Talafaatusa Mai Tulaga Masani

O LE mea moni lava ia, po o ā lava talafaatusa e te faaaogā, e tāua ona fetaui i le mataupu o loo e talanoaina. Peitaʻi, ina ia sili atu ona uigā, e tutusa foʻi le tāua pe a fetaui i lau aofia.

E mafai faapefea i se ituaiga o aofia ona aafia ai lau filifiliga o talafaatusa mo se tautalaga i se vaega? O le ā sa faia e Iesu Keriso? E tusa pe sa ia fetalai atu i le motu o tagata po o lona ʻausoo, sa leʻi aumaia e Iesu ana faaaʻoaʻoga mai ala o le olaga sa iloga ai nuu i fafo atu o Isaraelu. O na faaaʻoaʻoga o le a lē masani ai lana aofia. Mo se faataʻitaʻiga, sa leʻi taʻua lava e Iesu le olaga o aigātupu o Aikupito po o tū a lotu o Initia. E ui i lea, o ana talafaatusa sa aumai i gaoioiga ua masani ai tagata i atunuu uma. Sa ia fetalai e uiga i le fonoina o ofu, le faiga o pisinisi, le leiloa o se ʻoa tautele, ma le auai i se tausamaaga o se faaipoipoga. Sa malamalama Iesu i le auala na gaoioi ai tagata i lalo o tulaga eseese, ma na ia faaaogāina lenei malamalamaga. ( Mare. 2:21; Luka 14:7-11; 15:8, 9; 19:15-23) Talu ai sa taulaʻi patino atu lana talaʻiga i tagata o Isaraelu, na tele ai ina fai talafaatusa a Iesu i mea iloga ma gaoioiga sa avea ma vaega o o latou olaga i aso taʻitasi. O lea, sa ia faasino atu ai i mea e pei o le faifaatoʻaga, le auala e tali atu ai mamoe i lo latou leoleo, ma le faaaogāina o paʻu o manu e teu ai uaina. (Mare. 2:22; 4:2-9; Ioa. 10:1-5) Sa ia faasino atu foʻi i faaaʻoaʻoga i talafaasolopito ua masani ai—mo se faataʻitaʻiga o le foafoaina o le uluaʻi ulugalii faaletagata, le Lolo i ona pō o Noa, le faaumatiaga o Sotoma ma Komoro, atoa ma le oti o le avā a Lota. (Mata. 10:15; 19:4-6; 24:37-39; Luka 17:32) Po o faapena ona e iloiloina faaeteete gaoioiga ua masani ai lau aofia ma lo latou talaaga faaleaganuu pe a filifilia talafaatusa?

Ae ā pe a e talanoa atu, e lē i se vaega toʻatele, ae i se tagata e toʻatasi po o sina vaega toʻaitiiti? Ia taumafai e filifili se talafaatusa e talafeagai faapitoa mo lenā aofia toʻaitiiti. Ina ua molimau atu Iesu i se fafine Samaria i tafatafa o se vaieli i Sukara, sa ia fetalai e uiga i se “vaiola,” le ‘lē toe fia inu lava,’ ma “le vaipuna, e puna i luga i le ola faavavau”—o na mea uma o ni talafaatusa e fesootaʻi tuusaʻo atu i le galuega a le fafine. (Ioa. 4:7-15) Ma ina ua ia fetalai atu i tamāloloa o ē na ta o latou upega fagota, sa faaaofia ai faiga faiva i le talafaatusa na ia filifilia. (Luka 5:2-11) I na mea e lua, sa ono mafai ona ia faasino atu i le faiga o faatoʻaga, talu ai sa latou ola aʻe i se nofoaga faifaatoʻaga, ae maʻeu le sili atu ona uigā sa iai i le faatepa atu i la latou galuega totino a o ia faailoa atu se ata faalemafaufau! Pe e te taumafai ea e fai lenā mea?

Sa uaʻi atu Iesu i “mamoe o le aiga o Isaraelu ua le iloa,” o le aposetolo o Paulo sa auina atu e lē gata i Isaraelu ae faapea foʻi i Nuu Ese. (Mata. 15:24; Galu. 9:15) Pe sa faapogaia e lenei mea se eseesega i le auala na tautala atu ai Paulo? Ioe. Ina ua tusi atu i Kerisiano i Korinito, sa ia faasino atu i tauvaga tamoʻe, na ia taʻua le tū sa masani ai o le ʻai o meaʻai i fale o tupua, ma sa faatepa i solo manumalo, o mea sa masani lelei ai na tagata o Nuu Ese.—1 Kori. 8:1-10; 9:24, 25; 2 Kori. 2:14-16.

Pe o e faaeteete e pei o Iesu ma Paulo i le filifilia o talafaatusa ma faaaʻoaʻoga e faaaogā i lau aʻoaʻo atu? Pe e te iloiloina le talaaga ma gaoioiga i aso taʻitasi a lau ʻaufaalogologo? O le mea moni, ua iai suiga i le lalolagi talu mai le uluaʻi senituri. E toʻatele tagata ua matamata i tala fou o le lalolagi e ala i televise. Ua tele ina latou masani i tulaga o isi atunuu i fafo. Afai o faapena lou vaipanoa, e mautinoa la e lē sesē le faaaogā o mataupu i na tala e fai ma talafaatusa. Ae peitaʻi, o mea e sili atu ona pāʻia ai tagata, o mea ua masani ona aafia ai o latou lava olaga—o latou fale, o latou aiga, o a latou galuega, o mea taumafa latou te taumafaina, o le tau i lo latou vaipanoa.

Afai o manaʻomia e lau talafaatusa le tele o faamatalaga, atonu la o loo e talanoa i se mea e lē o masani ai lau aofia. O na talafaatusa e faigofie ai lava ona lē iloa le autū o le aʻoaʻoga. O le iʻuga, atonu o le a manatua e le aofia lau talafaatusa ae lē o le upu moni faale-Tusi Paia lea sa e taumafai e faaoo atu.

Na i lo le faia o ni faatusatusaga lavelave, sa faaaogā e Iesu mea faigofie, o aso taʻitasi. Sa ia faaaogā mea iti e faamatala ai mea tetele ma mea faigofie e faamatala ai mea faigatā. E ala i le faafesootaʻi o mea tutupu i aso taʻitasi ma upu moni faaleagaga, sa fesoasoani ai Iesu i tagata ina ia vave ona taliaina upu moni faaleagaga sa ia aʻoaʻoina ma ia manatuaina. Maʻeu se faaaʻoaʻoga e sili ona lelei e mulimuli ai!