Aua Neʻi Mou Atu lo Outou Uluaʻi Alofa
1 Na aʻoaʻia e Iesu le faapotopotoga i le uluaʻi senituri i Efeso: “Ua ou lē fiafia iā te oe, ona ua e tuua lou uluaʻi alofa.” (Faaa. 2:4) E foliga mai e toʻatele ua tuua lo latou uluaʻi alofa mo Ieova. Ina ua tatou aʻoaʻoina le upu moni, na tatou ati aʻe se alofa i le Atua ma tuaoi, ma uunaʻia ai e faalauiloa atu ma le maelega lo tatou faamoemoe fou ua iai. O le ā se mea e taofia ai i tatou mai le mou atu o lo tatou uluaʻi alofa, ma le maelega i le faiva?
2 Suʻesuʻega a le Tagata Lava ia ma le Auai i Sauniga: O le ā na māfua ai ona tatou ati aʻe le alofa mo le Atua ma tuaoi ina ua muaʻi aʻoaʻoina le upu moni? Pe lē ona o mea ea na tatou aʻoaʻoina mai a tatou suʻesuʻega e uiga iā Ieova? (1 Ioa. 4:16, 19) O lea la, ina “ia faatuputeleina pea lava lo [tatou] alofa,” e ao ona ave pea i fale le poto saʻo, ma ia matuā eli “i mea loloto a le Atua.”—Fili. 1:9-11; 1 Kori. 2:10, LT.
3 O se luʻi le tausia o se faasologa lelei o le faia o suʻesuʻega a le tagata lava ia, i nei aso e gata ai ua tumu i popolega ma mea faatosina. (2 Timo. 3:1) E ao ona tatou faatulaga se taimi mo le mauaina o taumafa faaleagaga. E tāua foʻi le auai e lē aunoa i sauniga a le faapotopotoga, aemaise lava ua tatou “iloa o le Aso o loo tāulata mai.”—Epe. 10:24, 25.
4 Le Faiva: E fesoasoani le auai ma le maelega i le faiva e faatumau ai lo tatou uluaʻi alofa mo le Atua. A o talaʻi atu le tala lelei, ua faamanatu ai iā i tatou folafolaga alofa a Ieova, ma fesoasoani e faamalosia lo tatou faamoemoe ma faaolaola ai lo tatou alofa. O le aʻoaʻo atu o upu moni o le Tusi Paia, e manaʻomia ai ona tatou faia ni suʻesuʻega loloto ina ia malamalama lelei ai, ma e faamalosia ai lo tatou faatuatua.—1 Timo. 4:15, 16.
5 E faatalitalia e Ieova mea uma e aofia ai ma lo tatou alofa. (Faaa. 4:11) Aua neʻi faataga lo outou alofa e mou atu. Ia faamalosia pea lo outou uluaʻi alofa i le suʻesuʻe ma le maelega o le Tusi Paia, auai e lē aunoa i sauniga, ma faalauiloa atu ma le maelega i isi le mea e sili ona outou faapelepele i ai.—Roma 10:10.