Talaʻi le Tala Lelei i so o se Mea

¹ O uluaʻi Kerisiano sa latou talaʻia le tala lelei i so o se mea. Na matuā maelega i latou auā i totonu o le tolu sefulu tausaga talu le toetū o Iesu Keriso, o le feʻau o le Malo na “talaʻiina atu i lalolagi aoao.”—Kolo. 1:23.

² O auauna maelega a Ieova i aso nei ua iai foʻi iā i latou lea lava sini—e faaoo atu i tagata uma le tala lelei o le Malo. O le ā e mafai ona fesoasoani iā i tatou ina ia faataulauina lenei sini? O loo faateleina pea tagata o loo galulue faataimi atoa ma e masani lava ona leai nisi i fale pe a tatou asiasi atu. Afai e lē o faigaluega, atonu o loo faimalaga, po o fai se faatauga, po o le ō foʻi e tafafao. E faapefea la ona oo atu le feʻau o le Malo i ē tatau i ai?—Mata. 10:11.

³ O nisi ua faafesootaʻia i nofoaga o loo faigaluega ai. I taulaga tetele, e galulue tagata i nofoaga faapitoa mo falegaosimea ma pisinisi, po o fale maualuluga e iai ofisa, ma i latou o ē mau i nofoaga malupuipuia, o loo mauaina se molimau—o le toʻatele lava o le taimi muamua lea. I faaiʻuga o vaiaso, o nisi sa faafesootaʻia a o mālōlō i paka, i nofoaga o tafaoga, i nofoaga o faamautū ai, po o tamaʻi fale e api ai po o le faatalitali foʻi i nofoaga e paka ai taavale po o nofoaga e iai faleoloa eseese ua faaalia lo latou tali lelei mai i le tala lelei.

⁴ O loo faia e le toʻatele o tagata talaʻi se taumafaiga faapitoa e molimau atu ai i nofoaga faitele, i so o se mea lava o mafai ona maua i ai tagata. I le taimi muamua sa faatalatū ma pei e fefefe nei Molimau, ona ua masani i talaʻiga ua fuafuaina lelei, e pei o le talaʻi mai lea fale i lea fale. O le ā la lo latou lagona i lenei taimi?

⁵ “Ua toe faaolaolaina ai laʻu faiva!” o le tala fiafia lea a se tasi o uso agavaa. Ua faaopoopo mai le isi uso e faapea: “Ua uunaʻia ai aʻu e taulaʻi atu i luma.” Ua mātauina e se tasi paeonia matua e faapea: “E faafouina ai faalemafaufau, faaletino, ma le faaleagaga, . . . ma o loo faaauau pea ona ou agaʻigaʻi i luma.” Ua iloa e se tasi tagata talaʻi e faapea ua mafai nei ona ia faafesootaʻi le tele o tagata o ē e leʻi talanoa muamua lava i Molimau a Ieova. Ua auai foʻi ma le maelega talavou i lenei galuega faamalieloto. Ua faaleoina mai e se tasi o talavou ona lagona i upu nei e faapea: “E manaia auā e te talanoa atu ai i le toʻatele o tagata.” Ua faapea mai le isi: “Ua ou tufaina atu nei le tele o lomiga nai lo se isi lava taimi muamua!” O nei tulaga uma o loo tutupu i oganuu ua galueaʻiina soo.

⁶ O Loo Taʻimua Ovasia Faimalaga: I le iloaina e faapea o loo ‘suia le tulaga o lenei lalolagi,’ na fautuaina ai talu ai nei ovasia faimalaga ina ia fetuunaʻi a latou faasologa o le auaunaga o le fanua mai lea vaiaso i lea vaiaso ina ia mafai ai ona faaooina atu le tala lelei i ni tagata se toʻatele e mafai ai. (1 Kori. 7:31) Mo le tele o tausaga, sa faatulaga ai e ovasia o matagaluega ia taeao o aso aunoa o le vaiaso ina ia auai ai i le galuega mai lea fale i lea fale, a o le afiafi e faaaogā atoatoa i le faia o toe asiga ma le faia o suʻesuʻega faale-Tusi Paia. I nisi oganuu, o loo aogā ai pea lenā faasologa. I isi oganuu, e itiiti se fua ua fuaina mai e le galuega talaʻi mai lea fale i lea fale i nisi o taeao o aso aunoa o le vaiaso. O ia tulaga, atonu e filifili ai loa le ovasia faimalaga e lelei pe a ō atu i le taeaopō e galulue faasolosolo i faleoloa po o le molimau atu i ala tetele. E mafai foʻi ona ia faatulagaina ni vaega laiti e molimau atu i fale maualuluga o iai ofisa, o vaipanoa o fefaatauaʻiga, o nofoaga e paka ai taavale, po o isi nofoaga faitele. O le faaaogāina e tagata talaʻi o le taimi ua faaavanoaina mo le auaunaga i le fanua i se auala e sili ona uigā, o le a atili ai ona toʻatele tagata e faafesootaʻia.

⁷ Ia manatua, e lē manaʻomia ona e faatali mo le ovasia matagaluega seʻi asiasi atu e faataʻitaʻia nisi o nei auala o le talaʻiga. O nisi nei o manatu eseese e mafai ona aogā i lau oganuu:

⁸ Molimau Atu i Ala Tetele: ‘O fea o iai uma tagata?’ O nisi taimi e tatou te taumānatu ai faapena a o tatou asiasi atu i se taeao o aso aunoa i se nofoaga e masani ona iai tagata ae ua tuufua. O nisi atonu o loo agaʻi e fai a latou feʻau tatau po o le faia o se faatauga. Po ua e taumafai ea e faafesootaʻia i latou e ala i le molimau atu i ala tetele? Afai e lelei ona faatinoina lenei vala o le auaunaga, e mafai ona matuā fua tele mai. Nai lo le tūtū i le mea e tasi ma mekasini, e sili ona lelei le faalatalata atu i tagata ma amata se talanoaga faaleuō. E lē manaʻomia ona molimau atu i ē uma o fegasoloaʻi. Ia talanoa atu iā i latou o ē e lē o faanatinati, e pei o ē matamata i faamalama o faleoloa, o ē o i totonu o taavale o loo paka, po o tagata o loo faatalitali mo se auala. Muamua lava, atonu ua na o se feiloaʻiga faaleuō e te faaali atu ma faatali mo se tali. Afai e naunau le tagata e talanoa, ona fesili lea mo sona manatu i se mataupu e te iloa e mafai ona fiafia i ai.

⁹ Molimau Atu i Paka ma Paka mo Taavale: O le molimau atu i paka ma paka mo taavale o se auala e aupito sili ona lelei lea e feiloaʻi ai ma tagata. Pe na e taumafai ea e molimau atu i paka mo taavale i fetaulaʻiga o faleoloa? Ia faamasani i le faaaluina o ni nai minute e mātau lelei ai ou siʻomaga i na nofoaga. Vaavaai mo se tasi e lē o faanatinati po o sē o faatalitali i se taavale o paka ma taumafai e amata se talanoaga faaleuō. Afai e faaauau le talanoaga, ona tataʻi loa lea i le feʻau o le Malo. Ia taumafai e galulue taʻitoʻatasi ae ia iai se isi tagata talaʻi e felataʻi. Ia ʻalofia le tauaveina o se ato telē po o se isi mea e iloagofie ai lau galuega. Ia faautauta. Atonu e sili ona lelei le faaalu o sina taimi puupuu i lea paka mo taavale ma agaʻi atu i le isi nofoaga. Afai e lē manaʻo le tagata e talanoa atu iā te oe, ia tuu filemu ae saʻili se isi tagata e talanoa i ai. O le faaaogāina o nei auala, sa tufaina atu ai e se tasi uso i le masina e tasi ni mekasini e 90 a o molimau atu i nofoaga e paka ai taavale.

¹⁰ Molimau Lē Fuafuaina i Fetaulaʻiga o Faleoloa: E ui e lē faigofie pea ona talaʻi fuafuaina mai lea faleoloa i lea faleoloa i fetaulaʻiga o faleoloa ona o nisi o taofiofiga a le vaipanoa lava ia, ae ua atiaʻe e nisi tagata talaʻi lava latou ni avanoa e molimau atu ai lē fuafuaina. Latou te nofonofo i se nofoa ma amata ai se talanoaga faaleuō ma isi o ē o loo mālōlō ai i inā. Afai e faaalia le naunau, ona latou ofoina lea ma le atamai se sāvali po o se mekasini ma taumafai e fai ni fuafuaga mo se toe asiga. Ina ua uma ona faaaluina ni nai minute e molimau atu ai i se tasi o vaega o lea nofoaga, ona faasolosolo atu lea i le isi itu ma talanoa atu i se isi foʻi tagata. O le mea moni, e ao ona faaeteete ina ia lē soona faatosina atu nisi a o molimau lē fuafuaina atu i lenei auala.

¹¹ Galulue Mai Lea Faleoloa i Lea Faleoloa: O nisi o faapotopotoga ua avea ia vaipanoa o pisinisi ma vaega o la latou oganuu tofia. O le uso o loo ia tausia oganuu atonu e mafai ona ia saunia ni faafanua o nei vaega tetele o pisinisi. So o se faafanua lava o le oganuu o loo nonofo ai tagata o loo aofia i le vaega o pisinisi e ao ona faamanino mai e faapea o le vaega o iai pisinisi e lē tatau ona galueaʻiina a o galulue i le faafanua o lea oganuu. I nisi oganuu, e mafai ona galueaʻiina faatasi nofoaga o pisinisi ma ni fale o aiga o latalata i ai. E mafai e toeaina ona valaaulia ni tagata talaʻi agavaa e galulue i oganuu o pisinisi i se tulaga faifai pea ina ia lē lafoaʻia ai le galulue mai lea faleoloa i lea faleoloa.

¹² Afai e valaaulia oe e fai se sao i lea galuega ae e te leʻi faia muamua, o se auala lelei la e faamalosia ai, o le galueaʻiina muamua lea o faleoloa laiti; ma afai ua e lagonaina le toʻa lelei, ona galueaʻiina loa lea o faleoloa tetele. (1 Tesa. 2:2) A o galue mai lea faleoloa i lea faleoloa, ia laʻei faapei o loo e auai i se sauniga i le Maota mo Sauniga. A mafai, ona ulufale lea i le faleoloa pe a leai ni tagata faatau o taliina. Fesili pe mafai ona talanoa i le pule po o lē o loo vaaia le faleoloa. Ia māfana, ma e sili atu i na mea uma, ia faapuupuu. E lē manaʻomia ona e tau faamālūlū atu. O le tele o pisinisi ua masani i feoaʻiga a ē faatau ma e latou te faatalitalia ni faasalavei.

¹³ Faatupu Avanoa e Talaʻi Ai: E leʻi taotasi Iesu i lona molimau atu i na o tulaga ua fuafuaina. Na ia faasalalau atu le tala lelei i so o se avanoa lava e talafeagai. (Mata. 9:9; Luka 19:1-10; Ioa. 4:6-15) Mātau le auala ua faatupu ai e nisi o tagata talaʻi ni avanoa e talaʻi ai.

¹⁴ O nisi ua fai ma masani le molimau atu i mātua o ē o loo faatalitali mo a latou fanau aʻoʻoga. Ona o le toʻatele o mātua e taunuu atu i le 20 minute a o leʻi tuua, ua iai la se taimi e faaaafia ai i latou i se talanoaga faaosonaunau i se mataupu faale-Tusi Paia.

¹⁵ E toʻatele paeonia ua fiafia e oo atu i tagata o ē atonu o iai se naunau faapitoa i se mataupu patino o loo aumaia i a tatou mekasini. Mo se faaaʻoaʻoga, o se tasi tuafafine na ia mauaina ni iʻuga lelei ina ua asiasi atu i aʻoga e ono e i le oganuu a lana faapotopotoga faatasi ai ma lomiga o le Awake! o Tesema 22, 1995, lea o loo iai le faasologa o mataupu e faapea “Schools in Crisis.” Sa asiasi atu foʻi o ia i matagaluega o loo gafa ma mataupu faaleaiga ma avatu mekasini e uiga i le olaga faaleaiga ma le faileagaina o tamaiti ma sa valaaulia o ia ina ia toe foʻi atu i se isi taimi ma nisi lomiga o iai nisi mataupu talitutusa faapena. O le tali sa ia maua mai le ofisa o loo fesoasoani i ē e leai ni galuega i le Awake! o Mati 8, 1996, lea o loo iai le mataupu e uiga i ē e leai ni galuega ua faamatalaina faapea ua “matuā lelei tele.”

¹⁶ I nisi o vaipanoa, ua filifilia ai nisi tagata talaʻi ua iai se faatagaga faapitoa e molimau atu i malae vaalele. I nisi taimi, e latou te maua ai le olioli i le molimau atu i tagata malaga faavaomalo o ē o loo aumau i atunuu o loo toʻaitiiti tagata o Ieova o iai. Afai e faaalia le naunau, ona latou ofoina lea i ai o se sāvali po o ni mekasini.

¹⁷ Ia Faamalosia Oe e Talaʻi i so o se Mea: O le ola aʻe e tusa ai ma lo tatou tuuina atu e aofia ai le lagonaina o se uiga faanatinati mo lo tatou tofiga o le talaʻia o le feʻau o le Malo. Ina ia oo atu i tagata i se taimi e talafeagai mo i latou, e manaʻomia ona faataatia ese o tatou manaʻoga totino “ina ia faaolaina nisi” ona o i tatou. E mananaʻo auauna tuuina atu uma lava a Ieova ina ia mafai ona faapea atu, e pei ona faia e le aposetolo o Paulo: “A ua ou faia mea uma ona o le tala lelei, ina ia ou talaʻi atu i isi.”—1 Kori. 9:22, 23.