Faaaogā Lelei le Sāvali
1. O le ā le aogā o le sāvali Iloa le Upu Moni?
1 O le sāvali Pe E te Fia Iloa le Upu Moni? ua fuafua e fesoasoani iā i tatou e amata ai suʻesuʻega faale-Tusi Paia. Ae o se meafaigaluega aogā foʻi e faasalalau atu ai fatu o le upu moni. (Fai. 11:6) O nai fautuaga nei e fesoasoani iā i tatou e faaaogā lelei ai lenei sāvali.
2. E faapefea ona tatou faaaogā le sāvali e amata ai se talanoaga?
2 Ina ia Amata se Talanoaga: Tuu atu le sāvali i le tagata o le aiga, ma faasino i ai fesili e ono o loo iai i luma o le sāvali, ma fesili i ai: “O lē fea o nei fesili sa e taumafaufau e fia maua i ai se tali?” Pe a tali mai le tagata, ona faasino lea i ai mai le sāvali le tali a le Tusi Paia i lana fesili, ma faitau se tasi o mau faasino o loo iai. Faitau pe aotele manatu o loo i le pito i tua o le sāvali, ma ofo le tusi, Aʻoaʻoga Moni. E tusa pe na te lē taliaina le tusi, ae ua ia maua le sāvali, lea e ono mafai ona mauaa ai le upu moni i lona loto.—Mata. 13:23.
3. Pe a pisi le tagata o le aiga, o le ā e tatou te ono fai.
3 Pe a Pisi le Tagata o le Aiga: E te ono faapea atu: “Ona e lē o talafeagai lenei taimi, o lea la, o le a tuu atu le sāvali lea iā te oe. O loo lisi mai ai fesili autū e ono, e masani ona fesili ai le toʻatele o i tatou, ma tali manino a le Tusi Paia i na fesili taʻitasi. Pe a ta toe feiloaʻi, ona taʻu mai lea o sou manatu i ai.”
4. O le ā se tala e tatou te fai atu pe a ofo le sāvali i le galuega i ala tetele?
4 Pe a Galue i Ala Tetele: E te ono faapea atu: “Talofa. Pe na iai se taimi na e fesili ai i se tasi o nei fesili? [Faatali mo se tali.] O loo faaalia manino i inei tali faamalieloto o loo maua i le Tusi Paia.” Afai e lē o faanatinati le tagata, e mafai ona lua talanoaina se tasi o tali mai le sāvali, ma e mafai foʻi ona ofo i ai le tusi, Aʻoaʻoga Moni.
5. E faapefea ona tatou faaaogā le sāvali i aiga e lē o maua i ai ni tagata i nisi taimi?
5 Pe a Lē Maua se Tasi i le Fale: I nisi o oganuu, pe a lē maua atu se tasi i le fale, e masani ona tuu e le ʻautalaʻi ni lomiga i aiga i se mea e lē iloa atu e tagata. Afai o le tulaga masani lea i lau faapotopotoga, aiseā e lē tuu ai ma le sāvali Iloa le Upu Moni i nisi taimi? Pe a e toe foʻi, e te ono fai atu: “Na ma ō mai muamua, ae e leʻi maua mai oe i le fale, ona ma tuu lea o le sāvali lenei i le faitotoʻa. O lē fea o nei fesili e te fia iloa i ai se tali?”
6. Aiseā e aogā tele ai le sāvali Iloa le Upu Moni i le galuega talaʻi?
6 O le sāvali Iloa le Upu Moni, o loo faamatala ai le upu moni i se auala faigofie ma tuusaʻo. E faaoso naunau i tagata o so o se lotu ma so o se aganuu. E faigofie ona faailoa atu; e oo lava i talavou ma tagata talaʻi fou, e mafai ona latou ofoina atu. Po o e faaaogā le sāvali i taimi talafeagai uma?