13 Uiga o Upu
A E I O U F L M N P S T V K MAA TĀUA MANU
A
Auauna o le faiva.
O le upu Eleni e maʻoti lona uiga, e fesootaʻi atu i mataupu ma faatulagaga a le faapotopotoga. O tane nei na aofia ai i tane na gafa ma le faatinoina o tiute tauave i le faapotopotoga.
Auaunaga paia.
O se faiva po o se galuega e paia, e fesootaʻi tuusaʻo i le tapuaʻiga i le Atua.
ʻAufaitaulaga Sili.
O ositaulaga tāua e aofia ai le ositaulaga sili o loo iai i lenā taimi, atoa foʻi ma ositaulaga sili ua mavae, o o latou aiga, ma atonu foʻi o ulu o vaega e 24 o ositaulaga. Tagaʻi foʻi i le “Ositaulaga sili.”
ʻAutusiupu.
O i latou na faia kopi o Tusitusiga Paia Eperu. E oo ane i le vaitaimi na afio mai ai Iesu i le lalolagi, na faasino atu le upu “ʻautusiupu” i se vasega tofia o tane e popoto i le Tulafono.
Agaga paia.
O se malosiaga e auina mai e le Atua, pe e na te faaaogāina e faataunuu ai so o se mea e na te faafinagaloina. Na faaaogā e le Atua le agaga paia e fai ai le lagi, le lalolagi ma mea ola uma lava.
Agalelei faifua.
E mafai ona faasino atu i se foaʻi agalelei po le auala alofa na fai ai lenā foaʻi. E mafai foʻi ona faasino atu i le lototalisapaia po o le lotofaafetai ona o le gaoioiga agalelei lea na fai, po o le faaali atu foʻi o le agalelei i se tasi e lē tatau i ai lenā agalelei.
Agelu sili.
O lona uiga o le “taʻitaʻi o agelu.” E faaalia ai e toʻatasi lava le Agelu Sili.
Alapasa.
O se maa paʻepaʻe, o nisi taimi e iai tositosi felanulanuaʻi. E mālō e tai pei o se maamora. E faapū totonu ina ia utu ai vai.
Amaketo.
O lona uiga o le “Mauga o Mekito.” O le taua o Amaketo, o le taua lea o le a tauina i le lumanaʻi i le lalolagi aoao, lea e faaumatia ai fili uma o le Atua e le Tupu tofia o Iesu Keriso.
Amioga matagā.
E lē o faasino atu i ni masei laiti po o ni mea sesē laiti. Ae e faasino atu i gaoioiga matuiā e soli ai tulafono a le Atua, lea e atagia mai ai se uiga faamaualuga ma le lē āva—o se agaga e faaalia ai le lē faaaloalo po le ʻinoʻino i le pule, o tulafono ma tapulaa.
Anetikeriso.
O lona uiga, o lē e tetee i le Keriso. E faasino atu i tagata uma lava e tetee pe e pepelo mai e faapea o i latou o le Keriso po o ona sui, po o ē foʻi e teena le upu a le Tusi Paia e faatatau i le Keriso.
Aposetolo.
O lona uiga, “o lē na auina mai.” E masani ona faasino i soo o Iesu na filifilia e Iesu e fai ma ona sui tofia e toʻa 12.
Aso Faamasino.
O se “aso” po o se vaitaimi patino e faamasinoina ai e le Atua ni tagata, ni nuu, po o le fanau a tagata. E mafai ona avea ma vaitaimi e faaumatia ai ē ua faamasinoina ua tatau i ai le oti, pe e maua ai le avanoa e laveaʻi ai isi ua faamasinoina, ma iʻu ina ola e faavavau.
Atalii o le tagata.
E toetoe a 80 taimi o loo taʻua ai lenei faaupuga i tusi o le Evagelia, ma e faasino faapitoa lava iā Iesu Keriso. O lenei faaupuga e faaalia ai sa avea le Alo o le Atua ma tagata. E faaalia ai foʻi, o le a faataunuu e Iesu le valoaga o loo i le Tanielu 7:13, 14.
Atolaau o le feagaiga.
O le pusa paia na tuu i le Mea e Sili Ona Paia o le faleʻie paia, ma mulimuli ane i le malumalu na fausia e Solomona. Na fausia e tusa ai ma faatonuga a Ieova ma o Ia foʻi na saunia le ata o le atolaau. Na masani ona tuu papamaa e lua o Tulafono e Sefulu i totonu o lenei atolaau.
Atualalaina.
O le saunia lea o le tino oti e ala i le faaaogāina o uu manogi ina ia lē pala ai le tino. Na faatino e tagata Aikupito lenei gaoioiga mai i aso anamua. Na faia foʻi e tagata Asuria, Peresia, ma Sekutia.
Areto.
O le upu Eleni, o le “falaoa.” O se falaoa e mafolafola, e faia e aunoa ma se mea faafefete.
E
Eunuka.
O se tane ua aveese ona fuā manava. Na tofia nei tane e auauna i maota o tupu e tautua pe vaavaaia le masiofo, o le ʻautaunonofo a le tupu, ma fafine. E mafai foʻi ona faasino atu i tofiga aloaʻia i le maota o le tupu, e faaalia ai e lē faapea ua aveesea o latou fuā manava.
Efota (a le ositaulaga sili).
O se ofu e foliga e pei o se talieleele e iai ona teuteu, e sosoo faatasi le pito i luma ma tua. Na iai se fusi e faia mai le ʻie lava lenā e tasi e fusi ai le efota, e faamau ai i le sulugātiti po o le manava.
I
Ieova o ʻau.
O le faaupuga lenei o “Ieova o ʻau,” e faaatagia ai le mana, o le mana o le Pule Silisili Ese o le lagi ma le lalolagi, o lē e na te faatonutonuina le anoanoaʻi o foafoaga agaga.
ʻIe talatala.
E masani ona lalaga mai i fulufulu ʻoti e malosi lona lanu. E laʻeiina nei ofu pe a faavauvau se tasi.
Iʻuga o faamasinoga.
Na tuuina atu e Ieova le Atua, o le Faamasino, o le Faitulafono, ma le Tupu, le tele o tulafono i le nuu o Isaraelu. O ana faaiʻuga i mataupu faaletulafono na fai ma taʻiala mo le faia o filifiliga i mataupu a tagata taʻitoʻatasi po o le nuu atoa.
Iupelī.
O le tausaga lea e mulimuli mai i se faataamilosaga e taʻifitu tausaga le umi, lea e amata ona faitauina mai ina ua ulu atu Isaraelu i le Nuu Folafolaina. O le Iupelī, e tusa o se tausaga atoa o le fiafia ma le faafetai, o le tausaga o le saʻolotoga.
Ifo i tupua.
O le tupua e faasino atu i se faatusa po o se mea e matuā tuutoina i ai ola o tagata. O le ifo i tupua o le faasilisilia lea o se mea po o se tasi, ua tapuaʻi ma matuā faapelepele i ai, ua avea na mea ma atua.
O
Ositaulaga.
O ē na fai ma sui aloaʻia o le Atua i le nuu na latou auauna ai, e aʻoaʻoina le nuu e faatatau i le Atua ma ana tulafono. Na fai i latou ma sui o le nuu i luma o le Atua, e ofoina atu taulaga ma fautua pe ʻaiʻoi atu mo le nuu.
Ositaulaga sili.
O le tagata autū lea e fai ma sui o le nuu i luma o le Atua. O ia foʻi ua tuu i ai le pule e na te vaavaaia isi ositaulaga. Tagaʻi foʻi i le “ʻAufaitaulaga sili.”
Ovasia.
O lē e uaʻi atu i ni mataupu patino po o ni tagata patino, e asiasi atu ma tofiaina isi. A o lana matafaioi autū, e na te vaavaaia ma leoleoina sui o le faapotopotoga, e fesoasoani iā i latou ina ia tumau i totonu o le lafu mamoe a le Atua.
U
Ufiufi o le Atolaau.
O le ufiufi o le atolaau o le feagaiga, lea na sausau ai i ona luma e le ositaulaga sili le toto o taulaga o agasala i le Aso o le Togisala.
Urima ma le Tumema.
O mea na faaaogā e faamautinoa ai po o le ā le finagalo o le Atua e faatatau i ni fesili tāua a le nuu e manaʻomia ai se tali mai iā Ieova.
F
Faauuina.
E uu i se uu. I taimi o le Tusi Paia, e faauuina e tagata Eperu o latou pule ma ositaulaga ua tofia, e fai ma faailoga ua talia aloaʻia i latou i o latou tofiga. E liligi ifo le uu i luga o le ulu o le tagata.
Faamasinoga Sili.
E taʻua foʻi o le Saniterini. E toʻa 71 ona sui, e aofia ai le ositaulaga sili ma isi o ē na avea ma ositaulaga sili. Na latou faatautaia le pulega a le atunuu, atoa foʻi ma mataupu faalelotu.
Faievagelia.
O se tagata e talaʻia le tala lelei; o le avefeʻau o se mea lelei.
Faiga o Mea.
O le upu Eleni ai·onʹ lea ua faaliliuina “faiga o mea” e faasino atu i le faagasologa masani o mea, o mea o loo tutupu i lenā taimi, po o vala e faaesea ai se vaitaimi maʻoti po o se tupulaga maʻoti, nai lo le faasino atu i le taimi.
Faiga Faaagaga.
O le upu Eleni mo le “faiga faaagaga” o le phar·ma·kiʹa. E tusa ai ma se lomifefiloi o le Tusi Paia, o loo faasino atu i le faaaogāina o vai, o vailaau, o le faalauatau, po o faiga faataulāitu. Pe a faaaogā ni vai masani po o ni vai oona i faiga faataulāitu, e ʻaiʻoi atu pe talosaga atu mo le mana faataulāitu, ma e tatau ona faaaogā faatasi ma asoa, o filifili ma isi mea faapea, auā e manatu o mea na e puipuia ai le tagata talosaga po o le tagata maʻi mai le mana o temoni, a o le mea moni lava ia, o loo faia e taulāitu na mea ina ia faaofo ai tagata i lenei mana uigaese ma le mana faataulāitu.
Falaoa ua laulauina.
O falaoa e 12 na tuuina i luga o le laulau i le Mea Paia o le Faleʻie Paia po o le malumalu, ma e sui atu i falaoa fou i Sapati taʻitasi.
Faleʻie Paia.
O se faleʻie feaveaʻi na fai ai le tapuaʻiga a le nuu o Isaraelu; na taʻua foʻi i nisi taimi o le “faleʻie o le feiloaʻiga.”
Fata faitaulaga.
O se tulaga po o se nofoaga maualuga e fai ai taulaga, pe faamū ai foʻi mea manogi i le tapuaʻiga i le Atua moni po o se isi atua.
Farao.
O le suafa e ave i tupu Aikupito.
Faresaio.
O se vaega faalelotu lauiloa a le lotu Iutaia i le uluaʻi senituri T.A. O i latou foʻi o sui o le Faamasinoga Sili.
Fetu Ao.
O le fetu mulimuli lea e oso aʻe i le itu i sasaʻe a o leʻi oso le lā, ma faailoa mai le tafa o ata o se aso fou.
L
Laau faamau.
O se meafaigaluega anamua e taofiofi ma faasalaina ai se tasi, o se laau e loka ai vae o se pagota a o nofo i lalo. (Ieremia 20:2, 3) E masani lava ona faatino lenei gaoioiga a o vaavaai ane tagata lautele ma tauemu i lē o loo lokaina.
M
Manai.
O le meaʻai autū lenei a tagata Isaraelu a o savalia le toafa mo le 40 tausaga. Na saunia faavavega e Ieova.
Mea e Sili Ona Paia.
O le potu pito i totonu o le Faleʻie Paia ma le malumalu; e taʻua foʻi o le Mea e Silisili Ona Paia.
Mea lilo paia.
O mea nei e mai le Atua, e lē faailoa mai seʻia oo i ona aso atofaina, ma e faailoa atu e le Atua i ē ua ia filifili e faailoa atu i ai.
Mea maualuluga.
E mafai ona faasino atu i mea maupuʻepuʻe, o aʻega ma mauga, ae e masani lava ona faasino atu i fale po o nofoaga na fai ai ifoga i tupua. O “nofoaga maualuluga” e masani ona faasino atu i tapuaʻiga, aemaise o nofoaga na fai ma taulaʻiga o tapuaʻiga sesē.
Mesia.
O lona uiga e “faauuina” po o “lē ua faauuina.” E tutusa ma le upu Eleni o le “Keriso.”
Muro.
O se pulu e manogi manaia, e maua mai i tamaʻi laau tuitui eseese po o tamaʻi laau. E malosi le manogi o ona lālā ma lona paʻu.
N
Naseri.
O lona uiga o “Lē ua Vavaeesea,” o “Lē ua Tuuina Atu.” E lua vasega o le ʻau Naseri: o ē na tauofo e avea ma Naseri ma ē na tofia e le Atua e avea ma Naseri.
Nisani.
O le igoa o le uluaʻi masina Iutaia o le kalena paia ina ua foʻi mai le ave faapagota i Papelonia, o se vaimea o Mati ma Aperila. Na taʻua muamua lenei masina o “Apipa.”
P
Paia.
O le vaega muamua, e sili atu lona telē, o le Mea Paia o le Faleʻie Paia ma le malumalu mulimuli ane, e ese mai i le vaega pito i totonu o le Mea e Sili Ona Paia.
Palake.
O se fafine ua faaipoipo i ai se tane e ese mai i lana avā muamua, ae e maualalo ifo le tulaga o le palake i le avā muamua.
Papatisoga.
E faasino atu i le faatofu po o le lolō uma o le tino i lalo o le vai. O loo taʻua foʻi i le Tusi Paia le papatisoga a Ioane, o le papatisoga i le agaga paia, o le papatisoga i le afi, ma isi foʻi papatisoga.
Pasama.
O se laau e maua mai ai se sua manogi e pei o se uu ma pulu. O se mea e tautele i tagata mai i Atunuu i Sasaʻe.
Paseka.
Na faavaeina le Paseka (Eperu, peʹsach; Eleni, paʹskha) i le afiafi a o leʻi tuua e Isaraelu Aikupito. O le paseka e faamanatu ai le faasaoina o tagata Isaraelu mai i Aikupito, ma le faasaoina o o latou ulumatua inu ua faaumatia e Ieova ulumatua o Aikupito.
Pemota (puaa sami).
O se manu vaefā telē e matuā māfiafia lona paʻu, ae e tau leai ni ona fulufulu, e nofo i vaitafe, vaituloto, ma taufusi.
Penetekoso.
O se igoa o loo taʻua i Tusitusiga Paia Eleni e faasino atu i le Tausamiga o Seleselega (Esoto 23:16) po o le Tausamiga o Vaiaso (Esoto 34:22), o loo taʻua foʻi o “ le aso o uluaʻi fua matua.” (Numera 28:26) E tatau ona faamanatuina i le aso lona 50 (O le uiga o le Penetekoso o le “Aso Lona Lima Sefulu”) e amata mai iā Nisani 16. E paʻū iā Sevana 6 i le kalena Iutaia.
Pologa.
Na toʻatele pologa i vaitaimi o le Tusi Paia. Na sauāina e nisi matai a latou pologa, a o isi matai na agalelei i a latou pologa. O loo taʻua Kerisiano o ni pologa auā na faatauina mai i latou i le tau o le toto tāua o Iesu; o lea la ua tauofo mai i latou e fai ma pologa a Ieova le Atua ma Iesu Keriso o latou Matai. O ē ua papatisoina o ni Kerisiano e fai i latou ma meatotino a le Atua, o ana pologa, ma e pule Ieova pe e faapefea ona faaaogā ana pologa.
Puluvaga.
O le “puluvaga,” o se tasi e tū i le va, e faalelei ni itu se lua.
S
Salamo.
O se pese o viiga i le Atua.
Salamō.
O le veape “salamō” o lona uiga “ua suia le mafaufau o se tasi e tusa ai ma se gaoioiga ua mavae (po o se gaoioiga o fuafua e fai) po o ni amioga ona o le faanoanoa po o le lē fiafia,” po o le “faanoanoa, ootia, atuatuvale ona o se gaoioiga ua fai po o se mea e leʻi faia.”
Sapati.
O le aso ua faataatia ese e le Atua e mālōlō ai mai i feʻau masani; na tuuina mai e Ieova le Sapati e fai ma faailoga i le va o ia ma le fanauga a Isaraelu. O loo taʻua foʻi i le Tulafono a Mose tausaga o Sapati.
Satani.
O lona uiga o “Lē e Tetee.” E faasino atu i le Fili sili o le Atua.
Satukaio.
O se vaega faalelotu lauiloa a le lotu Iutaia e fesootaʻi atu i le faiva faaositaulaga. O i latou foʻi o sui o le Faamasinoga Sili.
Selā.
O se upu Eperu e faaaogā i musika po o se tauloto. E lē o mautinoa po o le ā lona uiga.
Serafi.
O foafoaga agaga o loo tutū e latalata ane i le nofoālii o Ieova i le lagi.
Sui Sili.
O lē e taʻimua i so o se mea lava, ma e na te faataatia le faaaʻoaʻoga e mulimuli ai isi.
Sunako.
O lona uiga o le “faapotopotoga,” peitaʻi i le tele o mau, o loo faasino atu i se nofoaga e feiloaʻi faatasi ai tagata Iutaia e tatalo ma faitauina tusitusiga paia.
T
Taulaga i meainu.
Na ofoina faatasi ma le tele o isi taulaga. Na aofia ai le uaina (o le ʻava malosi) lea na liligi i luga o le fata faitaulaga.
Taulaga faifaatasi.
O le isi ona taʻu o taulaga o le leleiga. O taulaga faifaatasi e taliaina e Ieova, e faaalia ai o loo iai le leleiga ma Ieova. Na ofoina atu iā Ieova le toto ma le gaʻo o manu, ae e taumafaina le aano o manu e ositaulaga ma lē o loo ofoina atu le taulaga.
Taulaga lūlū.
E foliga mai na tuu e le ositaulaga ona lima i lalo ifo o lima o le tagata tapuaʻi, o lē o loo uuina le taulaga o le a ofoina atu, ma e na te lūlū mai le tasi itu i le isi itu; pe e lūlūina e le ositaulaga le mea o loo fai ai le taulaga. Atonu na lūlū e le ositaulaga mea o loo fai ai le taulaga i le itu o loo iai le fata faitaulaga.
Tala lelei.
E faasino atu i le tala lelei o le Malo o le Atua ma le faaolataga ona o le faatuatua iā Iesu Keriso.
Temoni.
O foafoaga agaga leaga e lē vaaia, e malolosi atu i lo o tagata. O agelu nei na lē usiusitaʻi le Atua i aso o Noa, ma ua latou aufaatasi ma Satani e fouvale iā Ieova.
Tenari.
O se tupe siliva Roma. Na iai le ata o le ulu o Kaisara. A o faatino le faiva a Iesu i le lalolagi, na masani ona maua e le ʻaufaifaatoʻaga le totogi e tasi le tenari mo le aso e tasi, lea e galulue mo le 12 itulau.
Tiapolo.
O lona uiga “o lē e taufaaleaga.” Na faaigoa Satani i lenā igoa ona o ia o le taufaaleaga sili ma le pepelo sili na tuuaʻia Ieova, o lana afioga lelei, ma lona suafa paia.
Toafa.
O le upu “toafa” i le Tusi Paia, e lē na o vaipanoa e tumu i oneone, ae e faasino atu foʻi i fanua tuufua e leʻi ʻaināina, e valevalenoa, e lafulafuā ma i nisi taimi e maua ai fanua e fafaga ai lafumanu.
Toeaina.
E lē gata e faasino atu i tane matutua, ae e faasino faapitoa foʻi i ē e iai le pule ma e iai tiute tauave i totonu o se faapotopotoga po o se nuu.
Togālauapi.
O lenei upu, e faasino atu i ni nofoaga lē tumau na api ai se nuu e maumausolo, o se faatulagaga lē tumau na faatutū ai faleʻie o tagata Isaraelu a o savalia le toafa, po o se nofoaga malupuipuia a se ʻautau.
Togiola.
O le tau e toe faatau mai ai pe e faasaʻoloto mai i se tiute tauave po o se tulaga lē lelei. E aofia ai le faafesuiaʻi o ni mea, ia fetaui lelei, pe e tutusapau foʻi.
Togisala.
O lona uiga autū ia “ufiufi” pe “fesuiaʻi,” ma e tatau ona tutusa lelei ma le mea lea e manaʻomia ona “ufiufi” pe “fesuiaʻi.”
V
Valoaga.
O le faia o valoaga o lona uiga o le taʻu atu lea o feʻau mai le Atua, ma faailoa atu le finagalo o le Atua. Atonu e aofia ai le valoiaina o mea e tutupu i le lumanaʻi, pe e leai foʻi. (Mataio 26:67, 68) O valoaga e ono aofia ai se aʻoaʻoga tau amio mai le Atua, o se faatonuga po o se faamasinoga mai le Atua, po o le faalauiloaina o se mea o le a tupu.
Vete.
O le vete e faasino atu i meafaitino e maua e ē ua manumalo mai i o latou fili ua faatoʻilaloina i se taua, po o meafaitino foʻi ua ave e ē faomea.
Vili.
O le faia o le vili o se tū ma aga faaanamua mo le filifilia o le tali o se fesili po o se mataupu. O le auala na faatino ai, na tuu ni maa po o ni fasilaau i le gauga o se ofu, pe tuu foʻi i totonu o se fagu, ona lūlū lea. O le mea e paʻū mai i fafo pe e seʻi aʻe i luga, o le mea lenā e filifilia.
K
Kerisiano.
O ē e mulimuli iā Keriso Iesu, e latou te lagolagoina le faa-Kerisiano.
Keriso.
O Lē ua Faauuina. O se suafa aloaʻia, ae e lē faapea ua na o se suafa e faaesea ai le Alii o Iesu mai i isi ua iai lea suafa.
Kerupi.
O se agelu e maualuga lona tulaga, ma e gafa ma tiute tauave faapitoa.
MAA TĀUA:
Aselama.
O se maa violē.
Iasepi.
E eseese ona lanu, e matuā manino (Faaaliga 21:11). Ua manatu nisi e faasino atu le upu Eleni i se taimane.
Uakini.
E lanu moana malosi.
Safaira.
E lanu moana.
Salikea.
E manino, e lanu mūmū enaena.
Samaraki.
E pei o se maa tioata lanu meamata.
Saritonu.
E iai laina lanu papaʻe, o se tioata lanu mūmū, samasama pe enaena.
Soama.
E masani lava ona samasama meamata, ae e iai taimi e ese ai lona lanu.
Tasesa.
E pei o se maa tioata, e samasama pe meamata.
Topasi.
E leai se lanu pe e tele foʻi ona lanu. O le lanu e pito i taatele o le lanu samasama.
Kakito.
E pei o se maa tioata, e tele ona lanu.
Kuasopera.
E pei o se maa tioata, e lanu meamata.
MANU:
Aia.
O se manulele e pei o le aeto. O le upu Peretania o le kite.
ʻAila, Sevi, Imura.
O le “ʻaila” o se manu e pei o le ʻoti ae falala ona seu aemaise manu poʻa. O le “sevi” ma le “imura” o ituaiga o lenei lava manu. O le upu Peretania o le stag, gazelle and roebuck.
Iaena.
O se manulele e umi lona ua, e iai ona apaʻau ae e lē lele. O le upu Peretania o le ostrich.
Oseni.
O le manulele lapoʻa e ʻai i tino o manu ua mamate. O le upu Peretania o le vulture.
Oreva.
O se manulele uliuli. O le upu Peretania o le raven.
Matuu.
E taitutusa ma le kasita. O le upu Peretania o le heron.
Nesa.
O se manulele e uumi ona apaʻau. O le upu Peretania o le falcon.
Perese.
O se manulele e pei o le aeto. O le upu Peretania o le osprey.
Saape.
E tai pei o le gogo. O le upu Peretania o le gull.
Saleka.
O se manulele e faatifa ifo i le sami ina ia maua ni iʻa. O le upu Peretania o le cormorant.
Sefanai.
O se manu e pei o se rapiti e nofo i papa. O le upu Peretania o le rock badger.
Somera.
O le isi manu e pei o le ʻoti ae pupuu ona seu. O le upu Peretania o le chamois.
Tanisamiti.
O le manulele e masani ona ʻauʻau i le vai. O le upu Peretania o le swan.
Tisona.
O se manu e pei o le ʻoti ae e saʻō ma uumi ona seu. O le upu Peretania o le antelope.
Tukapiti.
O se manulele e pei o se lupe ae umī lona gutu. O le upu Peretania o le hoopoe.
Kasita.
O le manulele e uumi ona vae ma masani ona savali i vai. O le upu Peretania o le stork.
Kati.
O se manulele lapoʻa ae umī lona gutu. O le upu Peretania, o le pelican.
Kite.
O se manulele e pei o le aeto. O le upu Peretania o le glede.