Toe Asia i Latou Uma na Faaalia Sina Naunau Fiafia
1 O le toʻatele o i tatou ua iai i le upu moni i aso nei, ona sa mātauina lo tatou tali lelei atu i le feʻau o le Malo e se tasi, ma onosai e toe foʻi mai—atonu e tele se taimi na alu ai—e ati aʻe lenā fiafia. E ao foʻi ona faapena lo tatou toe foʻi atu ma le naunau i ē uma na faaalia sina naunau fiafia. O le mea moni, e aofia le faia o toe asiga i lo tatou tofiga e ‘faia ni soo.’—Mata. 28:19, 20.
2 Ia Iloa le Fiafia: E tusa pe lē talia e se tagata se lomiga, ae o ona foliga vaaia, o le leo, po o upu e tautala ai, e ono faailoa mai ai sina naunau fiafia i le feʻau o le Malo. O tulaga faapena e mafai ona tatou faia ai se toe asiga. E lima lelei vaiaso sosoo o asiasi atu se uso i se tagata e aunoa ma le tuuina ai o se lomiga. I le asiasiga lona ono, na talia ai e le tagata se lomiga, ma iʻu ai ina amata se suʻesuʻega faale-Tusi Paia.
3 Afai e te mātaulia le naunau fiafia, ia vave ona toe foʻi e asi, atonu i ni nai aso mulimuli ane. Aua neʻi tuu se avanoa i “lē ua leaga” e faoa ai le mea na lūlūina i le loto o le tagata. (Mata. 13:19) Ia e tausisi i au upu pe afai sa e faia ni fuafuaga e toe foʻi atu i se taimi patino.—Mata. 5:37.
4 I Galuega i Alatetele: Pe e te taumafai e ati aʻe le fiafia na e maua a o galue i alatetele, pe a o molimau lē fuafuaina atu foʻi? I le iʻuga o la oulua talanoaga, e te ono fai atu: “E ese loʻu fiafia i le ta talanoaga. O fea ou te ono maua i ai oe ina ia ta toe talanoa atili?” Pe a talafeagai, e ono filifili nisi tagata talaʻi e ave i le tagata fiafia a latou numera telefoni, ia pe fesili foʻi i ai i lana numera. Afai e masani ona vaaia oe e tagata i le galuega i alatetele i le vaipanoa lava lea, e ono lē faatalatū la e avatu a latou numera o le telefoni po o tuatusi. E tusa foʻi pe lē mananaʻo e taʻu atu le mea e nofo ai po o le telefoni, e mafai lava ona e faateleina lo latou fiafia i le isi taimi e te feiloaʻi ai i le alatele.
5 E tatou te olioli pe a vaaia ua amata ona tutupu lauolaola se togālaau na tatou totō ma faasūsūina. E faapena foʻi ona tele lo tatou olioli, i le faia o toe asiga ma fesoasoani i tagata e agaʻigaʻi i luma faaleagaga. (1 Kori. 3:6) Ia fai ma ou sini le toe asia o ē uma na faaalia sina naunau fiafia.