Lomiga mo le Polokalame mo le Sauniga o le Faiva ma le Olaga Faa-Kerisiano
TESEMA 4-10
ʻOA TAUTELE MAI I LE AFIOGA A LE ATUA | SEFANAIA 1–HAKAI 2
“Saʻili iā Ieova a o Leʻi Oo Mai le Aso o Lona Toʻasā”
(Sefanaia 2:2, 3) Manū e leʻi tutupu mai mea ua poloaʻiina, a o leʻi mavae atu le aso e pei o vao mamago, manū e leʻi oo mai iā te outou le toʻasā tele o Ieova, manū e leʻi oo mai iā te outou le aso o le toʻasā o Ieova, 3 ia saʻili iā Ieova o outou uma o ē ua agamalu i le lalolagi, o ē ua tausia iʻuga o Ana faamasinoga. Ia saʻili le amiotonu, ia saʻili le agamalu. Atonu e lilo ai outou i le aso o le toʻasā o Ieova.
Saʻili iā Ieova a o Lumanaʻi le Aso o Lona Toʻasa
5 E te ono faapea mai: ʻO aʻu o se auauna tuuina atu, ma papatisoina a le Atua, o se tasi o Molimau a Ieova. Po ua lē uma ea ona ou ausia na mea manaʻomia?’ O le mea moni, e tele isi mea e aofia ai na i lo le na ona tuuina atu o i tatou lava ia Ieova. Sa avea Isaraelu o se nuu tuuina atu, ae i aso o Sefanaia, sa leʻi ola ai tagata o Iuta e ōgatusa ma lena tuuina atu. O le iʻuga, na mulimuli ane iʻu ina lafoaʻia le nuu. O le “saili ia Ieova” i aso nei e aofia ai le atiina aʻe ma le faatumauina o se faiā totino ma māfana ma ia e ala i le auaufaatasi ma lana faalapotopotoga i le lalolagi. O lona uiga ia iloa le finagalo o le Atua e faatatau i mataupu ma ia uaʻi atu i ona faalogona. Tatou te saʻili ia Ieova pe a tatou suʻesuʻeina ma le faaeteete lana Afioga, manatunatu loloto i ai, ma faatatauina ana fautuaga i le olaga. A o tatou saʻili atu foʻi i le taʻitaʻiga a Ieova e ala i le tatalo faatauanau ma le mulimuli i le taʻitaʻiga a lona agaga paia, o le a oo ina faalolotoina ai la tatou faiā ma ia ma uunaʻia ai i tatou e auauna ia te ia ʻma o tatou loto atoa, agaga [solu] atoa, ma le malosi atoa.’—Teuteronome 6:5; Kalatia 5:22-25; Filipi 4:6, 7; Faaaliga 4:11.
6 O le mea lona lua e manaʻomia lea e taʻua i le Sefanaia 2:3 o le “saili le amiotonu.” Sa faia e le toʻatele o i tatou ni suiga tāua ina ia agavaa ai mo le papatisoga faa-Kerisiano, peitaʻi e ao ona faaauau pea ona tatou tausisia tapulaa amiotonu a le Atua i o tatou olaga atoa. O nisi sa lelei ona amata mai i lenei tulaga ua latou faataga i latou lava e faaleagaina e le lalolagi. E lē faigofie ona saʻilia le amiotonu, auā ua siʻomia i tatou e tagata o ē manatu i amioga lē mamā faaleituaiga, le pepelo, ma isi agasala, o ni mea masani. Ae peitaʻi, o le iai o se faanaunauga malosi e faafiafia Ieova e mafai ona teena ai so o se faanaunauga ina ia taliaina e le lalolagi e ala i le taumafai e faafetaui atu i ai. Na melea e Iuta le finagalo malie o le Atua ona o lo latou faataʻitaʻi atu i amioga a o latou nuu tuaoi. Na i lo le faaaʻoaʻo la i le lalolagi, seʻi avea i tatou o ē ʻfaaaʻoaʻo i le Atua,’ e ala i le ati aʻe o “le tagata fou ua faia e foliga i le Atua, i le amiotonu ma le amio lelei e faamaoni.”—Efeso 4:24; 5:1.
7 O le manatu lona tolu ua taʻua i le Sefanaia 2:3 e faapea, pe afai tatou te mananaʻo e lilo i tatou i le aso o le toʻasa o Ieova, e ao ona tatou “saili le agamalu.” I aso taʻitasi, tatou te miomiō faatasi ai ma tane, fafine, ma talavou o ē aunoa ma se agamalu. I lo latou manatu, o le agamalu, o se pona. E manatu i le gauaʻi atu o se vaivaiga matuiā. Latou te tagisā, e manatu faapito, ma tautū i o latou lava taofi, i le talitonu faapea e tatau lava ona faatino a latou “aiā” totino ma manaʻoga e tusa lava po o le ā le tulaga e oo i ai. Pagā le faanoanoa pe afai ua aafia i tatou i nisi o na uiga! O le taimi lenei e ʻsaili ai le agamalu.’ E faapefea? E ala i le gauaʻi atu i le Atua, i le taliaina ma le lotomaulalo o ana aʻoaʻiga ma faia lona finagalo.
Saʻiliʻiliga Loloto mo ʻOa Faaleagaga
(Sefanaia 1:8) “O le aso o le taulaga a Ieova o le a ou taui atu ai i perenise, ma alo o le tupu, ma i latou uma o ē e oofu i ofu o isi atunuu.
Manatu Tāua Mai i Tusi o Nauma, Sapakuka, ma Sefanaia
1:8. O nisi i aso o Sefanaia, sa amio faatasi ma nuu na siʻomiaina i latou, e ala i le “oofu i ofu o nuu ese.” Maʻeu le valea mo ē tapuaʻi iā Ieova ona amio faatasi ma lenei lalolagi e ala i a tatou laʻei!
(Hakai 2:9) “ʻO le a sili atu le mamalu o lenei fale mulimuli nai lo o le fale muamua,’ ua fetalai mai ai Ieova o ʻau. “ʻOu te avatu i lenei mea le filemu,’ ua fetalai mai ai Ieova o ʻau.”
Manatu Tāua Mai i Tusi o Hakai ma Sakaria
2:9—O ā auala e mafai ai ona “sili le mamalu o lenei fale ua mulimuli i le muamua”? E tolu ni auala e iloa ai: o le tele o tausaga sa iai le malumalu, na aʻoaʻo ai i inā le aʻoaʻo sili, ma i latou na lolofi atu e tapuaʻi ai iā Ieova. E ui e 420 tausaga o iai le malumalu mataʻina o Solomona, mai le 1027 T.L.M. seʻia oo i le 607 T.L.M., ae e 580 tausaga na faaaogā ai le “fale mulimuli,” mai lona māeʻa i le 515 T.L.M. seʻia oo i lona faaumatiaga i le 70 T.A. E lē gata i lea, na aʻoaʻo le Mesia, o Iesu Keriso, i le ʻfale mulimuli,’ ma e toʻatele atu tagata ua ō mai i le malumalu lea na i lo le malumalu “muamua” ina ia tapuaʻi ai i le Atua.—Galuega 2:1-11.
Faitau Tusi Paia
(Hakai 2:1-14) O le masina lona fitu, i le aso lona lua sefulu tasi o le masina, na oo mai ai le afioga a Ieova e ala mai i le perofeta o Hakai, e faapea: 2 “Faamolemole, ia fai atu iā Serupapelu le atalii o Salatielu, o le kovana o Iuta, ma Iosua le atalii o Iosatako, o le ositaulaga sili, ma ē ua totoe o le nuu e faapea, 3 ʻO ai o outou o ē ua totoe na vaai i le matagofie na muaʻi i ai lenei fale? O le ā la outou vaai i ai i le taimi nei? Pe e lē o se mea noa ea i la outou vaai, pe a faatusatusa atu i lona matagofie na iai muamua?’ 4 “ʻA o lenei, Serupapelu e, inā faamalosi ia oe,’ ua fetalai mai ai Ieova, ʻma ia faamalosi oe Iosua le atalii o Iosatako, o le ositaulaga sili.’ “ʻIa faamalolosi outou o tagata uma o le atunuu,’ ua fetalai mai ai Ieova, ʻma ia galulue.’ “ʻAuā ou te faatasi ma outou,’ ua fetalai mai ai Ieova o ʻau. 5 ʻIa outou manatua le feagaiga na ou osia ma outou, ina ua outou ō mai mai i Aikupito, ma ina o iai loʻu agaga faatasi ma outou. Aua le fefefe.’” 6 “Auā o le fetalaiga lenei a Ieova o ʻau, ʻE toe tasi, e toe itiiti lava, ona ou lūlūina lea o le lagi ma le lalolagi, o le sami ma le laueleele mātūtū.’ 7 “ʻOu te lūlūina atunuu uma, ona ō mai ai lea o mea ua manaʻomia mai i atunuu uma; ou te faatumuina lenei fale i le mamalu,’ ua fetalai mai ai Ieova o ʻau. 8 “ʻO aʻu e ona le siliva, o aʻu foʻi e ona le auro,’ ua fetalai mai ai Ieova o ʻau. 9 “ʻO le a sili atu le mamalu o lenei fale mulimuli nai lo o le fale muamua,’ ua fetalai mai ai Ieova o ʻau. “ʻOu te avatu i lenei mea le filemu,’ ua fetalai mai ai Ieova o ʻau.” 10 O le aso lona lua sefulu fā o le masina lona iva, i le tausaga lona lua o le nofoaiga a Tariu, na oo mai ai le afioga a Ieova i le perofeta o Hakai, e faapea: 11 “O le fetalaiga lenei a Ieova o ʻau, ʻFaamolemole, ia fesili atu i ositaulaga e uiga i le tulafono, e faapea: 12 “Afai e ave e se tamāloa se tufaaga paia i lona pito ofu, ma paʻi atu lona pito ofu i se falaoa po o se sitiū, po o se uaina, po o se suāuu, po o se isi ituaiga o meaʻai, pe e paia ai ea ia mea?”’” Ona tali mai lea o ositaulaga e faapea: “E leai!” 13 Ua faapea atili atu Hakai: “Afai e lē mamā se isi ona o se tino oti ae pe a paʻi atu i se tasi o nei mea, pe e lē mamā ai ea lea mea?” Ona tali mai lea o ositaulaga e faapea: “E lē mamā ai.” 14 Ua tali atu Hakai e faapea: “ʻE faapena lenei nuu, ma e faapena foʻi lenei atunuu i oʻu luma,’ ua fetalai mai ai Ieova, ʻe faapena foʻi galuega uma a o latou lima, ma mea uma ua latou avatu i inā. Ua lē mamā.’
TESEMA 11-17
ʻOA TAUTELE MAI I LE AFIOGA A LE ATUA | SAKARIA 1-8
“Ia Fetagofi Atu i le Pito Ofu o le Tagata Iutaia”
(Sakaria 8:20-22) “O le fetalaiga lenei a Ieova o ʻau, ʻO le a ō mai nuu ma ē o nonofo i aai e tele; 21 ma o le a ō atu lava tagata o le tasi aai i tagata o le isi aai ma faapea atu: “Seʻi o tatou ō ia ma saʻili ina ia faamalieina le finagalo o Ieova ma saʻili atu foʻi iā Ieova o ʻau. Ou te alu foʻi aʻu.” 22 E ō mai foʻi nuu e tele ma nuu malolosi e saʻili iā Ieova o ʻau i Ierusalema ma saʻili foʻi e faamalieina lona finagalo.’
“Ua Avea Nei Outou ma Nuu o le Atua”
14 Sa valoia e ni perofeta anamua se toʻalua le lolofi mai o le toʻatele o tagata, e tapuaʻi atu iā Ieova faatasi ma ona tagata i lenei taimi o le iʻuga. Na valoia e Isaia: “E ō mai lava nuu e tele ma faapea ane: ʻŌ mai ia, tatou ō aʻe i le mauga o Ieova, i le fale o le Atua o Iakopo; e na te aʻoaʻoina ai i tatou i ona ala, ma tatou savavali ai i ona ala.’ Auā e alu atu le tulafono mai i Siona, ma le afioga a Ieova mai i Ierusalema.” (Isa. 2:2, 3) Sa valoia foʻi e le perofeta o Sakaria: “E ō mai foʻi nuu e tele ma nuu malolosi e saʻili iā Ieova o ʻau i Ierusalema ma saʻili foʻi e faamalieina lona finagalo.” Sa ia faamatalaina i latou o “tagata e toʻasefulu mai i gagana uma a atunuu eseese.” I se uiga faafaatusa, o loo latou fetagofi atu i le pito ofu o le Isaraelu faaleagaga ma faapea atu: “E matou te ō ma outou, auā ua matou faalogo o loo iā te outou le Atua.”—Saka. 8:20-23.
(Sakaria 8:23) “O le fetalaiga lenei a Ieova o ʻau, ʻO ia aso o le a fetagofi atu ai tagata e toʻasefulu mai i gagana uma a atunuu eseese, ioe, latou te fetagofi atu lava i le pito ofu o le tagata Iutaia, ma faapea atu: “E matou te ō ma outou, auā ua matou faalogo o loo iā te outou le Atua.”’”
“E Matou te Ō ma Outou”
4 Afai e lē mafai ona iloa suafa uma o le Isaraelu faaleagaga o loo i le lalolagi i aso nei, e faapefea la i isi mamoe ona “ō ma” i latou? Ia mātau le valoaga a Sakaria e faatatau i tagata faafaatusa e toʻasefulu. O le a latou ʻfetagofi atu i le pito ofu o le tagata Iutaia, ma faapea atu: “E matou te ō ma outou, auā ua matou faalogo o loo iā te outou le Atua.”’ E ui e na o le toʻatasi le tagata Iutaia o loo taʻua, ae o le suinauna “outou” e faasino atu i tagata e toʻatele. O lenei Iutaia faaleagaga e faasino atu i se vaega o tagata ae e lē o se tagata se toʻatasi. O lea, e lē manaʻomia ona tatou iloa suafa uma o le Iutaia faaleagaga ina ia ō ai ma i latou. E manaʻomia ona mātauina i latou o se vaega ma lagolagoina i latou. E lē o faalaeiauina i tatou e le Tusi Paia e mulimuli i se tagata e toʻatasi, auā o Iesu lo tatou Taʻitaʻi.—Mata. 23:10.
Ua Latou “Mulimuli Atu i le Tamaʻi Mamoe”
14 Na fetalai Iesu a tatou lagolagosua ma le faamaoni i ona uso, ua tatou lagolagosua atu foʻi iā te ia. (Faitau le Mataio 25:40.) O le ā la le auala ua lagolagoina ai e i latou ua iai le faamoemoe i le lalolagi, ia uso o Keriso ua faauuina i le agaga? O le auala sili lava, e ala lea i le fesoasoani atu iā i latou i le talaʻia o le Malo. (Mata. 24:14; Ioa. 14:12) A o faagasolo tausaga, ua faaitiitia le aofaʻi o le ʻaufaauuina i le lalolagi, ae ua faateleina le aofaʻi o isi mamoe. Pe a auai i latou ua iai le faamoemoe mo le lalolagi i le galuega o le molimau atu, i le auauna o ni tagata talaʻi faataimi atoa pe a mafai, ua latou lagolagosua atu i le ʻaufaauuina i le faataunuuina o le tofiga ia faia isi ma soo. (Mata. 28:19, 20) Aua foʻi neʻi galo, o isi avanoa e lagolagosua ai i lenei galuega, o le faia lea o foaʻi tautupe i so o se auala.
Saʻiliʻiliga Loloto mo ʻOa Faaleagaga
(Sakaria 5:6-11) Ona ou fai atu lea: “O le ā lea mea?” Ua ia faapea mai: “O le fua lenei o le efa o loo alu atu.” Ona ia toe faapea mai lea: “O o latou foliga na i le lalolagi atoa.” 7 Faauta! ua siitia i luga le ufi lapotopoto ua faia i le pulu; ma o loo nofo ai se fafine i totonu o le efa. 8 Ua ia faapea mai foʻi: “O le Amioleaga lenei.” Ona ia toe lafo lea o ia i totonu o le efa, ma lafo le ufi pulu i le gutu o le efa. 9 Ua tepa aʻe oʻu mata ma ou iloa ai, o fafine e toʻalua o loo ō mai, ma ua iai le matagi i o la apaʻau. Ua iai o la apaʻau e pei o apaʻau o le manulele o le kasita. Ua auaumālie ona la sii aʻe le efa i le va o le lalolagi ma le lagi. 10 Ona ou fai atu lea i le agelu o loo ma talanoa: “O fea o le a la ave i ai le efa?” 11 Ua faapea mai o ia iā te aʻu: “I le laufanua o Senara ina ia fausia ai se fale mo le fafine; e ao ona faatumauina lea fale, ma tuu ai o ia i inā i le mea e tatau ona iai o ia.”
O le ā le Tāua iā te Oe o Vaaiga na Iloa e Sakaria?
18 Na faamanatu atu foʻi e lenei vaaiga i tagata Iutaia lo latou tiute tauave o le tausisia pea o le mamā o la latou tapuaʻiga. E lē mafai ma o le a lē faatagaina le amioleaga e sao mai ma tumau ona iai i le lotolotoi o tagata o Ieova. Ua aumaia i tatou e Ieova i lana faalapotopotoga mamā lea e tatou te lagona ai lona alofa ma lana puipuiga. O lea la, o lo tatou tiute tauave le tausia pea o le mamā o lana faalapotopotoga. Po o tatou taumafai ia tausia le mamā o le faalapotopotoga a Ieova? E lē taliaina i totonu o lo tatou parataiso faaleagaga so o se ituaiga amioleaga.
(Sakaria 6:1) Ua toe tepa aʻe oʻu mata ma iloa ai; faauta! ua ō mai ni kariota se fā mai i le va o mauga e lua, o mauga foʻi o mauga ʻapamemea ia.
E Puipuia Oe e Kariota ma le Pale
7 I le Tusi Paia, o mauga e mafai ona faaata mai ai malo. E talitutusa mauga na vaaia e Sakaria ma mauga e lua lea e faamatala i le valoaga a Tanielu. O le tasi mauga e faaata mai ai le pule silisili ese a Ieova i le aoao o mea lea e tumau e faavavau. A o le isi mauga o loo faaata mai ai le Malo faa-Mesia lea e avea ai Iesu ma Tupu. (Tani. 2:35, 45) Na amata ona iai nei mauga talu mai le taimi na nofotupu ai Iesu i le 1914, ma e iai vaega faapitoa a nei mauga i le faataunuuina o le finagalo o le Atua i le lalolagi.
8 Aiseā ua faia aʻe ai nei mauga i ʻapamemea? E matuā tāua le ʻapamemea e pei lava foʻi o le auro. Na faatonu e Ieova tagata Isaraelu ia faaaogā le ʻapamemea i le fausiaina o le faleʻie paia, ma le malumalu mulimuli ane i Ierusalema. (Eso. 27:1-3; 1 Tu. 7:13-16) O lea la, o le ʻapamemea lea e faia aʻe ai mauga faafaatusa e lua, ua faamanatu mai ai iā i tatou le tulaga e silisili ona lelei o le pule silisili ese a Ieova i le aoao o mea ma le Malo faa-Mesia, ma o le a maua ai e tagata uma le saogalemu ma faamanuiaga.
Faitau Tusi Paia
(Sakaria 8:14-23) “Auā o le fetalaiga lenei a Ieova o ʻau, ʻ“E faapei ona ou manatu e faia le mea leaga iā te outou ona ua faatigā mai o outou augātamā iā te aʻu,” ua fetalai mai ai Ieova o ʻau, “ma ou te leʻi faanoanoa ai, 15 e faapea foʻi ona ou toe manatu i nei aso e fai mea lelei iā Ierusalema ma le aiga o Iuta. Aua tou te fefefe.”’ 16 “ʻO mea nei e ao ona outou faia: Ia tautala i le mea moni o le tasi i le isi. Ia faia la outou faamasinoga e tusa ma le upu moni ma le faamasinoga o le filemu i faitotoʻa o pā o o outou aai. 17 Aua tou te fafau aʻe i o outou loto ni mea leaga e fai e le tasi i le isi, aua foʻi tou te fiafia i se tautoga pepelo; auā o mea uma ia ou te ʻinoʻino i ai,’ ua fetalai mai ai Ieova.” 18 Ua toe oo mai foʻi iā te aʻu le afioga a Ieova o ʻau, e faapea: 19 “O le fetalaiga lenei a Ieova o ʻau, ʻO le anapogi o le masina lona fā, o le anapogi o le masina lona lima, o le anapogi o le masina lona fitu, ma le anapogi o le masina lona sefulu, o le a fai ma mea e fiafia ai ma olioli, ma aso o tausamiga lelei i le aiga o Iuta. O lea, ia fiafia i le upu moni ma le filemu.’ 20 “O le fetalaiga lenei a Ieova o ʻau, ʻO le a ō mai nuu ma ē o nonofo i aai e tele; 21 ma o le a ō atu lava tagata o le tasi aai i tagata o le isi aai ma faapea atu: “Seʻi o tatou ō ia ma saʻili ina ia faamalieina le finagalo o Ieova ma saʻili atu foʻi iā Ieova o ʻau. Ou te alu foʻi aʻu.” 22 E ō mai foʻi nuu e tele ma nuu malolosi e saʻili iā Ieova o ʻau i Ierusalema ma saʻili foʻi e faamalieina lona finagalo.’ 23 “O le fetalaiga lenei a Ieova o ʻau, ʻO ia aso o le a fetagofi atu ai tagata e toʻasefulu mai i gagana uma a atunuu eseese, ioe, latou te fetagofi atu lava i le pito ofu o le tagata Iutaia, ma faapea atu: “E matou te ō ma outou, auā ua matou faalogo o loo iā te outou le Atua.”’”
TESEMA 18-24
ʻOA TAUTELE MAI I LE AFIOGA A LE ATUA | SAKARIA 9-14
“Ia Tumau Pea i le ʻVanu o Mauga’”
(Sakaria 14:3, 4) “E afio atu lava Ieova ma tau faasaga i na nuu e pei o le aso na tau ai o ia, i le aso o le taua. 4 E tū ona aao i lea aso i luga o le mauga o laau o olive, o loo i luma o Ierusalema i le itu i sasaʻe, ona vaeluaina ai lea o le mauga o laau o olive i lona ogatotonu, e mai i le mea e oso aʻe ai le lā e oo atu i le itu i sisifo. O le a iai le vanu telē; ma o le a siitia le ʻafa o le mauga i le itu i mātū a o le isi ʻafa i le itu i saute.
Ia Tumau i le Vanu o le Puipuiga a Ieova
10 E tusa ai ma le valoaga, pe a vaeluaina le mauga o laau olive, ona tū lea o le tasi mauga i mātū, ae tū le isi i saute. Peitaʻi, o le a tū aao o Ieova i luga o nei mauga. O le vaeluaina o nei mauga, o le a maua mai ai se “vanu telē,” lea o le a tū ai i luga aʻe Ieova. O le ā lenā vanu? Ua faaāta mai ai le puipuiga a Ieova. E malupuipuia tagata i se vanu i le va o ni mauga se lua, e faapena foʻi le puipuiga e maua e auauna a Ieova mai i Lana pule, faapea le pulega a lona Alo. E lē faatagaina e Ieova le tafiesea o le tapuaʻiga moni. Na vaeluaina le mauga o laau olive i le 1914, ina ua pule Iesu i le lagi. Ua faapea mai foʻi le valoaga, e sosola atu tagata o Ieova i lenā “vanu telē.” O anafea na tupu ai lenā mea?
(Sakaria 14:5) E tou te sosola lava i le vanu o loo i oʻu mauga; auā e oo atu le vanu i Aselu. E tou te sosola foʻi e pei ona outou sosola ona o le mafuiʻe i aso o Usia le tupu o Iuta. E afio mai lava Ieova loʻu Atua faatasi ma le ʻaupaia uma.
Ia Tumau i le Vanu o le Puipuiga a Ieova
13 E faaauau pea ona tatou iai i le vanu o le puipuiga a Ieova, pe a tatou faamaoni pea iā te ia. E leai se mea e mafai ona aveesea le puipuiga a Ieova ma lona Alo mai iā i tatou. (Ioa. 10:28, 29) Ua fesoasoani Ieova iā i tatou ina ia faamaoni i Lana pule, faapea le pulega a lona Alo. Peitaʻi, e sili atu ona tatou manaʻomia lenā puipuiga, pe a oo mai le puapuaga tele. E tāua tele i le taimi lenei ona tatou tumau i le vanu o le puipuiga a Ieova.
(Sakaria 14:6, 7) “O lea aso foʻi, o le a leai se malamalama lea e tāua, o le a malō mea uma ona o le mālūlū. 7 O le a iloa ai foʻi o le aso lea o le aso o Ieova. E lē o le ao, e lē o le pō foʻi; ae a oo i le afiafipō o le a iai le malamalama.
(Sakaria 14:12) “O le mala lenei o le a faamalaia ai e Ieova nuu uma e siitaua atu iā Ierusalema: E pala le tino o se tasi, a o tū o ia i ona vae; ma o le a pala mata i le mea e tutū ai, o le a pala foʻi le laulaufaiva o se tasi i lona lava gutu.
(Sakaria 14:15) “E faapea foʻi ona iai le mala i solofanua, i miula, i kamela, i asini poʻa, ma isi ituaiga o manu lalata ua i togālauapi, o le a pei o lea mala.
Ia Tumau i le Vanu o le Puipuiga a Ieova
15 O le ā e tupu i tagata e lē iai i le vanu o le puipuiga a Ieova, i le aso e tau ai ma ona fili? Ua faapea mai le valoaga o le a latou lē maua le ʻmalamalama tāua,’ po o le finagalo malie o Ieova. Ua faaauau mai le valoaga, o ʻsolofanua, miula, kamela, asini poʻa, ma isi ituaiga o manu lalata,’ o le a ʻmalō uma ona o le mālūlū.’ O le a malō a latou meatau, pe i nisi upu, o le a faalēaogāina uma. E lē gata i lea, o le a faaumatia e Ieova ona fili i le “mala” po o se faamaʻi. O le a ʻpala foʻi o latou mata ma laulaufaiva.’ E tatou te lē iloa pe o le a tupu se faamaʻi moni. Peitaʻi, e lē aafia ai tagata o Ieova ma o le a faamuta ai faifaiga a ona fili. (Saka. 14:6, 7, 12, 15) O le a lagolagoina e “tupu o le lalolagi ma a latou ʻautau” le itu a Satani. Peitaʻi, e tusa po o fea e latou te iai, o le a faaumatia lava i latou. (Faaa. 19:19-21) “O i latou e fasia e Ieova i lea aso, e amata mai lava i le tasi pito o le lalolagi e oo atu i le isi pito o le lalolagi.”—Iere. 25:32, 33.
Saʻiliʻiliga Loloto mo ʻOa Faaleagaga
(Sakaria 12:3) O lea aso, ou te faia ai Ierusalema ma maa mamafa i nuu uma. O i latou uma e sii i le maa, o le a matuā tugā o latou maʻosiʻosi; ma e faapotopoto faatasi atunuu uma o le lalolagi e tetee atu iā te ia.
E Lē Manuia Auupega ua Faia e Tau Ma Oe
9 Ua faamalamalama mai e le valoaga a Sakaria le māfuaaga e tetee ai malo i Kerisiano moni. Seʻi mātau ua faapea mai le Sakaria 12:3: “O lea aso foʻi ou te fai ai Ierusalema ma maa mamafa i nuu uma.” O lē fea Ierusalema o loo faasino i ai lenei valoaga? O le Ierusalema lea o loo faasino i ai le valoaga a Sakaria, o le “Ierusalema faalelagi,” le Malo faalelagi lea ua filifilia i ai Kerisiano faauuina. (Eperu 12:22) O loo totoe pea i le lalolagi se vaega toʻaitiiti o nei suli o le Malo Faa-Mesia. O loo latou aufaatasi ma a latou aumea o “isi mamoe,” e uunaʻia tagata ina ia saʻili i le Malo o le Atua manū o maua pea le taimi. (Ioane 10:16; Faaaliga 11:15) O le ā le tali mai a malo i lenei valaaulia? O le ā le ituaiga o lagolagosua o loo avatu e Ieova i tagata tapuaʻi moni i aso nei? Seʻi o tatou saʻili a o suʻesuʻeina atili le uiga o le Sakaria mataupu e 12. O le faia faapea, e tatou te mautinoa ai e ʻleai se auupega o le a manuia’ i le ʻaufaauuina a le Atua ma a latou aumea.
10 Ua faaalia i le Sakaria 12:3 e faapea e “matuā manunuʻa” malo. E faapefea ona tupu lenei mea? Na poloaʻi mai le Atua e faapea, e ao ona folafola atu le tala lelei o le Malo. E matuā faatāua e Molimau a Ieova lo latou matafaioi ia talaʻi. Peitaʻi, ua avea le folafolaina atu o le Malo ua na o lea le faamoemoe o tagata ma “maa mamafa” i malo. Ua latou taumafai e aveesea, pe taofia lenei galuega e ala i le faalavelave i tagata talaʻi o le Malo. I le faia faapea, ua “matuā manunuʻa” ai malo o loo faalavelave i le galuega talaʻi, ma ua tigāina ai lava. Ua iʻu foʻi ina taʻuvalea ai i latou ona o le lē taulau o a latou taumafaiga. E lē mafai ona latou taofia tagata tapuaʻi moni, o ē e faapelepele i le faaeaga e faalauiloa le ʻtala lelei e faavavau’ o le Malo Faa-Mesia o le Atua, a o leʻi oo mai le iʻuga o lenei faiga o mea. (Faaaliga 14:6) Ina ua ia vaaia faiga sauā na faia i auauna a Ieova, na faapea atu se leoleo o se tasi o atunuu i Aferika: ʻE uma a outou taumafaiga e sauāina ai nei tagata, ae lē taitai faavaivai. E atili ai ona faatoʻateleina.’
(Sakaria 12:7) “E faaolaina muamua e Ieova faleʻie o Iuta, ina ia lē sili atu ai le matagofie o le aiga o Tavita, ma le matagofie o ē e nonofo i Ierusalema nai lo o Iuta.
E Lē Manuia Auupega ua Faia e Tau Ma Oe
13 Faamolemole faitau le Sakaria 12:7, 8. I Isaraelu anamua, sa avea fale ie o se vala iloga i le nuu, ma na faaaogā e leoleo mamoe ma tagata galulue fanua i le tele o taimi. O tagata na e muamua āfaina ma e manaʻomia se puipuiga pe a ō mai se malo o loo fai ma fili e osofaʻi le aai o Ierusalema. O le faaupuga o “fale ʻie o Iuta,” e taʻu mai ai, e peiseaʻī e lē o iai se puipuiga o le vaega totoe i aso nei, pe e lē o nonofo i ni aai nofo olo. E latou te puipui ma le lē fefefe mea e fitoitonu i le Malo Faa-Mesia. O le a faasao muamua e Ieova o ʻau ia “fale ie o Iuta,” ona ua fai i latou ma taulaʻiga o osofaʻiga a Satani.
Faitau Tusi Paia
(Sakaria 12:1-14) O le feʻau: “O le afioga a Ieova e faatatau iā Isaraelu,” ua fetalai mai ai Ieova, o Lē ua fofola atu le lagi ma faataatia faavae o le lalolagi, ma faia le malosi o le ola ua i totonu o le tagata. 2 “O aʻu lava, ou te faia ai Ierusalema ma ipu faaofuofu e tautevateva ai nuu uma o loo iai i ona itu uma; o le a siʻosiʻomia Iuta atoa ma Ierusalema e le fili. 3 O lea aso, ou te faia ai Ierusalema ma maa mamafa i nuu uma. O i latou uma e sii i le maa, o le a matuā tugā o latou maʻosiʻosi; ma e faapotopoto faatasi atunuu uma o le lalolagi e tetee atu iā te ia. 4 O lea aso,” ua fetalai mai ai Ieova, “ou te taia ai solofanua uma i le atuatuvale, ou te taia foʻi o ē e tiʻetiʻe ai i le valea; e vaavaai foʻi oʻu mata i le aiga o Iuta, ma ou te taia solofanua uma a le nuu i le tauaso. 5 Ona faapea ifo lea o alii pule o Iuta i o latou loto, ʻ Ua fai ē o loo nonofo i Ierusalema ma o tatou malosi mai iā Ieova o ʻau lo latou Atua.’ 6 O lea aso, ou te faia ai alii pule o Iuta e pei o se afi i le mea ua iai laau, e pei foʻi o se sulu ua mū i se faaputuga o fatu faatoʻā seleseleina, e latou te faatamaʻia nuu tuaoi uma o loo nonofo i lo latou itu taumatau ma lo latou itu tauagavale; ma e toe nonofo tagata o Ierusalema i lo latou lava aai o Ierusalema. 7 “E faaolaina muamua e Ieova faleʻie o Iuta, ina ia lē sili atu ai le matagofie o le aiga o Tavita, ma le matagofie o ē e nonofo i Ierusalema nai lo o Iuta. 8 O lea aso, o le a avea ai Ieova ma lē e puipuia o ē o loo nonofo i Ierusalema; ma o lē o loo tautevateva iā i latou o le a pei o ia o Tavita i lenā aso, o le aiga foʻi o Tavita o le a pei o le Atua, e pei o le agelu a Ieova i o latou luma. 9 O lea aso, ou te maumauaʻi ai e faaumatia atunuu uma o le a ō mai e tau ma Ierusalema. 10 “Ou te liligi ifo i le aiga o Tavita ma luga o ē o loo nonofo i Ierusalema le agaga o le taliaina ma le talosaga, ma e latou te vāai atu i Lē na latou tuʻia, e latou te tagituʻi ona o ia e pei ona tagituʻi i le atalii e toʻatasi; o le a iai foʻi le auēga tele ona o ia e pei o le auēga tele ona o le atalii ulumatua. 11 O lea aso, o le a iai le matuā tagituʻi i Ierusalema, e pei o le tagituʻi i Atatarimoni i le vanu laugatasi o Mekito. 12 O le a tagituʻi le atunuu, o aiga taʻitasi e na o i latou; o tagata o le aiga o Tavita e na o i latou, ma o latou fafine e na o i latou; o tagata o le aiga o Natano e na o i latou, ma o latou fafine e na o i latou; 13 o tagata o le aiga o Levi e na o i latou, ma o latou fafine e na o i latou; o le aiga o Semi e na o i latou, ma o latou fafine e na o i latou; 14 o aiga uma ua totoe, o aiga taʻitasi e na o i latou, ma o latou fafine e na o i latou.
TESEMA 25-31
ʻOA TAUTELE MAI I LE AFIOGA A LE ATUA | MALAKI 1-4
“Po o Fiafia Ieova i Lau Faaipoipoga?”
(Malaki 2:13, 14) “O le mea lona lua lenei ua outou faia, ua iʻu ai ina lilofia le fata faitaulaga o Ieova i loimata ona o le tagi ma le ōi, ma ua lē toe talia ai a outou taulaga e fai ma meaalofa, pe fiafia foʻi i so o se mea mai i o outou lima. 14 A ua outou fai atu, ʻAiseā ua faapea ai?’ Auā ua fai Ieova lava ia ma molimau iā te oe ma lau avā na e faia a o e tauleʻaleʻa, o lē na e feutagaʻi ma le lē faamaoni i ai, e ui o ia o lau paaga ma o le avā o lau feagaiga.
jd 125-126 ¶4-5
Ia Saosaolaumea i se Olaga Faaleaiga e Finagalo Malie i ai Ieova
4 I aso o Malaki i le senituri lona lima T.L.M., sa taatele ai tatalaga faaipoipoga i tagata Iutaia. Na faapea atu Malaki iā i latou: “Ua fai Ieova lava ia ma molimau iā te oe ma lau avā na e faia a o e tauleʻaleʻa, o lē na e feutagaʻi ma le lē faamaoni i ai.” O faiga lē faamaoni a tane Iutaia, na lilofia ai le fata faitaulaga o Ieova i loimata o avā faamaoni, “ona o le tagi ma le ōi,” ma na talia e ositaulaga lē faamaoni na faiga lē alofa.—Malaki 2:13, 14.
5 Na faapeʻī le silafaga a Ieova i manatu sesē o tagata i aso o Malaki e faatatau i le faaipoipoga? Na tusi Malaki: “ʻAuā e ʻinoʻino o ia i le teteʻa,’ ua fetalai mai ai Ieova le Atua o Isaraelu.” Na ia faamautinoa mai foʻi e “lē liliu lava” Ieova. (Malaki 2:16; 3:6) Po ua e mātau mai le manatu tāua? Ua loa ona gaoioi Ieova e teena le tatala o faaipoipoga. (Kenese 2:18, 24) Na ia faia faapea i aso o Malaki, ma o le tulaga lava lenā e tasi i aso nei. O nisi tagata e pau le māfuaaga latou te tuua ai a latou paaga faaipoipo, ona ua lē faamalieina i a latou paaga. E silafia lelei e Ieova le faaʻoleʻole o loto o nei tagata. (Ieremia 17:9, 10) E tusa pe e taumafai se tasi e taʻutonuina ana gaoioiga, e silafia uma e Ieova so o se faiga faaʻoleʻole po o se faufauga leaga ina ia tatala se faaipoipoga. Ioe, e “taatitia fua mai mea uma, ma ua matuā faaalia mea uma i luma o lana silafaga, o lē e ao ona tatou tali atu i ai.”—Eperu 4:13.
(Malaki 2:15, 16) Ae e iai se tasi e na te leʻi faia ia mea, auā ua iā te ia le vaega ua totoe o le agaga. O le ā le mea ua ia saʻilia? O le fanau a le Atua. O outou foʻi e tatau ona outou leoleo i o outou loto, ma aua neʻi e feutagaʻi ma le lē faamaoni ma lau avā na fai a o e tauleʻaleʻa. 16 Auā e ʻinoʻino o ia i le teteʻa,” ua fetalai mai ai Ieova le Atua o Isaraelu; “ma lē ua ufiufi lona ofu i le faasauā,” ua fetalai mai ai Ieova o ʻau. “E tatau foʻi ona outou leoleo i o outou lava loto, ma aua neʻi outou feutagaʻi ma le lē faamaoni.
E Inosia e Ieova Faiga Faaʻoleʻole
19 Ae o se vala e lelei, ona sa faailoa mai e Malaki le iai o ni tane sa leʻi faia ni faiga faaʻoleʻole i a latou avā. Sa iā i latou se vaega ʻo totoe o le agaga paia o le Atua.’ (Fuaiupu 15) O le tulaga e faafiafiaina ai ona o loo tele tane faapena i le faapotopotoga a le Atua o loo ʻava ia latou avā.’ (1 Peteru 3:7) E latou te lē faileagaina a latou avā e ala i upu po o le faaoolima, o le a latou lē faamalosia le faia o feusuaʻiga matagā, ma o le a latou lē taʻufaatauvaaina a latou avā e ala i le fefaatosinaaʻi ma isi fafine pe e ala i le matamata i ata ma faamatalaga o faiga matagā faaleituaiga. Ua fiafia foʻi le faalapotopotoga ona o loo iai le tele o avā Kerisiano faamaoni o loo tumau i le Atua ma ana tulafono. Ua iloa e nei tane ma nei fafine mea e inosia e le Atua, ma ua latou manatunatu ma ola e tusa ai ma ia mea. Ia faaauau ona faapei o i latou, i le ʻanaana i le Atua o lo tatou pule’ ma faamanuiaina e ala i lona agaga paia.—Galuega 5:29.
Saʻiliʻiliga Loloto mo ʻOa Faaleagaga
(Malaki 1:10) “O ai se tasi o outou e na te tapunia faitotoʻa? O outou foʻi, e tou te lē tutu fua le afi i loʻu fata faitaulaga. Ou te lē fiafia iā te outou,” ua fetalai mai ai Ieova o ʻau, “ou te lē fiafia foʻi i taulaga e fai ma meaalofa mai i o outou lima.”
Manatu Tāua Mai le Tusi o Malaki
1:10. E leʻi taliaina e Ieova le taulaga a ositaulaga matapeʻapeʻa, o ē sa totogi a latou galuega e oo lava i sina auaunaga itiiti e pei o le tapuniina o faitotoʻa ma le faamumū o le afi o le fata faitaulaga. O se mea tāua tele le uunaʻia o i tatou e fai le auaunaga e aofia ai le faiva faa-Kerisiano, ona o lo tatou alofa mo le Atua ma tuaoi, ae lē mo tupe!—Mataio 22:37-39; 2 Korinito 11:7.
(Malaki 3:1) “Faauta! Ou te auina atu laʻu avefeʻau, ma e saunia e ia se ala i oʻu luma. E faafuaseʻi ona oo mai i Lona malumalu le Alii moni, o lē o loo outou saʻilia, ma o le avefeʻau o le feagaiga o lē ua outou fiafia i ai. Faauta! O le a afio mai lava o ia,” ua fetalai mai ai Ieova o ʻau.
“Faauta! Ou te Faatasi ma Outou i Aso Uma Lava”
5 I senituri a o leʻi faia e Iesu le talafaatusa e faatatau i le saito ma le vao leaga, na faagaeeina ai e Ieova le perofeta o Malaki e valoia mai mea e tutupu e fesootaʻi i le talafaatusa a Iesu. (Faitau le Malaki 3:1-4.) Sa avea Ioane le Papatiso ma ʻavefeʻau e saunia le ala.’ (Mata. 11:10, 11) Ina ua afio mai Iesu i le 29 T.A., ua lata i le taimi e faamasinoina ai le nuu o Isaraelu. O Iesu le “avefeʻau o le feagaiga” lea na taʻua i le valoaga a Malaki. Na ia faamamāina faalua le malumalu i Ierusalema, i le amataga o lana faiva ma ina ua lata ina faaiʻu lana faiva. (Mata. 21:12, 13; Ioa. 2:14-17) O lea, sa iai se vaitaimi na aofia i le galuega faamamā sa faia e Iesu.
6 O le ā le faataunuuga sili o le valoaga a Malaki? Mai vaitausaga o le 1870 seʻia oo i le 1914, na faia ai e C. T. Russell ma ana aumea se galuega e pei ona faia e Ioane le Papatiso. O lenā galuega tāua, e aofia ai le toe aʻoaʻoina o aʻoaʻoga moni o le Tusi Paia. Na aʻoaʻoina e Tagata Aʻoga o le Tusi Paia le uiga moni o le taulaga togiola a Keriso, faailoa le sesē o le aʻoaʻoga o le faapuapuagatia i le afi, ma faailoa atu le iʻuga o le Taimi o Nuu Ese i le 1914. Peitaʻi, sa anoanoaʻi pea vaega faalelotu na faapea mai o i latou o soo o Keriso. O lea na tulaʻi ai se fesili tāua: O ai tonu le vaega na faaataina mai le saito? Ina ia tali lenā fesili, na asiasia e Iesu le malumalu faaleagaga i le 1914. O lenā asiasiga ma le galuega faamamā na amata mai le 1914, seʻia oo i le tauamatamataga o le 1919.
Faitau Tusi Paia
(Malaki 1:1-10) O le feʻau: O le afioga a Ieova e faatatau iā Isaraelu na ala mai iā Malaki: 2 Ua fetalai mai Ieova, “Ua ou alofa iā te outou.” A ua outou fai atu: “O le ā le auala ua e alofa mai ai iā i matou?” “Pe e lē o Esau ea o le uso o Iakopo?” ua fetalai mai ai Ieova. “Na ou alofa iā Iakopo, 3 ae na ou ʻinoʻino iā Esau; na ou faia ona mauga ma faatafunaga, na faia foʻi lona tofi mo taʻifau ʻaivao o le toafa.” 4 “Auā ua fai mai pea Etoma, ʻUa nutipalaina i tatou, ae e tatou te toe foʻi ma toe fausia mea ua faatafunaina,’ a ua fetalai mai Ieova o ʻau e faapea, ʻO i latou e fausia; a o aʻu ou te lepetia. E taʻua i latou e tagata “o le laueleele o le amioleaga” ma “o le nuu ua taʻusalaina e Ieova e oo i le faavavau.” 5 E vaai i ai o outou lava mata, ona outou faapea ane ai lea: “Tau ina ia faasilisilia Ieova i le laueleele o Isaraelu.”’” 6 “ʻE āva le atalii i lona tamā; e āva foʻi le auauna i lona matai sili. Afai o aʻu o le tamā, o fea o iai le āva iā te aʻu? Afai foʻi o aʻu o le Matai Sili, o fea o iai le mataʻu iā te aʻu?’ ua fetalai mai ai Ieova o ʻau iā te outou o ositaulaga, o ē o loo ʻinoʻino i loʻu igoa. “ʻA ua outou fai atu: “O le ā le auala ua matou ʻinoʻino ai i lou suafa?”’ 7 “ʻE ala i lo outou aumaia o meaʻai leaga i loʻu fata faitaulaga.’ “ʻUa outou faapea atu foʻi: “O le ā le auala ua e leaga ai ona o i matou?”’ “ʻE ala i lo outou faapea atu: “O le laoai a Ieova o se mea e ʻinoʻino i ai.” 8 Pe a outou aumaia se manu tauaso mo le taulaga ua outou faapea ane: “E lē leaga.” Pe a outou aumaia foʻi se manu pipili pe maʻi, ua outou faapea ane: “E lē leaga.”’” “Faamolemole, seʻi avatu ia lenā taulaga i le kovana. Pe e fiafia ea o ia iā te oe, pe na te talileleia mai oe?” ua fetalai mai ai Ieova o ʻau. 9 “A o lenei, faamolemole ia saʻili e faamalieina le Atua ina ia talia ai i tatou e ia. O outou ua tupu ai lenei mea. Pe e talileleia ea e ia so o se tasi o outou?” ua fetalai mai ai Ieova o ʻau. 10 “O ai se tasi o outou e na te tapunia faitotoʻa? O outou foʻi, e tou te lē tutu fua le afi i loʻu fata faitaulaga. Ou te lē fiafia iā te outou,” ua fetalai mai ai Ieova o ʻau, “ou te lē fiafia foʻi i taulaga e fai ma meaalofa mai i o outou lima.”