O Vala o le Tusi Paia o le Lalolagi Fou
1 O le Tauaofiaga Itumalo i le 2007 “Ia Mulimuli iā Iesu Keriso,” sa faataatia ai se matatiʻa i le talafaasolopito o Molimau a Ieova i Samoa. Sa matuā faatumulia i le fiafia tele i latou uma na tauaofia ai, ina ua faasilasila mai e Geoffrey Jackson, o se sui o le Vaega Pule, le tatalaina o le Tusi Paia o le Lalolagi Fou o Tusitusiga Eleni i le gagana Samoa. A o amata ona tatou faaaogāina lenei Tusi Paia, e toʻatele ua faafiafiaina e lē gata ona ua latou mātauina le faigofie o le faaliliuina i le gagana i ona pō nei, ae ua latou maua foʻi le malamalamaga manino o le uiga o le Afioga a le Atua. Seʻi o tatou talanoaina nisi o vala o le Tusi Paia lenei.
2 Faasilisilia le Suafa o le Atua: O se tasi o vala matilatila o le Tusi Paia lenei, o le toe faatulaga lea o le suafa o le Atua, o Ieova i vaega sa tatau ona iai. Auā i le tele o isi Tusi Paia e aofia ai ma Tusi Paia Samoa, i Tusitusiga Eleni, o loo mātauina le Atua i le taʻu po o le faalupega “Atua” po o le “Alii.” Ae peitaʻi, i le Tusi Paia o le Lalolagi Fou o Tusitusiga Eleni, pe tusa e 237 taimi o loo taʻua ai le suafa o le Atua.—Mata. 1:20 fpl.)
3 I nisi manusikulipi tuai o le Tusi Paia o loo maua ai le suafa o le Atua i faaliliuga o Tusitusiga Eleni ae i le upu Eperu, i vaega o loo sii saʻo mai i Tusitusiga Paia i le gagana Eperu. O se faaaʻoaʻoga, i se tasi taimi, na tulaʻi ai Iesu i se sunako ma faitau se vaega o le tusi tāʻai lea ua tatou taʻua i aso nei o le Isaia 61:1, 2, lea e sili atu i le faatasi ona taʻua ai le suafa o le Atua. (Luka 4:16-21) Pe na teena e Iesu le faaleoina o le suafa o le Atua e pei ona iai i inā, ae sui i le “Alii” po o le “Atua”? O le tali mautinoa e leai. E manino lava la, e tāua i ē tapuaʻi i le Atua ona iloa ma faaaogā lenā suafa.—Roma 10:13; Tagaʻi i le Faaopoopoga 2 i le itulau e 531 o le Tusi Paia o le Lalolagi Fou.
4 E Lē o Taaʻina i Manatu Faaituʻau Faalotu: O nisi taimi, e aliali mai ai manatu faaituʻau faalotu o nisi o tagata faaliliu i a latou faaliliuga. O se faaaʻoaʻoga, o i latou e talitonu o le agaga paia o le peresona lona tolu o le Tolutasi, ua latou tusia i mataʻitusi tetele le faaupuga “Agaga Paia.” Peitaʻi, o loo faaalia manino i le Tusi Paia o le agaga paia e lē o se tasi e pei o le Atua, ae o Lona malosi po o lona mana galue. O le mea lea, i le Tusi Paia o le Lalolagi Fou o loo tusia ai lenei faaupuga i mataʻitusi laiti.—Tagaʻi i le Faaopoopoga 7 i le itulau e 539 o le Tusi Paia o le Lalolagi Fou.
5 Faaupuga e Faaaogā i Lotu: O nisi Tusi Paia ua faaliliu ina ia atagia mai ai aʻoaʻoga ma talitonuga o la latou lotu. O faaupuga faalelotu, ma upu e atagia mai ai manatu o tapuaʻiga sesē o loo ʻalofia i le Tusi Paia o le Lalolagi Fou.
6 I nisi Tusi Paia, o faaupuga faalotu e pei o le “epikopo” ma le “tiakono” o loo faaaogā e faaliliu ai le e·pi’sko·pos ma le di·a’ko·nos. O le toʻatele o tagata latou te faafesootaʻi atu faaupuga nei ma tofiga maualuluga o loo ave i taʻitaʻi lotu ma ē o loo fesoasoani iā i latou. Peitaʻi, o le uiga faavae o le upu e·pi’sko·pos i le gagana Eleni, o se puipuiga malu ma se vaavaaiga lelei. I le itulau e 28 o le tusi Ua Faamaopoopo Ina ia Faia le Finagalo o Ieova o loo faapea mai, “I le faataʻitaʻi atu iā Iesu, e ao ona latou auauna ma le lotomalie, naunautaʻi ma avea ma faaaʻoaʻoga i le lafu, e taʻimua i le auaunaga iā Ieova.” O le taʻu la di·a’ko·nos e faatatau atu i se tasi na te tauaveina faatonuga a se isi tagata, aemaise lava se tasi ua avea ma matai. O loo faaalia mai la i le upu lenei i le Tusi Paia le tulaga o se auauna. O le faaaogāina o le upu lenei i le Tusi Paia e faaalia ai se tasi e lē ʻalo mai le faia māeʻaeʻa ma le loto maulalo o se auaunaga mo isi. O le māfuaaga lea ua faaaogā ai le faaupuga auauna o le faapotopotoga. Ua fesoasoani la le Tusi Paia o le Lalolagi Fou i le tagata faitau ina ia malamalama lelei i le uiga moni o nei faaupuga.—Fili. 1:1.
7 Saʻo Lelei: E tāua tele ona faailoa atu le uiga moni o se fuaiupu pe a faaliliu i isi gagana. O se faaaʻoaʻoga, i le Mataio 5:3, e mafai ona uiga le mau lenei i le “tagata mativa i la le agaga.” O loo faaliliuina i le Tusi Paia Samoa (1969) i le “matitiva i le agaga.” Peitaʻi, na taʻua i le Olomatamata faa-Peretania o Fepuari 15, 1957, a fua i le faaliliuga lenei e ono uiga atu i le “leai se malosi, leai se uunaʻiga, leai se faanaunauga, po o se naunautaʻiga.” I le Tusi Paia o le Lalolagi Fou: o le “naunau i mea faaleagaga” o loo faaliliuina ai ma le saʻo le uiga moni o le mau i uluaʻi tusitusiga.
8 Tausisi i le Uiga Moni: E toʻatele tagata faaliliu e lē manatu mamafa i le tāua o le tausisi i le uiga moni o faaupuga. Mo se faaaʻoaʻoga, e toʻatele le ʻaufaaliliu e lē taulau ona latou faaeseesea upu Eleni o le douʹlos, lea e uiga i se pologa sa faatau mai, ma le diaʹkonos, lea e uiga i se auauna. O loo faasino atu Tusitusiga Paia i Kerisiano faapea o pologa, auā na faatauina i latou i se tau; o i latou la o pologa a Ieova le Atua ma Iesu Keriso lo latou Matai. E lē o i latou o ni auauna totogi, e pule le tagata i le taimi e musu pe faamavae ai. Atonu e lē fiafia le toʻatele o le ʻaufaaliliu i le faaupuga “pologa,” peitaʻi e iai le māfuaaga na faaaogā ai e le ʻautusitala o le Tusi Paia le pologa na i lo le “auauna.” I le ōgatusa ai la ma le manatu lenei, ua faaaogā le faaupuga “pologa faamaoni ma le faautauta” ina ia atagia atu ai le malamalamaga lenei.—Mata. 24:45; Roma 1:1; 1 Kori. 7:23.
9 Ua avea moni le Tusi Paia o le Lalolagi Fou o se auupega malosi mo le faamaoniaina o “Tusitusiga Paia uma e mai le agaga o le Atua, ma e aogā.” (2 Timo. 3:16, 17) A fua i manatu ua talanoaina i lenei mataupu, e tatou te talisapaia lona saʻo ma le maufaatuatuaina, ma e mafai ona faafiafiaina moni ai i latou o faanaunau e faalogo atu i le Atua o fetalai mai i tagata i le gagana o aso nei e malamalama ai. Ua lē o toe manaʻomia ona faitau ma toe faitau ni fuaiupu ina ia malamalama i ni faaupuga e faigatā ona malamalama ai. E manino ma maua le uiga i le uluaʻi faitauga.
10 O le Tusi Paia o le Lalolagi Fou o Tusitusiga Eleni o se faaliliuga lelei tele o le Afioga a le Atua, “le pelu a le agaga.” O lona uiga, o se auupega aogā tele i le taua faaleagaga a Kerisiano, e fesoasoani e ‘lepetia ai ma faatoʻilaloina manatu sesē uma e tetee i le iloa o le Atua.’ Matou te faanaunau o le a fesoasoani le Tusi Paia o le Lalolagi Fou iā te outou uma taʻitoʻatasi e folafola atu le tala lelei o le Malo o le Atua i se auala e sili ona malamalama ai.—Efe. 6:17; 2 Kori. 10:4, 5.
This article is unique to Samoa.