofia. E ao ona manatunatu e lē gata po o le ā le tele e te vaai ai i au faamaumauga ae po o fea foʻi le taimi e fai ai. Afai e te vaai i au faamaumauga i le taimi ua e oo ai i se vaega tāua o le lauga, e lē gata o le a lē iloa ai po o le ā le tali mai a lau aofia, ae o le a lē atoatoa ai foʻi le malosi o lau taulimaga. O le mea lava e tasi, pe afai e te autilo soo i au faamaumauga, o le a leai sau fesootaʻiga ma le aofia.

Pe a e togi atu se polo i se isi, e te autilo atu e vaai pe o ia sapoina. O manatu taʻitasi o lau lauga e pei o se mea o loo e “togi” atu i le aofia. E ono faailoa mai le “sapo” e ala i la latou tali mai—o se lue mai o le ulu, o se ʻataʻata, o se pupula sagisagi mai. Afai e te faatumauina se fesootaʻiga lelei e ala i le vaai, o le a fesoasoani lenei iā te oe e faamautinoa ai o loo “sapo” mai ou manatu.

Afai e tofia oe e faitau atu i luma o le faapotopotoga, pe e te taumafai ea e vaai atu i le aofia a o faagasolo le faitau? Afai e mulimuli le aofia i lau faitauina o le Tusi Paia, o le toʻatele o i latou o le a lē iloaina pe o e vaai atu pe leai. Peitaʻi o le vaai atu i lau aofia e mafai ona fesoasoani e toe faaolaola ai lau faitau, auā o le a e iloa ai la latou tali mai. Ae mo so o se tasi i le aofia e lē o faaaogāina a latou Tusi Paia ma o loo tafatafao solo o latou mafaufau, e ono fesoasoani le fesootaʻi ma le failauga e ala i le vaai atu i ai, e ono uunaʻia ai lo latou toe uaʻi mai i mea o loo faitau atu. O le mea moni e lē tele se taimi e mafai ona e tilotilo atu ai, ma e lē tatau foʻi ona fai i se uiga o le a tautoʻai ai lau faitau. O le mea la e fai, e sili atu ona lelei le uu o lau Tusi Paia i lou lima ma ia tuu i luga lou ulu, ae aua e te faitau punou.

I nisi taimi, e valaaulia ai toeaina e tauaaoina se lauga o le tauaofiaga mai i se manusikulipi. Ina ia lelei ona fai o lenei tofiga e manaʻomia ai le poto masani, sauniuni ma faaeteete, ma faatele ona faataʻitaʻi. O le mea moni lava ia, o le faaaogāina o se manusikulipi e lē tele ai se fesootaʻiga ma le aofia e ala i le vaai. Peitaʻi afai e lelei sauniuniga a le failauga, e mafai lava ona vaai atu i lana aofia mai lea taimi i lea taimi e aunoa ma se faalētonu o le faitauina o lana lauga. O lona faia faapea o le a fesoasoani e faatumauina ai le uaʻi mai a le aofia ma mafai ai ona latou maua atoatoa aogā mai i faatonuga tāua faaleagaga o loo tauaaoina.