7 “Tatara”

O le upu “Tatara,” e na o le mau i le 2Pe 2:4 e maua ai. O lea upu o se vaega o le veape Eleni tar·ta·roʹo, o le mea lea, ua faaliliuina ai e faapea, “na lafo i latou i Tatara.”

I le solo mai anamuā a Homer e taʻua o le Iliad, o loo faamatala ai tarʹta·ros o se falepuipui e mamao i lalō o le eleele, e pei ona mamao o Heitisi (po o Seoli) mai i le lagi. E lē o ni tagata e faafalepuipui ai, ae o ni atua e lē tāua, o agaga e iai Cronus ma atua tinoeese o ē na fouvale iā Seu po Iupita le atua o talatuu a Eleni. Na faia e atua o talatuu lea falepuipui e ave i ai agaga na latou tuliesea mai i le lagi, ma e manatu e faapea, o lea falepuipui o loo i lalo ifo o Seoli i le mea loo iai tagata ua maliliu. I talatuu, o tarʹta·ros o le nofoaga e sili ona maulalō ma pogisa. E aofia ai mea uma i lalo ifo o le eleele. O lea, e tusa ai ma talatuu a Eleni faapaupau, sa iai le manatu e faapea, o tarʹta·ros o se nofoaga e lē mo tagata, ae mo atua tinoeese, o se nofoaga o le pogisa ma le malaia.

Ua faapea mai le Iopu 40:20 i le Septuagint e faatatau i le Pemota: “Ina ua alu aʻe o ia i se mauga maualuga, na olioli ai manu vaefā o le moana [ἐν τῷ ταρτάρῳ (“i tatara”)].” Ua faapea mai le Iopu 41:​31, 32 (41:​23, 24, Septuagint) e faatatau i le Leviatana: “Ua ia faapupuna le moana e pei o se ulo apamemea; ma e manatu o ia i le sami ua pei o se ulo suāuu, ua ia faia le vaega e sili ona loloto o le moana [τὸν δὲ τάρταρον τῆς ἀβύσσου (“le tataro o le tō”)] mo ia: e manatu o ia o le moana e ā ia.” Ua manino mai i le auala o loo faaaogā ai tarʹta·ros i nei fuaiupu i le Septuagint, o loo faatatau i se nofoaga maualalō, le “vaega e sili ona maualalo” o le tō.

I Tusitusiga e mai le agaga o le Atua, e lē o taʻua e faapea na lafo se tagata i tarʹta·ros, ae e na o foafoaga agaga po o “agelu na agasala” na lafo i ai. O lea la, o le lafoina o i latou i tarʹta·ros ua taʻu mai ai lo latou tulaga sili ona faamalaiaina a o ola. O lo latou faasalaga lea ona o le fouvale i le Atua Silisili ese. Ua tuufaatasi e le aposetolo o Peteru lo latou tulaga malaia ma le pogisa i le faapea mai “na tuuina i latou [e le Atua] i le lua e matuā pogisa e faatalitali ai i le faamasinoga.”​—2 Peteru 2:4.

I talatuu a tagata faapaupau e faatatau iā Cronus ma atua tinoeese na fouvale, e lē o saʻo le manatu o loo aumaia ai e faatatau i le faamalaiaina o foafoaga agaga na fouvale. Ae ua ese le auala o loo faaaogā ai e Peteru le veape tar·ta·roʹo, “lafo i Tatara,” ona e lē o uiga e faapea na lafo “agelu na agasala” i le Tatara e tusa ai ma talatuu, ae na tuliese i latou e le Atua o Lē e ona le malosi uma lava mai le lagi, ma aveese uma o latou faaeaga na iai ma ua matuā pogisa lava i latou e faatatau i fuafuaga matagofie a le Atua. Ua faaalia mai i Tusitusiga paia, ua na o se lumanaʻi e aunoa ma se faamoemoe e latou te maua, ma o le a faaumatia e faavavau i latou faatasi ma lē o pulea i latou, o Satani le Tiapolo. O lea la, ua faaata mai e Tatara le tulaga e sili ona malaia o na agelu fouvale.

E tusa ai ma Tusitusiga faagaeeina, e leai se sootaga o Tatara ma Seoli, ona o Seoli e tusa ai ma le gagana faafaatusa, o le nofoaga lea o loo momoe ai e toetoe o tagata uma lava ua maliliu. E lē o faapuapuagatiaina e faavavau ia agelu na agasala ma i latou ua maliliu i tarʹta·ros. O le a lē toe iai se Tatara, pe a faaumatia e le Faamasino Sili ia agelu na fouvale o loo iai i lea tulaga malaia.