Faaalia o le Faaaloalo i Isi

UA TAʻU mai e le Tusi Paia iā i tatou ia “ava i tagata uma” ma ia “aua neʻi upu leaga i se tasi.” (1 Pete. 2:17; Tito 3:2) O le mea moni, o tagata uma lava tatou te feiloaʻi, “ua faia e foliga i le Atua.” (Iako. 3:9) Na maliu Keriso mo tagata taʻitoʻatasi. (Ioa. 3:16) Ma e tatau i tagata uma ona faalogo i le tala lelei ina ia mafai ai ona latou faatino ma faasaoina ai. (2 Pete. 3:9) O nisi tagata e iai uiga po o tulaga ua tatau i ai se faaeaea faapitoa.

Aiseā atonu e taumafai ai nisi tagata e latou te ʻalofia le faaalia o le ituaiga o faaaloalo lea o loo faalaeiau e le Tusi Paia? Atonu ua faamautinoa e aganuu i lou vaipanoa po o ai e tatau ona faaalia i ai le ava e tusa o lona tulaga, lanu, ituaiga, soifua mālōlōina, po o tulaga tau vafealoaʻi. O le taatele o le lē faamaoni o tagata ofisa, ua faaitiitia ai le faaaloalo mo le pule. I nisi o atunuu, ua matuā lē faamalieina lava tagata i o latou olaga, atonu e uumi itula e faigaluega ai ina ia maua mea e tausia ai, ma o loo siʻomia i latou i tagata o ē e lē faaalia le faaaloalo. Ua oo i talavou omiga mai a latou tupulaga ina ia auai i teteega faasaga i faiaʻoga e lē fiafia i ai ma isi o loo iai le pule. E toʻatele ua aafia i ata o televise o loo faaalia ai tamaiti e faitogafiti ma fia pule i o latou mātua. E manaʻomia ni taumafaiga ina ia taofia ai na manatu faalelalolagi mai le faaitiitia o lo tatou amanaʻia o isi. Peitaʻi, a tatou aloaʻia tagata, o le a mafai ona maua se siʻomaga e faigofie ona felafolafoaʻi ai manatu.

Faafeiloaʻiga Faaaloalo. O se tagata e auai i se galuega faalelotu, o loo faatalitalia na te faaalia le faaaloalo e ala i laʻei ma gaoioiga talafeagai. E eseese taofi o lea vaipanoa ma lea vaipanoa i le mea e taʻu o aganuu talafeagai. O nisi e manatu o se lē faaaloalo le faafeiloaʻi atu i se isi tagata a o fai se pulou, pe tuu le isi lima i le taga. I isi atunuu, atonu e talia ai e tagata na aga. Ia teu i finagalo lagona o tagata o le vaipanoa ina ia aua neʻi faatigā i ai. O le faia faapea, e mafai ona fesoasoani iā te oe e ʻalofia ai toʻatugā i lou faalauiloaina ma le uigā o le tala lelei.

E faatatau foʻi lenā i le auala tatou te faafeiloaʻi atu ai i isi, aemaise i latou o ē matutua. Ua masani ona manatu faapea o se lē faaaloalo mo talavou lo latou valaauina o ē matutua i o latou suafa muamua, seʻi vaganā ua maua e talavou se faatagaga e faia ai faapea. I nisi o atunuu, ua faatalitalia ai foʻi ē matutua e ʻalofia le faafeiloaʻia o tagata ese i o latou suafa muamua. E lē gata i lenā, ae o le tele o gagana, o loo faaaogā ai le upu numera tele o le “outou” po o se isi mea ina ia faaalia ai le faaaloalo mo se tasi e matua, po o sē ua iai le pule.

Faailoa Atu le Faaaloalo. I nofoaga laiti, e faatalitalia ai oe ina ia amanaʻia pe faafeiloaʻi atu i se tasi e te lua feiloaʻi i luga o le auala po o le ulufale atu i se potu. E faia lenei mea e ala i se faafeiloaʻiga faigofie, o sina ʻataʻata, le lue atu o le ulu, po o le geno foʻi o laumata. O le lē amanaʻia o le isi tagata, e manatu i ai o se lē faaaloalo.

E ui i lea, o nisi atonu e iai le lagona e lē o amanaʻia i latou, e ui lava i lou faafeiloaʻi atu i ai. E faapefea? Ona latou te manatu, ua lē taulau ona e faafeiloaʻia i latou e tusa ma lo latou tulaga. O se mea ua taatele le faavasegaina o tagata e tusa ma se tulaga faaletino o loo iai. Ua masani ona ʻalofia tagata e lē atoatoa le malosi ma iai faafitauli tau soifua mālōlōina. Peitaʻi, ua faailoa mai e le Tusi Paia iā i tatou le auala e feagai ai ma na tagata i le alofa ma le faaaloalo. (Mata. 8:2, 3) Ua aafia uma lava i tatou i nisi o itu ona ua tuufaasolo mai iā i tatou le agasala a Atamu. Po o le a e lagona ea le faaaloalogia pe afai e mātauina oe e isi i ou masei? Pe e te lē manaʻo ea ia mātauina oe ona o ou uiga lelei e tele?

O le faaaloalo foʻi e aofia ai le amanaʻia o le tulaga ulu. I nisi o nofoaga, e manaʻomia ona e talanoa atu i le ulu o le aiga a o leʻi molimau atu i isi o le ʻauaiga. E ui o lo tatou tofiga ia talaʻi ma aʻoaʻo atu e mai iā Ieova, a ua tatou iloa ua tuu atu e le Atua le pule i mātua ina ia aʻoaʻo, aʻoaʻi, ma faatonu ai a latou fanau. (Efe. 6:1-4) O lea, pe a tatou asiasi atu i aiga, o se mea masani ua talafeagai le talanoa muamua i mātua, a o leʻi faia se talanoaga faaumiumi ma le fanau.

O le avea ma tagata matua e maua ai foʻi le poto masani i le olaga, lea e tatau ona faaaloalogia. (Iopu 32:6, 7) O le amanaʻia o lenei mea sa fesoasoani i se tuafafine talavou paeonia i Sri Lanka o lē na asiasi atu i se tamāloa ua loa lona soifua. Sa teena muamua e le tamāloa le asiasiga a le tuafafine, i lona faapea ane: “E mafai faapefea i se talavou e pei o oe ona aʻoaʻo mai iā te aʻu i le Tusi Paia?” Ae na tali atu le tuafafine: “O le mea moni, ou te leʻi sau e aʻoaʻo, ae ia ta fetufaaʻi ma oe i se mea ua ou aʻoaʻoina, sa faapea ona ou matuā fiafia ai, lea e tatau lava ona ou taʻu atu i isi.” O le tali faaaloalo a le paeonia na faagaee ai le naunau o le tamāloa. Sa ia fesili ane: “Seʻi taʻu mai la iā te aʻu, po o le ā ua e aʻoaʻoina?” Na tali le tuafafine: “Ua ou aʻoaʻoina le auala ou te ola ai e faavavau.” Sa amata ai loa ona suʻesuʻe e lenei tamā matua le Tusi Paia ma Molimau a Ieova. E lē o tagata matutua uma o le a faaleo mai se faanaunauga ina ia faaaloalogia i latou, ae o le toʻatele o le a latou talisapaia.

Peitaʻi, e mafai ona ova le faaalia o le faaaloalo. I atumotu o le Pasefika ma isi atunuu, o le faaaogā ma le faaaloalo o faalagiga faaleaganuu i taimi e feiloaʻi ai i matai o se nuu po o se ʻauaiga, e mafai ona fesoasoani i Molimau ina ia logoleleia ma maua ai se avanoa e talanoa atu ai e lē gata i matai, ae faapena foʻi i tagata o loo latou pulea. E ui i lea, e lē tatau pe talafeagai ona tau faaʻoleʻole. (Faata. 29:5) I se tulaga talitutusa, atonu ua aofia ai i le kalama o se gagana ia upu faaviivii, ae o le faaaloalo faa-Kerisiano e lē manaʻomia ai ona soona faaaogā naʻuā na upu.

Taulimaga Faaaloalo. Ua uunaʻia i tatou e le Tusi Paia ina ia faamatala atu le pogai o lo tatou faamoemoe i le “agamalu ma le ava [“faaaloalo loloto,” NW].” (1 Pete. 3:15) O lea, e ui ina atonu e mafai ona tatou vave faaalialia le sesē o manatu o se isi tagata, ae pe atamai ea ona faia o lenā mea i se auala atonu e lē aloaʻia ai o ia? Faamata e lē lelei le faalogologo ma le faaeteete, po o le fesili atu foʻi i ai pe aiseā ua ia manatu ai faapena, ona iloilo mulimuli ai lea o ona manatu a o tatou felafolafoaʻi ma ia i le Tusi Paia?

O le faaaloalo e pei o lea e faaalia i le va o lē tasi tagata i lē isi, e ao foʻi ona faaalia pe a talanoa atu i se aofia mai le pulelaa. O se failauga na te faaaloalogia lana aofia o le a ia lē soona faitioina i latou pe faaalia se uiga e faafoliga atu ai: “E mafai ona outou faatatauina lenei fautuaga pe afai tou te mananaʻo moni i ai.” O le tautala i se auala faapena e na ona faalotovaivai ai o isi. Maʻeu le lelei o le manatu i le aofia o se faapotopotoga o tagata, o ē e alolofa iā Ieova ma o loo mananaʻo e auauna iā te ia! I le faataʻitaʻi iā Iesu, e ao ona tatou faaalia le malamalama pe a feagai ai ma i latou o ē atonu ua vaivai faaleagaga, e itiiti le poto masani, pe e tuai ona faatatau fautuaga a le Tusi Paia.

O le a iloa e le aofia le faaaloalo o le failauga mo i latou pe afai na te faaaofia ai ia lava o se tasi o loo manaʻomia ona atoatoa le faatatauina o le Afioga a le Atua. O lea, e atamai ai ona ʻalofia le faaaogāina i taimi uma o le suinauna “outou” pe a faatatauina mau. Seʻi mātau, mo se faaaʻoaʻoga, le eseesega i le va o le fesili “Po o outou faia ea mea uma tou te mafaia?” ma le faamatalaga “E lelei mo i tatou taʻitoʻatasi ona fesili ifo: ‘Po o oʻu faia ea mea uma ou te mafaia?’” E tutusa le agaga o fesili taʻitasi, ae i le fesili muamua o loo faaalia ai e lē o faatutusaina e le failauga ia lava ma le tulaga o iai lana aofia. O le fesili lona lua o loo faalaeiau ai tagata taʻitoʻatasi, e aofia ai ma le failauga, ina ia iloilo ona lava tulaga ma ona uunaʻiga.

Ia teena le faaosoosoga o le faia o faamatalaga fia mālie e tau ina ia taliē ai le aofia. O le a aveesea e lenei mea le mamalu o le feʻau a le Tusi Paia. E moni, e ao ona tatou fiafia i le tatou auaunaga i le Atua. Atonu foʻi e iai ni vala o le tatou mataupu ua tofia mai e mālie i nisi itu. E ui i lea, o le faaitiitia o mataupu matuiā e fai ma mataupu e taliē ai, e faaalia ai le leai o se faaaloalo mo le aofia, atoa ma le Atua.

Talosia ia faaalia pea i a tatou faafeiloaʻiga, o tatou uiga, ma la tatou tautala, o loo tatou manatu i isi i le auala ua aʻoaʻoina ai i tatou e Ieova ina ia manatu ai iā i latou.