SUʻESUʻEGA 7

Saʻo ma Maufaatuatuaina Faamatalaga

Luka 1:3

AOTELEGA: Ia faaaogā faamaoniga maufaatuatuaina e fesoasoani i lau aofia po o le tagata o le fale ina ia maua se faaiʻuga saʻo.

Saʻili faamatalaga maufaatuatuaina. Ia faavae ou manatu mai i le Afioga a le Atua ma faitau saʻo mai i ai pe a mafai. Pe afai e te taʻua ni faamatalaga faafomaʻi, se tala fou, se mea na tupu po o nisi manatu e lagolago ai, ia faamautinoa muamua o au faamatalaga e maufaatuatuaina ma e pito sili ona lata mai.
Faaaogā lelei faamatalaga. Ia faamatala le mau ia ōgatusa ma lona siʻomaga, le feʻau autū o le Tusi Paia ma lomiga a le “pologa faamaoni ma le faautauta.” (Mata. 24:45) Pe a faaaogā faamatalaga e lē mai i le Tusi Paia, ia saʻo le faamatalaina nai lo o le suia o le uiga moni na tusia ai, po o le taʻu atu foʻi o se mea e ese mai i le uiga na tusia ai e le tusitala.

Aua le soona faatelē se mea moni po o ni fuainumera. Ia faaeteete ina neʻi feaveaʻia faaupuga e pei o “nisi tagata” i le “toʻatele o tagata,” o “nisi taimi” i le “taimi uma” ma le “atonu” i le “mautinoa.”
Fefulifulisaʻi i faamaoniga. Pe a māeʻa ona faitau se mau pe sii mai se faamatalaga, ia fai fesili faautauta po o se faataʻitaʻiga o le manatu autū, e fesoasoani i lau aofia e fai ai a latou lava faaiʻuga.