Ia Pei Lava Ona Masani Ai

O LE faailoaina atu o oe i se uiga e pei lava ona e masani ai, o le a mafai ona talitonuina ai oe e isi. Pe e te talitonuina ea se mea e fai mai ai se isi a o pupuni ona mata i se matapulepule? Faamata e iai se eseesega pe afai e manaia atu foliga o le matapulepule na i lo o foliga o le failauga lava ia? Atonu e leai. Na i lo le faaaogā la o ni foliga ese, ia faaali ou lava foliga e masani ai.

Aua neʻi faafenumiaʻia le pei lava ona masani ai ma le faatalalē. O le leaga o le kalama, sesē le faaleoga, ma le tautala faasenanui e lē talafeagai. E ao foʻi ona ʻalofia faaupuga lē faaaloalo. Tatou te manaʻomia e lē aunoa ona faatumauina le mamalu talafeagai, e lē gata i la tatou tautala ae o o tatou uiga. O le tagata e na te faia e pei lava ona masani ai, o le a ia lē soona fia faamamalu naʻuā po o le soona popolevale foʻi i le taumafai ia faaofo mai isi.

I le Faiva i le Fanua. Pe a e afea se fale pe feiloaʻi i se isi i se nofoaga faitele ina ia e molimau atu i ai, pe e te lagona ea le lē toʻa? O le toʻatele lava o i tatou e faapena, peitaʻi o nisi e umi se taimi o iai i na faalogona na i lo isi. Ona o le lē toʻa e ono faapogaia ai se leo e lē masani ai po o le fefe, e ono faaalia foʻi le tete e ala i ni gaoioiga e lē masani ai a lima po o le ulu.

E tele māfuaaga e ono fetaiaʻi ai se tagata talaʻi ma lenei faafitauli. Atonu o loo ia manatu i le faailoaga o le a ia faaali atu po o le taumanatu pe faamata o le a lelei lana taulimaga. O mea uma lava na e masani ai, peitaʻi e aliaʻe faafitauli pe a soona uaʻi atu naʻuā i mea na. Afai e te tete a o e leʻi auai i le faiva, o le ā e mafai ona faia? Ia sauniuni ma le faaeteete ma tatalo faatauanau iā Ieova. (Galu. 4:29) Manatunatu i le tele o le alofa mutimutivale o Ieova i le valaauliaina o tagata ina ia olioli i se soifuaga lelei atoatoa ma le ola e faavavau i le Parataiso. Manatunatu iā i latou o loo e taumafai malosi e fesoasoani i ai ma le manaʻoga ina ia latou faalogo i le upu moni.

Ia aua foʻi neʻi galo, e i tagata le aiā e filifili ai i le mea e fai, o lona uiga e mafai ona latou talia po o le teena foʻi o le feʻau. O le mea lava foʻi lenā sa iai ina o molimau atu Iesu i Ierusalema anamua. Na pau lava lou tofiga o le talaʻi. (Mata. 24:14) E tusa lava pe lē faatagaina oe e tagata e te tautala, e mafai lava ona e molimau atu i le tau lava o lou iai i inā. O le a e taulau ona ua e faatagaina Ieova e faaaogā oe e faataunuu lona finagalo. I tulaga faapena pe a e maua le avanoa e tautala ai, o le ā o le a mātaulia ai lau tautala? Afai e te faamasani e taulaʻi atu ou manatu i manaʻoga o isi, o le a logo lelei lau tautala ma pei lava ona masani ai.

Pe a avatu se molimau, pe afai e te gaoioi ma tautala e pei ona e fai i aso faisoo, o le a mafai ona faatoʻafimālie lau ʻaufaalogologo. Atonu o le a sili ai ona latou talia manatu faale-Tusi Paia o loo e manaʻo e fetufaaʻi ai ma i latou. Na i lo le fai atu i ai o se lauga lautele, ia tou talanoa faatasi. Ia faaleuō. Ia faaalia sou naunau mo i latou, ma ia faalogo atu i o latou manatu. Peitaʻi, afai e manaʻomia e se gagana po o se aganuu a tagata ni gaoioiga e faaalia ai le faaaloalo pe a talanoa atu i tagata e lē masani ai, e ao ona e tausia na manaʻoga. Ae e mafai lava ona e nofosauni ma se ʻataʻata e pei ona e masani ai.

I Luga o le Pulelaa. Pe a e tautala atu i se vaega, e masani lava ona sili atu ona lelei le fai faatalatalanoa i se tulaga e pei ona masani ai. E mautinoa lava a toʻatele le aofia, e manaʻomia le matuā pulea lelei o le telē ma le manino o lou leo. Afai e te taumafai e fai faatauloto lau lauga, pe faapea foʻi ua tusi auʻiliʻili uma au faamatalaga e fai, atonu la ua e manatu mamafa naʻuā i le saʻo lelei ona taʻua o upu taʻitasi. E tāua faaupuga talafeagai, ae a faamamafa naʻuā, o le a soona faamamalu ai foʻi. Ua lē maua ai le tulaga e masani ai. E ao ona muaʻi mafaufauina lelei ou manatu, peitaʻi ia sili ona e uaʻi atu i au manatu o loo folasia, ae lē i le saʻo aʻiaʻi o le faaupuina.

O le mea lava e tasi pe a faatalanoa oe i se sauniga. Ia sauniuni lelei, ae aua le faitauina pe fai faatauloto au tali. Ia fai au tali i se leo fesuisuiaʻi talafeagai e pei ona masani ai ina ia faigofie ai ona logolelei i le faalogo.

E oo lava i uiga manaʻomia o le tautala ae soonafai e mafai ona foliga atu i le aofia e lē o se tulaga e masani ai. Mo se faaaʻoaʻoga, e ao ona manino lau tautala ma faaaogā faaleoga saʻo peitaʻi, aua le soona faia i se tulaga e foliga atu ai lau tautala ua faalialia pe faatagāfai. A lelei ona fai tāga faamamafa ma tāga faamatala, e mafai ona ola ai lau lauga, peitaʻi o tāga e faamamapo naʻuā pe soonafai o le a salaese ai mai i mea o loo e fai atu ai. Ia lava le leo e faaaogā, ae taumafai e aua le soona avaavau. O se mea lelei le fai ma faaalia le aasa i au taulimaga, peitaʻi e ao ona e ʻalofia le fia faalialiavale. E ao ona faaaogā fesuiaʻiga, aasa, ma faalogona i se uiga o le a lē taulaʻi atu ai manatu iā te oe lava, pe faapogaia ai le faalētonu o faalogona o lau aofia.

O nisi tagata e iai lava auala patino e masani ai mo le faailoaina atu o i latou, e tusa lava pe latou te lē o faia se lauga. O isi e tele lava ina faaaogā le gagana masani i a latou talanoaga. O le mea tāua lava o le lelei o le tautala i aso faisoo ma ia amio faaaloalo o ni Kerisiano. A oo la ina e tū atu i le pulelaa, o le a faigofie lava ona e tautala ma gaoioi i se tulaga talafeagai e pei ona masani ai.

Pe a Faitau Atu i Luma o le Lautele. E manaʻomia se taumafaiga ina ia faitau atu i luma o le lautele e pei ona masani ai. Ina ia ausia lea tulaga, ia e iloa manatu autū i le mataupu o le a e faitauina, ma mātau le auala o faatulaga aʻe ai nei manatu autū. Ia manino lelei i lou mafaufau; auā a lē faia faapea, o le a na o upu lava e te faitauina. Siaki le faaleoina o upu e lē masani ai. Faataʻitaʻi le faitauina leotele ina ia maua le fesuiaʻiga talafeagai o le leo, ma ia faavasega faatasi upu i se auala e faaoo atu ai ma le manino manatu. Ia fai pea lava pea le mea lenā seʻi oo ina sologa lelei lau faitau. Fai ina ia e iloa lelei le mataupu, ma pe a oo ina e faitauina leotele, o le a foliga mai lau faitau e tai pei o se talanoaga ola. O le mea lenā e taʻu o le fai e pei ona masani ai.

O le mea moni lava ia, o le tele o a tatou faitau atu i luma o le lautele e fai mai i a tatou lomiga faale-Tusi Paia. E ese mai i o tatou tofiga faitau Tusi Paia i le Aʻoga o le Faiva Faatiokarate, e tatou te faitauina foʻi mau i le faiva i le fanua ma pe a fai atu lauga mai i le pulelaa. E tofia uso e faitau atu le mataupu o loo talanoaina i le Suʻesuʻega o Le Olomatamata ma le Suʻesuʻega Tautusi a le Faapotopotoga. O nisi uso agavaa latou te maua tofiga e faitau atu ai manusikulipi i aofia i tauaofiaga. Pe e te faitauina le Tusi Paia po o isi lava mataupu, ia faitau vaega o loo tuufaatasia ai upu sii, i se auala e ola ai le mataupu. Afai e tele ni tagata o sii mai ni a latou faamatalaga, fetuunaʻi lou leo e tau faafetaui i tagata taʻitoʻatasi. O se upu lapataʻi: Aua le soona faamatilatilaina naʻuā, ae fai i le tulaga e pei ona masani ai ina ia ola le faitau.

O le faitau e faia i se tulaga e pei ona masani ai, o le faitau lea e pei o loo faatalanoa. E lē foliga o se mea e faatagāfai ae o loo iai se lagona o le talitonu mautinoa.