O se ʻAuuso Autasi

PE TUSA ma le 1,500 tausaga na feutagaʻi ai Ieova ma le fanauga a Isaraelu o ni tagata e tauaveina lona suafa. Ona ia ʻsilasila atu lea i nuu ese, ina ia filifilia mai ai ni tagata mo lona suafa.’ (Galu. 15:14) O le a avea tagata mo lona suafa ma ana molimau, e autasi i manatu ma gaoioiga po o fea lava le vaipanoa o le lalolagi e latou te nonofo ai. O le autasia o tagata mo le suafa o le Atua, o le iʻuga lea o le poloaʻiga na tuuina atu e Iesu i ona soo: “O le mea lea, ia outou ō atu e fai tagata o nuu uma lava ma soo, ma papatiso atu iā i latou i le suafa o le Tamā, ma le Atalii, ma le agaga paia, ia aʻoaʻoina i latou ia tausi i mea uma ua ou poloaʻi atu ai iā te outou.”​—Mata. 28:19, 20.

² E ala i lou tuuina atu iā Ieova ma papatisoina, ua avea ai oe ma soo o Iesu Keriso. Ua avea ai foʻi oe o se vaega o le ʻauuso Kerisiano e autasi i le lalolagi aoao, o ē e lē faatagaina le eseese o atunuu, ituaiga ma le tulaga tau tamaoaiga e talepeina ai lo latou autasi. (Sala. 133:1) O le māfuaaga lea ua e alofa ma faaaloalo ai i au aumea Kerisiano i le faapotopotoga. Atonu o nisi o i latou e ese o latou atunuu, ituaiga, po o tulaga tauaʻoaʻoga. Pe atonu foʻi e te leʻi taliaina muamua i latou ona o nei eseesega. Ae ua autasia outou uma i le fusi o le alofa faaleuso lea e sili atu nai lo o se isi lava faiā tau i le vafealoaʻi, faaletapuaʻiga po o sootaga faaleaiga.​—Mare. 10:29, 30; Kolo. 3:14; 1 Pete. 1:22.

FETUUNAʻI LE AUALA E MAFAUFAU AI

³ Pe afai e faigatā i nisi ona aveesea faalogona faaituʻau i lanu, faiga faapolotiki, le vafealoaʻi, po o isi lava faalogona faaituʻau ua mauaa, e mafai ona latou mafaufau i uluaʻi Kerisiano Iutaia. Sa manaʻomia ona latou saʻoloto mai i faiga faaituʻau a le lotu Iutaia, faasaga i tagata o isi atunuu uma. Ina ua faatonuina Peteru e alu i le fale o le taʻitaʻiʻau Roma o Konelio, na muaʻi sauniunia ma le alofa e Ieova Peteru mo lenā tofiga.​—Galu. mataupu 10.

⁴ I se faaaliga, na faatonuina ai Peteru ina ia fasi ma ʻai nisi o manu e lē mamā i le tapuaʻiga a tagata Iutaia. Ina ua teena e Peteru lenā faatonuga, ona faapea mai lea o se leo mai i le lagi: “Aua e te toe taʻua e leaga mea ua faamamāina e le Atua.” (Galu. 10:15) O le faalaa ane o le Atua, na toe fetuunaʻi ai e Peteru le auala e mafaufau ai i le tofiga lea o le a tuuina atu iā te ia, o le asiasi atu lea i se tagata o nuu ese. Ina ua usitaʻi Peteru i le faatonuga mai iā Ieova, ona ia faapea atu lea iā i latou sa faapotopoto ai i inā: “Ua outou iloa lelei e sā i le tulafono, ona faatasi atu pe talanoa se Iutaia i se tagata o se isi atunuu. Ae ui i lea, ua faailoa mai e le Atua iā te aʻu, e lē tatau ona ou taʻua se tasi e leaga pe e lē mamā. O lea ua ou sau ai ma loʻu lotomalie, ina ua aami atu aʻu.” (Galu. 10:28, 29) Ina ua mavae lenā mea, ona vaaitino ai lea o Peteru i le faamaoniga o le finagalo malie o Ieova iā Konelio ma lona ʻauaiga.

⁵ Sa tatau iā Saulo o Taso o se Faresaio na lelei ana aʻoaʻoga, ona faamaulalo ma faifaimea faatasi ma i latou sa ia manatu muamua i ai e maulalo ifo nai lo o ia. Sa tatau foʻi ona ia taliaina a latou faatonuga. (Galu. 4:13; Kala. 1:13-20; Fili. 3:4-11) Seʻi manatunatu i le fetuunaʻiga o le auala sa mafaufau ai tagata e pei o Sekio Paulo, Taionusio, Tamari, Filemoni, Onesemo ma isi, a o latou taliaina le tala lelei ma avea ma soo o Iesu Keriso.​—Galu. 13:6-12; 17:22, 33, 34; File. 8-20.

FAATUMAUINA O LO TATOU AUTASI I LE LALOLAGI AOAO

⁶ E mautinoa o le alofa o uso ma tuafāfine na fesoasoani e tosina mai ai oe iā Ieova ma lana faalapotopotoga. Na e mātauina le matilatila o le faailoga o le alofa lea e mātaulia ai soo moni o Iesu Keriso, e pei ona ia fetalai ai e faapea: “Ua ou tuuina atu iā te outou le poloaʻiga fou, ina ia outou alolofa o le tasi i le isi; e pei ona ou alofa atu iā te outou, ia outou alolofa foʻi o le tasi i le isi. O le mea lea e iloa ai e tagata uma o oʻu soo outou, pe afai ua outou alolofa o le tasi i le isi.” (Ioa. 13:34, 35) Ua atili foʻi ona e lotofaafetai iā Ieova ma lana faalapotopotoga, ina ua e malamalama o le alofa o loo faaalia i le faapotopotoga, ua na o se faaataga o le alofa o loo iai i le ʻauuso i le lalolagi aoao. Ua e tofo la i le faataunuuga o se valoaga o le Tusi Paia, e faatatau i le aoaoina mai o tagata i aso e gata ai e tapuaʻi atu iā Ieova i le filemu ma le autasi.​—Mika 4:1-5.

⁷ Pe a mafaufau i le tele o fevaevaeaʻiga i aso nei, o ai na manatu o le a mafai ona autasia tagata “mai i atunuu uma, ma ituaiga, ma nuu, ma gagana”? (Faaa. 7:9) Seʻi manatu i le eseesega o i latou ua iai le tomai i mea faaonapōnei, ma i latou o loo tausisi pea i tū ma aga mai anamua. Manatu foʻi i feeseeseaʻiga i le va o tagata ona o le eseese o tapuaʻiga, e ui lava e tutusa o latou ituaiga ma atunuu. A o faateteleina le lotonuu, o le atili foʻi lenā ona fevaevaeaʻi o tagata i faiga faapolotiki. Pe a tatou manatu foʻi i eseesega i tulaga tau tamaoaiga faapea le tele o isi feeseeseaʻiga, o se vavega la le autasia o tagata mai i atunuu, gagana, ma vaega uma i se fusi e lē mafai ona motusia o le alofa ma le filemu. O lenā vavega e na o le Atua o Lē e ona le malosi uma lava e mafai ona faataunuuina.​—Saka. 4:6.

⁸ Peitaʻi, o loo iai moni lava lenā tulaga autasi, ma ua mafai ona e tofo i ai ina ua avea oe o se Molimau a Ieova ua tuuina atu ma papatisoina. Ua iai iā te oe le tiute tauave o le fesoasoani i le faatumauina o lenā autasi, ona o aogā ua e maua mai ai. E mafai ona e faia faapea, e ala i le utagia o upu a le aposetolo o Paulo i le Kalatia 6:10: “Seʻi o tatou faia mea lelei i tagata uma manū o talafeagai le taimi e fai ai, aemaise i ē tatou te aiga i le faatuatua.” E tatou te usitaʻia foʻi le fautuaga lenei: “Ia aua lava neʻi faia se mea ma le finauvale ma le faasausili, ae ia faia ma le lotomaulalo, i le manatu ua sili isi iā te outou, ia vaavaai ma le naunau e lē gata i au lava mea, ae i mea foʻi e lelei ai isi.” (Fili. 2:3, 4) O le a faaauau ona tatou maua ni faiā filemu ma fiafia ma o tatou uso ma tuafāfine, pe a aʻoaʻoina i tatou ina ia vaai iā i latou e pei o le auala e silasila ai Ieova, ae e lē fua i o latou foliga mai i fafo.​—Efe. 4:23, 24.

MANATU MAMAFA LE TASI I LE ISI

⁹ E pei ona faataʻitaʻia mai e Paulo mo i tatou, e lē fevaevaeaʻi i latou uma i le faapotopotoga ae e fetausiaʻi i latou. (1 Kori. 12:14-26) E ui e tatou te vavamamao ma nisi o lo tatou ʻauuso i le lalolagi aoao, ae e lē faapea ai e tatou te lē o manatu mamafa iā i latou. Pe afai e sauāina nisi o o tatou uso, e tatou te matuā faanoanoa ai lava. Pe afai e lē o maua e nisi ni mea e latou te manaʻomia pe aafia foʻi i se mala, taua, po o fetauaʻiga a atunuu lava latou, e naunau le ʻauuso uma e saʻili ni auala e fesoasoani atu ai i le itu faaleagaga ma le faaletino.​—2 Kori. 1:8-11.

¹⁰ E tatau iā i tatou uma ona tatalo mo o tatou uso i aso uma. O nisi o i latou o loo feagai ma tofotofoga ina ia faia mea leaga. O nisi o loo feagai ma mafatiaga atonu o loo iloa e le toʻatele. Ae o isi o loo feagai ma teteega mai i ē latou te faigaluega faatasi, faapea teteega mai i aiga lē talitonu lea e lē o iloa atu e le toʻatele. (Mata. 10:35, 36; 1 Tesa. 2:14) E tāua tele nei tulaga iā i tatou, talu ai o i tatou o se ʻauuso i le lalolagi aoao. (1 Pete. 5:9) E iai foʻi nisi o i tatou o loo galulue mamafa i le auaunaga iā Ieova, o ē o loo taʻimua i le galuega talaʻi ma totonu o faapotopotoga. E iai foʻi i latou e iai le tiute tauave o le vaavaaia o le galuega i le lalolagi aoao. E manaʻomia ona tatou tatalo mo i latou uma nei. O le faia faapea, ua faaalia ai lo tatou alofa ma le naunau moni, e tusa lava pe e leai se isi mea e mafai ona tatou fesoasoani atu ai.​—Efe. 1:16; 1 Tesa. 1:2, 3; 5:25.

¹¹ Ona o le tulaga vevesi o le lalolagi i nei aso e gata ai, ua tatau ai i tagata o Ieova ona nofosauni e avatu le fesoasoani i isi. I nisi taimi, ona o mala e pei o mafuiʻe ma lologa e manaʻomia ai ni galuega fesoasoani tetele mo se taimi umi, ma faatulaga le avatuina o le tele o fesoasoani faaletino. Na faataatia e Kerisiano i le uluaʻi senituri se faaaʻoaʻoga lelei i lenei vala. I le manatuaina o le fautuaga a Iesu, na foaʻi atu ai ma le fiafia e soo i Anetioka ni meaalofa faaletino mo uso i Iutaia. (Galu. 11:27-30; 20:35) Sa faalaeiauina mulimuli ane e le aposetolo o Paulo Kerisiano i Korinito ina ia lagolagoina fesoasoani laveaʻi na faia i se auala sologa lelei. (2 Kori. 9:1-15) I aso nei, pe a aafia o tatou uso ona o mea tutupu ma ua manaʻomia se fesoasoani faaletino, e vave ona tali atu le faalapotopotoga ma Kerisiano taʻitoʻatasi ma avatu mea e manaʻomia.

VAVAE ESE E FAIA LE FINAGALO O IEOVA

¹² Ua faamaopoopoina lo tatou ʻauuso autasi i le lalolagi aoao e faia le finagalo o Ieova. I le taimi lenei, o lona finagalo, o le talaʻia lea o le tala lelei o le Malo i le lalolagi atoa e fai ma molimau i atunuu uma. (Mata. 24:14) A o tatou faia lenei galuega, o loo finagalo Ieova ina ia ōgatusa a tatou amioga ma ana tapulaa maualuluga tau amio. (1 Pete. 1:14-16) E tatau ona tatou lotomalilie e gauaʻi atu le tasi i le isi, ma ia galulue e faaauiluma le tala lelei. (Efe. 5:21) O le taimi lenei ua sili atu ai ona manaʻomia ona faamuamua le saʻilia o le Malo o le Atua i o tatou olaga, nai lo o le faamuamua o o tatou lava manaʻoga. (Mata. 6:33) O le manatuaina o lenei mea a o tatou galulue faatasi ona o le tala lelei, o le a tatou maua ai le faamalieina moni i le taimi lenei ma iʻu atu ai i faamanuiaga e oo i le faavavau.

¹³ I le avea ai ma Molimau a Ieova, e tutasi i tatou ma ua vavaeesea mai i le fanau a tagata o ni tagata mamā, e maelega e faia le auaunaga i lo tatou Atua. (Tito 2:14) E tutasi i tatou ona o la tatou tapuaʻiga iā Ieova. E lē gata e tatou te galulue soosootauʻau ma o tatou uso i le lalolagi aoao, ae e tatou te tautatala foʻi i le gagana e tasi o le upu moni, ma ola e ōgatusa ai ma lenā upu moni. Na valoia mai lenei mea, ina ua faailoa atu e Ieova e ala i lana perofeta o Sefanaia e faapea: ʻOu te tuuina atu i nuu le gagana mamā, ina ia latou valaau uma lava i le suafa o Ieova, ma latou auauna soosootauʻau ai iā te ia.’​—Sefa. 3:9.

¹⁴ Ona faagaeeina lea e Ieova o Sefanaia, e faamatala mai le ʻauuso i le lalolagi aoao o loo iai i aso nei: “A o ē o loo totoe o Isaraelu, e latou te lē faia le amiolētonu, pe pepelo, e lē iloa foʻi i o latou gutu le laulaufaiva taufaasee; auā e latou te aai ma taooto faaloloa, ma o le a leai se isi e faamataʻu iā i latou.” (Sefa. 3:13) Ua mafai ona tatou galulue i le autasi, ona ua tatou malamalama i le Afioga a Ieova o loo iai le upu moni, suia o tatou mafaufau, ma faaōgatusa o tatou olaga ma tapulaa a Ieova. Ua tatou faataunuuina mea e foliga mai e lē mafai ona faataunuuina, pe a fua i le vaaiga faaletagata. O le mea moni e tutasi i tatou o ni tagata o le Atua, ma o lea ua faamamaluina ai o ia.​—Mika 2:12.