Pe e Mafai e Lotu Ona Autasia Tagata?

AFAI o lotu le māfuaaga autū o fetauaʻiga, o lona uiga la, o le a faaitiitia taua pe a leai ni lotu. Pe e moni lenā manatu? Po o le tafiesea o lotu o le a muta ai le fetauaʻi? O le mea moni lava ia: E lē o mafai e lotu ona autasia tagata. Seʻi iloilo ni māfuaaga e moni ai lenei manatu.

Fevaevaeaʻi Ona o Lotu

Ua fevaevaeaʻi tagata talu ai lotu ma o loo feteenaʻi pea lotu autū. Faamata e iai se māfuaaga e talitonu ai, e iai se taimi e autasi ai i le filemu ia lotu Musalimi, Puta, Siū, Hinitū, ma Kerisiano?

O le mea e leaga ai, o le tele o nei fevaevaeaʻiga, e i totonu lava o lotu autū. O se faataʻitaʻiga, e sili atu i le 30,000 vaega ua vaevaeina i ai lotu ua faapea mai o Kerisiano. E fevaevaeaʻi foʻi le lotu Isalama, ona o le feteenaʻi o o latou talitonuga. Na fai mai se faalapotopotoga o tala fou i Sasaʻe Tutotonu, e leʻi leva talu ona taʻua e Mohsen Hojjat, o sē e aloaʻia i le lotu Musalimi e faapea, “o le māfuaaga autū o faafitauli i atunuu e lotu Musalimi, ona e eseese o latou talitonuga.” Ua faapena foʻi ona fevaevaeaʻi lotu autū e iai le lotu Puta, Hinitū, ma le lotu Iutaia.

Aiā o Lotu i Upufai a Malo

E toetoe lava o vala uma o le olaga e aafia i faiga faalotu. Na taʻua i le mekasini The Economist, “i vala uma o le olaga e aofia ai ma pisinisi, ua saʻoloto tagata lotu e faailoa mai o latou manatu. Ua aafia foʻi filifiliga i mea tau tupe ona o lotu.” Ua atili fevaevaeaʻi ai tagata ae lē autasi. Ae o le aafiaga e sili ona leaga, o le talaaga umi o lotu i le aiā fua i mataupufai o malo.

I se lipoti lata mai e pei ona taʻua i le mataupu faatoʻā uma atu, na mātauina ai e ni tagata suʻesuʻe o talafaasolopito e faapea, “e foliga mai e māfua taua pe a faifaimea faatasi lotu ma malo.” Ma o le isi mea moni: E mai lava i le amataga e oo mai i le taimi nei, o lea lava e faifaimea faatasi lotu, malo ma vaegaau.

O se Māfuaaga e Tutupu ai Taua

I le tele o atunuu, ua avea lotu autū ma pogai o le lotonuu ma le faailogalanu. O le iʻuga, ua tele ai le feitagaʻi i le va o ituaiga o tagata ma atunuu. O lea, ua faigofie ai ona tutupu taua ma lē maua ai se toʻafilemu.

O se mea e faigatā ona malamalama i ai, ona o loo faapea mai le tele o lotu, o i latou o sui vaaia o le Atua. Pe faamata e iai se vaega a Lē e ona le malosi uma lava, o lē e atamai ma alofa, i lotu e fevaevaeaʻi ma faamasaatoto?

[Ata i le itulau 6]

E faitau afe Molimau a Ieova ua faafalepuipuiina ona o lo latou solitū