Aisea e Mataʻu ai Nei i le Atua Moni?
“Ia e mataʻu i le Atua, ma e anaana i ana poloaiga; auā o mea ia e tatau i tagata uma.”—FAILAUGA 12:13.
1, 2. Aisea ua talafeagai ai le iai o le mataʻu tatau i le Atua?
O LE mataʻu lelei ma le faaaloalo i le Atua, e lelei mo le tagata. Ioe, e ui o le tele o le mataʻu o loo i tagata e iu ai i aafiaga tau i faalogona ootia, e oo lava ina faaleagaina ai, ae mo lo tatou lava saogalemu, e lelei ai mo i tatou ona matataʻu ia Ieova le Atua.—Salamo 112:1; Failauga 8:12.
2 Ua silafia e Lē na Foafoaina Mea lenei tulaga. Ona o lona alofa i ana foafoaga, ua ia poloaia ai ana foafoaga uma ina ia matataʻu ma tapuai atu ia te ia. Tatou te faitau i ai e faapea: “Na aʻu iloa foi le tasi agelu ua lele i le taulotoaiga o le lagi, ua ia te ia le tala lelei faavavau e folafola atu i e nonofo i le lalolagi, i atunuu uma, ma ituaiga, ma gagana eseese, ma nuu, ua faapea atu ma le leo tele, ‘Ia outou matatau i le Atua, ma avatu ia te ia le viiga, auā ua oo mai le itu aso o lana faamasinoga; ma ia outou ifo i le na faia le lagi, ma le fanua.’”—Faaaliga 14:6, 7.
3. O le ā na faia e Lē na Foafoaina Mea mo o tatou uluai mātua?
3 E mautinoa lava e lē tatau ona tatou lē amanaiaina Lē na Foafoaina Mea uma, o le Puna o le ola, auā o ia e ana i tatou ma lenei paneta. (Salamo 24:1) I se faailoaga o lona alofa tele, na foaiina mai ai e Ieova i lana fanau faalelalolagi le ola, ma saunia mo i latou se nofoaga matagofie e ola ai—se parataiso matagofie. Peitai, o lenei meaalofa matagofie sa aumaia faatasi ma ni tuutuuga. O lona uiga, sa tuu mai i le la vaavaaiga. Sa tatau i o tatou uluai mātua ona la tausia lo la aiga ma ia faalautele atu, seia oo ina la faatoateleina ma aofia ai le lalolagi atoa. Na la maua ni faaeaga ma ni tiute tauave i le vaavaaia o manuvaefa, o manufelelei, ma iʻa—o isi foafoaga ola uma sa tatau ona ola faatasi ma i laua, ma ni a la fanau. Mo nei la mea e tele ua tuu atu i lana vaavaaiga, sa tatau ai i le tagata ona tali atu e tusa ai ma nei mea.
4. O le ā ua faia e tagata i foafoaga a le Atua?
4 E ui lava la i lena amataga ofoofogia, ae seʻi tagai i le mea ua faia e le tagata ina ia faaleagaina ai lenei aiga faalelalolagi matagofie! I amioga e lē faaaloalo i le tulaga pule a le Atua mo lenei fuafuaga tāua, ua faamatagāina ai e tagata le lalolagi. Ua oo atu le matautia o le faaleagaina i se tulaga ua faamataʻuina ai le ola o le tele o manuvaefa, o manufelelei, ma iʻa. O le a lē faavavau ona faatagaina e lo tatou Atua, e tonu ma alofa, lenei tulaga. O le faaleagaina o le lalolagi ua matuā manaomia ai se faamasinoga, o se mea ua tatau ai le matataʻu o le toatele. Peitai ane, o i latou o loo faatuatua ma le faaaloalo i le Atua, ua faamafanafanaina i latou i le iloaina o le mea o le a tupu. O le a faia e Ieova se faamasinoga, ma o le a toe faafoisia ai le lalolagi i se tulaga lelei. Ua avea moni lenei mea o ni tala fiafia mo ē uma e saʻo o latou loto o loo iai i le lalolagi.
5, 6. O le a faapefea ona tali atu Ieova i mea ua faia e tagata i Ana foafoaga?
5 O le ā le auala o le a tauaaoina atu ai e le Atua lana faamasinoga? E ala atu ia Iesu Keriso, lea ua faanofotupuina nei e avea ma Tupu o le Malo faalelagi o le Atua. E ala mai i lena Alo faalelagi, o le a faaiuina ai e Ieova le faiga o mea lē mamā ma le fouvale o loo iai nei. (2 Tesalonia 1:6-9; Faaaliga 19:11) O le auala lenei o le a ia aumaia ai le mapusaga ia i latou o ē matataʻu ia te ia, ma i le taimi lava e tasi, e laveaia ma faasaoina ai lo tatou aiga faalelalolagi.
6 O le a faapefea ona tupu o lenei mea? Ua taʻua e le Tusi Paia le oo mai o le puapuaga tele lea e taualuga i le taua o Amaketo. (Faaaliga 7:14; 16:16) O le faamasinoga lena a le Atua e faasaga atu i lenei faiga o mea ua faaleagaina, ma ē o loo faia le faaleagaina. Pe o le a iai ea ni tagata e totoe mai mo le faaolaina? Ioe! O i latou e iai le mataʻu moni i le Atua, e lē o se fefevale, ae o se mataʻu faaaloalo ia te ia. O le a faasaoina i latou.—Faataoto 2:21, 22.
Se Faaaliga e Ofo ai o le Mana
7. Aisea na faalaa ane ai le Atua e fai ma sui o Isaraelu i le vaitaimi o Mose?
7 O lenei gaoioiga mataʻina o le a faia e Ieova le Atua, sa faaatagia mai e le gaoioiga mamana na ia faatinoina mo le laveaia o ona tagata tapuai, i ni tausaga pe ā ma le 1,500 a o lei oo mai i o tatou aso. Sa faapologaina e le pulega tele faavaegaau a Aikupito tagata Isaraelu sa latou faafaigaluegaina, na oo foi ina latou fuafuaina se faiga e tafiesea uma ai nei tagata ina ua faatonuina e lo latou pule, o Farao, le fasiotia o pepe tama ulumatua uma o Isaraelu. Na tau manumalo le Atua ia Aikupito, ina ia toe faasaʻolotoina Isaraelu mai lena faiga faapolotiki sa saisaitia ai, ioe, o se saʻolotoga mai se nuu sa faaleagaina ona o tapuaiga i atua e tele.
8, 9. Na faapefea ona tali atu Mose ma le fanauga a Isaraelu i le faalaa ane a le Atua?
8 Ua faamauina i le mataupu e 15 o le Esoto le tali atu a Isaraelu i lo latou faasaʻolotoga mai Aikupito. O le iloiloina o lenei tala o le a fesoasoani ia i tatou ina ia talisapaia ai le auala e mafai ona faasaoina ai Kerisiano mai le faiga o mea o loo iai nei, ua matuā faaleagaina faaleagaga ma le faaletino foi. Seʻi o tatou iloiloina le Esoto mataupu e 15, i le taulaʻi atu i fuaiupu ua filifilia, ina ia iloa ai le pogai e tatau ai ona tatou filifili e matataʻu ia Ieova, le Atua moni. Seʻi tatou amata i fuaiupu 1 ma le 2:
9 “Ona pepese ai lea o Mose ma le fanauga a Isaraelu i lenei pese ia Ieova, ua latou fai ane, o loo faapea, Ou te pese ia Ieova, auā ua matuā manumalo o ia; o le solofanua atoa ma le na tietie ai, ua ia lafoina i le sami. O Ioa, o loʻu malosi ia, ma laʻu pese, ua fai foi o ia moʻu olataga.”
10. O le ā na oo atu ai i le faaumatiaina e le Atua o le autau a Aikupito?
10 Ua masani tagata i le lalolagi atoa ma le tala i le auala na faasaʻoloto ai e Ieova Isaraelu mai Aikupito. Na ia aumaia mala i lena malo malosi o le lalolagi, seia oo lava ina faataga e Farao le fanauga a Isaraelu ina ia ō ese atu. Ae teʻi ua toe tuliloa e le autau a Farao nei tagata o loo ō atu e aunoa ma so latou puipuiga, ma na foliga mai ua puʻea faamanu i ofaga i latou i le auvai o le Sami Ulaula. E ui lava sa foliga o le a vave ona toe mou ese atu le saʻolotoga o Isaraelu lea na faatoʻā latou maua, peitai sa ese le mea na i le finagalo o Ieova. Na ia faaavanoaina faavavega se auala i le ogatotonu o le sami ma aumaia ai ma le saogalemu ona tagata. Ina ua tuliloa mai e le ʻau Aikupito, na toe faafoi mai e Ieova le tafe o le Sami Ulaula i o latou luga ma malelemo ai Farao ma ana autau.—Esoto 14:1-31.
11. O le ā na iu i ai le gaoioiga a le Atua lea na faia ia Aikupito?
11 O le faaumatiaina e Ieova o vaegaau a Aikupito na faasilisilia ai o ia i le vaaiga a ona tagata tapuai, ma faalauiloa atili atu ai lona suafa. (Iosua 2:9, 10; 4:23, 24) Ioe, sa faasilisilia lona suafa e sili aʻe nai lo atua pepelo ma le leai o se malosi a Aikupito, o ē na faamaonia lo latou lē mafai ona faasaoina o latou tagata tapuai. O le faalagolago atu i o latou atua, ma faalagolago atu i le tagata e oti, ma le malosi faavaegaau, na taʻitaʻiina atu ai i se matuā loto tiga. (Salamo 146:3) E letioa uunaia loto o le fanauga a Isaraelu e pepese atu i viiga na faaatagia mai ai lo latou matataʻu lelei i le Atua soifua, o lē iai le mana e faasaoina ai ona tagata!
12, 13. O le ā e tatau ona tatou aʻoaʻoina mai le manumalo o le Atua i le Sami Ulaula?
12 I se tulaga tutusa, e tatau ona tatou iloa lelei, e leai ni atua sese i o tatou taimi, e leai foi se malo malosi, e oo lava i ni auupega faaniukelea, e mafai ona faatutusa atu ia Ieova. Na te mafaia, ma o le a ia faasaoina ona tagata. “Ua ia faia foi e tusa ma lona finagalo i ʻau o le lagi, atoa ma e o nonofo i le lalolagi; e leai se tasi na te taofia lona aao, pe fai atu ia te ia, O le a ea le mea e te fai na?” (Tanielu 4:35) Pe a oo ina tatou matuā malamalama i uiga o nei upu, o le a uunaia ai foi i tatou ina ia peseina ona viiga ma le fiafia.
13 Ua faaauau le pese manumalo o le Sami Ulaula e faapea: “O Ieova, o le toa lava ia, o Ieova o lona suafa lea.” O lea la, o lenei Toa e lē mafaatoilaloina, e lē na o se mea e fai ma ata o mafaufauga o tagata. E iai lona suafa! O ia ‘o Lē na māfua ai ona iai,’ o Lē Sili na Faia Mea, o Lē “e ou le suafa o Ieova, . . . o le Silisili ese i le lalolagi uma.” (Esoto 3:14; 15:3-5; Salamo 83:18) Pe e te lē ioe ea sa ono avea o se mea atamai mo na tagata Aikupito anamua ona iai so latou mataʻu talafeagai ma le faaaloalo i Lē Ona le Malosi Uma Lava, nai lo le fia faatavā atu ia te ia?
14. Na faapefea ona faataʻitaʻia i le Sami Ulaula le aogā o le mataʻu faaleatua?
14 Talu ai o ia o Lē na Fuafuaina le faiga o le lalolagi, ua iai i Lē na Faia le sami, le pule atoatoa i luga o le vasa laolao. (Esoto 15:8) I le faaaogaina foi o lana pulega i le matagi, na ia faataunuuina ai se mea sa foliga mai sa faafaigata ona faataunuu. Na ia vaeluaina le vai loloto i tua i se tulaga na taofiofia ai ina ia mafai ona maua ai se auala i le ogatotonu mo ona tagata e sopoia atu ai. Seʻi tatou faaataina le vaaiga: e faitau miliona tone le mamafa o le suāsami o loo faafaupue aʻe faafesagai, ua fau aʻe ai se auala malupuipuia ina ia sosola atu ai Isaraelu. Ioe, o i latou na faaalia le mataʻu lelei i le Atua na puipuia i latou. Ona toe faamatuu mai lea e Ieova le vai, ma toe foi atu i lona tulaga o se lolo tele, ma tanumia ai autau uma a Farao ma a latou auupega. Maeu se faaaliga o le malosi tauatua, e sili atu nai lo le malosi o atua e leai ni aogā, ma malosi faavaegaau a tagata! E mautinoa la, o Ieova o ia lē e tatau ona matataʻu i ai, a ea?—Esoto 14:21, 22, 28; 15:8.
Le Faaalia o Lo Tatou Matataʻu i le Atua
15. O le ā e ao ona avea ma a tatou tali atu i gaoioiga mamana a le Atua mo le faasaoina?
15 Pe ana fai sa tatou tutū saogalemu faatasi ma Mose i inā, e mautinoa lava o le a faagaeeina i tatou e pepese atu: “Ieova e, o ai ea se ua tusa ma oe i le vao atua? O ai se ua tusa ma oe, o lē silisili ona paia, o lē matautia i viiga, o lē fai vavega?” (Esoto 15:11) O na fuaitau faaviivii ua toe faaleo mai i le faitau senituri talu mai lena taimi. I le tusi faaiu o le Tusi Paia, ua faamatala ai e le aposetolo o Ioane se vaega o auauna faamaoni faauuina a le Atua e faapea: “Ua latou pepese i le pese a Mose le auauna a le Atua, ma le pese a le Tamai Mamoe.” O le ā lenei pese taʻutaʻua? “Le Alii e, le Atua e ou le malosi uma lava, Ua tetele au galuega e ofo ai! E tonu ma faamaoni ou ala, Le Tupu o augātupulaga e! Le Alii [Ieova] e, o ai se le mataʻu ma vivii atu i lou suafa? Auā ua na o oe e paia.”—Faaaliga 15:2-4.
16, 17. O ā faagasologa ofoofogia ua tatou vaaia le faataunuuina i aso nei?
16 I aso foi la nei, o loo iai ni tagata tapuai ua faasaʻolotoina ua latou talisapaia e lē na o galuega o le foafoaga a le Atua, ae talisapaia foi ana poloaiga. Ua faasaʻolotoina faaleagaga tagata mai atunuu uma, ua vavaeeseina mai lenei lalolagi ua faaleagaina auā ua latou iloa lelei ma faatinoina poloaiga amiotonu a le Atua. I tausaga taitasi, e faitau selau afe ua sosola ese mai lenei lalolagi piopio, ina ia latou aumau faatasi ma le faalapotopotoga mamā ma le tonu o tagata tapuai a Ieova. E lē pine, pe a mavae ona faaooina mai le faamasinoga aasa a le Atua faasaga i tapuaiga sese ma le isi vaega uma o lenei faiga amioleaga, ona latou ola ai lea e faavavau i se lalolagi fou amiotonu.
17 I le ogatusa ma le Faaaliga 14:6, 7, ua lagonaina nei e tagata se feau lapatai o le faamasinoga o loo faalauiloa atu e Molimau a Ieova e ala i le taʻitaʻiga faaagelu. I le silia i le 230 atunuu i le tausaga ua tuanai, na folafola ai e le tusa ma le lima miliona o Molimau le tala lelei o le Malo o le Atua ma lana aso o le faamasinoga. Ina ia aʻoaʻoina o latou uso a tagata mo le faasaoina, sa faia ai e Molimau ni asiasiga faifai pea i aiga o tagata, ma faia ni suesuega faale-Tusi Paia e aunoa ma se totogi. O lea, e faitau selau afe tagata i tausaga taitasi ua tele mea ua latou aʻoaʻoina ina ia naunau ai e matataʻu i le Atua moni, ma tuuina atu o latou ola ia te ia, ma papatisoina. Maeu se tulaga e faafiafiaina ai, ona ua matataʻu atu nei na tagata i le Atua moni!—Luka 1:49-51; Galuega 9:31; faatusatusa i le Eperu 11:7.
18. O le ā e faataʻitaʻia mai ai o loo aofia ai agelu i la tatou talaʻiga?
18 Pe moni ea o loo aofia ai agelu i lenei galuega talaʻi? E mautinoa le manino mai, o le taʻitaʻiga faaagelu e masani pea ona taʻitaʻia atu ai Molimau a Ieova i se aiga o loo iai ni tagata loto mafatia ma mapuitiga, atonu foi o loo tatalo atu mo se fesoasoani faaleagaga! Mo se faaaoaoga, e toalua ni Molimau a Ieova na latou ō atu faatasi ma se tamaitiiti, e folafola le tala lelei i se atumotu i le Karipiane. Ina ua oo i le aoauli, ona mafaufau lea o Molimau matutua e toalua o le a faagata ai i inā la latou galuega mo lea aso. Peitai, na matuā ese le naunau o le tamaitiiti latou te ō atu e afea le fale o loo sosoo ai. Ina ua vaai atu le tamaitiiti e lē o fia faia e le au matutua lena fuafuaga i lea taimi, ona alu lava lea na o ia ma tuʻituʻi le faitotoa o le fale. Na tatala mai e se tamaitai talavou le faitotoa. Ina ua vaai atu le au matutua i lenei mea, ona la ō atu loa lea i ai ma talanoa i le teine. Na faaulufale e le teine i latou, ma faamatala i ai e faapea, i le taimi tonu lava lea na ia faalogo mai ai o tuʻituʻi atu le faitotoa, o loo ia tatalo ai ina ia auina mai e le Atua ni Molimau ia te ia ina ia aʻoaʻoina o ia i le Tusi Paia. Sa faia loa ni fuafuaga mo se suesuega faale-Tusi Paia.
19. O le ā e mafai ona tatou faasino atu i ai e avea ma aogā o le mataʻu i le Atua?
19 A o tatou faaooina atu ma le faamaoni le feau faafaamasinoga a le Atua, ua tatou aʻoaʻo atu ai foi ana poloaiga amiotonu. Pe a faatatauina nei poloaiga i olaga o tagata, o le a iu ai e lē gata o faamanuiaga faaletino, ae o faamanuiaga faaleagaga foi. Mo se faaaoaoga, ua matuā manino le Tusi Paia i lona taʻusalaina o amioga lē mamā uma faaleituaiga. (Roma 1:26, 27, 32) Ua matuā taatele i le lalolagi i aso nei le lē amanaiaina o tapulaa mai le Atua. O le ā le iuga? Ua malepelepe faaipoipoga. Ua faateteleina amioga lē taupulea. O faamaʻi pipisi e pipili ai mai faiga faaleituaiga, ua matuā faatigaina ai pe oo ai lava i le oti, ua matuā salalau atu i lenei 20 senituri. O le mea moni, o le faamaʻi taufaamataʻu o le AIDS ua sili ona pipisi atu ona o faiga lē mamā faaleituaiga. Ae pe ua lē faamaonia ea le avea o le mataʻu faaaloalo i le Atua, o se puipuiga sili mo tagata tapuai moni?—2 Korinito 7:1; Filipi 2:12; tagai foi i le Galuega 15:28, 29.
O Iuga o le Mataʻu i le Atua i le Taimi Nei
20. O le ā e faataʻitaʻia mai ai, ua iloa e isi le talaaga o Molimau a Ieova?
20 E anoanoai faamanuiaga o i latou o ē matataʻu i le Atua ma usiusitai i ana poloaiga. Seʻi manatunatu i se mea na tupu e faataʻitaʻi mai ai le faatuputeleina o le amanaia o le mea moni e faapea, ua faavae aʻe e Molimau a Ieova se auuso filemu o ni Kerisiano amio saʻo. O ni Molimau sa usufono atu i se tauaofiaga faavaomalo i Amerika i Saute, sa latou nonofo i se faletalimalo na faaaogā foi i se po e tasi mo se faatasiga a ni tagata e lē o ni Molimau, na lauga ai le peresitene o le malo. A o faatopetope atu se vaega o leoleo o le puipuiga e faafeao atu le peresitene i totonu o le lifi, na oso faafuasei atu ai i totonu ma se Molimau, ona na te lei iloa po o ai sa i totonu o le lifi, ma na matuā meia ai leoleo! Ina ua manino le Molimau i lana mea sese na fai, ona ia faatoese ane lea ona o lona oso sese atu. Na ia faaali ane lana pine faamaonia o le tauaofiaga o loo faailoa ai o ia o se Molimau, ma ia taʻua le lei iai o sona mafaufau e faamataʻu ane i le peresitene. Na ʻataʻata se leoleo ma faapea ane: “Pe ana faapei tagata uma o Molimau a Ieova, semanū tatou te lē manaomia lenei ituaiga o puipuiga.”—Isaia 2:2-4.
21. O ā avanoa mo gaoioiga ua tatala mai mo tagata i aso nei?
21 O le ituaiga tagata lenei o loo aoaoina nei e Ieova ma sauniunia ina ia ‘faasaoina mai le puapuaga tele’ lea e faaiuina ai lenei faiga o mea. (Faaaliga 7:9, 10, 14) O lena faasaoina e lē o se mataupu o le a faia e aunoa ma le fuafuaina. Ina ia avea o sē e faasaoina, e tatau i se tagata ona mataʻu ia Ieova, ia amanaia le tonu o le avea o ia ma Pule Silisili ese, ma ia tuuina atu ia te ia. E ui i lea, o le mea moni, o le toatele lava o le a latou lē atiina aʻe le ituaiga o mataʻu lea e maua ai le puipuiga. (Salamo 2:1-6) E tusa ai o faamaoniga uma ua faaalia mai, o Iesu Keriso, le Pule ua filifilia e Ieova, ua pule nei o ia o se Tupu talu mai le tausaga tāua o le 1914. O le uiga o lenei mea, ua matuā utiuti lava le taimi o loo totoe mo tagata ina ia atiina aʻe ai ma faaalia mai le mataʻu lelei ia Ieova. Peitai, o Lē na Foafoaina i tatou, o loo ia faatagaina pea tagata, e oo lava i ē o loo i tulaga maualuluga, ina ia faia se gaoioiga: “O lenei, outou tupu e, ia outou atamamai; ia aʻoaʻoina foi outou faamasino o le lalolagi. Ia auauna ia Ieova ma le mataʻu, ia fiafia foi ma le gatete. Ina sogi ia i le Atalii, neʻi toasa mai o ia, ma outou fano ai i le ala; auā e faafuasei ona tupu o lona toasa. Amuia i latou uma o e faatuatua ia te ia.”—Salamo 2:7-12.
22. O le ā le lumanai o le a iai mo i latou o ē matataʻu i le Atua i le taimi nei?
22 Talosia ia tatou iai faatasi ma i latou o ē o le a vivii atu i Lē na Foafoaina i tatou, o Lē na laveaia i tatou. Peitai, e manaomia ai e lenei mea lo tatou matataʻu i le Atua moni i le taimi nei! (Faatusatusa i le Salamo 2:11; Eperu 12:28; 1 Peteru 1:17.) E tatau ona tatou faaauau pea i le aʻoaʻoina o ana poloaiga amiotonu ma usiusitai i ai. O le pese a Mose ma le Tamai Mamoe, lea e faamauina i le Faaaliga 15:3, 4, o le a oo ina matuā usuina ma le leotele a o soloiesea e Ieova amioleaga uma mai le lalolagi, ma amata ona faamālōlōina tagata ma lo latou aiga faalelalolagi mai aafiaga leaga uma o le agasala. Ona tatou pepese atu ai lea ma o tatou loto atoa i le faapea atu: “Le Alii e, le Atua e ou le malosi uma lava, Ua tetele au galuega e ofo ai! E tonu ma faamaoni ou ala, Le Tupu o augātupulaga e! Le Alii [Ieova] e, o ai se le mataʻu ma vivii atu i lou suafa?”
Pe E te Manatua?
◻ Aisea ua onomea ai ia Ieova lo tatou mataʻu lelei?
◻ O le ā na faaalia mai i mea na faataunuuina e le Atua i le Sami Ulaula?
◻ O ā aogā e maua mai i lo tatou matataʻu ma le faaaloalo ia Ieova?
◻ O le ā le lumanai o loo faatalitalia mai mo i latou o ē matataʻu i le Atua moni i aso nei?