Faaaogā le Mataupu ua Tofia Atu

UA FAATUSA e le Tusi Paia le faapotopotoga Kerisiano i le tino o le tagata. O ona vaega uma e manaʻomia, ae “le tasi se faiva i itu tino uma.” I le ōgatasi ma lenā mea, e ao ai ona tatou faatinoina so o se faaeaga ua tofia mai iā i tatou. O le a manaʻomia i lenei mea lo tatou malamalama ma sauniuni lelei mo so o se tofiga e lauga ai, na i lo le faaitiitia o le tāua o nisi mataupu ona ua tatou manatu e sili atu le mananaia o isi mataupu. (Roma 12:4-8) Ua iai i le vasega o le auauna faamaoni ma le mafaufau le avega tauave ina ia saunia ai meaʻai faaleagaga “i ona itu aso” e tatau ai. (Mata. 24:45) A tatou faaaogā o tatou tomai totino e fafau aʻe ai lauga e tusa ma faatonuga ua tatou maua, tatou te faaalia ai le lotofaafetai ma le faatāuaina o lenā faatatauga. O le a saosaolaumea lea i le sologalelei o le faagaoioiga o le faapotopotoga atoa.

Mea e Faaaofia Ai. Pe a tofia atu iā te oe se mataupu i le aʻoga, ia faamautinoa ua e faalauteleina lenā mataupu ae e lē o se isi mea. I le tele o tulaga, o le a taʻu atu faasinoga patino o se mataupu. Afai e lē o taʻuina atu iā te oe po o le ā le lomiga e faaaogā e fafau aʻe ai lau lauga, e mafai ona e mauaina faamatalaga mai ni lomiga e te filifilia. Peitaʻi, a o e sauniunia lau lauga, ia faamautinoa ua fafau aʻe lau taulimaga atoa i le mataupu na tofia atu. E manaʻomia foʻi ona e manatuaina lau aofia, pe a filifilia manatu e faaaofia ai.

Ia suʻesuʻe ma le faaeteete le mataupu ua faasino atu, ma iloiloina mau o loo aofia ai. Ona manatunatu lea pe faapefea ona faaaogā i se tulaga e sili ona uigā, ina ia maua ai e le aofia ni aogā. Ia filifilia ni manatu se lua po o le tolu, mai le mataupu ina ia fai ma manatu autū i lau lauga. Ia faapena foʻi ona e filifilia mai le mataupu na tofia atu ia mau ua e fuafua e faitau ma talanoaina.

O le ā le tele o faamatalaga e ao ona e faaaogāina? Ia tau o mea e mafai ona e taulimaina ma le uigā. Aua neʻi tuuesea le aʻoaʻo atu ma le uigā ona o le taumafai e faaaofia ai ni faamatalaga se tele. Afai e iai ni vaega o le mataupu e lē fetaui i le sini o lau lauga, ia uaʻi atu la i manatu o le a ausia ai lenā sini. Mai le mataupu na tofia atu, ia faaaogā manatu o le a sili atu ona aʻoaʻoina ai ma aogā mo le aofia. O lou sini e tusa ai o lenei manatu mo fautuaga o lauga, e lē ina ia vaai po o le ā le tele o le lauga e mafai ona talanoaina, ae ia faaaogā le mataupu na tofia atu e fai ma faavae o lau lauga.

E lē tatau ona avea lau lauga e tau o se aotelega o le mataupu na tofia atu. E ao ona e fuafua e faamalamalama nisi o manatu, ia faalautele, ia faataʻitaʻi, ma atonu e avatu se faaaʻoaʻoga o lo latou faatatauga. E ao ona faaaogā manatu faaopoopo e fafau aʻe ai manatu tāua mai lau mataupu na tofia atu, na i lo o le suia o lenā mataupu.

O uso o ē e iai agavaa manaʻomia e avea ai ma faiaʻoga, atonu i se taimi o le a valaaulia ai e avatu faatonuga i le Sauniga o le Auaunaga. Ua latou malamalama i le manaʻoga ina ia faaaogā lelei le mataupu na tofia na i lo le suia i se isi mea. I se tulaga faapena, ua avatu ai i uso o ē taulimaina lauga i le lautele, ni auivi e mulimuli ai. O le a mafai i lenei mea ona fetuutuunaʻi, ae e latou te faaalia manino mai manatu autū e ao ona fafau aʻe, o finauga lagolago e faaaogā, atoa ma mau ua saunia ai se faavae mo le lauga. O le taumafai ina ia iloa aʻoaʻo atu e ala i le faaaogāina o le mataupu na tofia atu e fai ma faavae, o se vaega tāua o sauniuniga mo isi tofiga o lauga.

O lenei toleniga e mafai foʻi ona fesoasoani iā te oe i le taulimaina o se suʻesuʻega faale-Tusi Paia i le aiga e agaʻigaʻi i luma. O le a e aʻoaʻoina le auala e faauaʻi atu ai manatu i le mataupu o le suʻesuʻega, na i lo le suia o le mataupu e ala i le faamatilatila o isi mea atonu e manaia ae e lē o manaʻomia ina ia malamalama ai i le mataupu. I le isi itu, afai e te maua le aano moni o lenei lesona, o le a e lē soona tautū ai i le mataupu, ma lē taulau ai ona avatu se faamalamalamaga faaopoopo atonu o loo manaʻomia e le tagata aʻoga.