Faaaogāina o a Tatou Mekasini i Lea Fale ma Lea Fale
1 O le fuafuaga o le Awake! o loo taʻua manino i le itulau e 4 o lomiga taitasi: “O loo atiina aʻe e lenei lomiga le mautinoa i folafolaga a Lē na Foafoaina Mea e uiga i se lalolagi fou filemu ma le saogalemu a o leʻi maliliu le tupulaga na vāai i mea na tutupu i le 1914.” O le mea moni, e ao ai la ona tufatufaina atu i le tele e mafai ai lea lomiga i la tatou faiva i lea fale ma lea fale!
2 O le Awake! o se auala sili ona lelei mo le faatupuina o le naunau o tagata atonu e lē naunau i mea faaleagaga. Pe a e faitauina kopi taitasi, vaai ni manatu talafeagai e tufa atu i isi. O isi tagata talaʻi latou te faia ni faamaumauga i a latou lava kopi totino, ma a o leʻi ofoina atu i le fanua na kopi, latou te toe autaluina a latou faamaumauga mo ni manatu patino e tufa atu i tagata e ona fale.
3 Atonu tatou te filifili e amata la tatou taulimaga i le faia o se manatu autū i se mataupu ua talanoaina i le lomiga o le Awake! o loo tatou faaaogāina.
Afai e faaalia e le tagata e ona le fale le fiafia, e mafai ona tatou faamatala atu i ai le lomiga atonu i le faapea atu:
◼ “O lenei mataupu o loo i le Awake! o loo faamatala atili mai ai le mataupu.” Ona faitau lea i ai o se fuaiupu po o ni fuaiupu ua e filifilia ma faaauau atu faapea: “Talu ai e foliga mai e te fiafia tele i lenei mataupu, e te fiafia la e faitau i lenei mataupu faatasi ai ma isi mataupu o loo iai i lenei kopi o le Awake!? Afai e te fiafia i ai, ou te fiafia e tuu atu ia te oe faatasi ma lona soa lea o Le Olomatamata.” Afai e talia e lē ona le fale le mekasini, atonu e lelei ona fai atu i ai se faamatalaga faapenei: “O le matou galuega o loo faia i le lalolagi aoao, ma o loo lagolagoina i ni foai tauofo. Afai e te manao e faia sau foai i le asō, o le a ou taliaina ma le fiafia.”
4 Afai e faaalia le fiafia moni o lē ona le fale i mea faaleagaga, atonu tatou te faasino atu i le mau e pei o le 2 Timoteo 3:1-5 e faatatau i aso e gata ai. A uma lena, ina ia faagaee pea lona fiafia i a tatou mekasini, e mafai ona tatou faitau saʻo i ai faamatalaga o loo i le itulau e 2 o le lomiga fou o Le Olomatamata i le vaega o loo amata faapea: “O le fuafuaga o Le Olomatamata.” Mulimuli ane, ona ofo loa lea i ai o lomiga fou o Le Olomatamata ma le Awake!
5 I isi oganuu o loo iai ni tagata e foliga mai e faapitoa ni tapuaiga e fiafia i ai, na i lo o le faatomua atu o mekasini atonu e te faapea atu:
◼ “I lenei vai aai, matou te feiloai ai ma tagata e tapuai i lotu eseese, ma e matuā ese lava mai la matou lotu. Ua tele auala eseese o sailiiliga a tagata mo le Atua. [Faitau le Galuega 17:26, 27.] Pe e te ioe faapea o le toatele lava o tagata o loo mulimuli atu i lotu a o latou mātua, na i lo o le sailiili o i latou lava mo le Atua? [Faatali mo se tali.] O le manatu lena o loo taʻua i le mataupu muamua o lenei tusi, Mankind’s Search for God. [Faamatilatila faamatalaga o loo i le palakalafa e 12 i le itulau e 8.] O le aʻoaʻoina atili e uiga i isi lotu e faamalamalamaina ma aʻoaʻoina ai. O loo faamatalaina e lenei tusi le amataga, o faiga, ma aʻoaʻoga a lotu tetele o le lalolagi.” A lava le taimi, faaali i le tagata e ona le fale le faasologa o mataupu o le tusi ma ni ata se tasi pe lua i le tusi.
6 A o tatou ō atu i lea fale ma lea fale, ia tatou manatua o loo ia i tatou ni meafaigaluega silisili se lua e fesoasoani ai i tagata e faia se agaigai i luma faaleagaga, o Le Olomatamata ma le Awake! Seʻi o tatou galulue i le faagaeeina o le naunau o tagata e ona fale nei mekasini ma ia tufaina atu i so o se avanoa.