Faamatala Atu ma le Mautinoa

PE A tautala atu se tagata ma le mautinoa, o le a iloa ai e isi o loo ia talitonu mausalī i mea o loo ia tautala ai. O se mautinoa faapena, sa faaalia lea i le faiva a le aposetolo o Paulo. Na ia tusi atu iā i latou o ē na talitonu i Tesalonia e faapea: “E lei oo atu la matou tala lelei ia te outou na o le upu, [ae faapea foʻi] . . . ma le mautinoa lava.” (1 Tesa. 1:5) Sa faaalia lenā mautinoa i le auala na ia tautala atu ai, atoa ma le auala na ia ola ai. E ao foʻi ona faaalia le mautinoa aʻiaʻi i le auala tatou te taulimaina ai upu moni o le Tusi Paia.

O le faamatala atu i se auala e mautinoa ai, e lē tutusa lea ma le tautū o se tasi i ona lava manatu, e faaulumalō, po o le faamaualuga. Na i lo lenā, pe a tautala se tagata o lē e faaalia ua mautinoa e uiga i mea o loo i le Afioga a le Atua, na te faia faapena i se auala e faaalia ai le faatuatua malosi.—Epe. 11:1.

O Taimi e Faaalia ai le Mautinoa. E tāua ona e tautala atu ma le mautinoa pe a e auai i le faiva i le fanua. E masani ona mātauina e tagata le auala e te tautala ai e pei foʻi ona mātauina o lau feʻau. E latou te iloa mai le auala o loo iai moni ou faalogona e uiga i mea o loo e fai atu ai. O le lou mautinoa e mafai ona faaoo atu ai i se tulaga e sili ona malosi na i lo o upu o loo iā te oe, se mea e sili ona tāua e fia faailoa atu.

O loo iai foʻi le manaʻoga ina ia tautala atu ma le mautinoa pe a talanoa atu i se aofia o uso talitonu. Na tusia e le aposetolo o Peteru lana uluaʻi tusi faagaeeina “ina ia avatu faalaeiauga ma se molimau faamaoni e faapea o le alofa tunoa moni lenei o le Atua.” I lea, na ia uunaʻia ai le ʻauuso: “Ia tutumau.” (1 Pete. 5:12, NW) Ina ua tusi atu i le faapotopotoga i Roma, na tautala atu le aposetolo o Paulo ma le mautinoa, lea sa faapea ona aogā iā i latou. Na ia tusi e faapea: “Ua ou mautinoa, e le mafaia e le oti, po o le ola, po o agelu, po o alii, po o e malolosi, po o mea i nei ona po, po o mea atali, po o le maualuga, po o le loloto, po o se tasi mea na faia, e le mafaia e ia mea ona faateaeseina mai i tatou i le alofa o le Atua, o loo ia Keriso Iesu lo tatou Alii.” (Roma 8:38, 39) Sa tusi faatauanau foʻi Paulo e faatatau i le manaʻomia ona talaʻi atu i isi, ma o lona lava maelega i lenā galuega na faamaonia manino ai, sa ia talitonu totino i lona tāua. (Galu. 20:18-21; Roma 10:9, 13-15) O le mautinoa faapena, e ao ona faaalia e toeaina Kerisiano i aso nei a o latou aʻoaʻo atu mai le Afioga a le Atua.

I taimi o suʻesuʻega, faapea ma isi taimi, e manaʻomia i mātua ona tautatala atu i se auala mautinoa pe a talanoaina mataupu faaleagaga ma a latou fanau. O lenei mea e manaʻomia ai i mātua ona atiina aʻe i o latou lava loto le alofa mo le Atua, atoa ma ona ala. Ona mafai ai lea ona latou tautatala atu i se auala mautinoa mai o latou loto i a latou fanau, ‘auā o le tele o mea i le loto e tautala mai ai le gutu.’ (Luka 6:45; Teu. 6:5-7) O le mautinoa faapena, o le a uunaʻia ai foʻi mātua ina ia faataatia se faaaʻoaʻoga o le ‘faatuatua e lē faagutugutulua.’—2 Timo. 1:5.

E tāua faapitoa lava lou tautala atu ma le mautinoa pe a fesiligia lou faatuatua. Atonu o faateʻia sau aumea i le aʻoga, se faiaʻoga, po o se aumea faigaluega, i lou lē auai i se aso faamanatu. O se tali maumauaʻi e talafeagai, atonu o le a fesoasoani ai iā te ia ina ia faaalia le faaaloalo i lou tulaga e faavae i le Tusi Paia. Ae ā pe afai e taumafai se tasi e maileia oe ina ia faia se amioga sesē—le lē faamaoni, faaaogāsesē o fualaau, po o amioga lē mamā faaleituaiga? E tāua ona faamanino atu, e te matuā lē auai lava i na amioga, ma o le a leai ni taumafaiga faatauanau o le a faapogaia ai oe e suia lou mafaufau. O le a manaʻomia i lenei mea lou tautala atu ma le mautinoa i le teena o le ofo. I le teena o faaosoosoga tau amioga lē mamā a le avā a Potifara, na fai atu ai ma le mausalī Iosefa: “Pe faapefea ona ou faia lenei mea leaga tele ma ou agasala ai i le Atua?” I le faatauanau atu pea o le fafine, na sola ese ai Iosefa mai le fale.—Kene. 39:9, 12.

Le Auala e Faaalia atu ai le Mautinoa. O upu o loo e faaaogāina, e mafai ona tele sona sao i le faailoa atu ai o lou mautinoa. I le tele o taimi, sa faatomua ai e Iesu faamatalaga tāua i le fetalai atu e faapea: “E moni, e moni, ou te fai atu ia te oe.” (Ioa. 3:3, 5, 11; 5:19, 24, 25) Sa faaalia le mautinoa o Paulo i faamatalaga e pei o le, “ua ou mautinoa,” “ua ou iloa ma ou mautinoa i le Alii o Iesu,” ma le “o le upu moni ou te fai atu ai ou te le tala pepelo.” (Roma 8:38; 14:14; 1 Timo. 2:7) E faatatau i le faataunuuga o lana afioga, i nisi taimi sa faagaee ai e Ieova ana perofeta ina ia faia ni faamatalaga maumauaʻi, e pei o le, “e oo mai lava, e le faatuai mai.” (Sapa. 2:3) Pe a e faasino i na valoaga, e mafai ona e faaaogā se gagana faapena. Afai e te faalagolago e lē iā te oe ae iā Ieova, ma afai e te tautala atu i isi i se auala faaaloalo, o faamatalaga e faaatagia ai se mautinoa faapena, o le a faamaonia ai o loo iā te oe se faatuatua malosi.

E mafai foʻi ona faaalia le mautinoa e ala i le naunautaʻi ma le malolosi o au faamatalaga. O ou foliga vaaia, o au taga, ma gaoioiga a lou tino e saosaolaumea uma i lenā mea, e ui ina atonu e eseese auala e faaalia ai e lea tagata ma lea tagata. E tusa pe e te matamuli pe tau lē lagona lou siʻuleo ona o lou lava uiga lenā, ae afai ua e mautinoa atoatoa e faapea o loo e tautala i le upu moni ma o loo manaʻomia ona faalogo i ai isi, o le a faaalia mai la lou mautinoa.

O le mea moni, o so o se faailoaga o le mautinoa e tatou te faaalia e tatau ona moni. Afai e iloa e tagata o loo tatou faatagāfai na i lo le tautala atu mai le loto, o le a latou faaiʻua ai la e faapea e lē moni la tatou feʻau. O le mea lea, ia muamua, ona tautala i lau auala masani. Pe a e tautala atu i se aofia toʻatele, atonu e manaʻomia ona e leo tele na i lo le tulaga masani ma ia matuā faamaʻati. Peitaʻi, o lou sini e ao ona e talanoa atu ma le faamaoni ma e pei ona masani ai.

O Fesoasoani i le Faaalia o le Mautinoa. Talu ai o lou mautinoa, e aafia ai ou faalogona e uiga i lau mataupu, e tāua ai la le sauniuni lelei. E lē lava le tau ina kopi o faamatalaga mai se lomiga ona toe taʻu atu lea. E manaʻomia ona e malamalama manino i le mataupu ma ia mafai ona faamatala atu i au oe lava upu. E tatau ona e talitonu atoatoa o le upu moni lea, ma o mea o le a e tautala atu ai e aogā i lau aofia. O lona uiga, pe a sauniuni lau taulimaga, e ao ona e manatuaina o latou tulaga, atoa ma mea atonu ua uma ona latou iloa e uiga i le mataupu po o o latou faalogona e uiga i ai.

E faigofie i isi ona latou iloa lo tatou mautinoa pe a sologa lelei la tatou taulimaga. O le mea lea, e lē gata i le sauniuni lelei o le mataupu, ae ia galue mamafa i lau taulimaga. Ia uaʻi faapitoa i vaega o lau mataupu na o loo manaʻomia ai le matuā naunautaʻi, ina ia mafai ai ona e taulima e aunoa ma le faalagolago i au faamaumauga. Ia manatua foʻi, ona tatalo mo le faamanuiaga a Ieova i au taumafaiga. I lenei auala, o le a mafai ai ona e ‘maua le lototele ona o lo tatou Atua’ ina ia tautala atu ai i se auala e faapea ona faaatagia ai lou mautinoa i le moni ma le tāua o lau feʻau.—1 Tesa. 2:2.