O Feʻau e Lua Mai i le Atua

E tatou te manatu i le Tusi Paia atoa o se feʻau mai le Atua lo tatou Tamā i le lagi. Na ia saunia ina ia faatonuina ai i tatou. Seʻi mafaufau i ni feʻau faapitoa se lua na aumaia i le silia ma le 2,000 tausaga ua mavae, e se agelu e suafa iā Kaperielu, o lē o loo “tū i luma o le Atua.” (Luka 1:19) O ā ni mea na tutupu i le taimi na aumaia ai e le agelu nei feʻau tāua?

Ua faailoa atu e Kaperielu le feʻau muamua iā Sakaria, pe tusa o le tausaga e 3 T.L.M. O Sakaria o se ositaulaga a Ieova ma e nofo i atumauga o Iutaia, lea e lē mamao mai i Ierusalema. E leai se la tama ma lana avā o Elisapeta ma ua matutua i laʻua. Ua oo nei i le taimi e auauna ai Sakaria o se ositaulaga i le malumalu o le Atua i Ierusalema. A o iai o ia i inā, ua faafuaseʻi ona faaali ane i ai Kaperielu, o loo tū latalata i le fata faitaulaga e faamū ai mea manogi.

Ua matuā atuatuvale lava Sakaria. Peitaʻi, ua faatoʻafilemu o ia e le agelu e ala i le faapea atu: “Sakaria e, aua e te fefe, auā ua faafofogaina au tatalo faatauanau, ma o le a fanaua e lau avā o Elisapeta sou atalii, e te faaigoa iā te ia o Ioane.” Ua toe faapea atu Kaperielu, ʻe sili Ioane i luma o Ieova’ ma o le a ia “saunia le nuu mo Ieova.”—Luka 1:13-17.

E faigatā iā Sakaria ona talitonu i lenei mea, auā e lē mafai ona toe maua sa la fanau ona ua matutua i laʻua. O lea, ua faapea atu ai Kaperielu iā te ia: “O le a e gūgū ma e lē mafai ona e tautala seʻia oo i le aso e taunuu ai nei mea, auā ua e lē talitonu i aʻu upu.”—Luka 1:20.

I le taimi lava lea, o loo taumānatu tagata o loo i fafo pe aiseā ua umi ai ona iai Sakaria i totonu o le malumalu. Ua alu atu nei o ia i fafo, ua lē mafai ona tautala, ae ua na ona fai atu o taga i ona lima. O lenei mea ua iloa ai e tagata sa vaaia e Sakaria se faaaliga uigaese, a o iai i totonu o le malumalu.

Ua māeʻa le auaunaga a Sakaria i le malumalu, ma ua toe foʻi nei o ia i lona aiga. E leʻi umi ae tō Elisapeta. E lima masina o nofo pea Elisapeta i le fale, ma faatalitali ai le taimi e fanau ai lana tama.

Mulimuli ane, ua toe faaali mai foʻi Kaperielu. Ae o le taimi la lenei ua faaali mai iā Maria, o se tamaʻitaʻi talavou e leʻi faaipoipo. E nofo o ia i le aai o Nasareta, lea o loo i le itu i mātū o Ierusalema i le itumalo o Kalilaia. O le ā ua taʻu atu e le agelu iā te ia? Ua faapea atu Kaperielu: ʻUa alofaina oe e le Atua. Faauta! o le a tō oe ma e fanauina mai se tama tama, e te faaigoa iā te ia o Iesu. E sili o ia ma e taʻua o ia o le Alo o le Silisili Ese, ma o le a fai o ia ma tupu i le aiga o Iakopo e faavavau, o lona malo foʻi e leai sona gataaga.’—Luka 1:30-33.

Ua tatou iloa mai i inei, sa manatu Kaperielu o se faaeaga le faailoaina atu o nei feʻau e lua. A o tatou faitau atili e uiga iā Ioane ma Iesu, o le a manino mai ai le māfuaaga e matuā tāua ai nei feʻau mai le lagi.