Fesoasoani mo Ē o Loo Sauāina i Aiga

Ua taʻua e le Faalapotopotoga o Soifua Mālōlōina i le Lalolagi: “O le sauāina o fafine ua pei o se faamaʻi pipisi i le lalolagi aoao, ma ua manaʻomia ona vave gaoioi e taofia.” Na taʻua ai foʻi, i se fua faatatau e toetoe 30 pasene “o fafine uma o loo nonofo faapōuliuli po ua faaipoipo, ua aafia i faiga sauā po ua faileagaina.” Ua taʻua foʻi i se lipoti a Malo Aufaatasi, i se fua faatatau i se tausaga lata mai, e 137 fafine ua maliliu i aso taʻitasi i le lalolagi atoa, ona o a latou paaga po o se isi sui o le aiga.a

E ono mafai e nei faamaumauga ona faailoa mai le telē o le faafitauli o sauāga i totonu o aiga, ae e lē mafai ona faailoa mai aafiaga i le itu i le tino ma tau faalogona ua mafatia ai ē o loo sauāina.

Po o e aafia i sauāga i totonu o aiga? Po o e iloa se tasi o loo sauāina? Afai o lea, ia iloilo manatu o le Tusi Paia e mafai ona fesoasoani iā te oe.

E lē tuuaʻia oe i sauāga i totonu o aiga

E maua le fesoasoani

E lē tuua na o oe

O le a faamutaina sauāga i totonu o aiga

Le auala e fesoasoani ai i ē o loo sauāina

E lē tuuaʻia oe i sauāga i totonu o aiga

Le manatu o le Tusi Paia: “O le mea lea, e taʻitasi ai i tatou uma ma tala atu lana amio i le Atua.”—Roma 14:12.

Ia manatua: E tali atu le tagata mo ana lava gaoioiga.

Pe afai e sauāina oe e lau paaga ma ia tuuaʻia ai oe, e sesē lona manatu. E tatau ona faaalia le alofa i avā ae lē o le sauāina.—Kolose 3:19.

O isi taimi, o se tasi e sauāina lana paaga atonu o loo aafia i se maʻi o le mafaufau, le auala na ola aʻe ai po o le faaaogā sesē foʻi o le ʻava malosi. E ui i lea, e tatau ona tali atu o ia i le Atua i le auala e feutagaʻi ai ma oe, ma o ia foʻi e tatau ona gaoioi e faia ni suiga.

E maua le fesoasoani

Le manatu o le Tusi Paia: “O le toʻatele o le ʻaufaufautua e faataunuu ai mea.”—Faataoto 15:22.

Ia manatua: Pe a e lagona le lē saogalemu pe lē iloa foʻi le mea e fai, e mafai ona fesoasoani atu isi.

Aiseā e te manaʻomia ai le fesoasoani a isi? Pe afai o loo sauāina oe, e tele mea e te ono mafaufau i ai. Atonu e faigatā ona e filifili le mea sili e tatau ona fai, ona e te lē iloa po o lē fea o mea nei e sili ona tāua:

• O lou saogalemu

• O le mea sili mo lau fanau

• O lou tulaga tau tamaoaiga

• O lou alofa i lau paaga

• O lou faanaunauga e faaleleia le lua faiā ma lau paaga pe afai e suia ona uiga

O se mea masani le lē mautonu i tulaga faapena. O ai e te maua ai le fesoasoani?

E ono mafai ona saunia e se uō po o se tauaiga maufaatuatuaina le fesoasoani aogā. E telē le fesoasoani e maua i le talanoa atu i se tasi e manatu mamafa iā te oe.

E mafai ona e vave maua se fesoasoani pe a telefoni atu i faalapotopotoga e saunia le fesoasoani mo ē o loo sauāina. E mafai e nei vaega ona fesoasoani mai i ni auala e puipuia ai oe lava. E mafai foʻi ona fesoasoani nei vaega i lau paaga e uia le laasaga muamua, pe afai ua manaʻo moni lava e faia ni suiga.

Pe afai ua lamatia lou ola, e mafai foʻi ona fesoasoani vaega mo faalavelave faafuaseʻi. O nei vaega e aofia ai fomaʻi, tausi maʻi po o ē e iai tomai faapitoa.

E lē tuua na o oe

Le manatu o le Tusi Paia: “E latalata mai Ieovab i ē e lotomomomo; e faaola e ia o ē ua lotonutimomoia.”—Salamo 34:18.

Ia manatua: Ua folafola mai e le Atua e na te fesoasoani mai iā te oe.

E manatu mamafa Ieova iā te oe. (1 Peteru 5:7) E na te silafia ou faalogona ma manatunatuga loloto. E na te faamāfanafana iā te oe e ala i Lana Afioga le Tusi Paia, ma e finagalo foʻi ina ia e tatalo atu iā te ia. Pe a e tatalo, ia talosaga mo le atamai ma le malosi manaʻomia e feagai ai ma lou tulaga.—Isaia 41:10.

O le a faamutaina sauāga i totonu o aiga

Le manatu o le Tusi Paia: “E taʻitoʻatasi i latou ma nofo i lalo o lona vine ma lalo o lona mati, e leai foʻi se tasi e faamataʻu iā i latou.”—Mika 4:4.

Ia manatua: Ua folafola mai i le Tusi Paia se taimi i le lumanaʻi o le a avea ai le aiga o se nofoaga filemu mo tagata uma.

E na o Ieova le Atua o loo iai le vaifofō moni ma tumau i o tatou faafitauli uma. Ua folafola mai i le Tusi Paia: “E na te soloiesea foʻi loimata uma i o latou mata, e lē toe iai se oti, po o se faanoanoa, po o se tagiauē, e lē toe iai foʻi se tigā.” (Faaaliga 21:4) I lenā taimi, o le a lē toe manatua mea leaga na tutupu, auā o le a faatumulia o tatou mafaufau i mea lelei. (Isaia 65:17) O le lumanaʻi filemu lenā ua folafola mai e le Tusi Paia.