3 Toe Tusia le Suafa o le Atua i Tusitusiga Paia Eleni “Ieova.”

E 237 mau o loo mulimuli mai o loo taʻua ai le suafa o “Ieova,” e pei ona toe tuu i ai i Tusitusiga Eleni o le lomiga O le Tusi Paia—O le Faaliliuga a le Lalolagi Fou.

Mataio 1:20, 22, 24; 2:13, 15, 19; 3:3; 4:4, 7, 10; 5:33; 21:9, 42; 22:37, 44; 23:39; 27:10; 28:2; Mareko 1:3; 5:19; 11:9; 12:11, 29, 29, 30, 36; 13:20; Luka 1:6, 9, 11, 15, 16, 17, 25, 28, 32, 38, 45, 46, 58, 66, 68, 76; 2:9, 9, 15, 22, 23, 23, 24, 26, 39; 3:4; 4:8, 12, 18, 19; 5:17; 10:27; 13:35; 19:38; 20:37, 42; Ioane 1:23; 6:45; 12:13, 38, 38; Galuega 1:24; 2:20, 21, 25, 34, 39, 47; 3:19, 22; 4:26, 29; 5:9, 19; 7:31, 33, 49, 60; 8:22, 24, 25, 26, 39; 9:31; 10:33; 11:21; 12:7, 11, 17, 23, 24; 13:2, 10, 11, 12, 44, 47, 48, 49; 14:3, 23; 15:17, 17, 35, 36, 40; 16:14, 15, 32; 18:21, 25; 19:20; 21:14; Roma 4:3, 8; 9:28, 29; 10:13, 16; 11:3, 34; 12:11, 19; 14:4, 6, 6, 6, 8, 8, 8, 11; 15:11; 1 Korinito 1:31; 2:16; 3:20; 4:4, 19; 7:17; 10:9, 21, 21, 22, 26; 11:32; 14:21; 16:7, 10; 2 Korinito 3:16, 17, 17, 18, 18; 6:17, 18; 8:21; 10:17, 18; Kalatia 3:6; Efeso 2:21; 5:17, 19; 6:4, 7, 8; Kolose 1:10; 3:13, 16, 22, 23, 24; 1 Tesalonia 1:8; 4:6, 15; 5:2; 2 Tesalonia 2:2, 13; 3:1; 2 Timoteo 1:18; 2:19, 19; 4:14; Eperu 2:13; 7:21; 8:2, 8, 9, 10, 11; 10:16, 30; 12:5, 6; 13:6; Iakopo 1:7, 12; 2:23, 23; 3:9; 4:10, 15; 5:4, 10, 11, 11, 14, 15; 1 Peteru 1:25; 3:12, 12; 2 Peteru 2:9, 11; 3:8, 9, 10, 12; Iuta 5, 9, 14; Faaaliga 1:8; 4:8, 11; 11:17; 15:3, 4; 16:7; 18:8; 19:6; 21:22; 22:5, 6.

O le faapuupuu o le suafa o le Atua o “Ioa,” e maua mai i le faaupuga Eleni hal·le·lou·i·aʹ, lea na maua mai i le faaupuga Eperu ha·lelu-Yahʹ, o lona uiga “Ia outou vivii atu iā Ioa!”—Faaaliga 19:1, 3, 4, 6.

Ina ia ʻalofia le faafitauli o le pule lava o le tagata faaliliu i ana lava faamatalaga, na matou matuā faaeteete lava i le tusiaina o le suafa o le Atua i Tusitusiga Eleni, ma na fai ma a matou masani le iloilo lelei o Tusitusiga Eperu. Na matou taumafai foʻi ina ia faaōgatusa ma Tusi Paia Eperu na matou faaaogāina. O loo lagolagoina e se tasi po o nisi o na Tusi Paia Eperu mau e 237, ia na matou toe tuuina i ai le suafa o Ieova i la matou faaliliuga.

Ina ua sii mai e uluaʻi Kerisiano mau mai le Septuagint, e lē taumatea latou te leʻi aveesea le suafa o le Atua mai na mau. Na lagolagoina malosi lenā manatu e le polofesa o George Howard, e pei ona faamatalaina i le lomiga Biblical Archaeology Review, na lomia iā Mati, 1978. O se faaaʻoaʻoga, na ia taʻua “se fuaiupu lauiloa i tusitusiga a le ʻau Rapi (Talmud Shabbat 13.5)” lea na “faamatala ai le faafitauli o le faatamaʻia o tusitusiga ua tetee i le lotu (e lē taumatea na aofia ai foʻi ma tusi a Kerisiano Iutaia).” O le ā lenā faafitauli? “Na iai le suafa o le Atua i tusitusiga na tetee i le lotu, ma afai e faatamaʻia uma na tusi, e mou atu ai foʻi ma le suafa o le Atua.”

Na toe faapea mai le polofesa o Howard: “Atonu na suia talitonuga o tagata ina ua aveese le suafa o le Atua lea na tusia i mataʻitusi Eperu e fā, e ese mai i mea na talitonu ai tagata i le uluaʻi senituri i le taimi o le Feagaiga Fou. Na masani ona matilatila le Atua o tagata Iutaia i lona suafa i le gagana Eperu. Peitaʻi na tauau ina mou atu lenā tulaga, ina ua lē toe faaaogā na mataʻitusi Eperu e fā.”