Le Manatu o le Tusi Paia
Pe e Tatau Ona Faaeseese Taʻitaʻi Lotu ma le ʻAulotu?
Afioga Mamalu, Tamā, Tamā Paia, Rapi, Afioga Paia, Le Faafeagaiga, Tamā Sili Ona Paia—o nisi nei o faalagilagiga e faaeseese ai taʻitaʻi lotu mai i le ʻaulotu. O le tele o lotu ua taatele ai le faaeseese o faifeʻau mai i ʻaulotu, ae pe e mai i le Atua lenei faatulagaga, po o ni tū ma aga ua faia e tagata? Ae sili ona tāua, pe faamaonia e le Atua lea tulaga?
NA TUSI le polofesa faalelotu o Cletus Wessels e faapea: “I le Feagaiga Fou ma i le taimi o uluaʻi aposetolo, e leʻi taʻua ai ni taʻitaʻi lotu ma ni ʻaulotu.” Ua faapea mai le Encyclopedia of Christianity: “Na tuputupu aʻe malie se faaeseesega o taʻitaʻi lotu e avea ma ē umia tofi, ma ʻaulotu . . . o ē e ‘lē agavaa’ ma e lē iloa le Atua.” Na salalau atu lea faiga i le senituri lona tolu T.A., ae ua sili atu i le luaselau tausaga ina ua mavae le taimi o Iesu Keriso!
E tusa ai ma le faatulagaga a aposetolo o Iesu ma isi uluaʻi Kerisiano, pe e sesē le faaeseese o taʻitaʻi lotu ma le ʻaulotu? E tusa ai ma le Tusi Paia, e sesē. Seʻi iloilo pe aiseā.
“O le ʻAuuso Uma Outou”
Ua faapea mai le Tusi Paia, o Kerisiano uma, o auauna a le Atua ma e leai se isi e sili aʻe pe maulalo ifo i le isi. (2 Korinito 3:5, 6) Na faapea mai se tusitala faalelotu o Alexandre Faivre: “Na maumauaʻi [Kerisiano anamua] ia leai se faaeseesega o tulaga.” Ua ōgatusa lenā tulaga ma upu a Iesu i ona soo: “O le ʻauuso uma outou.”—Mataio 23:8.
O lea, sa auauna tane e taʻumatuaina faaleagaga o ni ovasia, e aofia ai le avea ma leoleo mamoe ma faiaʻoga faaleagaga. (Galuega 20:28) Ae e lē o i latou o ni faifeʻau na maua ni totogi. O le toʻatele lava o i latou o ni tane faigaluega, ma e iai aiga ma fanau. E lē gata i lea, na mafai ona agavaa e avea ma toeaina ona o lo latou suʻesuʻe maelega i le Afioga a le Atua, ma atiaʻe uiga e manaʻomia e le Atua, ae lē o le aʻoʻoga i se aʻoga faafaifeʻau. Ua aofia ai i nei uiga le ‘pulea o le amio, e mafaufau lelei, e fai mea maopoopo, e talimālō, ma e agavaa e aʻoaʻo atu, e magafagafa, e lē faatupu vevesi, e lē o sē e manaʻo tele i tupe, o se tane e pule lelei i lona lava aiga.’—1 Timoteo 3:1-7.
Le Pogai e Lelei ai le Mulimuli i le Tusi Paia
“Aua tou te faia mea e sili atu nai lo o mea ua tusia.” (1 Korinito 4:6) E leaga le lē amanaʻia o taʻitaʻiga a le Atua o loo i le Tusi Paia, ona e faaleagaina ai la latou faiā ma Ieova, ma o le mea lenā ua tupu ona o le faaeseese o faifeʻau ma ʻaulotu. I le ā le itu? O manatu nei e ono o le a iloiloina.
1. Pe a faaeseese faifeʻau ma ʻaulotu, ua foliga mai ua faapitoa ona valaauina i latou e auauna i le Atua. Ae, e tusa ai ma le Tusi Paia, e ao i Kerisiano moni uma ona auauna i le Atua ma viia lona suafa. (Roma 10:9, 10) O le masani a Molimau a Ieova, ina ia avea se tane Kerisiano ma auauna i le faapotopotoga, e faalaeiauina i latou ia aapa atu mo lea faaeaga.—1 Timoteo 3:1.
2. Ua manino mai i faalupega ua ave i faifeʻau, le faaeaea ai o o latou tulaga. Ae na fetalai Iesu: “O lē e fai o ia lava ma tagata faatauvaa iā te outou uma, e sili lava o ia.” (Luka 9:48) E tusa ma lenā uiga lotomaulalo, na taʻu atu e Iesu i ona soo, e aua le faia ni o latou faalupega faalelotu.—Mataio 23:8-12.
3. E mamafa le avega tautupe e amoina e le ʻaulotu ona o le totogiina o faifeʻau, aemaise pe afai e tele o latou manaʻoga. Peitaʻi, o toeaina Kerisiano, e faigaluega ina ia tausi ai o latou manaʻoga faaletino, ma avea ai ma faaaʻoaʻoga lelei i isi.a—Galuega 18:1-3; 20:33, 34; 2 Tesalonia 3:7-10.
4. O le faalagolago o faifeʻau i isi e lagolagoina i latou tautupe, atonu e uunaʻia ai i latou e lauga atu na o upu o le Tusi Paia e fia faalogo i ai le ʻaulotu. O le mea tonu lea na valoia e le Tusi Paia. “Auā e iai le taimi e latou te lē toe taliaina ai aʻoaʻoga aogā, ae e tusa ai ma o latou lava tuʻinanauga, e latou te aoaoina aʻoaʻo mo i latou ina ia faalogo o latou taliga i mea e logolelei iā i latou lava.”—2 Timoteo 4:3.
5. Ua avea le faaeseese o faifeʻau ma ʻaulotu ma mea e latou te ola faalagolago ai i le faifeʻau mo mea faaleagaga ae tau lava o le auai i le lotu i vaiaso taʻitasi. Peitaʻi, e tatau i Kerisiano uma ona naunau i mea faaleagaga ma toʻaʻaga e suʻesuʻe le Tusi Paia.—Mataio 4:4; 5:3.
6. Pe afai e lē o malamalama le ʻaulotu i mea o loo fai mai ai le Tusi Paia, e faigofie lava ona faasesēina ma lē faia lelei i latou e faifeʻau. Ua tele mea faapena ua tutupu i le faagasologa mai o tausaga.b—Galuega 20:29, 30.
Ona o lo latou mulimulituʻi i le Tusi Paia, e leai ni faifeʻau totogi a Molimau a Ieova, ae ua iai ni tane e leoleo ma aʻoaʻoina ma le fiafia le lafu mamoe a le Atua e aunoa ma se totogi. E lelei pe a e auai atu i se Maota mo Sauniga i lou vaipanoa ona e iloa ai lea.
[Faaopoopoga i lalo]
a I le uluaʻi senituri, o nisi ovasia femalagaaʻi na tausia, pe “ola e tusa ai ma le tala lelei,” ona na latou talia le talimālō ma foaʻi agaalofa a le ʻauuso.—1 Korinito 9:14.
b O ni faataʻitaʻiga, o le totogi o patele e tatalo mo le faamagaloga, faamasinoga sauā a le Lotu Pope, ma le susunuina e faifeʻau o Tusi Paia ona e lē mananaʻo e faitau i ai a latou ʻaulotu.—Tagaʻi i Le Olomatamata o Novema 15, 2002, itulau e 27.
PO O E TAUMĀNATU EA I NISI TAIMI?
◼ I tagata o le Atua, o le ā le vaaiga e ao ona vaai ai le tasi i le isi?—Mataio 23:8.
◼ E faapefea ona agavaa tane Kerisiano e auauna o ni toeaina i le faapotopotoga?—1 Timoteo 3:1-7.
◼ Aiseā e lē faamaonia ai e le Atua le faaeseese o faifeʻau ma ʻaulotu?—1 Korinito 4:6.
[Faamatalaga faaopoopo i le itulau 31]
E lē pei Iesu o faifeʻau, ona na avea o ia ma “tagata faatauvaa”