Ua Faaalia e se Taʻitaʻiʻau le Faatuatua Malosi

Ua māeʻa le lauga a Iesu i Luga o le Mauga, ma ua alu atu nei o ia i le aai o Kapanaumi. Ua ō atu iā te ia toeaina o Iutaia. Na auina atu i latou e se tamāloa e ese lona tupuaga. O lenei tamāloa o se taʻitaʻiʻau o le ʻautau a Roma, o le taʻitaʻi o le toʻaselau.

Ua matuā maʻi tigāina le auauna pele a lenei tamāloa ma ua lata ina oti o ia. E ui o lenei taʻitaʻiʻau o se tagata o Nuu Ese, ae ua ia saʻili atu mo se fesoasoani mai iā Iesu. Ua taʻu atu e tagata Iutaia iā Iesu, ʻo loo faataotolia le auauna a lenei tamāloa i le fale, auā ua pē lona tino ma ua matuā tigāina lava.’ (Mataio 8:6) Ua faamautinoa atu e toeaina Iutaia iā Iesu, e ono ma tatau ona fesoasoani i lenei taʻitaʻiʻau e ala i le faapea atu: “Ua alofa o ia i lo tatou nuu, ma na ia faia foʻi lo matou sunako.”—Luka 7:4, 5.

E leʻi umi ae agaʻi atu loa Iesu ma toeaina Iutaia i le fale o le taʻitaʻiʻau. Ae a o latalata atu i latou i le fale, ua aauina mai e le taʻitaʻiʻau ni uō e taʻu atu iā Iesu e faapea: “Lau susuga e, aua e te popole, auā e lē talafeagai ona e maliu mai i loʻu fale. O le mea lenā ua ou manatu ai e lē tatau ona ou alu atu iā te oe.” (Luka 7:6, 7) Maʻeu le lotomaulalo o lenei taʻitaʻiʻau, e ui o ia o se tagata e masani i le avatuina o faatonuga i isi. Ua faaalia ai foʻi i inei, le eseesega o lenei tamāloa mai i isi tagata Roma o ē faileagaina pologa.—Mataio 8:9.

E mautinoa o loo iloa e lenei taʻitaʻiʻau, e lē faifaimea faatasi tagata Iutaia ma tagata e lē o ni Iutaia. (Galuega 10:28) Atonu o lona iloaina o lenei mea, ua ia faapea atu ai i ana uō e talosaga iā Iesu: “Tau lava o sau fetalaiga, ona mālōlō ai lea o laʻu auauna.”—Luka 7:7.

Ua maofa Iesu i lenei mea ma ua ia faapea atu iā i latou: “Ou te taʻu atu iā te outou, ou te leʻi iloa lava i Isaraelu se tasi ua faapea ona malosi o lona faatuatua.” (Luka 7:9) Ua toe foʻi atu uō a le taʻitaʻiʻau i lona fale, ma ua latou maua ai le auauna ua toe malosi.

Ina ua māeʻa le faamālōlōina o lenei auauna, ona faaaogā lea e Iesu o le mea ua tupu e faamautinoa atu ai, o le a maua e tagata e lē o ni Iutaia o ē e faaalia le faatuatua faamanuiaga. Ua ia fetalai atu: “E toʻatele e ō mai mai le itu i sasaʻe ma le itu i sisifo e taooto e aai faatasi ma Aperaamo, Isaako, ma Iakopo i le laoai i le malo i le lagi.” Ae faapefea tagata Iutaia e lē faatuatua? Ua faapea atu Iesu o le a “lafoina i [latou i] fafo i le pogisa. O i inā e latou te tagiauē ai ma lilivau o latou nifo.”—Mataio 8:11, 12.

O lea, o le a teena tagata Iutaia moni o ē e lē taliaina le avanoa sa tuuina atu muamua iā i latou, e avea ai ma vaega o le Malo faatasi ma Keriso. Peitaʻi, o le a taliaina tagata o Nuu Ese e taooto e aai faatasi ma Iesu i lana laoai, e pei o loo aai faatasi “i le laoai i le malo i le lagi.”