Lomiga mo le Polokalame mo le Sauniga o le Faiva ma le Olaga Faa-Kerisiano
IULAI 1-7
ʻOA TAUTELE MAI I LE AFIOGA A LE ATUA | KOLOSE 1-4
“Toese le Tagata Tuai ae Oofu i le Tagata Fou”
(Kolose 3:5-9) O le mea lea, ia fasiotia tuʻinanauga i o outou itutino, o le faitaaga, o amioga lē mamā, le tuʻinanau i feusuaʻiga, o tuʻinanauga leaga ma le manaʻo tele, o le ifo i tupua lava lea. 6 O mea uma na e oo mai ai le toʻasā o le Atua. 7 O mea uma foʻi na, sa masani ona outou faia, a o outou ola i lenā olaga. 8 A o lenei ia outou tuu ese mai iā te outou le lotoa, o le ita, o le leaga, o upuleaga, ma e lē tatau ona sau se upu masoā mai i o outou gutu. 9 Aua le pepelo le tasi i le isi. Ae ia toese le tagata tuai ma ana gaoioiga,
Ia Maua le Agaga o le Atua, ae Lē o le Agaga o le Lalolagi
12 O lē fea agaga o atagia atu i oʻu uiga? (Faitau le Kolose 3:8-10, 13.) O loo faaauiluma e le agaga o le lalolagi galuega a le tino. (Kala. 5:19-21) E lē iloa i taimi e sologa lelei ai mea le agaga o loo taaʻina ai i tatou, ae o taimi e lē sologa lelei ai, e pei o le lē toe fia talanoa mai o se uso po o se tuafafine, faatigā pe agasala mai foʻi. E iloa foʻi le agaga o loo pulea i tatou, i a tatou amioga i totonu o aiga. E tāua la ona iloilo e le tagata ia lava. Ia fesili ifo, ʻI masina e ono ua mavae, po ua atili ai ona ou faaalia uiga o Keriso, po ua ou toe foʻi i masaniga leaga i le tautala ma amioga?’
13 E fesoasoani le agaga o le Atua ina ia tatou “toese le tagata tuai ma ana gaoioiga,” ae oofu “i le tagata fou.” E atili ai ona tatou alolofa, agalelei ma faamagalo isi, e tusa lava po ua tatau lo tatou lē malilie. E tatou te lē toe tali atu foʻi i ni mea sesē na faia mai, e ala i le “ita umi, ma le itaitagofie, ma le lotoa, ma le soona ʻeʻē, ma upu masoā.” Ae o le a tatou taumafai malosi ia “māfana lo [tatou] alofa.”—Efe. 4:31, 32.
(Kolose 3:10-14) a ia oofu outou i le tagata fou ua faafouina i le poto saʻo, ina ia foliga e pei o Lē na foafoaina o ia, 11 o lea la, e lē o iai se Iutaia po o se Eleni, o sē e peritomeina po o sē e lē peritomeina, o se tagata ese, po o se Sekutia, se pologa po o sē e saʻoloto, ae ua iā Keriso mea uma, ua iai foʻi o ia i tagata uma lava. 12 Talu ai o outou o ē ua filifilia e le Atua, o ē ua paia ma alofagia, ia oofu outou i le alofa mutimutivale, le agalelei, lotomaulalo, agamalu ma le faapalepale. 13 Ia faaauau ona onosaʻi le tasi i le isi, ma ia fefaamagaloaʻi ma le lotoatoa pe afai ua faia e se tasi se mea e tigā ai le isi. E pei ona finagalo malie Ieova e faamagalo iā te outou, ia faapea foʻi ona outou faia. 14 Peitaʻi, e iai foʻi se isi mea e manaʻomia, ia oofu outou i le alofa, auā o le fusi lea e atoatoa ona autasi ai.
Po ua Liliuina Oe?
18 E mafai ona liliuina i tatou pe a faitau ma suʻesuʻe e lē aunoa le Tusi Paia, peitaʻi ua na o se amataga lenā. O le toʻatele e malamalama pe a faitau i le Tusi Paia. Atonu e tatou te feiloaʻi i le talaʻiga i tagata faapena, ma atonu e latou te taulotoina mai mau o le Tusi Paia. Ae atonu e leai se aafiaga i o latou olaga ma mafaufauga. Aiseā? Talu ai e faatoʻā mafai ona liliuina e le Tusi Paia se tasi, pe a goto ifo i lona loto mea ua ia aʻoaʻoina. O lea, e manaʻomia ona faaalu se taimi e mafaufau loloto ai i mea ua tatou aʻoaʻoina. Ia fesili ifo iā i tatou lava: ʻPo ou te mafaufau o mea ua ou aʻoaʻoina e lē na o se aʻoaʻoga faalotu? Po ou te vaai iai o le upu moni lenei? Po o oʻu faatatau i loʻu olaga mea o loo oʻu aʻoaʻoina nai lo o le tau ina aʻoaʻoina ai o isi? Po ou te talitonu o mea ua ou aʻoaʻoina e mai iā Ieova?’ O le mafaufau loloto i na fesili o le a faaloloto ai lo tatou alofa mo Ieova. O le a mafai ona faia ni suiga lelei i o tatou olaga pe a pāʻia o tatou loto.—Faata. 4:23; Luka 6:45.
19 O le faitau e lē aunoa o le Tusi Paia ma manatunatu loloto iai, o le a uunaʻia ai i tatou ina ia faaauau pea ona ʻtoese le tagata tuai ma ana gaoioiga, ma oofu ai i le tagata fou ua faafouina i le poto saʻo.’ (Kolo. 3:9, 10) O le malamalama lelei i le Tusi Paia ma faatatau mea ua aʻoaʻoina, o le a fesoasoani iā i tatou e oofu ai i le tagata fou ma puipuia ai mai togafiti faaʻoleʻole a Satani.
Saʻiliʻiliga Loloto mo ʻOa Faaleagaga
(Kolose 1:13, 14) Ua ia laveaʻi iā i tatou mai i le pule a le pōuliuli, ma avatu i tatou i le malo o lona Alo pele, 14 o ia foʻi ua faasaʻolotoina ai i tatou e ala i le togiola, o le faamagaloina lea o a tatou agasala.
it-2 169 ¶3-5
Malo o le Atua
“Le Malo o Lona Alo Pele.” I le sefulu aso talu ona toe afio aʻe Iesu i le lagi i le Penetekoso 33 T.A., na maua ai e ona soo le faamaoniga “ua faaeaina o ia i le itu taumatau o le Atua,” ina ua liligi ifo e Iesu le agaga paia iā i latou. (Ga 1:8, 9; 2:1-4, 29-33) Na amata mai ai iā i latou le “feagaiga fou,” ma avea ai i latou ma vaega autū o se “nuu paia,” o le Isaraelu faaleagaga.—Epe 12:22-24; 1Pe 2:9, 10; Ka 6:16.
O le taimi lea ua nofo Keriso i le itu taumatau o lona Tamā ma ua avea o ia ma Ulu o lenā faapotopotoga. (Efe 5:23; Epe 1:3; Fil 2:9-11) Ua faaalia mai i Tusitusiga Paia, na faavaeina se malo faaleagaga i soo o Iesu mai i le Penetekoso 33 T.A. ma faasolo mai ai. Ina ua tusi atu la le aposetolo o Paulo i Kerisiano i Kolose i le uluaʻi senituri, na ia taʻua ai ua iai se malo o Iesu Keriso: “Ua ia [le Atua] laveaʻi iā i tatou mai i le pule a le pōuliuli, ma avatu i tatou i le malo o lona Alo pele.”—Ko 1:13; faatusatusa i le Ga 17:6, 7.
Talu mai le Penetekoso 33 T.A., ua avea le malo o Keriso o se malo faaleagaga e pule i le Isaraelu faaleagaga, o Kerisiano ua faauuina i le agaga paia e avea ma fanau faaleagaga a le Atua. (Ioa 3:3, 5, 6) Pe a maua e na Kerisiano ua faauuina i le agaga lo latou taui i le lagi, ua lē toe avea loa i latou ma tagatānuu i le lalolagi o le malo faaleagaga o Keriso, ae o le a avea ma tupu faatasi ma Keriso i le lagi.—Fal 5:9, 10.
(Kolose 2:8) Ia faaeteete: ina neʻi maileia outou e se tasi i filosofia ma manatu taufaasesē e lē aogā e tusa ma tū masani a tagata, e tusa ma mataupu faavae a le lalolagi, ae e lē tusa ma aʻoaʻoga a Keriso;
Manatu Tāua Mai Tusi i Kalatia, Efeso, Filipi, ma Kolose
2:8—O ā “mataupu faavae a le lalolagi” na lapataʻi mai ai Paulo? O mea nei a le lalolagi a Satani—o mea autū po o taʻiala o loo faia aʻe ai, taʻitaʻia ai, pe atiina aʻe ai lana lalolagi. (1 Ioa. 2:16) E aofia ai i nei mea le filosofia faaletagata, le matapeʻapeʻa, ma le tele o lotu sesē a le lalolagi.
Faitau Tusi Paia
(Kolose 1:1-20) O aʻu o Paulo, o le aposetolo a Keriso Iesu e ala i le finagalo o le Atua, ma Timoteo lo tatou uso 2 o le tusi lenei i le ʻaupaia, ma uso faamaoni o ē ua autasi ma Keriso i Kolose: Tau ina ia iā te outou le agalelei faifua ma le filemu mai i le Atua lo tatou Tamā. 3 Matou te faafetai e lē aunoa i le Atua le Tamā o lo tatou Alii o Iesu Keriso, pe a matou tatalo mo outou, 4 talu ai na matou faalogo i lo outou faatuatua ona o Keriso Iesu, ma lo outou alofa mo le ʻaupaia uma 5 ona o le faamoemoe ua teuina mo outou i le lagi. O lenei faamoemoe na outou faalogo i ai muamua, ina ua talaʻiina atu le upu moni o le tala lelei 6 lea o loo iai iā te outou, e pei ona fua mai o le fua ma faateleina i le lalolagi uma, e faapena foʻi ona tupu iā te outou, mai i le aso na outou faalogo ai, ma iloa lelei ai ma le faamaoni le agalelei faifua o le Atua. 7 O le mea lenā na outou iloa mai i lo tatou uso a pologa, o lē e pele, o Epafara, o se auauna faamaoni a Keriso mo i matou, 8 o lē foʻi na faailoa mai iā i matou lo outou alofa i le itu faaleagaga. 9 O le mea foʻi lea matou te leʻi mapu ai e tatalo mo outou, talu le aso na matou faalogo ai i na mea, ma talosaga atu ina ia faatumuina outou i le poto saʻo i lona finagalo i le atamai uma ma le malamalama faaleagaga, 10 ina ia savavali ai e tusa ma le finagalo o Ieova, ma iʻu ina matuā faafiafiaina ai o ia a o faaauau ona outou fua mai fua o galuega lelei uma, ma ia tupu pea lo outou poto saʻo i le Atua, 11 ina ia matuā faamalosia ai i le malosi uma e manaʻomia, ma mafai ai ona tutumau atoatoa ma ia faapalepale, atoa ma le olioli ona o lona mana tele, 12 e faafetai i le Tamā o lē ua māfua ai ona outou agavaa ina ia maua le tofi o le ʻaupaia o ē o i le malamalama. 13 Ua ia laveaʻi iā i tatou mai i le pule a le pōuliuli, ma avatu i tatou i le malo o lona Alo pele, 14 o ia foʻi ua faasaʻolotoina ai i tatou e ala i le togiola, o le faamagaloina lea o a tatou agasala. 15 O ia ua foliga i le Atua e lē vaaia, o le ulumatua o foafoaga uma; 16 auā na foafoaina isi mea uma i le lagi ma le lalolagi e ala iā te ia, o mea e vaaia ma mea e lē vaaia, e tusa lava po o nofoālii, po o alii sili, po o malo, po o pule. Na foafoaina isi mea uma e ala iā te ia ma na foafoaina foʻi mo ia. 17 O ia foʻi na muamua i isi mea uma lava, ma ua iai isi mea uma lava ona o ia, 18 o ia o le ulu o le tino, o le faapotopotoga lea. O ia o le amataga, o le ulumatua o ē ua toetutū mai i le oti, ina ia avea ai o ia ma lē e muamua i mea uma lava; 19 auā ua silafia e le Atua, e lelei ona nofo i totonu iā te ia le tumu atoatoa, 20 ma e ala iā te ia, ua toe faaleleia ai e le Atua o isi mea uma lava iā te ia, ina ia lelei ai e ala i le toto na faamaligiina i luga o le laau na faapuapuagatia ai, o mea o i le lalolagi po o mea o i le lagi.
IULAI 8-14
ʻOA TAUTELE MAI I LE AFIOGA A LE ATUA | 1 TESALONIA 1-5
“Ia Outou Fefaamāfanafanaaʻi ai Pea ma Atiaʻe e le Tasi le Isi”
(1 Tesalonia 5:11-13) O le mea lea, ia outou fefaamāfanafanaaʻi ai pea ma atiaʻe e le tasi le isi, e pei lava ona outou faia nei. 12 O lenei le ʻauuso e, ua matou talosaga atu iā te outou, ia outou manatu mamafa i ē o loo galulue fitā mo outou, ma vaavaaia outou i le galuega a le Alii, ma apoapoaʻi atu iā te outou; 13 ma ia matuā faaaloalo iā i latou ma le alofa ona o la latou galuega. Ia outou tausia pea le filemu.
“Ia Outou Manatu Mamafa i Ē o Loo Galulue Fitā mo Outou”
12 E sili atu mea e aofia ai i le “vaavaaia” i lo le tau ina aʻoaʻo atu. O le upu Eleni lava lea e tasi o loo faaaogā i le 1 Timoteo 3:4. Ua taʻua e Paulo, e tatau i se ovasia ona avea ma “se tane e pule lelei i lona lava aiga, e gauaʻi ma e faaaloalo lana fanau.” O le faaupuga “vaavaaia,” e lē gata e aofia ai le aʻoaʻoina o lana fanau, ae e taʻimua foʻi i le aiga, ma “e gauaʻi ma . . . faaaloalo lana fanau.” Ioe, e taulamua toeaina i le faapotopotoga, ma fesoasoani i tagata uma ina ia gauaʻi atu iā Ieova.—1 Timo. 3:5.
“Ia Outou Manatu Mamafa i Ē o Loo Galulue Fitā mo Outou”
19 O le ā e te faia pe a e maua se meaalofa ua faia faapitoa mo oe? Po o le a faaalia ea lou talisapaia i lou faaaogāina o lea meaalofa? Ua saunia e Ieova e ala iā Iesu “meaalofa i tagata” mo oe. O se tasi o auala e faaalia ai lou lotofaafetai mo nei meaalofa, o le faalogologo totoʻa lea i lauga e faia e toeaina, ma taumafai e faatatau manatu ua latou taʻua. E mafai foʻi ona e faia ni tali i sauniga e faaalia ai lou loto talisapaia. Ia lagolago le galuega o loo taʻimua ai toeaina, e pei o le faiva i le fanua. Pe afai ua aogā iā te oe aʻoaʻiga ua avatu e se toeaina, aiseā e te lē faailoa atu ai iā te ia? E lē gata i lea, aiseā e lē faailoa atu ai i le aiga o le toeaina lou talisapaia? Ia manatua, afai o loo galue mamafa se toeaina i le faapotopotoga, o lona uiga o loo faataulaga e lona aiga le taimi lea sa tatau ona faaalu ma ia.
(1 Tesalonia 5:14) Uso e, matou te ʻaiʻoi atu ina ia apoapoaʻi i ē faalogogatā, ia faamāfanafana i ē mafatia, ia fesoasoani i ē vaivai, ma ia faapalepale i tagata uma lava.
ʻAlofa e Ala i Gaoioiga ma le Faamaoni’
13 Ia fesoasoani i ē e vaivai. E iloa le moni o lo tatou alofa pe a utagia le faatonuga a le Tusi Paia “ia fesoasoani i ē vaivai, ma ia faapalepale i tagata uma.” (1 Tesa. 5:14) E ui lava o le toʻatele o ē na vaivai faaleagaga ua toe malolosi i le faatuatua, ae e iai lava nisi o loo manaʻomia ona faaauau pea ona tatou faapalepale ma fesoasoani i ai. E mafai ona tatou faasoa i ai ni manatu faalaeiau mai le Tusi Paia, valaaulia ina ia tatou galulue faatasi i le talaʻiga, po o le faaavanoa o se taimi e faalogologo atu ai iā i latou. E lē gata i lea, nai lo o le manatu e faapea e “malosi” pe e “vaivai” se uso po o se tuafafine, ia tatou amanaʻia le mea moni e tofu uma i tatou ma itu e malolosi ai ma itu e vaivai ai. E oo foʻi i le aposetolo o Paulo na ia amanaʻia ona lava vaivaiga. (2 Kori. 12:9, 10) O lea, o i tatou uma lava e tatou te manaʻomia le fesoasoani a o tatou uso Kerisiano.
Faaaʻoaʻo i le Lotomaulalo ma le Faapelepele o Iesu
16 O a tatou faaupuga faapelepele. O o tatou faalogona faapelepele e uunaʻia ai i tatou e “faamāfanafana i ē mafatia.” (1 Tesa. 5:14) O ā ni faaupuga e faalaeiauina ai i latou? E mafai ona faagaeetia o latou loto e ala i le faailoa atu o le naunau moni iā i latou. O le faamālō atu ma le faamaoni, e fesoasoani iā i latou e iloa ai o latou uiga lelei ma tomai. Ia faamanatu atu foʻi, na tosina mai i latou e Ieova i lona Alo, ma e tautele i latou i Lana silafaga. (Ioa. 6:44) Ia faamautinoa atu iā i latou, e manatu mamafa Ieova i ana auauna ua “loto nutimomoia.” (Sala. 34:18) O a tatou faaupuga faapelepele e mafai ona faafouina ai i latou o loo manaʻomia faamāfanafanaga.—Faata. 16:24.
Saʻiliʻiliga Loloto mo ʻOa Faaleagaga
(1 Tesalonia 4:3-6) Auā o le finagalo lenei o le Atua ina ia faapaiaina outou, ia faamamao mai i le faia o le faitaaga, 4 ma ia taʻitasi outou ona iloa pulea o lona lava tino ina ia paia ma mamalu, 5 ae e lē o le tuʻinanau o le manaʻo tele i feusuaʻiga e pei ona masani ai nuu o ē e lē iloa le Atua; 6 ina neʻi iʻu ina faaleagaina ma solia ai e se tasi ia aiā tatau a lona uso e tusa ma lenei mea, auā o Ieova o lē na te tuuina atu le faasalaga o nei mea uma, e pei ona matou muaʻi taʻu atu ma faamatala māeʻaeʻa atu iā te outou.
it-1 863-864
Faitaaga
O le faitaaga o se gaoioiga sesē e mafai ona tuuesea (faateʻaina) ai se tasi mai i le faapotopotoga Kerisiano. (1Ko 5:9-13; Epe 12:15, 16) Na taʻua e le aposetolo o se Kerisiano e na te faia le faitaaga, ua agasala o ia i lona lava tino, i lona faaaogā sesē lea o ona itutino sā i se auala e lē mamā. Ua matuā afāina lona itu faaleagaga, faaleagaina ai le tulaga mamā o le faapotopotoga a le Atua, ma ua iai o ia i se tulaga lamatia e ono aafia ai i faamaʻi oti e pipisi atu ona o feusuaʻiga. (1Ko 6:18, 19) Ua ia solia foʻi aiā tatau a ona uso Kerisiano (1Te 4:3-7) e ala i le (1) aumaia o gaoioiga lē mamā ma matagā e faalumaina ai i totonu o le faapotopotoga (Epe 12:15, 16), (2) aveesea le tulaga mamā tauamio o lē na la faia le faitaaga, ma afai o lenā tagata e leʻi faaipoipo, o le a faaleagaina la lona tulaga mamā a o leʻi faaipoipo, (3) faaleagaina ai le talaaga mamā tau amio o lona aiga, ma le (4) faatigā ai i mātua, toʻalua, po o lē o le a faaipoipo i ai lē na la faia le faitaaga. E ui o tulafono a tagata e ono talia ai le faitaaga, ae o gaoioiga a sē e faia le faitaaga ua ia lē amanaʻia ai tulafono a le Atua, o lē o le a faasalaina o ia e tusa ai ma lana agasala.—1Te 4:8.
(1 Tesalonia 4:15-17) O le mea lenei matou te fai atu iā te outou mai i le afioga a Ieova, o i tatou o loo ola ma sao atu i le faatasi mai o le Alii, e lē muamua i tatou iā i latou o ē ua momoe i le oti; 16 auā e afio ifo le Alii lava ia mai i le lagi ma le alaga ma le leo o le agelu sili, ma le pū a le Atua, e muamua foʻi ona toe tutū mai i latou ua feoti o ē e autasi ma Keriso. 17 Mulimuli ane, ona aveina aʻe lea o i tatou o loo ola ma totoe, faatasi ma i latou i ao ina ia feiloaʻi ma le Alii i le ʻea; ma o le a tatou nonofo pea faatasi ma le Alii.
“Ua Latalata Ona Laveaʻiina Outou”!
14 O le ā o le a tupu pe a amata le osofaʻiga a Koku o Makoku i tagata o le Atua? Na faamatalaina e Mataio ma Mareko le mea o le a tupu: “Ona ia [le Atalii o le tagata] aauina atu lea o agelu e latou te aoaoina mai o ē ua filifilia mai i matāmatagi e fā, e mai i le tuluʻiga o le lalolagi e oo atu i le tuluʻiga o le lagi.” (Mare. 13:27; Mata. 24:31) O lenei galuega o le aoaoina e lē o faasino atu i le uluaʻi aoaoina o le ʻaufaauuina, pe e faasino atu foʻi i le faamaufaailoga faaiʻu o le vaega totoe o le ʻaufaauuina. (Mata. 13:37, 38) O lenā faamaufaailoga o le a tupu a o leʻi gāpā le puapuaga tele. (Faaa. 7:1-4) O lea, o le ā lenei galuega o le aoaoina lea na taʻua e Iesu? O le taimi lea o le a maua ai e le vaega totoe o le 144,000 lo latou taui faalelagi. (1 Tesa. 4:15-17; Faaa. 14:1) O le a tupu lenā mea i se taimi pe a māeʻa le amataga o le osofaʻiga a Koku o Makoku. (Eseki. 38:11) O le a faataunuuina ai loa le fetalaiga lenei a Iesu: “I lenā taimi e susulu atu ai o ē e amiotonu, e pei o le malamalama o le lā i le malo o lo latou Tamā.”—Mata. 13:43.
15 Po o le uiga o lenei mea o le a siitia aʻe le ʻaufaauuina? O le tele o lotu ua faapea mai o Kerisiano, e manatu o le a siitia aʻe Kerisiano i le lagi i o latou tino faaletino. E latou te manatu foʻi e vaaia e mata le toe afio mai o Iesu e pulea le lalolagi. Peitaʻi, o loo faaalia manino mai i le Tusi Paia e lē vaaia le toe afio mai o Iesu: “Ona iloa ai lea i le lagi o le faailoga o le Atalii o le tagata” ma o le a afio mai Iesu i “ao o le lagi.” (Mata. 24:30) E lē gata i lea, “e lē mafai ona fai le malo o le Atua ma tofi o i latou ua iai tino aano ma toto.” O lea, o i latou uma o le a aveina aʻe i le lagi, e tatau ona “suia” muamua i latou uma, “e vave lava e pei o le emo o le mata, i le taimi e ili ai le pū mulimuli.” (Faitau le 1 Korinito 15:50-53.) O lea, e tatou te lē faaaogāina le upu “siitiaga” ona e fesootaʻi atu i aʻoaʻoga sesē a lotu. Peitaʻi, o le a aoaoina le vaega totoe o le ʻaufaauuina faamaoni i se taimi vave.
Faitau Tusi Paia
(1 Tesalonia 3:1-13) O lea, ina ua lē mafai ona matou onosaʻi, ona matou manatu ai lea e sili ona tuu i matou i Atenai, 2 ma ua matou auina atu Timoteo lo tatou uso, o le auauna a le Atua, ma o lē na te talaʻia le tala lelei e uiga i le Keriso, ina ia faamausalī ai outou ma faamāfanafanaina ai e tusa ma lo outou faatuatua, 3 ina neʻi iai se tasi e faavaivai ona o nei puapuaga. Auā ua outou iloa, ua tofia i tatou mo lenei lava mea. 4 O le mea moni, ina ua matou faatasi ma outou, e masani ona matou muaʻi fai atu iā te outou, e ao ona oo iā i tatou puapuaga, ma o mea lava na ua tutupu ma ua outou iloa. 5 O le mea lea, ina ua ou lē toe lavā onosaʻi, sa ou auina atu o ia iā te outou po o faapeʻī mai lo outou faamaoni, auā atonu na iai ni mea na faaosoosoina ai outou e Lē e faaosooso, ma e ono iʻuvale ai la matou galuega fitā. 6 A o lenei ua toe foʻi mai Timoteo mai iā te outou, ma taʻu mai iā i matou le tala lelei e uiga i lo outou faamaoni ma le alofa, ma o loo outou manatuaina lelei pea i matou, ma naunau e fia feiloaʻi iā i matou, e pei foʻi ona matou fia feiloaʻi iā te outou. 7 O le mea lea le ʻauuso e, ua faamāfanafanaina ai i matou i lo outou faamaoni, e ui i mea na matou manaʻomia ma o matou puapuaga, 8 auā ua matou ola pe a outou tumau mausalī i le Alii. 9 Auā e faapefea ona matou faailoa atu lo matou faafetai i le Atua mo outou, ona o le tele o le olioli ua matou maua i luma o le Atua ona o outou, 10 a o matou matuā faatoga atu i le pō ma le ao, ina ia feiloaʻi ma outou ina ia faaleleia mea ua lē atoatoa ai lo outou faatuatua? 11 Tau ina ia taʻitaʻia atu ma le manuia la matou malaga iā te outou, e lo tatou Atua o le Tamā lea, ma lo tatou Alii o Iesu. 12 Tau ina ia faatuputeleina e le Alii lo outou alofa ma ia tele foʻi, ia alofa le tasi i le isi ma i tagata uma, e pei foʻi ona matou alolofa atu iā te outou, 13 ma iʻu ai ina faatumauina e ia o outou loto, ia lē taʻuleagaina ma ia paia i luma o le Atua, o le Tamā lea, i le faatasi mai o lo tatou Alii o Iesu ma le ʻaupaia uma.
IULAI 15-21
ʻOA TAUTELE MAI I LE AFIOGA A LE ATUA | 2 TESALONIA 1-3
“Le Faaalia Mai o Lē e Amioleaga”
(2 Tesalonia 2:6-8) O lenei ua outou iloa le mea o loo avea ma taofiofiga, seʻia faaalia mai o ia i le taimi e tatau ai. 7 E moni o loo galue lenei amioleaga, o le mea lilo lea; seʻia oo ina aveesea lē o loo avea ma taofiofiga i le taimi nei. 8 Ona faaalia mai lea o lē e amioleaga, lea o le a aveesea e le Alii o Iesu i le mānava o lona fofoga, ma faaumatia ai pe a faaali mai i lona faatasi mai.
it-1 972-973
Faamaoni i le Atua
O se isi mea lilo lenei e tetee atoatoa i le “mea lilo paia” a Ieova. O “lenei amioleaga, o le mea lilo lea.” Na avea lenei mea ma mea lilo i Kerisiano moni ona i aso o le aposetolo o Paulo, e leʻi iloa po o ai lenei “tagata o le amioleaga” ona o le taimi lenā e leʻi faia aʻe ma tino mai o se vaega ua mautū ma iloagofie. E oo lava foʻi i le taimi ina ua tino mai lea “tagata,” na avea pea o se mea lilo i le toʻatele ona o ana gaoioiga leaga na faafoliga mai e faamaoni i le Atua. Peitaʻi, na feteenaʻi ma le mea moni e taʻu o le faamaoni i le Atua. Na taʻua e Paulo e faatatau i ona aso, “o loo galue lenei amioleaga, o le mea lilo lea,” auā o le taimi lenā ua iai aafiaga o le amioleaga i totonu o le faapotopotoga, ma mulimuli ane faia aʻe ai se vaega na fulitua i le upu moni. I le iʻuga, o le a aveesea e Iesu Keriso lenei amioleaga pe a faaali mai i lona faatasi mai. O lenei “tagata” o loo faatonutonuina e Satani, o sē e fulitua i le upu moni, ua ia “siitia o ia lava e maualuga aʻe i ē uma e taʻua o ʻatua’ po o mea e tapuaʻi i ai” (faa-Eleni, seʹba·sma). O lea, o lenei tagata e matuā tetee i le Atua, o se auala o loo faaaogā e Satani e matuā taufaasesē lava, ma o le a iʻu atu i le malaia i latou uma e mulimuli i ana gaoioiga. E taulau lenei “tagata o le amioleaga,” ona o ana amioga leaga o loo faafoliga mai e faamaoni i le Atua.—2Te 2:3-12; faatusatusa i le Mat 7:15, 21-23.
(2 Tesalonia 2:9-12) O le faatasi mai o lē e amioleaga, e māfua ona o le galuega a Satani ma galuega mamana, ma faailoga pepelo ma mea ofoofogia uma 10 ma le amiolētonu, ma mea taufaasesē uma mo ē o le a fano, e taui ai iā i latou ona e leʻi faaalia lo latou naunau i le upu moni, lea e mafai ona faaolaina ai i latou. 11 O le mea lea, ua faataga ai e le Atua mea sesē e galue iā i latou, ina ia latou talitonu ai i le pepelo, 12 ina ia faamasinoina i latou uma, auā e leʻi talitonu i le upu moni ae e fiafia i le amiolētonu.
it-2 245 ¶7
Pepelo
E faataga e Ieova le Atua se “mea sesē” e galue i tagata ia e sili atu iā i latou le mea sesē, “ina ia latou talitonu ai i le pepelo” nai lo o le tala lelei e faatatau iā Iesu Keriso. (2Te 2:9-12) O lenei mataupu silisili o loo faataʻitaʻi mai i le mea na tupu iā Aapo le tupu o Isaraelu i ni senituri ua mavae. Na faamautinoa atu e perofeta pepelo iā Aapo o le a manumalo Isaraelu i le taua faasaga iā Ramota-kiliata, ae na valoia e Mekaio le perofeta a Ieova o le a toʻilalo Isaraelu. E pei ona faailoa atu i se faaaliga iā Mekaio, na faataga e Ieova se foafoaga agaga e avea o se “agaga taufaasesē” i gutu o perofeta a Aapo. O lona uiga, na faaaogā e le foafoaga agaga lona mana i na perofeta ina ia tautatala atu ai, e lē i le mea saʻo, ae o le mea na latou mananaʻo e taʻu atu ma le mea na manaʻo foʻi Aapo e faalogo i ai. E ui na muaʻi lapataʻia Aapo, ae na sili atu iā te ia le faasesēina i pepelo a na perofeta ma oo ai le oti iā te ia.—1Tu 22:1-38; 2No 18.
Saʻiliʻiliga Loloto mo ʻOa Faaleagaga
(2 Tesalonia 1:7, 8) a o outou o ē ua mafatia i puapuaga, e maua le mapusaga faatasi ma i matou, i le faaaliga o le Alii o Iesu mai le lagi faatasi ma ana agelu malolosi 8 i le afi mumū, a o ia faaoo mai le tauimasui i ē e lē iloa le Atua, ma ē e lē usiusitaʻi i le tala lelei a lo tatou Alii o Iesu.
it-1 834 ¶5
Afi
Na tusi Peteru e faapea, “ua tuu ai le lagi ma le lalolagi o loo iai i le taimi nei mo le afi.” Pe a fua i le siʻomaga o lenei mau ma manatu mai i isi mau, e faamaonia ai o lenei afi e lē o se afi moni ae o loo faaata mai ai le faaumatiaga e faavavau. E pei lava o le Lolo i aso o Noa, e leʻi faaumatiaina ai le lagi moni ma le lalolagi paneta, ae e na o tagata faalēmataʻu. E faapena foʻi le faaaliga mai o Iesu Keriso faatasi ma ana agelu malolosi i le afi mumū, o le a iʻu atu i le faaumatiaga aʻiaʻi mo na o tagata faalēmataʻu, ma lenei faiga amioleaga o mea o loo latou lagolagoina.—2Pe 3:5-7, 10-13; 2Te 1:6-10; faatusatusa i le Isa 66:15, 16, 22, 24.
(2 Tesalonia 2:2) e aua neʻi vave fenuminumiaʻi o outou mafaufau, pe atuatuvale foʻi ona o se feʻau mai i le agaga, po o se feʻau tuugutu, po o se tusi e peiseaʻī e mai iā i matou, e faapea ua oo mai le aso o Ieova.
it-1 1206 ¶4
Faagaeeina
“Feʻau Mai i le Agaga”—Saʻo pe Sesē. O le upu Eleni pneuʹma (agaga) o loo faaaogā i se auala faapitoa i nisi o tusitusiga a aposetolo. O se faataʻitaʻiga i le 2 Tesalonia 2:2, na faalaeiauina ai e le aposetolo o Paulo ona uso i Tesalonia ina ia aua neʻi vave fenuminumiaʻi o latou mafaufau, pe atuatuvale foʻi “ona o se feʻau mai i le agaga, po o se feʻau tuugutu, po o se tusi e peiseaʻī e mai iā i matou, e faapea ua oo mai le aso o Ieova.” E manino mai o loo faaaogā e Paulo le upu pneuʹma (agaga) e faasino atu i se auala o fesootaʻiga e pei o le “feʻau tuugutu” po o se “tusi.” O le māfuaaga lea na faapea mai ai le tusi Commentary on the Holy Scriptures (itu. 126) a Lange e faatatau i lenei mau: ʻO le faaaogāina e le Aposetolo o lenei faaupuga e maua ai le manatu o se valoaga, manatu faaleagaga, faamatalaga a se perofeta.’ (Faaliliuina ma toe teuteuina e P. Schaff, 1976) Ua faapea mai le tusi Word Studies in the New Testament a Vincent: “E ala i le agaga. E ala mai i faamatalaga faavaloaga a i latou sa iai i faatasiga a Kerisiano, o ē na faapea mai o loo iā i latou le pule e faia ai valoaga mai i le Atua.” (1957, Tusi IV, itu. 63) O lea, e ui o loo faaliliuina i nisi faaliliuga le upu pneuʹma i le mau lenei ma isi mau i le “agaga,” a o isi faaliliuga e faaliliuina i le “feʻau o le agaga” (The Bible—An American Translation), “valoaga” (The Jerusalem Bible), “faagaeeina” (D’Ostervald; Segond [French]), “feʻau mai i le agaga” (NW).
Faitau Tusi Paia
(2 Tesalonia 1:1-12) O i matou o Paulo, o Siluano ma Timoteo, o le tusi lenei i le faapotopotoga i Tesalonia o ē o autasi ma le Atua lo tatou Tamā, ma le Alii o Iesu Keriso: 2 Tau ina ia iā te outou le agalelei faifua ma le filemu mai i le Atua le Tamā, ma le Alii o Iesu Keriso. 3 E tatau ma onomea iā i matou ona faafetai atu i le Atua mo outou le ʻauuso e, ona ua tupu tele lo outou faatuatua, ma ua faateleina foʻi le alofa o le tasi i le isi iā te outou uma lava taʻitoʻatasi. 4 O le mea lea ua matou mitamita ai iā te outou i faapotopotoga a le Atua, ona o lo outou tutumau ma le faatuatua i sauāga uma ma puapuaga o loo outou onosaʻia. 5 O le faamaoniga lenei o le faamasinogatonu a le Atua, ua iʻu ai ina taʻuaogāina outou i le malo o le Atua, lea o loo outou mafatia ai. 6 O lea la, o le amiotonu o le Atua ua ia taui atu ai puapuaga i ē ua faapuapuagatiaina outou, 7 a o outou o ē ua mafatia i puapuaga, e maua le mapusaga faatasi ma i matou, i le faaaliga o le Alii o Iesu mai le lagi faatasi ma ana agelu malolosi 8 i le afi mumū, a o ia faaoo mai le tauimasui i ē e lē iloa le Atua, ma ē e lē usiusitaʻi i le tala lelei a lo tatou Alii o Iesu. 9 O i latou lava ia e oo i ai le faasalaga tonu o le faaumatiaga e faavavau, e teʻa ese mai luma o le Alii ma lona malosi tele, 10 i le taimi e afio mai o ia e faamamaluina faatasi ma le ʻaupaia, ma e ofo ai i lenā aso i latou uma e faatuatua, auā na outou faatuatua i la matou molimau. 11 O le mea lava lea e matou te tatalo ai pea mo outou, ina ia taʻuaogāina outou e lo tatou Atua e tusa ma lana valaau, ma tau ina ia faia atoatoa e lona mana o mea lelei uma ua ia finagalo i ai, ma galuega o le faatuatua; 12 ina ia faamamaluina ai iā te outou le suafa o lo tatou Alii o Iesu, atoa foʻi ma outou o loo autasi ma ia, e tusa ai ma le agalelei faifua o lo tatou Atua ma le Alii o Iesu Keriso.
IULAI 22-28
ʻOA TAUTELE MAI I LE AFIOGA A LE ATUA | 1 TIMOTEO 1-3
“Ia Aapa Atu mo Galuega Lelei”
(1 Timoteo 3:1) E moni foʻi lenei faamatalaga. Afai e fia aapa atu se tasi i le tofi o se ovasia, e naunau o ia i galuega lelei.
Po o E Iloa le Tāua o le Agaʻigaʻi i Luma Faaleagaga?
3 Faitau le 1 Timoteo 3:1. O le veape Eleni ua faaliliuina “aapa atu,” e uiga atu i le aapa atu i se mea e faigatā ona e āu i ai. O le faaaogāina o lenei upu, na faamatilatila ai e le aposetolo o Paulo e manaʻomia ni taumafaiga ina ia agaʻigaʻi ai i luma faaleagaga. Seʻi manatu i se uso o loo mafaufau i lona lumanaʻi i le faapotopotoga. Atonu e lē o avea o ia i le taimi lenei o se auauna o le faiva, peitaʻi ua ia iloa e manaʻomia ona ia atiaʻe uiga faaleagaga. Muamua, e taumafai o ia ina ia agavaa e avea o se auauna o le faiva. Ae a o faagasolo taimi, e faamoemoe o ia e ausia agavaa faaleagaga e avea ai o se toeaina. I nei vala taʻitasi, e galue mamafa o ia e ausia agavaa faaleagaga ina ia taulimaina ai tiute tauave faaopoopo i le faapotopotoga.
(1 Timoteo 3:13) Auā o tane o ē e auauna lelei, e taʻuleleia i latou ma e matuā saʻoloto e tautala atu i le faatuatua iā Keriso Iesu.
km 9/78 4 ¶7
ʻO Ē e Taʻuleleia’
7 E faigofie ona tatou iloa le māfuaaga na taʻua ai e Paulo nei tane ʻo ē e taʻuleleia.’ E lē uiga atu lenei manatu e faapea ua siitia tulaga o na tane e pei ona manatu ai nisi. Nai lo o lea, o auauna o le faiva “o ē e auauna lelei” e mautinoa lo latou maua o faamanuiaga mai iā Ieova ma Iesu, ma e faaaloalogia ma lagolagosua i ai le faapotopotoga atoa. Ua talafeagai ai ona latou “matuā saʻoloto e tautala atu i le faatuatua iā Keriso Iesu.” O lo latou faamaoni i o latou faaeaga, ua talisapaia ai i latou i la latou auaunaga lelei; e mausalī lo latou faatuatua ma e faailoa atu lenā faatuatua e aunoa ma le popole pe fefefe ina neʻi faalumaina.
Saʻiliʻiliga Loloto mo ʻOa Faaleagaga
(1 Timoteo 1:4) aua foʻi le faalogo atu i tala sesē ma gafa e leai se uiga, e iʻu ai i le tele o fesili lē aogā, nai lo o le faailoa atu o se mea mai i le Atua e tusa ai ma le faatuatua.
it-1 914-915
Gafa
E leai se aogā o le suʻesuʻeina ma le talanoaina o nei mataupu, aemaise lava i le taimi na tusi atu ai Paulo iā Timoteo. O le taimi lenā ua lē toe manaʻomia ona teuina ni faamaumauga o gafa ina ia faamaonia ai le tupuaga o se tasi, ona ua lē toe faaeseesea e le Atua tagata Iutaia ma tagata o Nuu Ese i totonu o le faapotopotoga Kerisiano. (Ka 3:28) Ua uma foʻi ona faamaonia mai i faamaumauga o gafa na iai, na tupuga mai Keriso i le gafa o Tavita. E lē gata i lea, a o leʻi leva talu ona avatu e Paulo lenei apoapoaʻiga ae faaumatia loa Ierusalema, ma na faaleagaina uma ai ma faamaumauga a tagata Iutaia. E leʻi faasaoina e le Atua na faamaumauga. O le māfuaaga lea na popole ai Paulo, ina neʻi alu ai le tele o le taimi o Timoteo ma faapotopotoga, i saʻiliʻiliga ma fefinauaʻiga i nei mataupu e leai se fesootaʻiga ma le faatuatuaga faa-Kerisiano. Na lava faamaumauga o gafa o loo i le Tusi Paia e faamaonia ai o Keriso o le Mesia, ma o le gafa pito sili ona tāua lenā i Kerisiano. O isi gafa o loo i le Tusi Paia, ua faamaonia ai le saʻo aʻiaʻi o faamaumauga i Tusitusiga Paia, ma faaalia manino ai o ni mea moni lava na tutupu i le talafaasolopito.
(1 Timoteo 1:17) O lenei, ia iai i le Tupu o le vavau, o lē e soifua pea ma e lē vaaia, o le Atua e toʻatasi, ia iā te ia le viiga ma le mamalu e faavavau, faavavau lava. Amene.
“Faauta, o lo Tatou Atua Lenei”
15 O le isi taʻu e na o Ieova lava e faatatau i ai, o le “Tupu o le vavau.” (1 Timoteo 1:17) O le ā le uiga o lenei taʻu? E faigatā tele i o tatou mafaufau vaivai ona malamalama atoatoa i ai, peitaʻi e faavavau Ieova i itu uma e lua—i taimi ua teʻa ma i le lumanaʻi. Ua faapea mai le Salamo 90:2: “O le Atua oe mai le vavau e oo i le faavavau.” O lea la, e leʻi iai se amataga o Ieova, ma e soifua pea o ia. Ua tonu ai la le taʻua o ia o “Lē ua mai anamuā ona aso”—sa soifua Ieova mai le vavau a o leʻi oo ina iai mea uma lava o loo i le aoao o mea i aso nei! (Tanielu 7:9, 13, 22) O ai se tasi na te mafaia ona luʻia le aiā a Ieova e avea ai ma Alii Pule Silisili Ese?
Faitau Tusi Paia
(1 Timoteo 2:1-15) O lenei, e muamua i mea uma lava ona ou apoapoaʻi atu ina ia faia talosaga, o tatalo, o ōlega, ma le ofo atu o faafetai e faatatau i ituaiga uma o tagata, 2 e faatatau i tupu ma i latou uma i tulaga maualuluga, ina ia tatou ola i ni olaga toʻafimālie ma le filemu, e faamaoni i le Atua ma ia faatagata matua. 3 O le mea lelei lea ma le mālie i le silafaga a le Atua lo tatou Faaola, 4 o lē e finagalo ina ia faaolaina ituaiga uma o tagata, ma ia maua le poto saʻo i le upu moni. 5 Auā e toʻatasi le Atua, ma e toʻatasi foʻi le puluvaga i le va o le Atua ma tagata, o le tagata lea o Keriso Iesu, 6 o lē na ofoina atu o ia lava e fai ma togiola e fetaui lelei mo tagata uma, o le mea lenei e molimau i ai i lona taimi e tatau ai. 7 O lenei molimau na tofia ai aʻu e avea o sē e talaʻi ma o se aposetolo, ou te taʻu atu le upu moni, ou te lē pepelo, o aʻu o le faiaʻoga o nuu ese i le faatuatua ma le upu moni. 8 O lenei, ou te manaʻo ia faaauau ona tatalo tane i mea uma lava, ma sisii i luga lima ma le faamaoni, ae ia lē ita ma finau. 9 Ou te manaʻo foʻi i fafine ina ia teuteu iā i latou i ofu e talafeagai, ia onomea ma ia mafaufau lelei, ia lē faia i le lauulu fili ma auro, po o penina po o ofu e sili ona taugatā, 10 ae ia tatau ma fafine o ē ua faapea mai latou te matataʻu i le Atua, e ala i a latou galuega lelei. 11 Ia aʻoaʻoina le fafine e aunoa ma sana tala e fai, ma ia gauaʻi atoatoa. 12 Ou te lē faatagaina se fafine e aʻoaʻo atu, pe pule foʻi i se tamāloa, a ia lē tautala o ia. 13 Auā na muamua ona faia o Atamu, ona faia ai lea o Eva. 14 E leʻi ʻolegia foʻi Atamu, ae na matuā ʻolegia lava le fafine, ma oo ina soli ai le tulafono. 15 Ae peitaʻi, e saogalemu o ia pe a fanauina ni tama, pe afai e latou te faaauau i le faatuatua, ma le alofa, ma le faapaiaina, atoa ma le mafaufau lelei.
IULAI 29–AOKUSO 4
ʻOA TAUTELE MAI I LE AFIOGA A LE ATUA | 1 TIMOTEO 4-6
“Faamaoni i le Atua po o ʻOa?”
(1 Timoteo 6:6-8) E moni, e tele mea e maua mai le faamaoni i le Atua ma le lotomalie. 7 Auā tatou te leʻi aumaia lava se mea i le lalolagi, ma e lē mafai foʻi ona tatou aveese ai o se mea. 8 O lea, afai ua iai ni a tatou meaʻai, o mea e oofu ai, ma mea e nonofo ai, ia tatou lotomalilie i nei mea.
Aʻoaʻoina le Auala e Maua ai le Lotomalie
O le vala autū lava na māfua ai ona fiafia Paulo ona o lona lotomalie. O le ā la le uiga o le lotomalie? O lona uiga, o le malie i mea ua maua. Na taʻu atu e Paulo i lana aumea i le faiva, o Timoteo e uiga i lenei mea: “A o le amio Atua ma le loto malie, o le oloa tele lava lea. Auā tatou te leʻi au mai lava se mea e tasi i le lalolagi, ua mautinoa foʻi tatou te lē mafai ona ave ese ai o se mea. Afai ua maua e i tatou o mea e aai ai ma mea e oofu ai, ia gata ai o tatou manaʻo.”—1 Timoteo 6:6-8.
Ia mātau ua faafesootaʻi e Paulo le lotomalie ma le amio Atua. Sa ia iloa, e maua le fiafia moni mai le faia o le amio Atua, o lona uiga, o le faamuamua o la tatou auaunaga i le Atua, ae lē o le mauaina o ʻoa faaletino. Afai na te maua ʻmea e ʻai ai ma mea e ofu ai’ o le a mafai ona ia faaauau pea ona faatinoina le amio Atua. O lea la, o le auala a Paulo e maua ai le lotomalie o le faalagolago lea iā Ieova e tusa lava po o ā tulaga e ono oo iai.
(1 Timoteo 6:9) O i latou o ē fia mauʻoa, e paʻuʻū i latou i le faaosoosoga ma le mailei, ma le tele o tuʻinanauga valea ma le tigā, ia e oo atu ai tagata i le faaumatiaga ma fano ai.
O Aafiaga o le Fia Mauʻoa
O le mea moni, o le toʻatele o tagata e lē maliliu ona o le saʻilia o ʻoa. Ae a o faagasolo tausaga, e tele mea o le a latou misia i le olaga ona o le pupū i le saʻilia o le tele o le ʻoa. E lē gata i lea, o le a aafia o latou soifua mālōlōina ona o omiga mai galuega po o popolega tau tupe, lea e māfua ai ona popole vale, lē lelei se moe, umi ona tigā le ulu, ma maʻi o le puta, ma o nei tulaga e mafai ona puupuu ai le ola. E tusa foʻi pe toe iloa mulimuli ane ua manaʻomia ona suia mea e faamuamua, ae atonu ua leai se aogā. Atonu ua lē o toe talitonuina o ia e ana uō, aafia lana fanau i itu tau faalogona, pe ua afāina foʻi lona soifua mālōlōina. O nisi mea ua faaleagaina e ono mafai ona toe faaleleia, ae e manaʻomia ai le tele o taumafaiga. O le mea moni, ua “tuia ai i latou e i latou lava i le tele o tigā.”—1 Timoteo 6:10.
(1 Timoteo 6:10) Auā o le manaʻo tele i tupe o le pogai lea o mea leaga eseese uma, ma o le manaʻo tele i ai, ua ō ese ai nisi mai le faatuatua, ma tuia ai i latou e i latou lava i le tele o tigā.
g-SM 4/09 22 ¶4-6
Auala e Ono e Taulau Ai
E pei ona tatou faitau ai i le mataupu muamua i le faasologa o nei mataupu, o ē saʻili i tupe ona e manatu e taulau ai, ua pei o loo taumafai e puʻe se ata lafoia. E lē gata ina lē taulau, ae tele ai foʻi ma tigā. O se faataʻitaʻiga, ua avea le pupū tele o nisi i le saʻilia o ʻoa ma mea ua lē amanaʻia ai o latou aiga ma uō. Ae ua lē lelei le moe a nisi ona o le pupū i galuega, po o le popole naʻuā. Ua faapea mai le Failauga 5:12: “E lelei le moe o lē faigaluega, pe itiiti pe tele ana mea e ʻai; a o le maumea o le mauʻoa e lē mafai ai ona moe o ia.”—Hebrew Names Version.
O ē e pulea e tupe, e oo i ai tigā, ma ua faasesēina i le manatu o le auala lea e maua ai le fiafia. Na taʻua e Iesu Keriso le “malosi taufaasesē o le ʻoa.” (Mareko 4:19) O lona uiga, e foliga mai o le a maua le fiafia ona o ʻoa, ae e leai. Ae e na o le manaʻo tele i ʻoa, e maua ai. “O lē ua manaʻo i tupe, e lē malie o ia i tupe,” e tusa o le Failauga 5:10.—The New English Bible.
O lona uiga, o lē manaʻo tele i tupe, ua faatigā ai e ia o ia lava ma e oo atu ai i faanoanoaga, lē fiafia, pe solitulafono ai foʻi. (Faataoto 28:20) E maua le fiafia ma le taulau i uiga e iai le lima foaʻi, loto faamagalo, amio mamā, alofa, ma iai se faiā lelei ma le Atua.
Saʻiliʻiliga Loloto mo ʻOa Faaleagaga
(1 Timoteo 4:2) e ala i tala pepelo a tagata faafiaamiotonu, ua faailogaina o latou lotofuatiaifo i le uʻamea aasa;
Se Lotofuatiaifo Lelei ma le Atua
17 Na tusi Peteru: “Ia taofimau i se lotofuatiaifo lelei.” (1 Peteru 3:16) Pe a faaauau ona lē amanaʻia e tagata mataupu silisili a Ieova, o le a iʻu ina lē toe gaoioi o latou lotofuatiaifo. Na faapea mai Paulo, o lenā ituaiga o lotofuatiaifo ua ʻfaailogaina i le uʻamea aasa.’ (1 Timoteo 4:2) Pe na e matuā mū leaga i se afi? Pe a tupu se mea faapena, e matuā maʻilaʻila ai lou paʻu ma e lē toe lagona ai se mea. Pe afai e faaauau ona faia e se tasi mea sesē, e mafai ona “faailogaina” lona lotofuatiaifo ma lē toe gaoioi ai.
(1 Timoteo 4:13) Ia toʻaga pea e faitau i luma o tagata, ia apoapoaʻi atu ma aʻoaʻo atu seʻia ou alu atu.
it-2 714 ¶1-2
Faitau i Luma o Tagata
I le Faapotopotoga Kerisiano. I le uluaʻi senituri, e toʻaitiiti na iai ni a latou kopi o le tele o tusi tāʻai o le Tusi Paia, ma na tāua ai la le faitau atu i luma o tagata. Na faatonuina e le aposetolo o Paulo le faitau atu o ana tusi i luma o tagata i taimi o sauniga a faapotopotoga Kerisiano. Na ia faatonuina foʻi i latou ina ia fesuiaʻi na tusi ma ana tusi na avatu i isi faapotopotoga, ina ia mafai ai ona latou faitau i na foʻi tusi. (Ko 4:16; 1Te 5:27) Na fautuaina e Paulo le ovasia Kerisiano talavou o Timoteo, ina ia toʻaga pea e “faitau i luma o tagata, ia apoapoaʻi atu ma aʻoaʻo atu.”—1Ti 4:13.
O le faitau atu i luma o tagata e tatau ona sologa lelei. (Sap 2:2) Talu ai o le faitau atu i luma o tagata na aʻoaʻoina ai i latou, na tatau la i le tagata faitau ona malamalama lelei i mea o loo ia faitauina atu, o faanaunauga o le tusitala, ma ia faaeteete i le auala e faitau atu ai ina ia lē avatu ai se manatu sesē i le ʻaufaalogologo. Ua taʻua i le Faaaliga 1:3, e fiafia i latou e faitau leotele i upu o lenei valoaga, faapea foʻi ma i latou e faalogo atu i na upu.
Faitau Tusi Paia
(1 Timoteo 4:1-16) Ae peitaʻi, ua taʻutino mai e le agaga paia e faapea, i se taimi mulimuli ane e paʻuʻū ese ai nisi mai i le faatuatua, ae matuā uaʻi atu i upu taufaasesē mai agaga ma aʻoaʻoga a temoni, 2 e ala i tala pepelo a tagata faafiaamiotonu, ua faailogaina o latou lotofuatiaifo i le uʻamea aasa; 3 ua faasā ona faaipoipo, ma faatonu atu e faamamao mai i meaʻai na foafoaina e le Atua, e aai ai ma le faafetai i latou e faatuatua ma iloa lelei le upu moni. 4 Auā e lelei foafoaga uma a le Atua, ma e lē tatau ona teena se mea pe afai ua talia ma le faafetai, 5 auā ua faapaiaina e ala i le afioga a le Atua ma le tatalo. 6 O le tuuina atu o nei fautuaga i uso, ua avea ai oe ma auauna lelei a Keriso Iesu, o lē ua tausia upu o le faatuatua ma le aʻoaʻoga lelei ua e mulimulituʻi i ai. 7 Aua neʻi faalogo atu i tala sesē ua faaleagaina ai mea e paia, sa faamatalaina e loomatutua. Ae ia aʻoaʻo oe lava ia fai ma ou sini le faamaoni i le Atua. 8 Auā e itiiti le aogā o le faamalositino, a o le faamaoni i le Atua e aogā lea i mea uma lava, auā o loo folafola mai ai le ola i le taimi nei ma le lumanaʻi. 9 E moni lenā faamatalaga, ma e tatau foʻi ona matuā taliaina. 10 O le mea lea ua tatou galulue mamafa ma finafinau ai, auā ua tuu atu lo tatou faamoemoe i le Atua soifua, o le Faaola lea o ituaiga uma o tagata, aemaise lava o ē e faamaoni i le faatuatua. 11 Ia faaauau ona taʻu atu nei poloaʻiga ma aʻoaʻo atu ai. 12 Aua lava neʻi vaai maulalo se tagata i lou talavou. A ia fai oe ma faaaʻoaʻo i ē e faamaoni i le tautala, ma le amio, ma le alofa, ma le faatuatua, ma le amio mamā. 13 Ia toʻaga pea e faitau i luma o tagata, ia apoapoaʻi atu ma aʻoaʻo atu seʻia ou alu atu. 14 Aua neʻi faatalalē i le meaalofa ua tuuina atu iā te oe, e ala i le valoaga ma ina ua faaee atu lima o le ʻautoeaina iā te oe. 15 Ia manatunatu i nei mea; ia naunau i ai, ina ia iloa ai e tagata uma lou agaʻigaʻi i luma. 16 Ia uaʻi totoʻa iā te oe lava ma lau aʻoaʻo atu. Ia e tumau ai i nei mea, auā o le faia faapea e faaolaina ai oe lava atoa ma i latou o faalogo iā te oe.