Maʻi Gugu—Māfuaaga ma Aafiaga Leaga
O LE gugu o se maʻi masani o sooga o ponaivi ma e matuā tigā tele. Ua taʻua i le tusi Arthritis: “E māfua le maʻi o le gugu ona o le lē lelei o le faagasologa o le uric acid i totonu o le tino, ma ua faaputuputu le suāvai lea e faamāseesee ai le sooga o ponaivi (synovial fluid), . . . aemaise lava i le vaematua.”
O le uric acid, o se vaega o meaʻai e lē o toe manaʻomia i le tino ae ua salalau solo i alātoto, ona ua lē mafai ona vaevaeina mea e taʻu o purines. Pe a faaputuputu le uric acid ona ua lē alu le feʻauvai, ona tupu aʻe lea o mea e tai pei o ni nila, ia e taʻu o crystals. O sooga o ponaivi o le vaematua e masani lava ona aafia e ui e ono aafia foʻi nisi sooga o ponaivi. E ono fula sooga o ponaivi ma e tigā tele pe a paʻi i ai se isi.a Ua faapea mai Alfred, o sē e maua i le gugu, “E oo lava i sina tamaʻi paʻi i ai, e matuā lē mafai ona tatali le tigā.”
Na taʻua i se lomiga a le Arthritis Australia, “pe afai e lē togafitia le gugu, e atoa le vaiaso o tigāina. Ae a togafitia, atonu o le a lē toe aliaʻe mai mo ni masina po o ni tausaga. Ae a lē togafitia lelei, o le a oso soo ma sili atu ona tigā ma avea ma maʻi tumau.”
E faigofie ona togafitia le gugu. E masani ona faaaogā ai fualaau e pei o le nonsteroidal, anti-infammatory, ae afai e tigāina tele, ona faaaogā lea o le allopurinol, lea e fesoasoani e taofiofia le faatupulaʻia o le uric acid. Pe e mafai ona taofia le toe aafia i le gugu? E mafai pe afai e nofouta ma magafagafa i māfuaaga.
Māfuaaga e Toe Aliaʻe Ai
O le māfuaaga autū ona o le matua o tausaga, itupā, ma sela e faasolo i le toto. Ua taʻua i nisi faamaumauga e silia i le 50 pasene e aafia i le gugu ona o se maʻi e faasolo i le aiga. Na faapea mai Alfred na taʻua muamua, “E maua uma loʻu tamā ma le tamā o loʻu tamā i le gugu.” E faatolu i le faafā taimi e sili atu ai tamāloloa e i le va o le 40 ma le 50 tausaga e aafia ai, nai lo o fafine, ia e seāseā ona aafia a o leʻi oo i le taimi ua lē toe alu ai o latou maʻi masina (menopause).
Tino puta ma meaʻai: Ua taʻua i le Encyclopedia of Human Nutrition: “Ina ia taofia le toe aliaʻe o le gugu, e lē o toe faamamafaina le taofia o le taumafaina o meaʻai e tele ai le purine. Ae ia togafitia faamaʻi e pei o le tino puta, insulin resistance syndrome ma le ova o le gaʻo i alātoto, lea e māfua ai le gugu.”
E ui i lea, ua fautuaina foʻi e nisi fomaʻi le faaitiitia o meaʻai o loo tele ai le purines, e pei o meaʻai e ave ai mea faafefete, ituaiga o iʻa ma le tele o aano o manu fasi.b
ʻAva malosi: O le soona taumafaina o le ʻava malosi, e faatuputeleina ai le uric acid i le tino.
Soifua mālōlōina: E tusa ai ma faamatalaga mai i le Mayo Clinic i le Iunaite Setete, e māfua le gugu ona o le tulaga tau soifua mālōlōina, e aofia ai le “lē togafitia o le toto maualuga (hypertension), ma gasegase faaumiumi e pei o le suka, maualuga o le gaʻo i le toto (hyperlipidemia), ma le vaiti o alātoto (arteriosclerosis).” E fesootaʻi atu foʻi i se “maʻi faafuaseʻi po o se manuʻa tugā, po o le lē gaoioi ona o le umi ona taoto,” faapea le maʻi o fatugaʻo. E masani ona aafia le vaematua ona e vaivai le taamilosaga o le toto ma maualalo le vevela—o mea na e lua e mafai ona faatupuina ai le uric acid.
Vailaau ma fualaau faafomaʻi: O mea nei e atili ai ona oso le maʻi gugu, e aofia ai thiazide diuretics (o fualaau e aveesea ai le vai mai i le tino o le tagata, lea e masani ona togafitia ai le toto maualuga), aspirin e lē malolosi tele, ma fualaau ina ia talia ai e le tino totoga fou e sui atu i ai (transplant), ma fualaau e faaaogā i le togafitiga e taʻu o le chemotherapy.
Auala e Lima e Faaitiitia ai le Toe Tupu
Talu ai o le gugu e fesootaʻi atu i mea e faaaogā e tagata mo le soifuaga, o fautuaga o loo mulimuli mai e ono fesoasoani i ē o loo aafia ina ia ʻalofia ai le toe tupu.c
1. Talu ai o le maʻi gugu e māfua mai i le auala e faagaoioi ai e le tino meaʻai o loo taumafaina e le tagata, e tatau la ona taumafai e faatumau se tino soifua mālōlōina lelei, ma faaitiitia meaʻai e tele ai le suka. O le tagata e ova le lapoʻa, ua faaopoopo atili ai le mamafa o le avega o sooga o ponaivi.
2. Ia faaeteete le soona tipi o le ʻai, ona e ono faatuputeleina ai le uric acid i le toto.
3. ʻAlofia le soona taumafa i aano o manu fasi. Ua fautuaina e nisi ia lava le ono aunese (170 kalama) o aano o manufasi e aofia ai moa ma iʻa i le aso.
4. Ia fuafua lelei le taumafaina o le ʻava malosi. Pe afai e oso le gugu, ia aua neʻi toe inuina se ʻava malosi.
5. Ia toʻaga e inu vai. E fesoasoani e faaliu suāvai ai le uric acid, ma faigofie ona aveese mai i le tino.d
O auala ua taʻua i luga ua faamanatu mai ai le fautuaga a le Tusi Paia ia ʻpulea le amio’ ma aua le “inu tele i le uaina.” (1 Timoteo 3:2, 8, 11) Ua silafia lelei e Lē na faia i tatou mea e mo lo tatou lelei.
[Faaopoopoga i lalo]
a O le faailoga foʻi lenā pe a faaputuputu le calcium pyrophosphate crystals i sooga o ponaivi, aemaise i uaua e pipii i le ponaivi. Peitaʻi, o le ituaiga o gugu lenā e taʻu o le pseudogout, e ese lona togafitiga mai i isi gugu.
b E tusa ai ma le mataupu sa lomia i le tusi Australian Doctor, o le taumafaina o pulouaitu ma fualaau ʻaina e tele ai le purine e pei o pi, lentils, spinach ma le cauliflower, “e lē o faamaonia o le pogai lea o āuga mataʻutia o le gugu.”
c O lenei mataupu e lē o faatulaga atu o ni taʻiala faafomaʻi. E ono eseese togafitiga e manaʻomia e tagata taʻitoʻatasi e aafia i le gugu. E lē tatau foʻi ona taofia le inuina o fualaau ua fautuaina e fomaʻi, pe matuā suia ana meataumafa e aunoa ma le faafesootaʻia muamua o lana fomaʻi.
d E faavae mai nei faamatalaga i fautuaga mai i le Mayo Foundation for Medical Education and Research.
[Siata/Ata i le itulau 28]
(Tagaʻi i le lomiga mo le ata atoa)
Sooga o ponaivi ua fulafula
Synovium
[Ata i le itulau 28]
Accumulated uric acid crystals