Faafalepuipui Ona o lo Latou Faatuatua—Rusia

Ua matuā faileagaina ma sauāina Molimau a Ieova e tusa ai ma le talafaasolopito i Rusia. A o faagasolo le senituri lona 20, na matuā tetee le malo o Rusia i Molimau a Ieova, e ui lava o i latou o ni tagatānuu e tausia le filemu ma usitaʻia tulafono. O le naunautaʻiga sa iai i le malo o le Soviet Union, o le faamalosia o Molimau a Ieova ina ia mulimuli i aʻoaʻoga a le Soviet. Na faasā ona iai ni a latou Tusi Paia po o ni lomiga faalelotu. Na matuā mataʻituina i latou i taimi uma, ma sa tatau ona faia faalilolilo a latou sauniga. Pe afai na maua i latou, na sasaina ma faaopoopo le umi e faafalepuipuiina ai. Na faaaunuua e le malo le faitau afe o Molimau a Ieova i Siberia.

Ae na amata ona suia le tulaga o mea i le 1991, ina ua amanaʻia faaletulafono e le malo o Rusia Molimau a Ieova, ma tuu atu le saʻolotoga e tapuaʻi ai e aunoa ma le toe faalavelave atu o leoleo. Peitaʻi, e leʻi umi lenā vaitaimi o le filemu.

I le 2009, na amata ona toe faateteleina teteega ma faasāsāaga ina ua lagolagoina e le Faamasinoga Maualuga a Rusia le faaiʻuga a se isi faamasinoga maulalo ifo, ina ia faailogaina le faapotopotoga a Molimau a Ieova “o ni ē e faatupu faalavelave.” Ina ua mavae le tele o tausaga o faia faamasinoga, iā Aperila 2017, na aumaia ai le faaiʻuga a le Faamasinoga Maualuga a Rusia ina ia tapunia faalapotopotoga faaletulafono a Molimau a Ieova ona o tuuaʻiga sesē i le faia o ni gaoioiga faatupu faalavelave. O lea, na faoa faamalosi ai e leoleo a Rusia meatotino ma fanua e patino i le faalapotopotoga a Molimau a Ieova, tapunia nofoaga e faia ai a latou tapuaʻiga, ma faapea mai o a latou lomiga faalelotu “e faatupu faalavelave.”

E leʻi gata ai i meatotino ma fanua osofaʻiga a leoleo a Rusia. Na latou osofaʻia foʻi Molimau a Ieova taʻitoʻatasi. Na latou faapea mai e iai le sootaga o le tapuaʻi o le tagata i lona lava fale ma le faalapotopotoga lea ua faasāina. Pe a osofaʻia e leoleo fale o uso ma tuafāfine, e latou te matuā sauāina ma tuʻifesili i latou. E tusa lava po o le ā le matutua o uso ma tuafāfine, ae ua puʻea, faanofo vaavaaia i o latou fale pe i se isi nofoaga e faatali ai o latou faasalaga, molia, ma faafalepuipuiina i latou.

Talu ona faasā galuega a Molimau a Ieova iā Aperila 2017, ua faitau selau uso ma tuafāfine na taofia e faatali o latou faamasinoga po ua faafalepuipui foʻi, ona o moliaga o le faia o gaoioiga faatupu faalavelave. E oo mai iā Iuni 17, 2025, ua toʻa 160 Molimau a Ieova ua faafalepuipuiina.

Matuā Tetee Tagata i Sauāga Ogaoga a le Malo o Rusia i Molimau a Ieova

O loo faaauau pea ona molia e leoleo i Rusia Molimau a Ieova i le faia o gaoioiga faatupu faalavelave, e ui lava i le matuā tetee o tagata i le lalolagi aoao i sauāga o loo faia pea i Molimau a Ieova. Ua taʻusalaina le malo o Rusia e faamasinoga ma tagata mai i isi atunuu, o ē o loo malamalama i le tulaga o loo tupu, ona o lo latou sauāina pea o Molimau a Ieova.

Faamasinoga o Aiā Tatau i Europa: Iā Iuni 7, 2022, na faia ai e le Faamasinoga o Aiā Tatau i Europa se faaiʻuga tāua e faasaga iā Rusia, ona o lo latou sauāina o Molimau a Ieova (Taganrog LRO and Others v. Russia, nos. 32401/10 ma isi mataupu e 19). Na faailoa mai e le faamasinoga, o se solitulafono le faasāina e Rusia o Molimau a Ieova i le 2017. Na faatonuina Rusia, ia “taofia mataupu tau faamasinoga uma faasaga i Molimau a Ieova, ma faasaʻoloto Molimau a Ieova o loo faafalepuipuiina.” E lē gata i lea, na faatonuina foʻi Rusia ia toe faafoʻi mai a tatou meatotino uma na faoa faamalosi, pe totogi le silia ma le 60 miliona tālā Amerika. Na faatonuina foʻi i latou e totogi le silia ma le 3 miliona tālā Amerika i ē na faafalepuipuiina ae lē sala.

Le tusi mai le Failautusi Aoao o le Faalapotopotoga o le Fono a Europa: Iā Tesema 9, 2022, na tusi atu ai Marija Pejčinović Burić i le Minisita o Mataupu o le Vā i Fafo e faapea: “I le mataupu o le faamasinoga a Molimau a Ieova i Moscow ma Isi ma le mataupu a Krupko ma Isi, lea na soloia ai lenei faalapotopotoga faalotu ma faasā a latou galuega, taofia le faia o a latou sauniga filemu, ma le taofiofia o le saʻolotoga o nisi o a latou sui auai, ua matuā fautuaina ai e le Komiti le faigāmalo ina ia aveesea faasāsāaga i galuega uma a Molimau a Ieova, ma taofia faiga faasolitulafono uma o loo faia iā i latou.”

Faaiʻuga a le Komiti o Minisita o le Fono a Europa: I le fono a le Komiti o Minisita [CoM] iā Setema 2023, na latou mātauina ai “ma le popole le lē amanaʻia ma le loto i ai e pulega a Rusia o le faatonuga manino a le (Faamasinoga o Aiā Tatau i Europa) e pei ona faailoa mai i le Tulafono 46 o le Fono, ma le faaiʻuga a le Taganrog LRO and Others, aemaise lava le poloaʻiga e faasaʻoloto Molimau a Ieova o loo faafalepuipui.” Talu ai o le lē usitaʻia e Rusia o lenā faaiʻuga, ua filifili ai le Komiti o Minisita “e tuuina atu na mataupu i le Komiti o Aiā Tatau a Malo Aufaatasi, o le Working Group on Arbitrary Detention of the UN Human Rights Council, ma isi faalapotopotoga faavaomalo o loo taulimaina le mataupu i le sauāina o Molimau a Ieova i Rusia, ina ia faamautinoa e usitaʻia e Rusia aiāiga a le faamasinoga.”

Faataʻitaʻiga o Faaiʻuga Lē Talafeagai

Iā Mati 27, 2025, na molia ai e le Faamasinoga a le Aai o Konakovo i le Itumalo o Tver ni Molimau a Ieova se toʻafā: o Oleg Katamov, Aleksey Kuznetsov, Aleksandr Shchetinin, ma Aleksandr Starikov. O le ā la latou solitulafono? O le talatalanoa ma o latou tuaoi e faatatau i le Tusi Paia, ma faia a latou sauniga faalelotu. Na tuuina atu iā i latou ni faasalaga e taʻiono tausaga i le falepuipui, ma na ave saʻo i le falepuipui mai i le potu faamasino.
Iā Aperila 3, 2025, na molia Maksim Khamatshin e le Faamasinoga Faaitumalo a Sovetskiy a le Aai o Chelyabinsk ma tuuina atu le faasalaga e ono tausaga i le falepuipui. Na molia Maksim i le faia o sauniga faalelotu, ma na ave saʻo i le falepuipui mai i le potu faamasino.
Iā Me 30, 2025, na molia e le Faamasinoga Faaitumalo a Leninskiy a le Aai o Tambov se tamā e 60 tausaga lona matua, ma tuuina atu i ai le faasalaga e ono tausaga i le falepuipui. E toʻalua le fanau teine a Oleg, ma o le igoa o lana avā o Nataliya. Na fetaiaʻi lenei tamā ma tulaga faigatā ina ua suʻesuʻeina e leoleo lo latou fale i Tambov iā Setema 2021. Na tuuaʻia o ia i le faamaopoopoina ma le auai i sauniga faalelotu a Molimau a Ieova, lea e vaai i ai le malo e tutusa ma le faaauilumaina o gaoioiga a se faalapotopotoga faatupu faalavelave. Na ave saʻo o ia i le falepuipui mai i le potu faamasino.

Faaauau Taumafaiga e Taofia Faasalaga Lē Tonu

Ua matuā mafatia Molimau a Ieova i le lalolagi aoao ona o le matuā faileagaina e Rusia o o latou uso talitonu. E faitau miliona Molimau a Ieova i le lalolagi aoao na lafoina atu tusi i tagata maualuluga o le malo o Rusia, ma talosaga atu ai mo o latou uso tapuaʻi o loo faafalepuipuiina. Na faaulu e lōia o loo tutū mo Molimau ua faafalepuipuiina talosaga apili i so o se faamasinoga i Rusia, ma o le tele o na talosaga na faaulu atu i le Faamasinoga o Aiā Tatau i Europa. Na faaulu foʻi e Molimau a Ieova a latou tagi i le Komiti mo Aiā Tatau a Tagata i le Malo Aufaatasi, ma le UN Working Group on Arbitrary Detention, ma tuuina atu foʻi ni lipoti i faalapotopotoga faavaomalo e mataʻituina i latou e lē o amanaʻiaina aiā tatau a tagata. E faaauau pea ona faaaogā e Molimau a Ieova na auala ina ia taumafai ai e iloa e tagata mafatiaga o loo fesagaʻia e o latou uso talitonu i Rusia, ina ia faamuta ai nei sauāga ogaoga.

Talaaga o Sē na Faafalepuipui Ona o Lona Lotofuatiaifo

Anatoliy Marunov

Na suʻesuʻeina, taofia, ma faafalepuipuiina Anatoliy Marunov iā Oketopa 2021. O ia o se tasi o Molimau a Ieova i Moscow, ma o se tagata filemu. Ua tele tausaga talu ona faaipoipo, ma o se faaaʻoaʻoga lelei o se tamā tausi aiga, ae na faafuaseʻi ona tuuaʻia o ia i le faaauilumaina o galuega a se faalapotopotoga faatupu faalavelave.

Na fanau Anatoliy iā Novema 1953 i le aai o Izmail (Ukraine), ma e leai ni ona uso po o ni tuafāfine. A o auai i le aʻoga, na ia fausia ni vaa faataʻitaʻi, ma na auai foʻi i se aʻoga musika. E tele tausaga o nonofo lona aiga i Tallinn (Estonia).

Ina ua uma le auaunaga faavaegaʻau a Anatoliy, na siitia atu i Moscow e faaauau ai ana aʻoaʻoga. Ina ua uma le tolu tausaga i le Iunivesite, na tatau ona nofo ma le aʻoga ina ia tausia lona aiga. E toetoe 40 tausaga o faigaluega Anatoliy i le Krasnaya Zvezda, o le nusipepa aloaʻia a le Russian Federation Ministry of Defense. Na aofia ai i ana matafaioi le auala e faatulaga lelei ai upu ma ata o le nusipepa. Ua litaea nei o ia, ma e fiafia e fai galuega inisinia mo taavale i ona taimi avanoa.

A o auai Anatoliy i le aʻoga i Moscow, na la feiloaʻi ai ma Alevtina. Na la faaipoipo i le 1975 ma e toʻalua le la fanau tama. O Alevtina o se tagata e fiafia i lotu, ma e leʻi umi ae amata ona ia suʻesuʻeina le Tusi Paia ma Molimau a Ieova. Na papatiso i le 1994, ae na papatiso Anatoliy i le 1999. Na maofa o ia i le lē feteenaʻi o manatu o le Tusi Paia, ma le vaai i le faataunuuga o nisi valoaga.

O le faafalepuipuiina o le uso o Anatoliy ua suia atoa ai le tulaga o lo latou aiga. O loo tuli lona faasalaga e ono ma le ʻafa tausaga, ma o le a faasaʻoloto iā Iulai 2028.

Mea na Tutupu

Iuni 17, 2025

E toʻa 160 Molimau ua faafalepuipuiina.
Mati 6, 2025

Na faailoa mai e le Faamasinoga o Aiā Tatau i Europa (ECHR) la latou faaiʻuga i le faamasinoga o Loginov and Others v. Russia, ma na faapea mai na solia e Rusia aiā tatau a ni tane Molimau a Ieova se toʻaiva, o ē na taofia i se auala faasolitulafono (o le toʻafitu o i latou na sauāina) ina ua uma ona osofaʻia o latou fale i Surgut iā Fepuari 15, 2019.
Oketopa 24, 2023

Na faalauiloa mai e le Komiti mo Aiā Tatau a Tagata i le Malo Aufaatasi (CCPR) i la latou faaiʻuga ni manatu se lua e faatatau i le mataupu e aofia ai faalapotopotoga tau tapuaʻiga o Elista ma Abinsk. I na mataupu e lua, na faailoa mai ai e le CCPR le solia e Rusia o aiā tatau a Molimau e tusa ai ma le Tulafono 18.1 (“aiā tatau e saʻoloto ai e faaali manatu, lotofuatiaifo, ma tapuaʻiga”) ma le Tulafono 22.1 (“o le aiā e saʻoloto ai e faapotopoto faatasi”) a le International Covenant on Civil and Political Rights. Na faamaonia foʻi e na faaiʻuga, le leai o ni mataupu e faaosofia ai le ita ma faiga sauā i a latou lomiga faalelotu.
Iuni 7, 2022

Na faia e le Faamasinoga o Aiā Tatau i Europa (ECHR), Taganrog LRO and Others v. Russia se faaiʻuga iloga e taʻusalaina ai Rusia ona o lo latou sauāina o Molimau a Ieova.
Ianuari 12, 2022

Ua faaopoopo e le Matagaluega o Faamasinoga a Rusia le polokalame o le JW Library i le Lisi o Mea e Lagolagoina ai Faiga Faatupu Faalavelave. O le taimi muamua, ma e na o le pau foʻi lea o le polokalame ua faasā e Rusia, ona e manatu i ai o loo lagolagoina ai faiga faatupu faalavelave.
Setema 27, 2021

Na teena ai e le Faamasinoga a le Aai o Saint Petersburg le apili e faatatau i la latou faaiʻuga na faia iā Mati 31, 2021, lea na faasilasila aloaʻia ai o le polokalame o le JW Library o se meafaigaluega a tagata faatupu faalavelave, ma faasā ai loa ona toe faaaogāina i le atunuu atoa o Rusia ma Crimea. Na faataunuuina le iʻuga a le faamasinoga i le aso lava na faia ai.
Aperila 26, 2019

E manatu le UN Working Group on Arbitrary Detention ua lē amanaʻiaina aiā tatau a Dmitriy Mikhailov, ma faitioina ai le sauāina e Rusia o Molimau a Ieova.
Aperila 20, 2017

Na aumaia le faaiʻuga o le Faamasinoga Maualuga a Rusia e taofia ai galuega o le ofisa a Molimau a Ieova ma ana faalapotopotoga e 395.