Tusi o le Tusi Paia Numera 56—Tito

Lē na Tusia: Paulo

Nofoaga na Tusia Ai: Maketonia (?)

Māeʻa Ona Tusia: Pe tusa o le 61–64 T.A.

“O AʻU o Paulo, o se pologa a le Atua ma le aposetolo a Iesu Keriso . . . o le tusi lenei iā Tito le atalii moni, e tusa ai ma le faatuatua ua tatou talitonu uma i ai.” (Tito 1:1, 4) O le amataga lea o le tusi a Paulo iā Tito, o lē na la galulue ma faifai mea faatasi mo se taimi umi, lea na ia tuua i le motu o Kereta e faamaopoopoina lelei faapotopotoga o loo iai. Na tuuina atu iā Tito se galuega tele e fai. Na taʻua e faapea o lenei aai, sa avea lea ma nofoaga i aso anamua o “le tamā o atua ma tagata,” ma o inei e māfua mai ai le faaupuga faapea, “ia amio faa-Kereta i se tagata Kereta,” o lona uiga “ia faavalea se tagata amio piʻopiʻo.”a Ona o le lauiloa o ona tagata i le lē faamaoni na sii mai ai e Paulo se faamatalaga a se tasi o o latou lava perofeta: “E pepelo i taimi uma tagata Kereta, o ni manu feʻai mataʻutia, o ni ē e lē fia galulue ma e soona aai.” (1:12) Na faamatalaina foʻi tagata Kereta i aso o Paulo e faapea: “Sa matuā lē maufaatuatuaina, lē faamaoni, ma finauvale uiga o tagata; sa matuā matapeʻapeʻa i latou, amio lē mamā, talapepelo ma onanā, e matuā lē tusa ai lava o latou uiga ma amioga masani a tagata; ma o tagata Iutaia na aumau ai sa matuā sili atu ai lo latou amio lē mamā nai lo tagata moni o le nuu.”b O le ituaiga siʻomaga tonu lenā na tutupu aʻe ai faapotopotoga i Kereta; ma na matuā manaʻomia ai e uso talitonu ona “teena amioga faalēmataʻu ma tuʻinanauga o le lalolagi, ma ia ola ma le mafaufau lelei, ma le amiotonu, ma le faamaoni i le Atua,” e pei ona apoapoaʻi atu i ai Paulo.—2:12.

² E itiiti se faamatalaga a le tusi o Tito lava ia e faatatau i le galulue faatasi o Paulo ma Tito. E ui i lea, e tele ni faamatalaga ua mafai ona aoaoina mai i isi tusi a Paulo ia o loo taʻua ai Tito. O Tito o se tagata Eleni sa masani ona ō faatasi ma Paulo, ma na malaga atu i laʻua i se tasi taimi i Ierusalema. (Kala. 2:1-5) O loo faasino atu Paulo iā Tito e faapea “o ia o le auauna e pei o aʻu, e ma te galulue faatasi.” O Tito lea na auina atu e Paulo i Korinito ina ua māeʻa ona tusi atu mai Efeso lana tusi muamua i Kerisiano i Korinito. A o iai i Korinito, sa aofia ai Tito i le faamaopoopoina o le meaalofa lea na fai mo uso i Ierusalema, ma mulimuli ane toe auina atu i ai o ia e Paulo ina ia faamāeʻa le sauniaina o lenā meaalofa. O le toe foʻi o Tito i Korinito ina ua mavae le la feiloaʻiga ma Paulo i Maketonia, na alu ai ma ave le tusi lona lua mai iā Paulo mo Kerisiano i Korinito.—2 Kori. 8:16-24; 2:13; 7:5-7.

³ Ina ua tatalaina mai Paulo i lona uluaʻi faafalepuipuiina i Roma, na toe galulue faatasi ai o ia, o Timoteo ma Tito i tausaga mulimuli o lana faiva. E foliga mai na aofia ai Kereta, Eleni, ma Maketonia i la latou auaunaga. Mulimuli ane, na taʻua ai e Paulo lona malaga atu i Nikopoli, i mātū i sisifo o Eleni, lea e foliga mai na puʻeina ai o ia ma auina atu loa i Roma i lona faafalepuipuiina mulimuli ma fasiotia ai. Ina ua asiasi atu i Kereta, na tuua ai e Paulo i inā Tito e “faasaʻoina mea sa faalētonu, ma . . . tuu atu ni tofiga i toeaina i lea aai ma lea aai,” e tusa ai ma le faatonuga na ia avatu iā Tito. E aliali mai atonu na tusia le tusi a Paulo mai Maketonia, a o leʻi leva lava talu ona ia tuua Tito i Kereta. (Tito 1:5; 3:12; 1 Timo. 1:3; 2 Timo. 4:13, 20) O le fuafuaga o le tusi e foliga mai e tutusa ma le Timoteo Muamua, o le faalaeiauina o le aumea a Paulo ma fesoasoani atili atu e tusa ai ma le faataunuuina o ona tiute.

⁴ Atonu na tusia e Paulo le tusi i se vaitaimi i le va o lona faafalepuipuiina muamua ma le lona lua i Roma, i le tusa o le 61 i le 64 T.A. E tutusa faamaoniga o le moni aʻiaʻi o le tusi iā Tito, ma tusi ia na avatu iā Timoteo, o nei tusi e tolu o le Tusi Paia e masani ona faaupuina o “tusi faalelotu” a Paulo. E tai tutusa lelei le auala na tusia ai. O loo siiina mai e Irenaeus ma Origen le tusi o Tito, ma e toʻatele isi tusitala anamua e molimau foʻi i le moni aʻiaʻi o le tusi. O loo maua i manusikulipi o le Sinaitic ma le Alexandrine. I le faletusi o John Rylands o loo iai se vaega o tusitusiga na tusia i paʻu laau, P^{3 2} , o se vaega o le codex o loo iai le Tito 1:11-15 ma le 2:3-8 pe tusa o le senituri lona tolu T.A.c E faamaonia ai o lenei tusi e moni aʻiaʻi ma o se vaega o le Tusi Paia e mai le agaga o le Atua.

AISEĀ E AOGĀ AI

⁸ Na soifua aʻe Kerisiano Kereta i se siʻomaga o tagata pepelo, amio piʻopiʻo, ma matapeʻapeʻa. Pe sa tatau la ona latou faataʻitaʻi i ai? Pe sa tatau ona latou uia ni laasaga maumauaʻi ina ia vavae ese mai ai i latou ia avea o ni tagata ua faapaiaina mo Ieova le Atua? Na faailoa e ala atu iā Tito le tatau i uso i Kereta ona “tausisi i galuega lelei,” auā na faapea atu Paulo: “E lelei nei mea ma e aogā i tagata.” (Tito 3:8, 14) E ‘lelei ma aogā’ foʻi i aso nei, a o iai i se lalolagi ua magoto ifo i le loloto o faiga piʻopiʻo ma le lē faamaoni, lea e ‘aʻoaʻoina ai Kerisiano moni ina ia tausisi i galuega lelei,’ ma fuatele mai i le auaunaga i le Atua. (3:8, 14) Ua avea le taʻusalaina e Paulo o amioga lē mamā ma le amioleaga lea na lepetia ai faapotopotoga i Kereta ma lapataʻiga mo i tatou i le taimi nei, ina ua ‘faaali mai ai iā te i tatou le agalelei faifua o le Atua ina ia teena ai amioga faalēmataʻu ma tuʻinanauga o le lalolagi, ma ia ola ma le mafaufau lelei, ma le amiotonu, ma le faamaoni i le Atua a o faagasolo faiga o mea a le lalolagi.’ E tatau i Kerisiano ona “nofo sauni mo galuega lelei uma” i le usiusitai i taʻitaʻi faalemalo, ma tausisia se lotofuatiaifo mamā.—2:11, 12; 3:1.

⁹ Ua lagolagoina e le Tito 1:5-9 le 1 Timoteo 3:2-7 i le faaalia o mea o loo manaʻomia e le agaga paia ina ia faia e ovasia. Ua faamamafa ai le ao i ovasia ona “taofimau i upu faamaoni,” ma avea ma sē e aʻoaʻo i le faapotopotoga. Maʻeu le manaʻomia o lenei tulaga ina ia avea uma ai tagata ma ni ē e taʻumatuaina! O le mea moni, o loo tele taimi o loo faamamafa mai ai le manaʻomia ona maua le aʻoaʻoga saʻo i le tusi iā Tito. Ua apoapoaʻi atu Paulo iā Tito ina ia “tautala atu pea i mea e talafeagai ma aʻoaʻoga aogā.” O loomatutua ia fai ma “ē e aʻoaʻo atu i mea lelei,” ae o auauna ia latou “faamamaluina i mea uma lava aʻoaʻoga a le Atua lo tatou Faaola.’ (Tito 1:9; 2:1, 3, 10) I le faamamafaina o le manaʻomia e Tito i le avea ma ovasia ona maumauaʻi ma lototele i lana aʻoaʻo atu, na faapea atu ai Paulo: “Ia fai atu pea nei mea ma aʻoaʻi atu ma ia faatonu atu ma le pule uma lava na tuuina atu iā te oe.” Ae o i latou e lē usiusitai, na ia faapea atu: “Ia e matuā aʻoaʻi atu pea iā i latou, ina ia latou malolosi i le faatuatua.” O le tusi la a Paulo iā Tito, ua sili ona “aogā e aʻoaʻo ai, e aʻoaʻi ai, e faasaʻo ai mea, e faatonu ai i le amiotonu.”—Tito 2:15; 1:13; 2 Timo. 3:16.

¹⁰ O le tusi iā Tito ua faatupuina aʻe ai lo tatou talisapaia mo le agalelei faifua o le Atua, ma faalaeiauina ai i tatou e liliu ese mai faiga lē amioatua a le lalolagi, “a o tatou faatalitali i le faamoemoe fiafia ma le faaali mai i le mamalu o le Atua sili, atoa ma lo tatou Faaola o Keriso Iesu.” O le faia faapea, o i latou ua taʻuamiotonuina e ala iā Keriso Iesu e ono avea ma “suli e tusa ma le faamoemoe o le ola e faavavau” i le Malo o le Atua.—Tito 2:13; 3:7.

[Faaopoopoga i lalo]