Ua Fanau Mai Se Tasi e Saunia le Ala

Ua toeitiiti lava fanau Elisapeta. E tolu masina o nonofo pea ma lona tauaiga o Maria. Ae ua oo nei i le taimi e faamavae ai Maria, ma toe foʻi i se malaga umi i le itu i mātū i lona aiga i Nasareta. Pe tusa e toe ono masina, ona fanau foʻi lea o ia.

E leʻi umi talu ona toe foʻi Maria, ae fanau loa Elisapeta. O se mea e fiafia ai ona e leai se faalētonu i le taimi na fanau ai Elisapeta, ma o loo malolosi uma o ia ma le pepe. Ua faaali atu nei e Elisapeta lana pepe i ona tuaoi ma tauaiga, ma ua latou olioli faatasi ma ia.

E tusa ai o le Tulafono a le Atua i Isaraelu, e tatau ona peritomeina se tama tama, pe a oo i le aso lona valu talu ona fanau mai. O le aso foʻi lenā e faaigoaina ai o ia. (Levitiko 12:2, 3) Ua manatu nisi tagata o le a faaigoa le tama i le igoa o lona tamā, peitaʻi, ua faapea atu Elisapeta: “E leai! e tatau ona faaigoa o ia iā Ioane.” (Luka 1:60) Manatua foʻi, o lea na faapea mai le agelu o Kaperielu e tatau ona faaigoa lenei pepe iā Ioane.

Ae ua finau mai tuaoi ma tauaiga: “E leai se tagata o lou aiga e igoa i lenā igoa.” (Luka 1:61) Ua latou fesili atu iā Sakaria e ala i le faaaogāina o taga, po o le ā le igoa e manaʻo e faaigoa ai lona atalii. Ua fai atu Sakaria e aumai se laupapa ma ua ia tusia ai: “O Ioane lona igoa.”—Luka 1:63.

O lenei mea ua tupu, ua faavavega ai ona toe tautala Sakaria. Atonu o e manatua, na gūgū Sakaria ina ua lē talitonu i le tala a le agelu, o le a fanau mai e Elisapeta se tama. O lea, ina ua toe tautala Sakaria, ua maofa ona tuaoi ma faapea ifo: “O le ā le tulaga o le a oo i ai lenei tamaitiiti?” (Luka 1:66) Ua latou vaaia faamaoniga o le taʻitaʻiga a Ieova, i le auala na maua ai e Ioane lona igoa.

Ua faatumulia Sakaria i le agaga paia, ona ia faailoa atu lea: “Ia viia Ieova le Atua o Isaraelu, ona ua silasila mai o ia ma laveaʻi i ona tagata. Ua ia faatūina lē e malosi, o le faaola lea mo i tatou i le aiga o Tavita lana auauna.” (Luka 1:68, 69) O loo faasino atu le faaupuga “lē e malosi,” i le Alii o Iesu lea o le a fanau mai. Ua faapea atu Sakaria, e ala i Lē e malosi, ua ʻtuuina mai ai e le Atua iā i tatou, le faaeaga o le faia o le auaunaga paia iā te ia ma le lē fefe, ina ua uma ona laveaʻiina i tatou mai i lima o o tatou fili, i le faamaoni ma le amiotonu i ona luma i o tatou aso uma lava.’—Luka 1:74, 75.

Ua avea o se faalaeiauga le valoaga lenei a Sakaria e faatatau i lona atalii: “A o oe le tamaitiiti, e taʻua oe o le perofeta a Lē Silisili Ese, auā e te muamua atu i luma o Ieova e saunia ona ala, ina ia faailoa atu le faaolataga i ona tagata, e ala i le faamagaloina o a latou agasala, ona o le alofa faapelepele o lo tatou Atua. O lenei alofa mai lugā, o le a susulu e pei o le malamalama i le tafa o ata, e faamalamalama ai i latou o loo nonofo i le pōuliuli ma le ata o le oti, e taʻitaʻia ai ma le manuia o tatou vae i le ala o le filemu.”—Luka 1:76-79.

O le taimi lea, ua taunuu ane Maria i lona aiga i Nasareta, ma e leʻi faaipoipo lava o ia. O le ā o le a tupu iā te ia, pe a iloa ane e tagata ua tō?