AMATAINA O SE TALANOAGA
LESONA 4
Lotomaulalo
Mataupu silisili: “Ia faia ma le lotomaulalo, i le manatu ua sili isi iā te oe.”—Fili. 2:3.
Mea na Faia e Paulo
1. Ia matamata le VITIŌ, pe faitau le Galuega 26:2, 3, ona manatunatu lea i fesili nei:
a. Na faapefea ona faaalia e Paulo le lotomaulalo ina ua talanoa atu i le tupu o Akeripa?
e. Na faapefea ona faauaʻi atu e Paulo Akeripa iā Ieova ma le Tusi Paia, nai lo o le faauaʻi atu iā te ia lava? —Tagaʻi i le Galuega 26:22.
O le ā e Tatou te Aʻoaʻoina Mai iā Paulo?
2. O le a sili atu ona logolelei le feʻau o le Tusi Paia pe a tatou talanoa atu i se auala lotomaulalo ma faaaloalo.
Faaaʻoaʻo iā Paulo
3. Aua le vaai maulalo i tagata. ʻAlofia le talanoa atu i se auala e manatu ai le tagata e tele atu mea e te iloa nai lo o ia. Ia talanoa atu ma le faaaloalo.
4. Ia faailoa atu i tagata o upu moni o loo e aʻoaʻo atu e mai i le Tusi Paia. E maua i le Afioga a le Atua manatu e pāʻia ai loto o tagata. Pe a tatou faaaogā la le Tusi Paia, o lenā ua tatou atiaʻe lo latou faatuatua i le Afioga a le Atua.
5. Ia faaauau ona agamalu. Aua le tausisi o oe lava e saʻo. E tatou te lē mananaʻo e finau ma tagata. Ia faaalia le lotomaulalo e ala i le toʻa pea ma iloa le taimi e tatau ai ona e alu ese. (Faata. 17:14; Tito 3:2) O le tali atu ma le agamalu, atonu o le a talia ai e le tagata se talanoaga i se isi taimi i le lumanaʻi.