Agaʻigaʻi i Luma Faaleagaga o se Aiga

¹ E faamālō atu i aiga Kerisiano ona o le aʻoaʻoina o i latou ia muamua ona agalelei i o latou lava aiga. (1 Timo. 5:4) Peitaʻi, o le tele o taaʻiga leaga o loo siʻomia ai i tatou lea e faavaivaia ai le faatuatua, e tāua ai ona galulue mamafa aiga ina ia tumau ona malolosi faaleagaga. E faapefea ona ausia lenei tulaga?

² Suʻesuʻega a le Aiga: O le faia pea o le suʻesuʻega a le aiga i vaiaso taʻitasi, ua faailoa atu ai e ulu o aiga i a latou fanau le tāua ona faamuamua o mea faaleagaga. E ao ona faatulaga se taimi mo le suʻesuʻega. (Efe. 5:15-17) Ia ola le faiga o le suʻesuʻega mo le fanau, e ala i le uigā o le faaaogāina o le Tusi Paia. E ao ona lagona e le fanau o loo faaaofia i latou i le suʻesuʻega ina ia olioli ai.

³ Ina ia aogā le suʻesuʻega a le aiga, e ao i le ulu o le aiga ona uaʻi totoʻa i ‘lana aʻoaʻo atu.’ (1 Timo. 4:16) Ua taʻua i le tusi Aʻoga o le Faiva, i le itulau e 32: “O faapefea le agaʻigaʻi i luma faaleagaga o tagata o lou aiga? . . . Pe o latou fiafia i le polokalame a lo outou aiga o le faitauina o le Tusi Paia ma le faia o suʻesuʻega? Pe o latou avea moni ea ala o Ieova ma ala latou te ola ai? O le mataʻitūina ma le faaeteete o le a faaalia ai po o le ā e mafai ona e fai i le avea ai ma ulu o le aiga, ina ia faatulaga ma ati aʻe ai uiga faaleagaga i tagata taʻitasi o le aiga.”

⁴ I Sauniga: Ua iloa e nisi mātua le aogā o le iai foʻi o ni kopi o lomiga o loo faaaogā i sauniga a tamaiti laiti. Atonu a o faia le suʻesuʻega a le aiga, latou te fesoasoani i le fanau e fai ni tali talafeagai. E mafai foʻi ona faalaeiau e mātua a latou fanau, e ala i le toe autalu o manatu na talanoaina i le sauniga, ma faaalu le taimi e tali ai ni fesili a le fanau. E ao foʻi ona manatua e mātua ia faamālō i a latou fanau mo le faia o sao i sauniga.

⁵ Talaʻiga: O le faatulaga o taimi maʻoti e auai ai i le talaʻiga, o se tasi lea vaega o se masaniga lelei faaleagaga. Na iloa e le toʻatele na ola aʻe i aiga Molimau, o le iai o se taimi patino mo le talaʻiga i vaiaso taʻitasi, na fesoasoani iā i latou e agaʻigaʻi ai i luma o ni faifeʻau Kerisiano.

⁶ E mafai e mātua ma fanau ona manatunatu i upu a Iosua, o lē na faapea mai: “O aʻu nei ma loʻu aiga, matou te auauna iā Ieova.”—Iosua 24:15.