Aua le Faamaʻimauina a Tatou Lomiga
1. E faapefea ona tatou faaaʻoaʻo i le faaaʻoaʻoga a Iesu o le talisapaia lea o mea o loo saunia mai e Ieova?
1 Ina ua uma ona fafaga faavavega e Iesu ni tagata e toʻatele, sa ia faamautinoa e lē faamaʻimauina mea na totoe. (Mata. 14:19-21) Talu ai e leʻi faamaʻimauina e Iesu mea na saunia mai e Ieova, ua faataatia ai se faaaʻoaʻoga lelei mo i tatou ina ia ‘faaalia lo tatou loto faafetai’ e ala i le lē faamaʻimauina o mea o loo saunia e Ieova e ala mai i “le auauna pule e faamaoni.”—Kolo. 3:15; Luka 12:42; Mata. 24:45-47.
2. E faapefea ona tatou ʻalofia le faaputuputu ai lava o mekasini ae lē ofoina?
2 Mekasini: E faigofie lava ona iai se faaputuga mekasini pe a tatou lē ofoina i tagata. Afai e faaauau ona totoe ni a tatou mekasini, e tatau la ona faaitiitia mekasini tatou te talosagaina. Ae ā mekasini tuai? E tusa pe tuai mekasini ae tumau pea le aogā i tagata o mataupu o loo iai. Afai o iai ni a tatou mekasini o faaputuputu e leʻi ofoina, e ono fesoasoani mai le ovasia o le auaunaga po o se isi toeaina iā i tatou ina ia iloa ni auala talafeagai e ofo atu ai.
3, 4. O ā manatu e ao ona manatua pe a aumai a tatou lomiga mai le Maota mo Sauniga?
3 Isi Lomiga: Pe afai e sui le lomiga e ofo i le talaʻiga, ia faamautinoa muamua po o iai ni au lomiga na i le fale, a o leʻi aveina nisi au lomiga mai le Maota mo Sauniga. Ia faamasani e ave na o lomiga e faaaogā mo le vaiaso, ma seʻi vaganā ua ofo uma atu ona toe aumai lea o nisi lomiga.
4 Mo lomiga a le tagata lava ia e faaaogā, ia ota tau lava o lomiga e te manaʻomia moni lava. Ia tusia lou suafa ma le tuatusi i le avanoa e tusia ai. Afai e leiloa e faigofie ona toe faafoʻi mai iā te oe. Afai e te faaaogāina le Watchtower Library on CD-ROM ma o loo teu foʻi au mekasini ua uma ona faaaogā, atonu la e lē manaʻomia ona ota ni au tuufaatasiga o le Watchtower ma le Awake!
5. O le ā e ao ona manatua pe a ofo atu a tatou lomiga?
5 Le Ofoina o Lomiga: E tatou te taumafai malosi e ofo a tatou lomiga iā i latou e faaalia moni le naunau fiafia. Ia manatua o i tatou e fitoitonu i ai le faatupeina o nei meafaigaluega aogā mo la tatou faiva. Pe a tatou tuu se lomiga i se tagata fiafia, aua le faatalatū e taʻu i ai le avanoa latou te lagolagoina ai le galuega i le lalolagi aoao e ala i a latou meaalofa tauofo.
6. Aiseā tatou te matuā faatāuaina ai a tatou lomiga, ma ua uunaʻia ai i tatou e fai le ā?
6 Sa saunia faavavega e Iesu taumafa mo isi, ae o le tele o taimi sa ia fafagaina ai faaleagaga tagata. Na fetalai Iesu: “E lē na o meaʻai e ola ai le tagata, ae o afioga uma e tulei mai i le fofoga o Ieova.” (Mata. 4:4) O loo aʻoaʻo atu e a tatou lomiga upu moni o le Tusi Paia e maua ai le ola e faavavau. (Ioa. 17:3) E lē tatau lava ona faamaʻimauina!