Ia Saʻo ma Poto Au Tuʻi
1. O le ā le faatatauga o le 1 Korinito 9:26 i le galuega talaʻi?
1 Na tusi le aposetolo o Paulo: “E lē o faalētonu laʻu tamoʻe, e faapea foʻi ona ou tuʻi, ou te lē tuʻi i le ʻea.” (1 Kori. 9:26) Sa faasino atu Paulo i le maumauaʻi o lona mafaufau ma le taulaʻi saʻo atu i le tuliloaina o sini faaleagaga. Peitaʻi, o nei upu e mafai foʻi ona faatatau atu i le galuega talaʻi. E tatou te mananaʻo ia saʻo ma poto a tatou “tuʻi” po o taumafaiga, ina ia mafai ona faataunuuina le mea e sili ona lelei. E faapefea?
2. E faapefea ona tatou faaaʻoaʻo iā Paulo ma isi faievagelia i le uluaʻi senituri, i le filifilia o taimi ma nofoaga e talaʻi ai?
2 Ia ō i Nofoaga o Loo Iai Tagata: Na talaʻi Paulo ma isi faievagelia i le uluaʻi senituri i nofoaga sa iai tagata. (Galu. 5:42; 16:13; 17:17) O lea, pe afai o le toʻatele o tagata o la tatou oganuu e maua i o latou fale i le afiafi, atonu la o le taimi sili lea e talaʻi ai mai i lea fale i lea fale. Pe e toʻatele ni tagata e iai i nofoaga e faatali ai pasi i le taeao ma le afiafi, a o agaʻi atu tagata i galuega pe toe foʻi i o latou fale? O lē fea taimi e tumutumu ai tagata i nofoaga e fai ai faatauga? Atonu o taimi ia e sili ona aogā e talaʻi ai i alatetele.
3. E mafai faapefea ona saʻo ma poto a tatou tuʻi, i le auala e galueaʻiina ai la tatou oganuu?
3 Ia Galueaʻiina i se Auala Atamai le Oganuu: E tatau foʻi ona faaeteete ia saʻo ma poto a tatou tuʻi, i le auala e galueaʻiina ai la tatou oganuu. O se faaaʻoaʻoga, nai lo o le ō atu o se vaega e toʻatele i se oganuu e tasi, lea e telē le taimi ma taumafaiga e manaʻomia ina ia faamaopoopo ai le vaega ma talaʻi ai, atonu e sili ona lelei pe a vaevae le vaega. I se tulaga tutusa, pe a galueaʻiina oganuu maotua, o le a vave ona galueaʻiina le oganuu ma tele avanoa e talanoa atu ai i tagata, pe afai e lē toʻatele ni vaega o loo faimalaga i taavale. Pe e mafai ona maua sau oe lava oganuu e latalata ane i lou fale, ina ia faaitiitia ai le taimi e faimalaga ai?
4. O le ā e fesoasoani iā i tatou ina ia avea ai o ni “faifaiva i tagata” e taulau manuia?
4 Na faatusa e Iesu faievagelia o ni ē e “faifaiva i tagata.” (Mare. 1:17) O le sini o se tagata faifaiva, e lē tau ina ia fagota, ae ia maua ni iʻa. O lea la, o tagata faifaiva e taulau manuia, e ō atu i le nofoaga ma le taimi e maua ai iʻa, ma amata loa ona latou fagogota e aunoa ma le faatuai. Ioe, e saʻo ma poto a latou taumafaiga. Tau ina ia tatou faaalia foʻi lenā lava filigā i la tatou faiva.—Epe. 6:11.